1-3. (a) Txini enfanyeelihu wika vamburoni voroma? (b) Makattamiho gani angumanana abale ansunza elogelo yina, nanda ejoya enita mavuzo gani? (Koona foto eli omaromo.)

MASAKA ABANO, Anamoona a Yehova enjene, anokamihedha wakwanihedha nivuhulo na walaleya “athu a vilabo dhotene, a mahimo, a vilogelo, a malogo etene.” (Ovuhulela 14:6) Weyo oli mmodha wa abale ansunza elogelo yina? Akalawo abali anlaba ninga amisionario, obe ankamihedha wego oli ojombeliwa wa anamalaleya. Enaya anowoona matugumano a elogelo yina wenewo onkalani.

² Emeleli otene a Yehova anowika vamburoni voroma egumi yawa yomuyani vina ya amudhawa. (Mateu 5:3) Veli-veli ninokaanaga mabasa gwé okosa, mpaka orameyeliwa mudhidhi wokosa nsunzo na muttu yeka. Mbwenye abale anoona matugumano na elogelo yina anokaana makattamiho ottabwaya.

 ³ Abale ankamihedha milogo dha elogelo yina, anofanyeela osunza elogelo eswa, masiki dhawene, akaane ebaribari wi anovilibihedha osunza dhilobo dhoviteya dha Yehova. (1 Korinto 2:10) Koddi awene anakose dhavi ejoya akala kannonelamo mowakwana ejile enlogiwa mmatugumanoni? Kito amambali ankamihedha milogo dha elogelo yina, anawodhe dhavi wasunziha ebaribari anawa?

4. Txini egekile vangovini mandano ehu na Yehova? Katagiha.

⁴ Akala kaninnonelamo masunziho a Bibilia na elogelo yina, ejo enowobaniha mandano ehu na Yehova. Mwiyeleli Nehemiya adhowaga o Jeruzalemi, wahiwa wila aima enjene kaloga elogelo ya Ebraiko. (Kengesa Nehemiya 13:23, 24.) Sabwa yawila aimaya kewelelamo Mazu a Mulugu, mandano awa na Yehova ahobana.​—Nehemiya 8:2, 8.

5, 6. Amambali enjene ankamihedha milogo dha elogelo yina anzinddiyela eni, vina makaniya bavi?

⁵ Amambali enjene a Akristu, ankamihedha milogo dha elogelo yina, anologaga wila mandano a anawa na Yehova anowobana. Sabwa yawila anawa kannonelamo deretu dhinlogiwa mmatugumanoni, zeludha kadhinattukulela okosa elobwene. Pedro omwalile o Austrália adhowa w’America, ologile wi, “agalogiwaga makani omuyani”, “murima na etanaalelo enopattiwa.” ^[1] (Koona yowenjedha.)​—Luka 24:32.

⁶ Nigengesaga na elogelo yina, mazuya kanddiginya murima ninga munkoselani nigengesa na elogelo yehu y’obaaliwana. Sabwa ya orutxa wita makani na elogelo yina, ejo enonikosiha okala wolemene vina omwebedha wehu Yehova onopatteya. Akala ninofuna olibihavi efunelo yehu ya okamihedha mulogo wa elogelo yina, ninofanyeela vina olibiha mandano ehu na Yehova.​—Mateu 4:4.

7. Akadda Babilónia atamela dhavi omukokela Daniyel ofara dhilemelelo na relijiau yawa?

⁷ Daniyel na amarho aye mwatxedheliwani o Babilónia, akadda Babilóniaya anakokela ofara dhilemelelo vina relijiau yawa. Na mukalelo gani? Awene ahasunziha “elogelo na mulebelo wa akadda Kaldeya” vina asaddula mazinawa. (Daniyel 1:3-7) Nzina niswa na Daniyel nintapulela Bel, wali mulugu wa akadda Babilónia. Ejo yahipadduwa sabwani Mwene Nabukodonosor wafuna wila Daniyel arumeele wi mulugu wa akadda Babilónia wali waguru vaddiddi ompitta Yehova Mulugu wa Daniyel.​—Daniyel 4:8.

