1, 2. (a) Txini enfwanyelihu okosa vagapadduwa matxinjo? (Koona foto eli omaromo.) (b) Mowiwanana na Masalmo 131 txini enanikamihedhe okana murenddele muyubuweloni?

MULABELI Lloyd na Alexandra o’Beteli mwari mwa vyaka 25, awene ahidha ottomiwa ninga apionero. Voromavene awene kaziveliwe. Lloyd ohiloga: “Miyo ddanziveliwa vaddiddi mabasa akosimi. Valimi o’Beteli ddanrumela mabasa mabasavi attomeliwemi, mbwenye musogorhomwa vattomeliwehu ninga apionero kiyaddizivelile, ddavyona ninga ninyanyaliwe.” Masaka mena ddanziveliwana mabasaya opionero mbwenye masaka menaguwa ddakala wokumuwene.

² Mudhidhi-mudhidhivi, vanele opadduwa matxinjo ahajedhelihu, abene ananittukulele wubuwela vaddiddi vina  onizuzumiha. (Gano 12:25) Akala enopadduwa matxinjo mwigumini mwehu ninakose nni wila nihidhugudheye? (Kengesa Masalmo 131:1-3.) Ninele osunza dhotagiha dha emeleli a Yehova a masaka a mundduni vina a masaka abano akanile murenddele muyubuweloni masiki na matxinjo ohijedheleya mwigumini mwawa.

3. Txini empadduweli José?

³ Katanalela yotagiha ya José. Mwa aima otene a Jakob, wakweliwetxa wali José. Nona abalaye animwidda vaddiddi. Mwakwanihedhiye vyaka 17, wahigulihiwa ninga mudhari. (Wita 37:2-4, 23-28) Mwari mwa vyaka 13, wahitabuwa w’Ejipitu, voroma ninga mudhari, musogorhomwa ninga munyaperhezu. José wali wolapelana na babe wamukweletxa. Na makattamiho otene agumanana iyene txino agamuttukulela ohikana njedhelo vina osilidhiwa, mbwenye kakumuwile wali wolibene. Txini emukamihedhile?

4. (a) Txini ekosile José bali mukamburha? (b) Yehova wakulile dhavi nlobelo naye?

⁴ José mu kamburha mwaliye wantabuwa vaddiddi masiki dhawene iyene wanimuroromelavi Yehova. (Wita 39:21; Masalmo 105:17-19) Wannubuwela yarohiliye bali muzombwe, dhilobo dhene esi dhannimukamihedha ononelamo wila oli na Yehova. (Wita 37:5-11) Iyene wahikosa nlobelo alogaga dhili mmirimani mwaye. (Masalmo 145:18) Yehova wahidha wakula nlobelo na José, modhela ompangarhaza vina omulagiha ‘wi oli na iyene’ masiki epadduwe elobo-txilobo.​—Merelo 7:9, 10. * (Koona yowenjedhedha.)

5. “Murenddele wa Mulugu” onnikamihedha dhavi odhowavi banigamulabela Yehova?

⁵ Makattamiho-makattamihovi angumanana iyo, nikane ebaribari wila enowodheya okana “murenddele wa Mulugu” vina mureddeleya onele obarela “mubuwelo wehu” wi nikale ofwasa. (Kengesa Filipi 4:6, 7.) Nigazuzuma na makattamiho obe nigasilidheya, “murenddele wa Mulugu” onowodha onivaddiha wi nimulabele Yehova nihiyelelaga mundduni. Ninfuna nisunze dhotagiha dha abali na arogora a masaka abano anfwanyiwa makattamiho.

6, 7. Okosa nlobelo ologaga ejile enfuniwe enkamihedha dhavi okana murenddele wili? Kavaha yotagiha.

⁶ Ryan na Juliette vewalani wila mabasa akamihedhani opionero a mudhidhi wetene ohigoma awene kaziveliwe. Ryan ohiloga: “Nahinpanga Yehova dhotedhene dhali mmirimani mwehu. Iyo nanziwa wila nanfwanyela omukuluvela Yehova na murima wehu wotene. Attu enjene mmulogoni mwehu ali aswa, nona nahimukumbirha nikamihedho Yehova wila aniwodhihe okala tagiha yaderetu.”

⁷ Yehova wakulile dhavi nlobelona? Rayn ohiloga: “Mohijedheleya mmalelihu olobela onyimuleya okule wanihuna wahivira. Murenddele wa Mulugu onkoya  murima wehu na mubuweloya wahinilibiha. Iyo ninomulabelavi Yehova ninga munwodhelihu, nikanagavi monelo waderetu.”

8-10. (a) Muya wa Mulugu onnikamihedha dhavi nigazuzuma na makattamiho? (b) Nigazuzumela mabasa a Yehova iyene onikamihedha dhavi?

