1, 2. (a) Ottiyana gani oliwo wa esile dhinjedhihu na esile dhinjedha attu eena? (b) Txini enasunze iyo mwari mwa mutoma obu?

YEHOVA onnivaha dhilobo dhapama dhinjedhelihu. Olibela okoddeliha nzina naye vina okosiha wila ofuna waye wireyege wirimu na vati. (Mateu 6:9, 10) Esi dhilobo dhapama dhinnikamihedha wang’ana dha musogorho. Yehova olibela onivaha egumi ya mukalakala, wirimu na velaboni ya vati. Ejo enele okala yohagalaliha vaddiddi! (Joau 10:16; 2 Pedro 3:13) Ninojeedhela woona mukalelo onavahe Yehova nikamihedho vina waweddiha attu a nlogo naye masaka abano omariha.

² Bibilia onloga wila “omuroromela Mulugu thi nikoma” n’owakela dhinjyedhihu. Eji entapulela wila abale ana nroromelo, akaana ebaribari yawi dhetene dhilibeli Mulugu dhinele wakwanihedheya. (Ahebreu 11:1) Masaka abano attu enjene anojedhaga woona dhilobo esi, mbwenye kaana ebaribari wi dhinele wakwanihedheya. Motagiha, attu enjene anojedhaga opemberha mugunddu, mbwenye mudhidhi  mwina empadduwaya kahiyo ejuwene. Mutoma obu onele onikamihedha ononelamo mukalelo onfanyeelihu olibiha nroromelo nehu mowiwanana na dholibela esi. Ninele woona wila olibiha nroromelo ovanene ononikamihedha.

3. Ninkanela eni ekuluvelo wila dholibela dha Yehova dhinele wakwanihedheya?

³ Mwa iyo notene kavo obaaliwe na nroromelo. Akala ninofuna okaana nroromelo, nittiye wila muya wokoddela wa Mulugu weeddihe mirima dhehu. (Galásia 5:22) Muya wokoddela onele onikamihedha omuziwa mowakwana Yehova. Niganonelamo wila iyene ddwa ewodhelo vina muziwetxi, ninele okuluvela wila onele wakwanihedha dholibela dhetene dhiganiliye. Yehova mwinyene onowadda dholibela ninga dhimalile wakwanihedheya eraga “Dhetene dhimala wireya!” (Kengesa Ovuhulela 21:3-6.) Iyo ninoziwa wila Yehova onowakwanihedha dhetene dhinlibeliye. Iyene ‘ddi Mulugu wororomeleya.’ Ji sabwaya enrumeelihu dhetene dhinlibeliye okosa musogorho.​—Olibiha 7:9.

4. Elobo gani yaroromela emeleli a Yehova masaka a mundduni?

⁴ Va Ahebreu 11 vanologiwa attu owakwana 16 alobwana na ayana, alibihile nroromelo nawa mwa dholibela dha Yehova. Vina vanologiwa attu enjene amukwela Yehova sabwa ya ‘nroromelo nawa.’ (Ahebreu 11:39) Otene anjeedha woona “ziza” nattagile ologa Yehova. Awene anziwa wila muttu oddo wa “ziza” agahatolotxa amwiddani etene a Mulugu vina agahikosiha elabo okala paraizu ninga mwalani omaromo. (Wita 3:15) Txibarene emeleli abo anroromela wila Mulugu, agahawiyihedha egumi. Noona, aweneya kajedhela ovenyihiwa mu okwani wi aakele egumi ya wirimu, sabwani Yezu wali ahinatti ofugula dila. (Galásia 3:16) Ottiya ejo, ajeedhela ovenyihiwa wi aakele egumi yamukalakala velaboni ya vati mparaizu wokoddela.​—Masalmo 37:11; Izaiya 26:19; Ozeya 13:14.

5, 6. Abramu na amudhaye ajedha eni? Nanda alibihile dhavi nroromelo nawa? (Koona foto eli omaromo.)