8. Daniyel owodhile dhavi olibiha mandano aye na Yehova?

⁸ O Babilónia Daniyel wahivahiwa dhoja dha mwene. Mbwenye iyene “ohubuwela ohivikwaruliha” sabwani kageweleli malamulo a Mulugu. (Daniyel 1:8) Sabwa yokaana elemelelo yowengesa ‘manivuru a anamavuhulela’ alebiwe  na Ebraiko, wanlibiha mandano aye na Yehova masiki vakaliye elabo yotxedheliwa. (Daniyel 9:2) Txibarene, masiki mumalelani vyaka 70 bali o Babilónia, iyene waziwiwa na nzina naye na Ebraiko, Daniyel.​—Daniyel 5:13.

9. Namaleba Salmo 119, wana moonelo gani na Mazu a mulugu?

⁹ Namaleba Masalmo 119 wahivilela masiki valogiwiye bure na attu akala vatakulu va mwene. Mbwenye sabwa yawila wanliba na Mazu a Mulugu, ejo emukamihedha ovittiyaniha na awene. (Masalmo 119:23, 61) Iyene ovittiya weddihiwa na Mazu a Mulugu.​—Kengesa Masalmo 119:11, 46.

10, 11. (a) Efunelo yehu jivi nigasunzaga Mazu a Mulugu? (b) Niwodhe dhavi ofwanya efuneloya? Katagiha.

¹⁰ Joziweya wi ninottomeliwaga okosa dhilobo dhinjene mmulogoni obe omabasani, masiki dhawene ninofanyeela oveda mudhidhi wila nikose nsunzo nehu nomwinya obe webedha wa vamuralani. (Éfeso 5:15, 16) Efunelo yehu kahiyo okalaga wengesavi dhipaddi dhetene, wi nivahe dhowakula dhehu omatugumanoni. Efunelo yehu ja ottiya wi Mazu a Mulugu addiginye murima vina alibihe nroromelo nehu.

¹¹ Wi nifiyedhe efuneloya ejo, ninofanyeela ovilibihedha. Nigasunzaga kanikale wang’anavi dhojomba dha akwehu, mbwenye nubuwelege dhojomba dhehu. (Filipi 1:9, 10) Nitanaalele wila akala nindowa mmalaleyoni, o matugumanoni, obe ninkosa diskursu, kanivittukulelege. Ninga motagiha, namapiya onrhawurha esile dhinpiyiye kanunuana esuwenevi. Agafunaga wila akalewo na egumi yaderetu onofanyeela oja dhaderetu wi akaane guru. Na mukalelo wakakene, nigafunaga wila mandano ehu na Yehova alibe, nimwengesege Bibilia malabo etene. Masunzo abo anonikamihedha okwaranya dhojombeliwa dhehu.

12, 13. Attu enjene anlogela eni wila japama omusunza Bibilia na elogelo yobaliwana?

¹² Abali enjene ankamihedha milogo dha elogelo yina ahoona wila enokamihedha vaddiddi omwengesa Bibilia malabo otene na ‘elogelo y’obaaliwana.’ (Merelo 2:8) Amisionario enjene aloga wila ogafunaga okalavi woliba na mabasa awo buli elabo yina, kujedhele bahi esile dhiniwa weyo mmatugumanoni.

¹³ Alain, onsunza elogelo ya akadda Persa mwari mwa vyaka tanu na ttaru ologa: “Ddigavisasanyedhelaga matugumano a elogelo ya Persa, ddinofaseyela vaddiddi elogelo yaga. Sabwa yawila ddingilatela masunzo manddimuwa,  kaddimpurelamo deretu dhomuyani dhinemgesimi na elogelo yina. Noona masaka menjene ddinomwengesa Bibilia vina manivuru meena na elogelo yaga.”

14. Txini enfanyeela amambali ononelamo, vina sabwaya jivi?

¹⁴ Amambali a Akristu anofanyeela ononelamo wila txibarene ebaribari enoddiginya miridha dha anawa. Kobuwela elogile Sergio na mwadhiye Maria akamihedhi mulogo wa elogelo yina mwari mwa vyaka ttaru. Awene ahoona wila mwanawa wa vyaka 17 kapurelamo matugumano, nne vina mabasa a olaleya. “Maria ologa wila, mwanaye wannyonyeya agadhowaga olaleya na elogelo yina, mottiyana na wale valaleyiye na elogole yaye yobaliwana, Efaranses.” Sergio ologa wila, “Monelehu wila mwanihu wankattamiheya vaddiddi odhowa vasogorho,” “nahubuwela wiyelela mmulogoni mwehu.”