⁸ Muya wa Mulugu onowodha onikamihedha ofwanya ottugarheya, versu dha mBibilihani vina dhinonikamihedha ononelamo ttima ena egumi yehu. (Kengesa Joau 14:26, 27.) Ndoweni none empadduweli Fhilip na Mary, atelani akamihedhile o’Beteli mwari mwa vyaka 25. Nvireli myeri minayi mbudduwelani o’Beteli, ahikweliwa amayi awa na anamudhi ena, vina anfwanyela omukamihedha babi wa Mery wali mureddda.

⁹ Philip ohiloga: “Miyo ddobuwela wila dhilibo dhannedda deretu mbwenye nne kadhedda-wene. Mwang’aneli wosunzana ovaha yotapulela ya Kolosi 1:11. Miyo ddannivilibihedha mbwenye kaddawodha ovilelawa. Ddanfwanyela ‘ovilibihedha-wene wi ddikale wokurumuwa vina wohagalala.’ Versu eji eddubutxedha wila wagalala waga kunda mwa okala mugumi obe ohikala mugumi mbwenye onda ddigakana muya Mulugu.”

¹⁰ Velani Philip na Mery ahivilibihedha mmabasani a Yehova, awane ahirurihiwa na mukalelo wottiyana-ttiyana. Mbudduwelani o’Beteli, ahizuzumela masunzo awa a Bibilia, anamasunzaya ankumbirha asunza malabo meli obe mararu vasumanani. Mary ohiloga: “Awene annagalaliha vaddiddi, akalaga ninga Yehova wele onaddela wila dhotedhene dhinouweddelani deretu.”

11, 12. (a) José okosileni wila Yehova amururihe? (b) Yehova omururihile dhavi?

¹¹ Egumi yehu egatxinja labo-labovi, txino ninele ozuzuma vina ninele wubuwela mwaha wa makattamiho ehu. Japama wubuwela epadduwile na José. Iyene wahisakula okosa elobo emukamihedhile mmakattamihoni agumanana iyene. Walaba va Putifar, vina mukambura wali ninga mwang’aneli wa afugeliwi akwaye.​—Wita 39:21-23.

¹² Iyene wahittomeliwa mabasa a wawang’aneli afugeliwi eli alaba vatakulu va fumu Putifar. Labo dhahi muvenyelani na membesi anamalaba abale eli ahidhugudheya  vaddiddi na erohilani mattiyu. (Wita 40:5-8) José kaziwa wila oroha okule wanna alobwana abale ogahimuttukulela obudduwa mukamburha. Vyaka bili musogorhomwa ahidha obudduwa-wene bakala mulamuleli wanawili w’Ejipitu. Woroma wali Faraó wanawili wali iyene!​—Wita 41:1, 14-16, 39-41.

13. Enfwanyelela nni okosa elobo-txilobo wila nirurihiwe na Yehova masiki nitabuwaga?

¹³ Ninga José kanikale nokihu nigafwanyiwa makattamiho otiyana-ttiyana ahinwodhihu owanana. Nigakala okurumuwa vina nikosa enwodhihu Yehova onele wikavo nlada. (Masalmo 37:5) Akala iyo ninozuzuma na makattamiho obe ninodhugudheya na elobo-txilobo ‘kanirimeliwe nroromelo’ obe njedhelo nehu. (2 Korinto 4:8) Yehova onele okala na iyo nigavilibihedha mmabasani a olaleya.

14-16. Filipi azuzumela dhavi mabasa olaleya masiki egumi yaye vatxinjeyilani?

¹⁴ Filipe yotagiha yaderetu, iyene muttu weka mabasa a Yehova vamburoni voroma masiki vapadduwilani matxinjo mwigumini mwaye. Wahidha ovahiwa mabasa maswa o’Jeruzalemi. (Merelo 6:1-6) Masiki dhawene egumi yaye yahitxinja. Nsakanene ntto akristu anfwara-fwariwa vaddiddi; bu mudhidhene obo opiwe Estêvau. Mwaha wa ofwara-fwariwa, Akristu ena ahittawela o’Jeruzalemi. Mbwenye Filipi wahizuzumela omulabela Yehova, iyene wahala o’Samariya wila alaleye attu afuna wiwa miselu dhapama.​—Mateu 10:5; Merelo 8:1, 5.

¹⁵ Filipi wahigana odhowa warumiwiye na muya wa Mulugu. Yehova wahimulabihedha wila alaleye miselu dhapama attu ali ahinewa ebaribari. Ayuda enjene vawonani attu a elabo ya Samariya annapwaza vaddiddi. Mbwenye Filipi kazuzumile na ejuwene vina kanyonyehile; wahidhowa walaleyela miselu dhapama. Akadda Samariya anninvuruwana vina onnona ‘matikiniwo akosiye’!​—Merelo 8:6-8.

