NSUNZO 45
Yehova Onnikamihedha Dhavi Mmabasani a Olaleya
“Aner’oziwa wi vari vawa vakala namavuhulela.”—EZEK. 2:5.
JIBO 67 ‘Dhowani Mwalaleye’
DHINASUNZE IYO a
1. Txini enjeedhelihu ogumanana, nanda nina ebaribari gani?
OKU nidhowagana mabasa ehu a olaleya ninojeedhela ofwara-fwariwa. (Dan. 11:44; 2 Tim. 3:12; Ovuh. 16:21) Ofwara-fwariwa oku txino onele ottabwa musogorho, masiki dhawene nikane ebaribari wi Yehova onele odhowavi anikamihedhaga. Ninlogela nni dhawene? Yehova onodhowavi akamihedhaga alabeli aye wakwanihedha mabasa—attomeliwani, kintanala orutxa wa mabasaya. Wi niladdanihe, ndowe none dhilobo dhing’onovi dhipadduwile mwigumini ya namavuhulela Ezekiyel wattomeliwe walaleya Ayuda atxedheliwe o Babilónia.
2. Yehova onaloga dhavi attu alaleya Ezekiyel, nanda txini enone iyo mwari mwa nsunzo ntti? (Ezekiyel 2:3-6)
2 Attu alaleya Ezekiyel ali dhavi? Yehova ohiloga wi ali ‘avuru-vuru,’ “ovadda musorho” vina “ahintxinuwa.” Awene ali ovadda musorho ninga malugu vina owopiya ninga wenye [escorpião]. Nona Yehova amwaddela dila dhinjene Ezekiyel: “Kuhawove”! (Kengesa Ezekiyel 2:3-6.) Ezekiyel wahivilevela ozuzumela mabasa a olaleya attomeliwiye sabwani wanziwa wi (1) warumiwe na Yehova, (2) wanlibihiwa na muya wokoddela vina (3) nzu na Mulugu yanlibiha nroromelo naye. Dhilobo esi ttaru dhimukamihedhile dhavi Ezekiyel? Nanda dhinanikamihedhe dhavi masaka abano?
EZEKIYEL—WARUMIWE NA YEHOVA
3. Mazu gani amulibihile Ezekiyel nanda Yehova olagihile dhavi wi agahimukamihedha?
3 Yehova wahimwaddela dhahi Ezekiyel: “Ddinouruma.” (Ezek. 2:3, 4) Mazu aba ahimulibiha Ezekiyel. Sabwaya? Iyene wahubuwela mazu akene alogile Yehova arumaga anamavuhulela Aye Mizé na Izaiya. (Obud. 3:10; Iza. 6:8) Ezekiyel wanziwa nikamihedho navahile Yehova anamavuhulela aba eli wi akwaranye dhorutxa. Nona vamwaddeli Yehova Ezekiyel dila yanawili: “Ddinouruma,” namavuhulela oddu wahikana mwaha wapama wa okuluvela nikamihedho na Yehova. Ottiya ejo munivuruni na Ezekiyel ninofwanya dila dhinjene nzu ntti: ‘Yehova oddittanyuwela oddaddela dhahi.’ (Ezek. 3:16) Vasogorhova ninofwanya mazu oladdana alogile Ezekiyel dila dhinjene: ‘Yehova oddittanyuwela oddaddela dhahi.’ (Ezek. 6:1) Pumwenemo, Ezekiyel wahikana ebaribari wi warumiwe na Yehova. Vowi iyene wali mwana wa namakutta, babe wahimusunziha mapadduwo anoniha wi Yehova ohakamihedha anamavuhulela aye nsaka na wale. Yehova wahiloga mazu aba: “Miyo ddili na weyo” amwaddagana Izaki, Jakob vina Jeremiya.—Wita 26:24; 28:15; Jer. 1:8.
