1. Ninfanyeela ovyona dhavi na nroromelo nehu?

NROROMELO elobo ehina attu enjene. (2 Tesalónika 3:2) Mbwenye Yehova onowavaha nroromelo etene animulabela. (Roma 12:3; Galásia 5:22) Nitamaalele nroromelo ninivahile Yehova!

2, 3. (a) Ninapurelemo eni nigakaana nroromelo? (b) Mavuzo gani anatxokotxelihu ovanene?

² Yehova omuleva mwana waye wi abale etene animuroromela Yezu aleveleliwe dhottega dhawa. Ejo enowakamihedha attu okala amarho a Yehova, vina okalawo na mukalakala. (Joau 6:44, 65; Roma 6:23) Yehova muttu waderetu! Masiki nigaali attegi vina banittongeliwe okwa, Yehova ohoona wila ninowodha okosa dhilobo dhapama. (Masalmo 103:10) Iyene onikamihedha osunza sabwa ya Yezu vina mukutto waye. Ninojedhela egumi yamukalakala, akala ninomuroromela Yezu!​—Kengesa 1 Joau 4:9, 10.

 ³ Dhihikalawo dhilobo dhina dhinasunzihu dhinenjedhedha nroromelo? Okaana nroromelo, oziwa dhilobo dhikosile Yehova vina dhinakosiye musogorho bahi? Ndowe noone txini enfanyeelihu okosa.

4. Okaana nroromelo entapulela nni?

⁴ Omuroromela Yehova na Yezu, kahiyo bahi oziwa esile dhinnikoselani. Entapulela okaana efunelo enddimuwa ya okalawo mowiwanana na esile dhinnisunzihani. Vina ovilibihedha wakamihedha attu eena wi amuziwe Yehova na Yezu. Murumiwi Paulo ologa: “Ogalaleya na mulomo wawo wi Yezu ddi Nabuya, ogaroromela na murima wawo wi Mulugu omvenyiha mukwani, weyo onovuneya. Pumwenemo: ole onroromela na murima waye, Mulugu onomwakela; ole onvuwiha na mulomo waye eli Yezu Kristu, onovuneya.”​—Roma 10:9, 10; 2 Korinto 4:13.

5. Nroromelo nikaleli eni namakamaka, nanda nikose eni wila nilibihe nroromelona? Katagiha.

⁵ Txibarene, wi nijevo egumi yamukalakala mwilaboni eswa ya Mulugu, jaderetu okaana nroromelo vina olibiha nroromelona. Nroromelo nili ninga muri otxeyiwe. Ninofanyeela wika manje wi muriya wunuwe vina okaane mitxitxi. Akala kaninyettiha, muriya onowuma. Mwadhawene nikose yakakene na nroromelo nehu wi nikale “noliba” vina “nunuwe”.​—Tito 2:2; 2 Tesalónika 1:3; Luka 22:32; Ahebreu 3:12.

6. Dhilobo gani bili dhinloga Ahebreu 11:1 sabwa ya nroromelo?

⁶ Va Ahebreu 11:1, Bibilia onologa entapulela nroromelo. (Kengesa.) (1) Nroromelo “thi nikoma n’owakela dhinjyedhihu.” Ologa “dhinjyedhihu” entaganyiheya na dholibela dha Yehova dha musogorho. Motagiha, nikaana ebaribari wi obure onele ogoma, nanda onele okala elabo eswa. (2) Nroromelo “thi nikoma ninniziwiha dhiliwo dhihinoneya,” obe ezinddiyelo ya ‘esile dhiliwo dhihinwodhihu woona.’ Iyo nihiziwa wila Yehova Mulugu, Yezu Kristu, angelo, na Omwene wa wirimu dhihikalawo mbwenye iyo kannonaga na mento ehu. (Ahebreu 11:3) Ninalagihe dhavi wila ninororomela dholibela dha Mulugu na esile dhihinona iyo? Ninolagiha na mweddelo wehu, malogelo na merelo ehu.