15. (a) Txini enakamihedhe amambali osakula akala anofuna omwalela milogo dhina? (b) Nlebo na Olibiha 6:5-7 ninakamihedha dhavi amambali?

¹⁵ Txini enakamihedhe amambali ononelamo akala vanofuneya omwalela mulogo wa elogelo enziwa anawa wi anonelegemo deretu? Yoroma, aweneya aziwelemo akala anokaanaga mudhidhi wi asunzihe ebaribari ya Bibilia anawa vina asunzihe elogelo eswa. Yanawili, aziwelemo akala anawa anoziveliwaga  odhowa olaleya vina woona matugumano a elogeloya ejo. Mwa venevo amambali anele woona akala jaderetu omwalela mmulogoni wa elogelo eniwa anawa wi anonelegemo. Anawa agamala wimetxa mandano oliba na Yehova, amambali txino podi wiyelela mulogo wa elogelo yina wi akamihedhe.​—Kengesa Olibiha 6:5-7.

16, 17. Txini enakamihedha amambali eena wasunziha anawa sabwa ya Yehova?

¹⁶ Amambali eena ahifanya marhe a wasunzihana anawa ebaribari ya Yehova na elogelo yobaliwana oku akamihedhaga mulogo wa elogelo yina. Charles babi wa anaburu araru ana vyaka oromana 9 mpaka 13. Awene ankamihedha nikuru na elogelo ya Lingala. Iyene ologa: “Nihikosa masasanyedho a masunzo awebedha wa murala vamodha na anihu na elogelo yehu yobaliwana. Nihikosa vina masasanyedho a wasunziha dhilobo dhing’onovi na elogelo ya lingala wila garedhaga na akwawa nasegedheyege.”

¹⁷ Kevin, babi wa anayana eeli mmodha ona vyaka tanu, mwina tanu na ttaru. Iyene onokosa guru wila asunzihe ebaribari anaye sabwani awene kampurelamo matugumano a elogelo ya mulogo ontugumanani. Iyene ologa: “Miyo na mwadhaga nikosa masasanyedho a okosa nsunzo na murala na elogelo ya Efaranses, eli yehu yobaliwana. Dila modha kadda mweri ninodhowaga  woona matugumano a elogelo ya Efaranses, vina nigakaana feriya ninodhowaga woona matugumano a kwatti na elogelo yehu yobaliwana.”

18. Nlebo na Roma 15:1, 2 ninukamihedha dhavi okosa yosakula yaderetu ogasunzihaga anawo? (b) Yosakula gani enkosa amambali enjene? (Koona yowenjedha.)

¹⁸ Kadda murala onofanyeela osakula ekalile deretu wa anawa vina mandano awa na Yehova. ^[2] (Koona yowenjedha.) (Galásia 6:5) Maria ologa wila masiki iyene na mamunaye afunagavi okamihedha mulogo wa elogelo yina, awene asakula omwala wila akamihedhe anawa olibiha mandano awa na Yehova. (Kengesa Roma 15:1, 2.) Sergio vina, ohoona wila ahikosa yosakula yaderetu. Iyene ologa: “Mmwaleli iyo nidhowa mulogo wa elogelo ya Efaranses, mwanihu momaguva ohunuwa omuyani nanda obatiziwa. Ovano pionero wa mudhidhi wotene.” Ovanene iyene oroma wubuwela omwala na amambali aye wi akamihedhe mulogo wa elogelo yina!

19, 20. Ninalagihe dhavi okwela wehu Mazu a Mulugu?

¹⁹ Yehova onowakwela attu otene. Ohittiya wila Bibilia atapuleliwe na dhilogelo dhinjene na efunelo yawi “athu a malogo etene” aziwe ebaribari. (1 Timóteo 2:4) Iyene oziwa wila mandano awa na iyene anele oliba akala attuya anomwengesa Bibilia na elogelo ennonelamo awene.

²⁰ Notene iyo nikosege guru enddimuwa wi nilibihe mandano ehu na Yehova. Ninokosa ejuwene nigamusunzaga Bibilia na elogelo enziwa iyo deretu. Ninele owodha okamihedha murala wehu olibiha mandano awa vina egumi yawa yomuyani, ninele olagiha vina wila ninokwela Mazu a Mulugu.​—Masalmo 119:11.