4. Mazu gani amulibihile Ezekiyel?
4 Ana Izrayel akulele dhavi olaleya wa Ezekiyel? Yehova ohiloga dhahi: “Ana Izrayel kanautanale, vowi awene kanfuna oddivuruwana miyo.” (Ezek. 3:7) Sabwa ya awene ohifuna onvuruwana Ezekiyel yatapulela wi kafuna onvuruwana Yehova. Mazu aba ahimulibiha Ezekiyel oziwa wi sabwa ya nlogo nttile ohinvuruwana kiyatapulela wi muladduya wali waye. Yehova vina wahimulibiha Ezekiyel okuluvela wi dhottonga dhaye dhali dhebaribari, nlogo nttile nigahiziwa wi “vari vawa vakala namavuhulela.” (Ezek. 2:5; 33:33) Kavali waganyedha wi mazu aba ahimulibiha Ezekiyel odhowavi azuzumelaga mabasa aye a olaleya.
YEHOVA—ONONIRUMA
Dhawene ninga Ezekiyel, ninodhaga otanyiwa obe ofwara-fwariwa, mbwenye ninoziwa wi Yehova oli na iyo (Kang’ana ddima 5-6)
5. Izaiya 44:8, onnikamihedha dhavi oliba murima?
5 Iyo vina ninolibiheya sabwa ya oziwa wi nirumiwe na Yehova. Iyene ononittittimiha mwa onikuwela ‘anamoona’ aye. (Iza. 43:10) Eji gari enddimuwa! Dhawene ninga mmwaddeli Yehova Ezekiyel: “Kuhawove,” Yehova ononiruma alogaga: “Kamururumuwe, kamove!” Iyo ninkoddela nni wawova amwiddani ehu? Dhahene ninga Ezekiyel, iyo nirumiwe na Yehova vina nikana nikamihedho naye.—Kengesa Izaiya 44:8.
6. (a) Yehova onnikamihedha dhavi? (b) Elobo gani ennilibiha vina ennipangarhaza?
6 Yehova ononikamihedha. Motagiha, Yehova ahinatti ologa mazu aba: ‘Nyuwo muli anamoona aga,’ vamaromo ologile dhahi: ‘Vanabuwegewe minje dhovaya, miyo ddinakalege na weyo; manjeya kanawuririmihe. Ogadha ovira va mottoni, kunazwe; wavuwa wa motto kunawutototxe.’ (Iza. 43:2) Oku nizuzumelaga mabasa a olaleya, dila dhina ninogumanana makattamiho ankala ninga muneri vina anladdanihiwa na motto. Mbwenye na nikamihedho na Yehova, ninele odhowavi nilaleyaga. (Iza. 41:13) Dhahene ninga nsaka na Ezekiyel, attu enjene ovanene kanfuna ovuruwana miselu dhinlaleya iyo. Niziwe wi sabwa ya awene ohinivuruwana kintapulela wi kaninlaleya pama. Ninopangarhazeya vina ninolibiheya oziwa wi Yehova onowagalala sabwa ya iyo odhowavi nilaleyaga. Murumiwi Paulo ologa dhahi: “Muthu-muthu onere wakela muthengo omfwanyelela mabasa athiddileye.” (1 Kor. 3:8; 4:1, 2) Murogora oli namalaleya mwa vyaka dhinjene ohiloga: “Oziwa wi Yehova ononittuva sabwa ya mabasa ankosihu enoddivaha wagalala.”
EZEKIYEL—OHILIBIHEYA NA MUYA WA MULUGU
Ezekiyel ohona karo ya Yehova wirimu emulibihile okana nikuluvelo wi na nikamihedho na Yehova, agahiwodha wakwaniha mabasa a olaleya (Kang’ana ddima 7)
7. Txini yewilemo Ezekiyel, mumaleliye otanalela esile dhooniliye? (Koona foto ya kapa.)
7 Ezekiyel ohona mulabelo wa muya wa Mulugu. Muwonihiwa, iyene ohona na mento aye muya wa Mulugu olabaga na dhitagano dha muya dhedda mumodhani, na maroda a karo enddimuwa ya wirimu. (Ezek. 1:20, 21) Txini ekosile Ezekiyel mooneliye? Iyene ohiloga dhahi: “Monelimi esodhá, ddigwela vati, dditibela kove.” Ezekiyel mooneliye nipadduwo nttile notikiniha wahigwela vati. (Ezek. 1:28) Vasogorhova, Ezekiyel mutanaleliye nipadduwo nttile notikiniha, wahidha ononelamo wi na nikamihedho na muya wa Mulugu agahiwodha wakwaniha mabasa a olaleya.