7. Yotagiha ya Nowé ennikamihedha dhavi ononelamo entapulela okana nroromelo? (Koona foto eli omaromo.)

⁷ Yotagiha ya Nowé ennisunziha eni sabwa ya nroromelo? Murumiwi Paulo ologile wi Nowé, “omvuruwana Mulugu wamwaddela dhàfuna opadduwa, dhihinathi woneya, omukumga pangaya mvuneyile iyene na amudhaye.” (Ahebreu 11:7) Sabwa ya ororomela dhaloga Yehova, Nowé ommaga pangaya munddimuwa. Txino anamwanddamani aye aninvuza sabwa yamagileyi pangayayá. Noona, nikaana ebaribari wi Nowé txipo kamaalile. Bibilia onloga wila Nowé “wasunziha mukalelo wa muthu womyala  murima.” (2 Pedro 2:5) Iyene wahalaleya attu wi Mulugu agahidhana mpulo wi atolotxe avuti. Txino iyene wahawaddela dhetene dhaloga Yehova: “Ddinoatolotxa-wene athu, vowi adhaliha obure mwilaboni; ddinowagomiha vamodha na elaboyá,” vina “Miyo ddinfuna orubwiha mpulo munddimuwa, onatolotxe mwilaboni athu na vitagano dhotene dhamento. Dhetene dhilimo dhinomala.” Nowé wahawaddela attu etene elobo yafanyeelani okosa wi avuluwe. Yehova wahiloga: ‘Mvolowe mpangayani.’​—Wita 6:13, 17, 18.

8. Tiago ologile dhavi sabwa ya nroromelo?

⁸ Tiago ohileba vina sabwa ya nroromelo. Iyene txino olebile murumiwi Paulo bamalile walebela Ahebreu. Tiago oleba: “Apa ddonihé nroromelo nawo nihinna merelo; miyo na merelo aga, ddinowutonyihedha nroromelo naga nineddémina.” (Tiago 2:18) Tiago otapulela wila okaana nroromelo kahiyo bahi orumeela. Adomonyo anorumeela wila Mulugu okalawo, mbwenye awene kanimuroromela Yehova. Ottiya ejuwene awene anomusadduwela mopitta. (Tiago 2:19, 20) Muttu onimuroromela Mulugu, onolagiha merelo apama. Jijuwene ekosile Abramu. Tiago oleba: Abramu “wakeleliwé merelo, jowi omuleva mwanaye Izaki vebuwani. Veneva weyo onowona wi ororomela waye weddilé vamodha na merelo; vina ororomela oko wakwanihiwé na merelo.” Musogorhomwa ologa wila nroromelo nihina merelo kanimpura elo, olebile dhahi: “Txibarene maningo ahina muzimu, bokwa; nroromelo vina nihina merelo, thokwa.”​—Tiago 2:21-23, 26.

9, 10. Omuroromela Mwana ontapulela eni?

⁹ Vyaka 30 musogorhomwa, Joau oleba Muttaka vina makarta mararu. Ninga mwakosela anameleba Bibilia eena, Joau wannonelamo yatapulela Nroromelo. Dila dhinjene alebaga, Joau wanlabihedha mulogelo wa (verbo) ya Agregu entapulela “okaana nroromelo” na elogelo ya Etxuwabo.

¹⁰ Motagiha, Joau otapulela: “Ole onimurumela Mwana, ofwanya egumi yohimala; ohinimurumela, oyelela okalawo oku, sabwa owali wa Mulugu kunamuthiye.” (Joau 3:36) Omuroromela Mwana, ontapulela omwiwelela Yezu. Txibarene mmaleboni a Joau ninoona wila Yezu ologa dila dhinjene wi nigafunaga ofanya egumi yohimala, nimuroromele iyene na Babe.—Joau 3:16; 6:29, 40; 11:25, 26; 14:1, 12.

11. Ninamutamaalele dhavi Yehova sabwa ya oziwa ebaribari?

¹¹ Yehova onolabihedha muya waye wokoddela wila anisunzihe ebaribari mwaha waye vina wa Mwanaye, vina wi naaroromele. (Kengesa Luka 10:21.) Ninalagihe dhavi wi ninomutamaalela Yehova  na dhetene esi dhinnikoseliye? Txipo kanidduwale omutamaalela sabwa ya orumeela wi nikaane mandano na iyene vina Yezu, ole “onnakwaniha muroromelanimwá.” (Ahebreu 12:2) Vina ninolibiha nroromelo nehu mwa omuloba Yehova vina osunza Nzu naye.​—Éfeso 6:18; 1 Pedro 2:2.

12. Ninakose eni nigakaana nroromelo?

¹² Ninofanyeela olagiha na merelo ehu wila ninororomela dholibela dhetene dha Yehova. Motagiha, ninowalaleya attu miselu dhapama dha Omwene wa Mulugu, vina wakamihedha okala anamafara a Yezu. Noona “mudhidhi wotene onwodhihu, nawirele dhapama athu otene, makamaka amudhi a kristu.” (Galásia 6:10) Apa nikose kukuttu wila nipé merelo otene “alí vimanya dha mwilaboni” vina kanittiye elobo-elobovi otakaliha mandano ehu na Yehova.​—Kolosi 3:5, 8-10.

