1. Ninawodhe dhavi oliba mwetemwene? (2 Timóteo 4:5)

 NIGAPATTIWA makattamiho, weddeyena wehu na Yehova vina nikuru naye onodhaga wehiwa. Eji egapadduwa, txini enfwanyelihu okosa? Ninofwanyela oliba mwetemwene, okala txenjewa vina ‘nivikome munroromeloni.’ (Kengesa 2 Timóteo 4:5.) Iyo ninele owodha oliba mwetemwene nigang’anela dhubuwelo dhehu vina nigavilibihedha woona dhilobodha ninga munoonela Yehova. Nigakosa dhawene kaninattiye makattamiho weddiha dhubuwelo dhehu.

2. Txini enasunzihu mwari mwa nsunzo ntti?

² Nsunzo nivirile nihoona dhoweha ttaru dhiniteya otakulu wa mulogo. Mwari mwa nsunzo ntti, ninele woona makattamiho mararu aniteya mmulogoni aneha weddeyana wehu na Yehova. (1) Akala ninubuwela wi abali kaneddihile pama, (2) nigalagiwaga vina (3) akala ninorutxiwa orumela matxinjo aniteya munikuruni. Nigapattiwa dhoweha ninga esi txini enfwanyelihu okosa wi nilibe mwetemwene vina nihittiye weddeyana wehu na Yehova vina nikuru naye?

3. Txini egadhile opadduwa akala ninubuwela wi mbali kaneddihile pama?

³ Wahiromaga osilidhiwa sabwa ya elobo ekosile mbali obe munddimuwa wa mulogo? Akala ejo epadduwa, iyene txino kana efunelo ya wunyimula. (Rom. 3:23; Tia. 3:2) Txino eji yahusilidha, bufiyedha oyelela tturho sabwa ya ejuwene. Vina wanvivuza, ‘Akala mbali onokosa elobo ninga ejile, ntti txibarene nikuru na Mulugu?’ Satana onfuna wi iyo nubuwelege dhawene. (2 Kor. 2:11) Mbwenye nigobuwela dhawene ninodhaga ottiya omulabela Yehova vina onyanyala nikuru  naye. Akala ninubuwela wi mbali obe murogora kaneddihile pama txini enfwanyelihu okosa wi nilibe mwetemwene vina nirabele dhubuwelo dhohifwanyela?

4. José owodhile dhavi oliba mwetemwene masiki veddihiwiye n’ohifwanyela, nanda eji ennisunziha nni? (Wita 50:19-21)

⁴ Kumukanele muttu ya mmurimani. José bali muzombwe, abalaye kamweddihile pama. Oku abalaye ena afuna ampe. (Wita 37:4, 18-22) Omamalelowa ahimuguliha ninga mudhari. Edhile opadduwa José wahigumanana dhoweha dhinjene mwari mwa vyaka 13. Txino José agahidha wubuwela dhahi akala Yehova onoddikwela-wene, iyene oddinyanyaleli nni mudhidhi obu worutxa onveda miyo nikamihedho naye. Mbwenye José kattiyile wi makattamiho aba amuttukulele okala muttu worutxa. Ottiya ejo iyene wahiliba mmakattamihoni otene vina wali ofwaseyene. Vaniyena ofuru wowawihedha ntxiga abalaye iyene wahalagiha okwela vina wahalevelela. (Wita 45:4, 5) José owodhile okosa ejene sabwani wannubuwela pama. Ottiya ozuzumela wang’ana makattamiho ampattile, iyene wantanaalela makattamihoya pama vina wazuzumela okosa—efunelo ya Yehova. (Kengesa Wita 50:19-21.) Eji ennisunziha nni? Akala mbali kauweddihile pama, kunpwattelihe Yehova muladdu vina kuwubuwele wi iyene ohunyanyala. Ottiya ejo, otanaalele nikamihedho ninuvaha iyene wi owodhe ovilela makattamihoya. Akala attu ena kanuweddiha pama kaalevelele, kudduwale wi okwela onottimiha dhottega dhinji.—1 Ped. 4:8.

