1, 2. Mukweli Mizé mabasa gani avahiwe Josuwé?

YEHOVA ohiloga na Josuwé: ‘Mwimeleli waga Mizé okwa. Kavenya, weyo na nlogo notene mmuabuwe Jordau, nvolowe mwilaboni enavahe miyo ana Izrayel.’ (Josuwé 1:1, 2) Yali elobo yorutxa, sabwani Josuwé wali ninga mukamihedhi wa Mizé mwari mwa vyaka 40!

² Mizé, wali musogorheli wa ana Izrayel mudhidhi mwinjene, mbwenye ovano ddi Josuwé wafuna oroma waweddiha. Iyene txino wannubuwela akala attuya agahimurumela ninga musogorheli wawa. (Olibiha 34:8, 10-12) Yaddiwagana nlebo na Josuwé 1:1, 2, nivuru dhahi ninkamihedha omunonelamo Bibilia ninloga wi elobo yowopiha vaddiddi musogorheli wa nlogo agatxinjiwa, mwina amuhaba mpaddo.

3, 4. Yehova omururihile dhavi Josuwé sabwa yomwiwelela, nanda ninfwanyela ovikosa nivuzo gani?

 ³ Josuwé wahikana mwaha wawova. Mbwenye iyene wahimwiwelela Yehova vina wahifwara s’ohigonela malago aye. (Josuwé 1:9-11) Velani Josuwé wannimukuluvela Mulugu, wahakela maruriho menjene, iyene vamodha na ana Izrayel aheddihiwa na anju wa Mulugu. Enkala ninga anju oddule wali Nzu, obe nammodha wa Mulugu.​—Obudduwa 23:20-23; Joau 1:1.

⁴ Yehova wahakamihedha ana Izrayel orugunutxa mubuwelo wawa ofiyedha omurumela Josuwé ninga musogoreli wawa. Masaka abano, anopadduwa vina matxinjo menjene. Ninofwanyela ovivuza ‘Velani Nikuru na Mulugu ninodhowavi vasogorho, ninofwanyela omuroromela musogorheli wehu, Kristu?’ (Kengesa Mateu 23:10.) Wila nakule nivuzo ntti, enofuneya ononelamo mukalelo weddihile Yehova nlogo naye nsaka nawale.

5. Elobo gani empadduweli Josuwé waddamana kwatti ya Jerikó? (Koona foto eli omaromo.)

⁵ Mmaleli ana Izrayel omwabuwa Jordau, Josuwé wahidha okana monelo wohijedheleya. Addamelaga kwatti ya Jerikó, iyene wahimona mulobwana wana supadda. Nona wahinvuza: ‘Nyuwo muli wehu, peno muli mwiddanihu?’ Josuwé wahitikina mmwiweliye mulobwana oddule alogaga dhahi ‘miyo ddili munddimuwa wa nikuru na anyakoddo a Yehova,’ ddidhelé obarela nlogo naye. (Kengesa Josuwé 5:13-15.) Masiki elogiwaga wila ddi Yehova waloga mwinyene na Josuwé, eji enoligana na yakosa Mulugu masaka mena mundduni, amulabihedhaga anju, akalaga ninga mulomo waye.​—Obudduwa 3:2-4; Josuwé 4:1, 15; 5:2, 9; Merelo 7:38; Galásia 3:19.

6-8. (a) Ofwara monelo wa anju ekalele nni elobo ehimpadduwetxa? (b) Ninziwa dhavi wila monelo waderetu onda mudhidhi onfuneya? (Koona vina yowenjedhedha.)

⁶ Anju wahimwaddela Josuwé yafwanyeliye okosa wila attukule elabo ya Jerikó. Vamaromo malagoya kanoneleyamo deretu. Motagiha, anjuya wahimwaddela Josuwé wila anyakoddo otene arome otxetteliwa. Eji yatapulela wila kagakanile guru yowana malabo mang’onovi. Obule wali mudhidhi waderetu wila anyakoddo abale atxetteliwe?​—Wita 34:24, 25; Josuwé 5:2, 8.

⁷ Txino anyakoddoya annivivuza, ‘Iyo ninawodhe dhavi obarela murala wehu, amwiddani agafiya?’ Mbwenye mohijedheleya yahipadduwa elobo! Alobwana o’Jerikó ottiya wabuddugela ana Izrayel, el’owawova. Malebo anloga wi: ‘Muttette wa Jerikó wali wobareleyene, misuwo dhofugadhene, mwaha wa wawova akadda Izrayel; kawo wabudduwa nne wavolowamo.’ (Josuwé 6:1) Ovano ana Izrayel anfwanyela okuluvela-wene mweddihedho wa Mulugu!

⁸ Anju wahimwaddela Josuwé wila ahimbuddugele Jerikó. Awene anfwanyela orugunuwa muttetteya dila modha va siku, mpaka malabo matanu na nimodha. Amwiddani awa obuwela wila ejile ‘yakosa ana Izrayel yali otolo!’ Mbwenye ana Izrayeliya annonelamo wila musogorheli wawa onoziwa enkosiye! Ofwara malago aye ehilibiha  nroromelo nawa, vina awene kawova anyakoddo o’Jerikó.—Josuwé 6:2-5; Ahebreu 11:30. * (Koona yowenjedhedha.)