⁵ Ahebreu 11:13 onowaloga emeleli aba a Yehova, “Etene aba akwa aroromelagavi, ahifiyedhile othidda dhapikirheliwani; na nroromelo nanani ahonela uddayi-wene, athabela.” Awene ajedha elabo ya musogorho, atanalelaga ninga ali mwenemo. Mmodha wa abene ddi Abramu. Yezu walogile dhahi sabwa ya Abramu: “Abramu, nikolo nenyu, wanjyedha n’othaba siku na odha waga; ohona-wene murima waye ofwasa.” (Joau 8:56) Sara, Izaki, Jakobi vamodha na attu eena anang’ana dha musogorho, mudhidhi ogaromile olamulela Omwene “mmuthetheni wotibeleya, wubuweliwe, omagiwe na Mulugu.”​—Ahebreu 11:8-11.

⁶ Koddi Abramu na murala waye awodhile dhavi olibiha nroromelo nawa? Awene ansunzavi sabwa ya Yehova. Mudhidhi mwina, Mulugu wanloga na awene modhela angelo, na dhoroha. Awene txino ahisunza na dhotagiha dha azamani awa obe malebo a masaka a mundduni. Abramu na murala waye txipo kadduwala dholibela dha Yehova nanda wantanaalela mudhidhi  wotene. Ninga yopurelamoya, awene kaganyedha wila Yehova agahakwanihedha dholibela dhaye. Sabwa ya eji awene ahimuroromelavi Yehova, masiki vagumanani na makattamiho vina ofarafariwa.

7. Txini enivahile Yehova wila nilibihena nroromelo nehu, nanda ninfanyeela okosa eni?

⁷ Txini enanikamihedhe olibiha nroromelo nehu? Yehova onivaha Bibilia wi anisunzihe sabwa ya dholibela dhaye dha musogorho. Onologa vina ejile enfanyeelihu okosa wi nihagalale. Ji ejene ekalelani yamakamaka omwengesa Bibilia malabo otene vina ovirihamo maganoya. (Masalmo 1:1-3; kengesa Merelo 17:11.) Yehova ononigawela “poso mudhidhi ogafiya” eji entapulela mabasa ankosiwa na “mwimeleli wororomeleya, wamalago.” (Mateu 24:45) Natagihaga emeleli a Mulugu masaka a mundduni, ninofanyeela wengesa sabwa ya dholibela dha Mulugu, vina otamelaga mudhidhi wi nitanaalele. Ejo enele onikamihedha omuroromela Mulugu, vina ojeedhela n’ottaba mudhidhi onalamule Omwene waye velaboni ya vati.

8. Nlobelo ninlibiha dhavi nroromelo nehu?

⁸ Koddi, vahikala elobo yina yakamihedhile attu a nlogo na Yehova olibihavi nroromelo nawa masaka a mundduni? Awene anlobela akumbirhaga nikamihedho wa Yehova, nanda iyene agakula nlobelona nroromelo nawa nanliba. (Nehemiya 1:4, 11; Masalmo 34:4, 15, 17; Daniyel 9:19-21) Na mukalelo wakakene, vanoonihu wila Yehova ohakula nlobelo nehu, nanda onivaha yakumbirhile iyo na mudhidhiya, nroromelo nehu ninoliba. (Kengesa 1 Joau 5:14, 15.) Ninofanyeela vina “omukumbirha” Yehova wila anivahe muya waye wokoddela wi onilibihe omuyani.​—Luka 11:9, 13.

9. Dhilobo gani dhinfanyeelelihu olobelela?

⁹ Nigalobelaga kanikumbirhege dhinnijombela bahi. Mbwenye jaderetu omutamaalela na ohagalala malabo etene. Ottiya ejuwene, Mulugu ddinnivaha dhapama dhinfunehu malabo etene! (Masalmo 40:5) Attu a nlogo na Yehova anowalobelela abali awa ali orugunuwa elabo yotene. Motagiha, jaderetu “wawubuwela abale ali mu kambura.” Nalobelele “abale vina annisogorhela.” Nigoona mwakulelo onakula Yehova na malobeloya abo, nroromelo nehu ninowunuwa.​—Ahebreu 13:3, 7.