5. Miqueas owodhile dhavi ovilela mudhidhi wanyimuwiliye?

⁵ Koona empadduweli munddimuwa wa mulogo onkuweliwa Miqueas b onkala o América do Sul. Abali ena ana ettomo mmulogoni ahikosa elobo yamunyimulile. Iyene ohiloga dhahi: “Okalawo waga wetene txipo kaddinasilidhiwaga dhahene, miyo ddakala wokubanyene kaddawodha ottidda tturho na mattiyu ddannunla sabwani kaddaziwa yokosa.” Masiki dhawene, Miqueas ohiwodha oliba mwetemwene vina ohivilibihedha wang’anela dhubuwelo dhaye. Iyene owodhile dhavi? Wannimuloba Yehova mudhidhi wotene muya wokoddela wi awodhe ovilela. Iyene vina ohipepesa mapublikasau ehu agawodhile omukamihedha. Eji ennisunziha nni? Akala mbali ologa obe okosa elobo yunyimulile, kakurumuwa vina kavilibihedhe orabela dhubuwelo dhabure. Txino ekalawo elobo epadduwile mwigumini ya mbaliya ehinziwa weyo emuttukuleli okosa ejuwene. Nona kamulobelele Yehova, wi awukamihedhe ozinddiyele moonelo wa muttu mwina mwaha wa makaniya. Ogakosa dhawene enele okala yovevuwa omulevelela vina ohubuwela wi mbaliya olofuna wunyimula. (Gano 19:11) Kudduwale, Yehova onoziwa pama makattamiho angumanana weyo iyene onele wuvaha guru wi owodhe ovilela.—2 Map. 16:9; Koh. 5:8.

6. Nigalagiwa na Yehova, ninfwanyelela nni woona ninga marhe onitonyihedha okwela waye? (Ahebreu 12:5, 6, 11)

⁶ Nigalagiwaga na Yehova ninokubanya vaddiddi. Mbwenye nigazuzumeletxa eniwamo iyo, ninodhaga oroma wubuwela wi kanilagiwe n’ofwanyelela, nlagona kaninddipatta vina nihittabwa. Nigakosa ejuwene ninodhaga odduwala elobo yamakamaka—olagiwa marhe onnitonyihedha Yehova okwela waye. (Kengesa Ahebreu 12:5, 6, 11.) Nigattiya wi dhubuwelo dhohikala dhineddihe, ninele onvaha Satana ofuru wa onilupela. Iyene onfuna wi nihirumeele olagiwa,  vang’ono-vang’ono nittiye omulabela Yehova vina ninyanyale nikuru naye. Nona ogalagiwa, txini enfwanyeliwe okosa wi okalevi wolibene?

7. (a) Ninga munlagiha foto, Yehova omulabihedhile dhavi Pedro murumeeleliye olagiwa? (b) Osunzile nni na yotagiha ya Pedro?

⁷ Orumele olagiwa vina okose matxinjo. Yezu wanimusisigula Pedro dila dhinjene vari va arumiwi ena. (Mk. 8:33; Lk. 22:31-34) Pedro wantoteya manyazo. Masiki dhawene, kattiyile weddeyana waye na Yezu. Wanrumeela olagiwa vina wantxinuwa sabwa ya dhovonya dhaye. Nona Yehova wahiruriha weddeyana wa Pedro vina wahimukuluvelana mabasa amakamaka mmulogoni. (Jo. 21:15-17; Mer. 10:24-33; 1 Ped. 1:1) Txini ensunzihu na yotagiha ya Pedro? Kanizuzumele wang’ana manyazo atoteyilehu, nirumeele olagiwa vina nikosa matxinjo anfuneya. Nigakosa dhawene, Yehova onele onilabihedha venjene vina abalihu.

8-9. Valagiwe Bernardo, vamaromo ewilemo dhavi, nanda txini emukamihedhile otxinja mubuwelo waye?

⁸ Koona empadduweli Bernardo mbali wa elabo ya Moçambique. Iyene wahiyelela ettomo ya okala munddiwa wa mulogo. Vamaromo wewilemo dhavi? Bernardo ohiloga dhahi, “Miyo ddahisilidhiwa sabwani kaddaziveliwe olagiwawa.” Iyene wahizuzuma na ejile y’obuwela abali sabwa ya iyene. Ohiloga wi, “Dhihivira myeri dhing’onovi wi ddiwodhe okana moonelo wofwanyelela sabwa ya olagiwa, vina wiyelela omukuluvela Yehova na nikuru naye.” Txini emukamihedhile Bernardo otxinja mubuwelo waye?

⁹ Bernardo wahitxinja mubuwelo waye. Iyene ohiloga dhahi: “Mudhidhi wali miyo munddimuwa wa mulogo, ddanawengesela ena Ahebreu 12:7 wi ddakamihedhena okana moonelo wapama sabwa ya olagiwa. Venevo ddanvivuza, ‘Bani onfuniwana ovirihamo nlebo ntti?’ Alabeli otene a Yehova—miyo vina.” Vasogorhova Bernardo wahikosa matxinjo mena wi awodhe wiyelela omukuluvela Yehova na nikuru Naye. Iyene wanimwengesa Bibilia dila dhinjene vina otanalela, Bernardo walivi wozuzumene obuwelaga mukalelo wamoona abali na arogora, masiki dhawene wandhowa olaleya vina otugumana na abali. Mwa ovira wa mudhidhi Bernardo wahikala wili munddimuwa wa mulogo. Akala weyo dhahene ninga Bernardo, wile olagiwa, kuzuzumeletxe wang’ana manyazo atoteyile  weyo vina mubuwelo wawo, karumela olagiwa vina kakosa matxinjo anfuneya. c (Gano 8:33; 22:4) Ogakosa dhawene, onele okana nikuluvelo nawi Yehova onele wuttuvela sabwa ya weddeyena wawo na iyene vina nikuru naye.