¹⁶ Musogorhomwa muya wa Mulugu wahimweddiha mpaka elabo ya Azoto vina muttette wa Sesareya, wenewo wenjivile Amalabo wila alaleye. (Merelo 8:39, 40) Bali wenewo egumi yaye yahitxinjeya. Iyene wahidha okana murala. Masiki egumi yaye vatxinjeyilani na mukalelo wahajedheliye, wahidhowanavi mabasa aye olaleya, nanda Yehova wahimururiha vaddiddi iyene na murala waye.​—Merelo 21:8, 9.

17, 18. Masiki egumi yehu etxinjeye, ozuzumela mabasa olaleya onanikamihedhe dhavi?

 ¹⁷ Attu enjene ali mmabasani a mudhidhi wotene ageka mabasa a olaleya vamburoni voroma, awene anele okana wagalala masiki egumi yawa etxinje. Motagiha, atelani dhahi ankala epaddi ya Afrika do Sul ankuweliwa Osborne na Polite ahibudduwa o’Beteli, awene obuwela wila egakala yorutxa ofwanya mabasa a mudhidhi mung’onovi vina okana mburo wokalagavo. Mbwenye kipadduwile dhawene, Osborne ohiloga: “Mokubanyiha-mwene, mabasa kanagumeli ninga yobuwela iyo.” Polite owenjedhedha: “Kanafwanyile mabasa mwari mwa myeri miraru, kanakoyile kobiri. Txibarene yali yorutxa.”

¹⁸ Txini emukamihedhi Osborne na Polite owodha owanana makattamiho awa? Osborne ohiloga: “Olaleya vamodha na odhowa omatugumanoni sinikamihedhile.” Ottiya okala vatakulu akubanyene, azuzumeli mabasa a olaleya. Okosa ejene enodhana wagalala ohimpimeya! Osborne ohenjedhedha: “Iyo nahidha ofwanya mabasa mohijedheleya.”

19-21. (a) Txini enanikamihedhe okana murenddele muyubuweloni? (b) Akala ninovilibihedha okala owimela txitti masiki na makattamiho angumanana eyo ninapurelemo nni?

¹⁹ Ninowonaga wila nigavilibihedha masiki nifwanyiwaga makattamiho vina nimuroromela Yehova na murima wotene, iyo ninele okana murenddele masiki epadduwe elobo-txilobo. (Kengesa Mikeya 7:7.) Mudhidhi wa ovyogolela vina otxinja mweddelo wehu bubwene vina womaga mandano oliba na Yehova. Polite ohiloga wila obudduwa o’Beteli omukamihedha wona wila enofwanyela otamela nikamihedho na Yehova masiki dhamwigumini dhigaheddege deretu. Iyene ohilogavi: “Wandana wehu ohivadda.”

 ²⁰ Mary ologiwe mumdduni, onkala na Babe oli muredda onfuna nikamihedho naye onlaba vina ninga pionera. Iyene ohiloga: “Ddihisunza wila ddigazuzuma na makattamiho ddinofwanyela oroma wimela, olobela vina ovuma. Ottiya makattamiho otene mmadani mwa Yehova ehiddisunziha elobo yamakamaka, nona ddinofwaseyela wubuwelaga dhamusongorho.”

²¹ Lloyd na Alexandra anorumela wila otxinja wa egumi onowobaniha nroromelo nehu na mukalelo wohijedheleya. Mbwenye awene ahifiyedha wona wila makattamiho agumanilanina ehakamihedha. Ovano nroromelo nawa ninkala nolibanene masiki agafwanyiwa makattamiho, vina aroma okala attu aderetu.

22. Akala ninokosa munwodhela iyo masiki akala egumi yehu enotxinja ninajevo nni?

²² Mwilaboni ejino yabure, egumi enotxinja mohijedheleya. Ninowakela ettomo yottiyana-ttiyana mmabasani a Yehova, ninokana makattamiho mwigumini obe enofuneya wazuzumela attu a vamuralani vehu. Elobo yamakamaka enfwanyela weyo oziwa jawi masiki epadduwe elobo- txilobo mwigumini mwawo Yehova onele wuzuzumela vina onele wukamihedha ogafwanyiwa masaka orutxa. (Ahebreu 4:16; 1 Pedro 5:6, 7) Ovanene masiki na makattamiho kakosa elobo-txilobo. Kamulobelele Babi wawo Yehova vina kasunza omukuluvela iyene na murima wawo wotene. Ogakosa dhahene masiki akala egumi yawo enotxinja, weyo onele okana murendddele onda mwa Yehova.