8-9. (a) Txini epadduwile vaddeliwe Ezekiyel na Yehova wi emele? (b) Yehova omulibihile dhavi Ezekiyel wi awodhe olaleya?
8 Yehova ohimwaddela dhahi Ezekiyel: “Weyo, mwana muthu, kavenya, ddinfuna ddulogena.” Mazu aba ahinvaha Ezekiyel guru obe “muya” wi avenye. Ezekiyel ohileba dhahi: “Muya wa Mulugu oddithidda, oddivenyiha, oddimetxa.” (Ezek. 2:1, 2) Vasogorhova Ezekiyel wahinonelamo wi mabasa aye olaleya, eddihiwa na “nlada” na Mulugu—kuloga muya wokoddela wa Mulugu. (Ezek. 3:22; 8:1; 33:22; 37:1; 40:1) Muya wa Mulugu wahimulibiha Ezekiyel—owodha wakwaniha mabasa attomeliwiye, walaleya attu ‘ovadda musorho vina awuma murima.’ (Ezek. 3:7) Yehova wahimwaddela dhahi Ezekiyel: ‘Ddinowuvaddiha ninga mujila, ddinowuwaraliha opitta mwarha. Kuwawove, kugurumele na makunyari anawupottelani, masiki awuzugunuwele.’ (Ezek. 3:8, 9) Yehova wahimwaddela Ezekiyel: ‘Kugurumele na mazu a nlogo ntto. Miyo ddinere wulibiha.’
9 Mwakelilé Ezekiyel muya wa Mulugu ohiwodha odhowana vasogorho mabasa a olaleya. Ezekiyel ohiloga dhahi: ‘Yehova ohiddittidda na guru ya nlada naye.’ Mwari mwa sumana modha namavuhulela Ezekiyel wahisunza venjene vina wahinonelamo muselu wafwanyeliye osunziha se wova. (Ezek. 3:14, 15) Vasogorhova Yehova wahimwaddela wi adhowe onttittwani, wenewo ‘muya ohinvolowa.’ (Ezek. 3:23, 24) Mwa venevo Ezekiyel wali womala-nawale wi arome olaleya.
MUYA WA MULUGU ONONILIBIHA—MASAKA ABANO
Txini emukamihedhile Ezekiyel nanda txini enanikamihedhe masaka abano wi nakwanihe mabasa ehu a olaleya? (Kang’ana ddima 10)
10. Txini enanikamihedhe odhowavi nizuzumelaga mabasa a olaleya nanda sabwaya jani?
10 Nikamihedho gani ninvedihu wi nakwanihe mabasa a olaleya? Wi nakule nivuzo ntti, nirome otanalela ejile empadduweli Ezekiyel. Ahinatti oroma olaleya, muya wa Mulugu wahinvaha nikamihedho nafuniye. Dhahene ninga epadduwile na Ezekiyel, masaka abano ninele owodha odhowana vasogorho mabasa a olaleya nigakana nikamihedho na muya wa Mulugu. Sabwaya jani? Sabwani Satana onowana na iyo wi atximihe mabasa ehu a olaleya. (Ovuh. 12:17) Attu enjene anubuwela wi Satana dwa guru vaddiddi nona iyo kaninawodhe owanana. Mbwenye na mabasa a olaleya ankosihu, ninowodha ompemberha! (Ovuh. 12:9-11) Dhavi? Mudhidhi wetene ondowa iyo olaleya, ninowoniha wi kaninimova Satana. Venevo vandowa iyo nilaleyaga ninompemberha Satana. Txini ennikuluveliha wi ninele odhowavi nilaleyaga masiki nifwara-fwariwaga? Nikane ebaribari wi ninolibiheya na muya wa Mulugu vina ninorumeeliwa na Yehova.—Mt. 5:10-12; 1 Ped. 4:14.