10. Txini yakamihedhile attu enjene okala oliba vina omuroromela Mulugu?

¹⁰ Va Ahebreu kapitulu 11 murumiwi Paulo ologa: “Na ororomela, ayana ena ahawakela wili amarafula awa, avenyile múkwani, ena atutukiwa ofiyedha okwa; karumelile woboleliwa, áfuna afwanye egumi yebaribari vanavenyani múkwani.” (Ahebreu 11:35) Enjiya ahivilela ofarafariwa vina ahimuroromela Mulugu sabwani ankuluvela ovenyihiwa mu okwani, ninga mwalibeleli Mulugu. Awene anziwa wila musogorho Yehova agahavaha egumi, velaboni ya vati na mukalakala. Kamubuwele Nabot na  Zakariya. Awene ovokeliwa malugu mpaka okwa sabwa ya omulabela Mulugu. (1 Amwene 21:3, 15; 2 Mapadduwo 24:20, 21) Daniyel wahiponyedhiwa mulejeni mwa apoddogoma, amarho aye ahiponyedhiwa mujugumani ya motto. Awene ahirumeela okwa, akooddaga wawebedha amilugu ottambi. Alobwana aba anroromela wi Yehova agahavaha muya waye wila wakamihedhe ovilela goyi dhawa.​—Daniyel 3:16-18, 20, 28; 6:13, 16, 21-23; Ahebreu 11:33, 34.

11. Dhoweha gani dhavilela anamavuhulela enjene sabwa ya nroromelo nawa?

¹¹ Anamavuhula enjene, ninga Mikeya na Jeremiya, ahivadiwa vina ahifugeliwa mukambura. Enaya ninga Eliya “wanvitala mwiddeddereni, mugulugudhani na mulejeni mwa mwango.” Otene aba, amuroromela Mulugu sabwani ahikaana njeedhelo na esile “dhiliwo dhihinoneya.”​—Ahebreu 11:1, 36-38; 1 Amwene 18:13; 22:24-27; Jeremiya 20:1, 2; 28:10, 11; 32:2.

12. Yotagiha gani enfanyeelihu ofara? Iyene owodhile dhavi ovilela?

¹² Yezu Kristu wahittongiwa n’otabala, masiki dhawene wahimuroromela Mulugu. Txini emukamihedhile ovilela dhawene? Paulo ologa: ‘Nlibele omwag’ana Yezu, ddi iyene witile dila ya nroromelo, ddi iyene onnakwaniha muroromelanimwá; iyene orumeela okwa va pingirizini; ddabuno oli vamodha na Mulugu.’ (Ahebreu 12:2) Paulo onowalibiha Akristu otene wi ‘afare vakuvi’ ttarho dha Yezu. (Kengesa Ahebreu 12:3.) Dhahene ninga Yezu, Akristu enjene a vyaka zana dhoroma apiwa sabwa ya omuroromela Yehova. Mmodhaya mwa abene ddi Antipa. (Ovuhulela 2:13) Akristu aba a vyaka zana dhoroma, ahimala wakela nlivo nawa, mottiyana na attu eena. (Ahebreu 11:35) Mudhidhi mung’onovi musogorhomwa, mvenyihedhiwe Yezu akala Mwene yaka ya 1914, Akristu aba ottikitteliwa, avahiwa egumi ya wirimu wenewo onalamulelani na Kristu.​—Ovuhulela 20:4.

13, 14. Yoweha gani egumanilena Rudolf Graichen, anda owodhile dhavi omuroromela Mulugu?

¹³ Matxikwi na matxikwi a Akristu masaka abano anofara yotagiha ya Yezu. Awene anotanaala malibelo a Mulugu, nanda anokalavi oliba masiki na ofarafariwa. Mmodhaya wa abene ddi Rudolf Graichen obaliwe w’Alemanha yaka ya 1925. Valiye muzombwe, amambali aye ahitomeya mba mafoto a mapadduwo a mBibiliani. Iyene ologa: “Foto modha yalagiha mwiji na mwana ng’ombe, muzombwe na nyarugwe, nibila na poddogoma,​—dhetene eso dhikumbuziwaga na mpali mbwenye na murenddele.” (Izaiya 11:6-9) Eji emukamihedha Rudolf wubuwela dha paraizu velaboni ya vati, vina yanlibiha nroromelo naye. Yodhavoya,  wahimukuluvelavi Yehova, masiki afarafariwaga vyaka dhinjene na akadda Gestapo Nazista vina akadda Stasi Communist da East Alemanha.