13. “Omuroromela Mulugu” okaleli eni wamakamaka? Bibilia onloga dhavi esidha vina sabwa jani?

¹³ Bibilia onloga: “Pumwenemo muthu ohinna nroromelo, kanwodha omuziveliha Mulugu, ole onimususela Mulugu, enofuneya orumela wi Mulugu okalawo, vina onoathuva abale animutamela.” (Ahebreu 11:6) Bibilia onologa vina wila elobo yoroma enakaliha Akristu ku “omuroromela Mulugu.” Eji epaddi yoroma ya ‘yimelelo yehu.’ (Ahebreu 6:1) Ottiya nroromelovi, jaderetu wunuwiha merelo meena, ananikamihedhe okaana vina olibiha mandano ehu na Yehova.​—Kengesa 2 Pedro 1:5-7; Juda 20, 21.

14, 15. Moligana na okwela, nroromelo nikaleli eni namakamaka?

¹⁴ Anamaleba Bibilia aloga nroromelo opitta ekalelo yina. Ejoya entapulela wila nroromelo elobo yamakamaka enfanyeelihu okaana?

¹⁵ Paulo oladdaniha nroromelo na okwela. Iyene oleba: “Kofiyedha nroromelo nawakwana nowodha omwaliha myango, dditowa okwela, kaddigali elo.” (1 Korinto 13:2) Yezu ologa dhahi: “Nlamulo nddimuwana” ku omukwela Mulugu. (Mateu 22:35-40) Okwela ononikosiha okaana mikalelo dhinji dhinimuzivela Mulugu. Motagiha, Bibilia onologa wi  onkwela “onovilela dhetene.” Mwa dhahene okwela onele onikamihedha orumeela dhetene vina okuluvela dhetene dhinloga Mulugu mBibiliani.​—1 Korinto 13:4, 7.

16, 17. Txini enloga Bibilia sabwa ya okwela na nroromelo? Dhilobo esi bili enddimuwayavó jivi, vina sabwa jani?

¹⁶ Nroromelo na okwela esi dhilobo dhamakamaka, vina anamaleba Bibilia aloga mikalelo esi mumodhani. Paulo ohalibiha abali wi “ninofanyela neddegena ororomelana na okwelana.” (1 Tesalónika 5:8) Pedro oleba dhahi sabwa ya Yezu: “Nyuwo muhimonilevi Yezu, munomukwela. Ddabuno vina wohimonene, munomuroromela.” (1 Pedro 1:8) Tiago wahavuza abali aye ottikitteliwa: “Mulugu kàsakulile ahawi a mwilaboni mpuno, wi àrelihe na nroromelo, adhe wakela Omwene wapikirheliye abale animukwela?” (Tiago 2:5) Joau oleba wila nlamulo na Mulugu ttintti, “nimurumele Mwanaye Yezu Kristu, nikwelanege mukalelihu ninga munilamuleliye.”​—1 Joau 3:23.

¹⁷ Paulo oleba: “Ovano dhikalawo dhilobo esi tharu: orumela, ororomela, okwela; enddimuwayávo okwela.” (1 Korinto 13:13) Musogorho kaninatamele ororomela dholibela dha Mulugu, sabwani dhinele wireya. Ninele okaana egumi yohagalaliha ninga mulogeli Bibilia. Enfuna ohalawo ku wunuwiha omukwela wehu Mulugu vina nlogo naye. Txibarene okwela wehu onele wunuwavi na mukalakala.

18, 19. Masaka abano nimpurelamo eni mwa nroromelo ninkana nlogo na Yehova, nanda nttittimihona nindowa wa ani?

¹⁸ Attu a nlogo na Yehova masaka abano anororomela Omwene waye nanda anokamihedha. Anokwelana muttu na mukwaye. Eji empadduwa sabwani awene aneddihiwa na muya wokoddela wa Mulugu. (Galásia 5:22, 23) Yopurelavoya jivi? Muttengo mamiliau matanu na mararu wa abali orugunuwa elabo yotene akaana murenddele mmilogoni mwawa. Txibarene nroromelo na okwela dhilobo dhadretu dhina guru yopitta.

¹⁹ Murenddele obu onowodheya sabwa ya nikamihedho na muya wa Mulugu. Matamaloya otene ninvahege iyene. (Izaiya 55:13) Txibarene iyo ninomutamaalela sabwa ya onivaha gari ya ovulumutxiwa na “okwela oku wa Mulugu.” (Éfeso 2:8) Yehova onele wakamihedha attu enjene wi amuroromele iyene. Omamalelowa, elabo enele okaliwa na attu a mirima dhomyala, oligana vina ohagalala anamwebedhe Yehova na mukalakala!