MOWIWANANA na Mateu 13:24-26, Yezu ologa: “Omwene wa wirimu onladdana na muthu wàlile beu yapama mmunddani mwaye. Mathiyu athu agonaga, mwiddani waye odha, wàlamo ntaje mmunddani mwali tirigu, odhowa vyaye. Tirigu onuwaga, ntaje vina niroma woneya.” Anamaleba enjene kanrumeela wila nladdaniho ntti nankoseya, mbwenye mowiwanana na dholebiwa dhawale dha akadda Roma, elobo ninga eji yampadduwa.

Disionario dhahi wa Bibilia, onloga wi mowiwanana na malamulo a Roma, wala ntaje mmunddani mwa muttu mwina na efunelo ya wiyihedha ntxiga, wali otabala onddimuwa. Okalawo nlamulo naloga ejene, entapulela wila yampadduwa-wene. Namasunza ontxemerhiwa Alastair Kerr otapulela wila yaka ya 533 Yezu bakwile, Mulamuleli wa Roma Justino, wahivuwiha nivuru naye. Nivuru ntto nagwaddela malamulo a Roma vina mwanfanyeya dhowenjedha dha aziwetxi a malamulo oromana yaka ya 100-250 Kristu bakwile. Mowiwanana na nivuru ntto, muziwetxi Ulpiano, ologa wila makani aba ampadduwaga mwari mwa vyaka mazana meeli oroma. Mwahikala olagihiwa wa muttu bagala ntaje mmuddani mwa muttu mwina, oku tirigu anongeyaga. Malamulo a Nivuru ntto aloga wi namaala ntaje wanttogeliwa muttengo wi ampitxele munya, apitxelaga dhetene dhinongeyile.

Dhilobo esi dhampadduwa o Roma, elagihaga wila mazu alogile Yezu odheela musibo ampadduwa-wene.