¹⁴ Rudolf ovilela na goyi dhinjene. Mamayaye okwile na eredda ya tugu o Ravensbrück wattiyiwani ninga atxedhiwi. Babe wahileba karta yalogaga wi wahittiya okala Munamoona wa Yehova. Mbwenye Rudolf wahilibihavi nroromelo naye. Mfuruliwiye mukambura wahilaba ninga nameddelela milogo. Musogorhomwa wahiwobeliwa eskola ya Gilead, nomala battomeliwa o Chile, okala nameddelela milogo wakene. Mmaleliye, omutela murogora Patsy wali misionaria. Yopaya jawila yaka modha musogorhomwa, mwanawa olokwa. Vyaka dhina musogorhomwa Patsy vina okwa. Okwile bana vyaka 43. Masiki na makattamiho ninga aba Rudolf kattiyile omulaba Yehova. Masiki valiye kalaba, vina vaniyena makattamiho a egumi, wanlabavi ninga pionero wa mudhidhi wotene, oku bali munddimuwa wa Mulogo.  Kengesa dhopadduwa dha egumi yaye, mu A Sentinela 1 de Agosto de 1997, makuku 20-25. ^[1] (Koona yowenjedha.)

15. Kavaha yotagiha ya abali vina arogora animulaba Yehova n’ohagalala masiki afarafariwaga?

¹⁵ Masaka abano vina, abali enjene vamodha na arogora, animulabela Yehova masaka meena anofarafariwa. Enjiya mwa abene afugeliwa mu kambura o Eritreia, Singapura, ena o Koreia do Sul, sabwa ya okodda ottidda “supadda.” (Mateu 26:52) Motagiha, Isaac, Negede, na Paulos ali mu kambura o Eritreia okwaranya vyaka 20! Awene anosottottiwa. Mwari mwa vyaka eso awene alivi aziye vina kanwodha wakamihedha amambali awa. Txibarene awene anomuroromela Yehova, vina nroromelo nawa ninoliba. Ang’aneli a misuwo dha kambura yawa anowariha. Mu site jw.org muhikala foto ya abali aba. Masiki na matabuwo menjene awene akanavi emwerumweru.

16. Nroromelo nawo nigakala noliba ninawukamihedhe okosa eni?

¹⁶ Emeleli enjene a Yehova kafugeliwe mu kambura obe kasottottiwe ninga abali aba alogiwe mundduni. Mbwenye enjiya anotabuwaga na ngovi dha elabo, obe koddo. Enaya anfara dhotagiha dha Abramu, Izaki, Jakobi na Mizé, anyanyala orihiwa na otamela dhorela dha elabo, batamela omulabela Yehova. Txini enakamihedha abali aba ohagalala oku amulabaga Yehova? Omukwela wawa Mulugu na ororomela wawa dholibela dhaye. Awene anoziwa wila iyene onele wareliha emeleli aye etene na egumi yamukalakala mwilaboni eswa, muhinakale obure.​—Kengesa Masalmo 37:5, 7, 9, 29.

17. Txini enaukamihedhe olibiha nroromelo nawo, nanda ninasunze eni mwari mwa mutoma ondawo?

¹⁷ Mwari mwa mutoma obu, nihoona wila “omuroromela Mulugu thi nikoma n’owakela dhinjyedhihu.” Wi nikaane nroromelo nakakene, ninofanyeela omuloba Yehova, vina wubuwela dholibela dhaye. Musogorhomwa, ninele owodha ovilela goyi dhotene. Mutoma onfarela onela ologa mukalelo mwina onfanyeelihu okaana nroromelo.