9. Enfwanyelela nni ofwara malago anttambirhihu mmulogoni mwa Mulugu? Kavaha yotagiha.

⁹ Ninsunzavo nni na yotagiha eji? Munikuruni mwa Yehova ninowiwagamo matxinjo, mbwenye masaka mena kaninnonelamo deretu matxinjoya. Motagiha, txino nobuwela wila kahiyo elobo yaderetu olabihedha muttitto obe tableti wila nikosena nsunzo nomwinya, olaleyana obe wonana matugumano. Mbwenye ovano ninowonamo yopurelamoya. Nigonaga yopurelamo ya matxinjoya, nroromelo nehu ninovadda vina ninokala mumodhani na abali vamodha na arogora ehu ali orugunuwa elabo yotene.

10. Bani okosile masasanyedho wila okale matugumano o’Jeruzalemi na nikuru nolamulela wila atakuneliwewo makani otxetteliwa?

¹⁰ Muvireli vyaka 13, mulobwana dhahi wali Mmalabo wohitxetteliwe wahifiyedha okala Mukristu, Akristu ena ali Ayuda anloga wila otxetteliwa kofuneya. (Merelo 15:1, 2) Abali akala kwatti ya Antiokiya ahizuzuma na makani aba. Anddimwa a nlogo ahikosa masasanyedho wila Paulo adhowe o’Jeruzalemi wi avuze abali akosa epaddi na nikuru nolamulela mwaha wa makaniya. Txini emukosihile Paulo odhowawo? Mwinyene  ohakula: “Ddidhowawo ddifwaraga yaddaddeli Nabuya.” Txibarene, ddi Kristu weddihile nikuru nolamulela ofiyedha otapulela mowakwana mwene makaniya.​—Galásia 2:1-3.

11. (a) Akristu ena ali Ayuda atonyihedhile dhavi wila anroromela otxetteliwa? (b) Paulo owodhile dhavi, wakamihedha anddimuwa o’Jeruzalemi? (Koona vina yowenjedhedha.)

¹¹ Nikuru nolamulela nahidha ononelamo na nikamihedho na Kristu wila kili yofuneya muttu otxetteliwa wila akale mukristu, nona awene ahawaddela Ayuda ena wila kiyali yofuneya muttu otxetteliwa wila akale mukristu. (Merelo 15:19, 20) Vyaka dha musogorho, Ayuda owinjiva annatxettelihavi aniwa. Anddimuwa a nlogo o’Jeruzalemi anna wiwa attu onlagana mmirimani wila Paulo kanfwara Nlamulo na Mizé. Anddimuwaya ahimwaddela Paulo wila akose elobo enlagiha wi onoriha Nlamulo na Mizé. * (Koona yowenjedhedha.) (Merelo 21:20-26) Awene ahimpanga Paulo wila alobwana anlaba mumparhani na attu ena annimona Paulo alupaga Nlamulo. Paulo wahigwadda dhahi: ‘Eso dhinloginyu kadhikalile! Munddivuzelani akala miyo ddihikosa ejuwene? Ayuda abale ahanonelamo makaniya a otxetteliwa bapupuruwile, ottiya Paulo.’ Pauloya wahinonelamo wi anddimuwa a nlogo afuna wila Akristu otone akale mumodhani, vina noviyeviha afwarege malago avahiwani. Nivivuze, Yezu wattiyedhile nni makani otxetteliwa ologiwagavi mudhidhi mwinjene, kito nlamulo na Mizé nahikwela mudhidhi okwile Yezu?​—Kolosi 2:13, 14.

12. Kristu ottiyedheli nni ovira mudhidhi mwinjene wila avahe yowakula yofwanyelela sabwa ya otxetteliwa?

¹² Wogolela yubuwelo kahiyo elobo yovevuwa. Ayuda ena attukula mudhidhi mwinjene wi arumele yawi kali mutxiddo mwa Nlamulo. (Joau 16:12) Mwa awene otxetteliwa yakala ninga ezinddiyelo yokana wandana wofiyedheya na Mulugu. (Wita 17:9-12) Attu ena ova anafwara-fwariwe na Ayuda ana mweddelo wottiyana. (Galásia 6:12) Musogorhomwa, Kristu wahavaha malago mena amulabihedhaga Paulo.​—Roma 2:28, 29; Galásia 3:23-25.

13. Txini enanikamihedhe ononelamo mukalelo onsogorhela Yezu masaka abano?

¹³ Masaka abano vina Yezu Onosogorhelavi mulogo wokristu. Ogona wila ehikalawo elobo etxinjiwe mmulogoni mbwenye weyo kunonelimo, japama wubuwela mukalelo weddihile Kristu nikuru na Mulugu masaka a mundduni. Nsaka na Josuwé, vina na arumiwi; Kristu wahavaha malago okuluveleya abene abarelile, avaddihile  nroromelo nawa vina akamihedhile okala mumodhani.​—Ahebreu 13:8.