11. Muya wa Mulugu onanikamihedhe dhavi nanda txini enfwanyela iyo okosa wila nakelegevi?
11 Elobo gani ensunza iyo nigobuwela guru envahile Yehova Ezekiyel wi awodhe olaleya? Muya wa Mulugu ononivaha guru wi niwodhe okwaranya makattamiho angumanihuna mmabasani a olaleya. (2 Kor. 4:7-9) Txini enfwanyelihu okosa wi nakelegevi muya wa Mulugu? Nididele olobela s’ohilemana, nikuluvelaga wi Yehova onele ovuruwana malobelo ehu. Yezu ohasunziha arumiwi aye: “Lobaní, munovahiwa; tamelaní, munofwanya; kopelaní, munowakeliwa.” Yehova onele wakula malobelo ehu ‘anivahaga muya wokoddela nigamuloba.’—Lk. 11:9, 13; Mer. 1:14; 2:4.
NZU NA MULUGU—NIHILIBIHA NROROMELO NA EZEKIYEL
12. Ninga munlogela Ezekiyel 2:9–3:3, nipapi nadheela wuvi nanda txini yalimo?
12 Muya wa Mulugu ohinvaha guru Ezekiyel wi awodhe olaleya, oku nzu na Mulugu nanlibiha nroromelo naye. Ezekiyel wahoona nlada nattiddelile nipapi. (Kengesa Ezekiyel 2:9–3:3.) Nipapina nadheela wuvi? Txini yalimo? Nilibihile dhavi nroromelo na Ezekiyel? Ndoweni none. Nadha vampaddoni va Yehova. Nipapi ntto Ezekiyel wavahiwe na anju mmodha, mwa anju anai awoniliye omaromo arumiwe na Yehova. (Ezek. 1:8; 10:7, 20) Munipapinimwa mwali mazu a Mulugu—muselu wa ottonga wafwanyela Ezekiyel walaleyela avuruvuru atxedheliwe o Babilónia. (Ezek. 2:7) Museluya walebiwe dhipaddi bili dha nipapina.
13. Txini emwaddeli Yehova Ezekiyel wi akose na nipapi, nanda ejoya yakalelini elobo yottapira?
13 Yehova wahimwaddela namavuhulela Ezekiyel wi aje nipapi nttile ‘arubale.’ Ezekiyel wahiwelela, wahija nipapi notene. Nivuhulo ntti natapulela eni? Ezekiyel wanfwanyela ononelamo pama muselu wadhowiye olaleya. Yanfuneya ononelamo mowakwana muselu obu wi awodhe olaleya pama. Vasogorhova yahipadduwa elobo yotikiniha. Ezekiyel wahizinddiyela wi nipapi nttile ‘nanttapira ninga wiyi.’ (Ezek. 3:3) Sabwaya? Mwa Ezekiyel orumiwa na Yehova yali elobo yottapira opitta wiyi vina yottabiha murima. (Masal. 19:8-11) Iyene wahagalala sabwa ya orumeliwa na Yehova ninga namavuhulela waye.
14. Txini emukamihedhile Ezekiyel owodha olaleya mpaka omagomo?
14 Vasogorhova Yehova ohimwaddela dhahi Ezekiyel: ‘Vuruwana dhotene dhinupanga miyo, koya mmurimani mwawo.’ (Ezek. 3:10) Na maswagiho aba, Yehova wel’omwaddela Ezekiyel wi akoye mmurimani mazu otene alebiwe vanipapini vina atanaalelege. Mudhidhi wakosa Ezekiyel ejuwene nroromelo naye nanliba. Eji ehinvaha Ezekiyel guru ya olaleya nlogo nttile. (Ezek. 3:11) Ezekiyel vawodhiliye ononelamo pama vina arumela muselu wa Mulugu wahiroma mabasa a olaleya mpaka omagomo.—Kaladdaniha na Masalmo 19:14.