10. Matxinjo gani agadhile weha weddeyena wa alobwana ena a Izrayel?

¹⁰ Matxinjo munikuruni na Yehova anoweha weddeyana wehu. Nigahikale txenjewa ninodha okala wolapela na Yehova. Motagiha, karoma otanalela mukalelo opattiwe ana Izrayel ena matxinjo. Awene ahinatti wakela Nlamulo na Mizé, amwazambo a ntakulu anttidda mabasa abuwene adhile ottomeliwa anamakutta. Awene ammaga dhibuwa wi amuddumeyele Yehova mukutto wa dhinama awirelaga amudhawa. (Wita 8:20, 21; 12:7; 26:25; 35:1, 6, 7; Job 1:5) Vetiwe Nlamulo na Mizé, amwazambo a ntakulu ayelela ettomo eji. Yehova wahiloga wi anamakutta anakuttege mikutto akale a ziza na Aroni. Mwiteyile matxinjo aba, mwazambo wa ntakulu wakutta mukutto ahili wa ziza na Aroni wampiwa. d (Onam. 17:3-6, 8, 9) Txino ba matxinjo-ene aba amuttukuleli Kora, Datani, Abirau vina anddimuwa ena 250 osadduwela ettomo yana Mizé na Aroni? (Oleb. 16:1-3) Kaninziwa. Kintanala mwahaya, Kora na alobwana ali na iyene ahittiya weddeyana na Yehova. Nona akala munikuruni na Yehova munowiteya matxinjo aneha weddeyana wehu txini enfwanyeliwe okosa?

11. Txini ensunzihu na akadda Kaati?

¹¹ Okamihedhe matxinjo-matxinjovi munikuruni na Yehova. Mudhidhi okalile ana Izrayel mwiddeddereni akadda Kaati ahittomeliwa mabasa a vawoka. Dila dhotene dhattimurha ana Izrayel bagadhowa mburo mwina, akadda Kaati battukula yobo mwali dha nipagano na Nabuya. (Oleb. 3:29, 31; 10:33; Jos. 3:2-4) Eji yali gari enddimuwa! Mbwenye mumalile ana Izrayel ovolowa Elabo Yolibeliwa vahiteya matxinjo. Kiyali yofuneya omwaliha mudhidhi na mudhidhi yobo mwali dha nipagano na Yehova. Nsaka nalamulela mwene Salomau, akadda Kaati ena ahittomeliwa wiba, ena ali ang’aneli a vamusuwo oku ena attomeliwe okoya muhaku vina dhattima dhaleveliwa Mulugu. (1 Map. 6:17-18 [1 Map. 6:31-33, Tradução do Novo Mundo]; 1 Map. 26:1, 24) Kuli epaddi ya Bibilia enloga wi akadda Kaati anrogela mabasa obe antamela ettomo yina sabwa yawi vamaromo anttukula yobo mwali dha nipagano na Nabuya. Eji ennisunziha nni? Nikuru na Yehova nigakosa matxinjo nikamihedhe na murima wotene, masiki akala anopatta mabasa attomeliwihu. Japama wagalala na mabasa-mabasavi anttomeliwihu. Kudduwale wi ttima ena iyo vamentoni va Yehova kimpimiwa na mabasa ankosihu. Eli yamakamaka vamentoni va Yehova ja weyo omwiwelela.—1 Sam. 15:22.

12. Zaina oviwilemo dhavi vabudduwiliye o Beteli attomeliwa olaleya?

¹² Koona yotagiha ya Zaina wa Oriente Médio, murogora opattiwe na matxinjo amuttukulele ottiya mabasa amuzivela vaddiddi. Iyene walaba o Beteli okwaranya vyaka 23 n’omala baattomeliwa mabasa a olaleya. Iyene ohiloga dhahi: “Matxinjo aba ahidditikiniha. Miyo kaddavyonana ttima vina ddanvivuza, ‘Miyo ddivonyile vavi?’”  Mokubanyiha-mwene edhile ottabwiha makaniya, abali na arogora ena a mulogo waye ahimwaddela dhahi: “Weyo kowiliwa wankosa pama mabasa attiddiwe, n’apanovi ogahikala o Beteli.” Mwa mudhidhi mwinjene Zaina wakala wokubanyene wannunla omattiyu wotene. Mbwenye iyene ohiloga dhahi: “Miyo kaddattiyile wi makattamiho aba addittukulele wubuwela bure sabwa ya nikuru vina waganyedha oddikwela wa Yehova.” Zaina owodhile dhavi oliba mwetemwene?