14-16. Weddihiwa na ‘mwimeleli wororomeleya wa malago’ entonyihedha dhavi wila Kristu onofuna ovaddiha nroromelo nehu?

¹⁴ Masaka abano ‘mwimeleli wororomeleya wa malago’ ononeddiha vina ononivaha malago okuluveleya anfunihu. (Mateu 24:45) Weddihiwa oku ontonyihedha wila Yezu txibarene ononitanala. Marco ona aima anayi ohiloga: “Masaka abano Satana onokosa muli mwetemwene wila obanihe mulogo ettekelaga mirega mirala. Ovano mirala dhinolibihiwa wila dhikanege webedha wa ntakulu labo nimodha vasumanani, amwazambo anokokomeziwa vaddiddi okana webedha oku​—wila awodhe obarela murala wawa!”

¹⁵ Nigazinddiyela mukalelo onneddiha Yezu, ninele ononelamo wila efunelo yaye jokamihedha nroromelo nehu oliba. Motagiha, munddimuwa dhahi onkuweliwa Patrick ohiloga: “Vamaromo-vene attu kaziveliwa otugumana na makuru mang’ono omamalelo wa sumana wila adhowe mmabasani a olaleya.” Mbwenye musogorhomwa ohiloga wila matxinjo abale ahitonyihedha wila Yezu onomutanalela muttu-muttu wa mmulogoni. Motagiha abali na arogora anetxa manyazo vina ahadhowa omalaleyoni masaka menjene, ddabuno awene ankala otapuwene wila alaleye. Eji enolibiha vaddiddi nroromelo.

¹⁶ Kristu ononikamihedha ozuzumela mabasa olaleya ali a makamaka vaddiddi ankosiwa orugunuwa elabo yotene. (Kengesa Marko 13:10.) André ottomeliwe ninga munddimuwa wa mulogo, wannivilibihedha ofwara malamulo etene avahiwiye na nikuru na Yehova. Iyene ohiloga: “Ovuguliwa wa attu ankamihedha o katti ehinubutxedha wila masaka abano omariha enofuneya ozuzumeletxa mabasa a olaleya.”

17, 18. Ekaleleni yaderetu ovilibihedha orumela matxinjo anttambirha iyo?

¹⁷ Mukalelo onneddiha Yezu Kristu, Mwene wehu, ononikamihedha masaka abano vina onele onikamihedha musogorho. Karoma wona mukalelo ompurelamo weyo ogarumela matxinjo maswa. Va webedhani wa ntakulu karomani osekeserha matxinjo akosiwe mmulogoni obe mukalelo wolaleya, okamihedhile murala wenyu.

¹⁸ Iyo nigobuwelaga wila ofwara malago a nikuru na Yehova enodhana yopureleyamo, enele okala yovevuwa ofwara noziveliwa. Ninga motagiha velani kaninpidetxa manivuru ninga mwakosilihu wale, ninowodha okana evito. Masaka abano, ninlabihedhetxa tekinologiya wila nafwanyena attu enjene miselu dhapama. Japama olabihedha deretu manivuru ehu na mavidiyuya anfwanyeya mwinternetini. Sabwani obu mukalelo mmodha womukamihedha Kristu, onfuna wila nilabihedhege dhinnivaha nikuru nehu na mirugu.

19. Enfwanyelela nni iyo omukamihedha Kristu onnisogorhela?

¹⁹ Nigamukamihedhaga Kristu onnisogorhela, ninowakamihedha abali na arogora okana nroromelo noliba vina okala mumodhani. André ologiwe, wahikosa epaddi ya anamudhi o’Beteli ya katti enddimuwa enang’anela mabasa orugunuwa elabo yotene; ohiloga: “Oderetu odditonyihedhi abali o’Beteli oddikamihedha waguva ororomela vina oriha mabasa akosa miyo. Awene anofwara mukukutta wa Yehova nona anofwanya wagalala mmabasani ankosani.”

20, 21. (a) Ninfwanyelela nni omuroromela Kristu oli Musogorheli wehu? (b) Nivuzo gani ninasekeserhiwe mutoma ondawo?

²⁰ Mohigonela, Musogorheli wehu Yezu Kristu, ‘onele ogomiha obure wotene’ vina ‘onele wira dhowumiha milomo.’ (Ovuhulela 6:2; Masalmo 45:4) Iyene ovanene ononisasanyedha wila nakele egumi mwilabo eswa, nikosemo mabasa, nasunzihe attu anavenyihiwe mukwani vina nikamihedhe okoddeliha elabo mpaka okala paraizu.

²¹ Ninofwanyela omuroromela Kristu oli Mwene wehu, masiki vagapadduwa matxinjo, sabwani iyene ddinakale musogorheli wehu mwilaboni eswa. (Kengesa Masalmo 46:1-3.) Enokala yorutxa orumela matxinjo, ttabwattabwa akala matxinjoya anonipatta. Matxinjoya agapadduwa ninawodhe dhavi okanavi murenddele vina omuroromelavi Yehova? Ninele osekeserha nivuzo ntti mutoma ondawo.