NZU NA MULUGU NINOLIBIHA NROROMELO NEHU—MASAKA ABANO
15. Wi niwodhe olaleya mofwanyelela txini enfwanyelela iyo ‘wika mmurimani’?
15 Wi nidhowegevi nivilelaga mmabasani a olaleya, ninofwanyela odhowavi nilibihaga nroromelo nehu na nzu na Mulugu. Iyo ninofwanyela wika ‘mmurimani mwehu’ mazu otene annaddela Yehova. Masaka abano Yehova onloga na iyo modhela Nzu naye nilebiwe mBibiliani. Ninawodhe dhavi okana ebaribari wi dhubuwelo dhehu vina dhokosa dhehu dhineddihiwa na Nzu na Mulugu?
16. Txini enfwanyelihu okosa nigasunzaga Nzu na Mulugu nanda ninawodhe dhavi wika mmurimani mwehu?
16 Iyo nigamala oja vasogorhova nivuma maningo ehu anoliba, empadduwa yakene nigasunza Nzu na Mulugu nitanaalela esunzilihu, nroromelo nehu ninoliba. Ensunza iyo na rolu yonile Ezekiyel jiji: Yehova onfuna wi iyo nije mazu aye ‘nirubale’ kuloga, ononelamo pama Nzu naye. Ninawodhe okosa ejuwene modhela olobela, wengesa vina otanalela. Vamaromo ninofwanyela olobela wila murima wehu wakele dhubuwelo dha Mulugu. Mwavenevo iyo oroma omwengesa Bibilia. Vasogorhova iyo otxima wi nitanaalele esile dhengesilihu. Okosa eji enanikamihedhe dhavi? Iyo nigatanaalela dhinsunzihu vina ninonelamo pama Nzu na Mulugu nroromelo nehu ninele oliba.
17. Ekaleli nni yamakamaka otanalela dhinengesihu mBibiliani?
17 Omwengesa Bibilia vina otanaalela ekalele nni yamakamaka? Okosa eji enonivaha guru enfunihu wi niwodhe olaleya muselu wa Omwene ovanene vina nilaleye muselu wa ottonga onavuwihiwe musogorho mpo mohigonela. Ottiya ejo, nigatanaalela mikalelo dhapama dha Yehova mandano ehu na iyene anoliba. Yopurelamoya, ninele okana—murenddele vina wagalala na dhinehu.—Masal. 119:103.
NINOLIBIHIWA WI NIVILELE
18. Txini enanonelemo attu a mirudda dhinlaleyihu nanda sabwaya jani?
18 Mottiyana na Ezekiyel, iyo kanili anamavuhulela a attu. Masiki dhawene ninodhowavi nivuwihaga muselu wa Yehova ohinafiya mudhidhi onagome mabasa a olaleya. Ottonga wa Mulugu ogafiya attu a mmuruddani mwehu kanakaane mwaha wa ologa wi iyo kanilaleyiwe obe Mulugu ohinipwaza. (Ezek. 3:19; 18:23) Ottiya ejo, awene anele ononelamo wi miselu dhinlaleyihu dhinda wa Mulugu.
19. Txini enanivahe guru ya odhowanavi vasogorho mabasa a olaleya?
19 Txini enanivahe guru ya odhowanavi mabasa a olaleya? Dhilobo dhakene dhimulibihile Ezekiyel. Iyo ninele odidelavi olaleya sabwani ninoziwa wi nirumiwe na Yehova, ninolibihiwa na muya wa Mulugu vina Nzu na Mulugu ninolibiha nroromelo nehu. Na nikamihedho na Yehova ninele odhowavi banigalaleya “mpaka omagomo.”—Mt. 24:13.
JIBO 65 Nihiyelele Mundduni!
a Mwari mwa nsunzo ntti, ninele wona dhilobo ttaru dhimukamihedhile Ezekiyel wakwanihedha mabasa a olaleya attomeliwiye. Nigoona nikamihedho ninvahile Yehova namavuhulela oddu, ninele olibiha omukuluvela wehu Yehova wi onele onikamihedha odhowanavi vasogorho mabasa ehu a olaleya.