13. Txini ekosile Zaina wi awodhe opemberha dhubuwelo dhohikala?

¹³ Zaina ohiwodha opemberha dhubuwelo dhohikala. Owodhile dhavi? Iyene ohengesa mitoma dhinji dha mapublikasau ehu dhinloga makattamiho oladdana agumaniliyena. Mutoma mmodha omukamihedhile venjene obudduwile Mwang’aneli wa 1 de Fevereiro de 2001 “Você Pode Vencer o Desânimo!” Mutoma obu onotapulelamo ejile ewilemo namaleba Bibilia Marko sabwani enoneya ninga wanwanana dhubuwelo dholaddana muttomeliwiye mabasa mena. Zaina ohiloga, “Yotagiha ya Marko, yali ninga murobwe oddikamihedhile opemberha okumuwa.” Yina emukamihedhile Zaina ja okala wofiyedheya na amarho aye, iyene wanrabela okala yeka vina kakala ovikubanyedhavi. Wahinonelamo wi muya wa Mulugu onolaba mmatxinjoni otene ankosiwa munikuruni na Yehova vina abali ansogorhela anomukwela vaddiddi. Zaina wahidha ononelamo wi eli yamakamakaya munikuruni na Yehova jowi mabasaya edde n’ofwanyelela.

14. Matxinjo gani amurutxile Vlado orumela, nanda txini emukamihedhile?

¹⁴ Vlado, munddimuwa wa mulogo wa vyaka 73 onkala o Eslovénia, wahirutxiwa ononelamo sabwaya yattomiwe mulogo waye otaganyihiwa na mulogo mwina, omamalelowa Numba ya Omwene ofugiwa. Iyene ohiloga dhahi: “Mwa miyo kavali mwaha wa ofugiwa Numba ya Omwene yokoddela vaddiddi. Yahiddikubanyiha vaddiddi sabwani mumalilehu osasanyedha kuwavirile mudhidhi mwinjene. Miyo ddili namasema vina ddahikamihedha osasanya dhilobo dhina ottiya ejo otaganyiha milogo mili ali matxinjo manddimuwa vaddiddi makamaka mwa abali owunuwelavo.” Txini emukamihedhile Vlado? Iyene ohitapulelamo dhahi: “Ovilibihedha wi nirumeele matxinjo a nikuru na Yehova onodhana  mareliho.” Mwebaribari matxinjo mang’ono angumanana iyo masaka abano, anoniwaraliha wi niwodhe owanana matxinjo manddimuwa ananipatte musogorho. Weyo ohipattiwa na matxinjo obe mulogo wawo olotaganyiwa na mwina? Enokala yorutxa nigagumanana matxinjo ninga aba. Mbwenye okane nikuluvelo wi Yehova onononelamo eniwamo weyo. Kakana nikuluvelo nawi Yehova onele wururiha ogakala oweddeyana, ogakamihedha matxinjo ankosa iyene vina nikuru naye.—Masal. 18:25.

15. Ninawodhe dhavi oliba mwetemwene nigapattiwa makattamiho aniteya mmulogoni?

¹⁵ Oku naddamelaga omagomo wa elabo ejino, ninojeedhela opattiwa na makattamiho aneteyege mmulogoni. Makattamiho abo anodhaga weha weddeyana wehu na Yehova. Nona ninofwanyela oliba mwetemwene. Akala weyo olonyimuwa na mbali wa mmulogoni. Kukane ya mmurimani, akala ololagiwa, kukalelege wang’anavi makattamiho atoteyile sabwa ya ejuwene. Karumela nlagona vina kakosa matxinjo anfuneya. Akala ohipattiwa na matxinjo eteyile munikuruni na Yehova karumela matxinjoya na murima wotene vina kafwara malagoya.

16. Ninawodhe dhavi odhowavi nimukuluvelaga Yehova vina nikuru naye?

¹⁶ Akala weddeyana wawo onowehiwa odhowevi omukuluvelaga Yehova vina nikuru naye. Wi owodhe okosa ejuwene onofwanyela oliba mwetemwene kuloga okale ofwaseyene, wubuwele na mukalelo wapama vina wone dhilobodha ninga munoonela Yehova. Elobo yina enawukamihedhe okosa ejuwene ku osunza mapadduwo a attu anlogiwa mBibiliani awodhile opemberha makattamiho oladdana na awo vina otanalela dhotagiha dhawa. Kamukumbirhe Yehova na nlobelo. Vina kukale wolapelana na abali a mmulogoni. Ogakosa dhawene kintanala elobo gani enapadduwe, Satana txipo kanawodhe wumwalaniha na Yehova vina nikuru Naye.—Tia. 4:7.