1. Yosakula gani yattimaya-ttimaya enfwanyela okosa muttu?

DHOSAKULA dha amambali masaka meena dhinowapatta anawa mwari mwa mudhidhi mwinjene. Akala amambali anokosa dhosakula dha otowa malago, anowatotela anawa segedho. Mbwenye agakosa dhosakula dha malago, anele wakosiha anawa osakula dhinahagalalihe, vina dhinapurihemo aniwa. Txibarene ayima anofwanyela osakula dha malago. Yosakula yattimaya-ttimaya enfwanyela okosa muttu ja omulaba Babi wehu wa wirimu, Yehova.—Masal. 73:28.

2. Txini dhikosile Yezu vamodha na amambali aye?

² Amambali a Yezu ahigana-wene wakamihedha anawa omulabela Yehova, vina yosakula ejile ya amambali abale yahoniha wi awene anttittimiha mabasa amukoselani Yehova. (Lk. 2:40, 41, 52) N’ekalelo yakakene Yezu ohikosa yosakula ya malago ya wakwaniha mabasa amuttomele Yehova. (Mt. 4:1-10) Yezu ohunuwana merelo a okala mwene, iyene ddororomeleya, wali mulobwana woliba murima—ohunuwa na yeddelo ya mwana-mwanavi onattabiha amambali aye animukwela Mulugu.

3. Mavuzo gani anfunihu wakula?

³ Mwari mwa mutoma obu iyo ninela wakula nivuzo ntti: Yezu okoseliwe yosakula gani na Yehova? Txini dhifwanyela osunza amambali Akristu na dhosakula dha José na Maria? Txini dhinfwanyela osunza azombwe a Akristu na dhosakula dha Yezu?

4. Yosakula gani amukoselaga Yehova Mwanaye?

⁴ Yehova ohimusakulela Yezu amambali apama vaddiddi. (Mt. 1:18-23; Lk. 1:26-38) Dhologa dhibudduwile mmirimani mwa Maria dhilebeliwe mBibiliani, dhinowoniha wi iyene wannimukwela  venjene Yehova vamodha na Mazu aye. (Lk. 1:46-55) Mwiwelelo wiwelele José dhologa dha Mulugu, dhinoniha wi iyene wannimova Muluguyá vina wanfuna okosa dhinimuttittimiha.—Mt. 1:24.

5-6. Txini dhittiyele Yehova, wi dhimpadduwele mwanaye?

⁵ Wone wi Yehova kasakule attu ofuma wi akale amambali a Yezu. Mukutto okosile José na Maria mmalele Yezu obaliwa ononiha wi awene ali ayelegi vaddiddi. (Lk. 2:24) Mabasa a José ali osema, iyene walaba vansapattani nasasanyileye vakuvi na vatakulu vaye, o Nazareti. Awene kazuzumeletxa dhorela, egumi yawa yali yoluluvene, ttabwa-ttabwa mudhidhi wenjiva anamudhi awa, ofiyedha mudhidhi wanani ayima atanu na eli.—Mt. 13:55, 56.

⁶ Yehova ohimbarela Yezu mwari mwa dhawopiha, mbwenye Iyene kambarele dhorutxa dhotene dhafwanyiwiye. (Mt. 2:13-15) Ninga motagiha, Yezu wanrutxiwa wiwanana na amudhe ahali alabeli a Yehova. Karoma wubuwela munyimuwelo wa Yezu venevo vobuweliye wi ena mwa anamudhi aye karumela wi iyene ddi Muttikitteliwi wapikireliwe. (Mk. 3:21; Jo. 7:5) Enoneya ninga Yezu vina wahikubanya venjene sabwa ya okweliwa babe, José. Okwa oku wa babe, wali ezinddiyelo yawi iyene wanfwanyela ottiddela mabasa a babe wi awodhe wasapela anamudhi. (Mk. 6:3) Mudhidhi wonuwiye, Yezu wanona txini enfwanyeliye okosa wi akamihedhe amudhe. Enoneya ninga iyene wanfwanyela olaba venjene wi asapele amudhe. Txibarene, Yezu ohona wi muttu agalaba venjene, omaddowelo wa nzuwa onolema.

7. (a) Mavuzo gani anakamihedhe atelani agalelaga anawa? (b) Gano 2:1-6 onloga nni mwaha wa walela ayima?

⁷ Akala nyuwo muhitelana, vina mugahiziveliwa wabala ayima, murome ovivuza dhahi: ‘Iyo nihikana ekalelo ya oviyeviha, vina nili attu anzuzumela dha Mulugu, ofiyedha Yehova okana efunelo ya onisakula wi nimulele mwana?’ (Masal. 127:3, 4) Akala nyuwo muhimala obaala, kavivuzeni: ‘Iyo ninowasunziha anihu oziwa ttima ya mabasa?’ (Koh. 3:12, 13) ‘Miyo ddinokosa guru dhetedhene wi ddimbarele mwanaga dhoputtula dha maningo na dha yubuwelo esuwene dhigadhiliye ofwanya mwilaboni mwa Satana?’ (Gano 22:3) Weyo onofwanyela omukamihedha mwanawo mwari mwa dhorutxa dhetene dhinfwanyiye. Aba mabasa orutxa vaddiddi. Mbwenye enowodheya  weyo wavaha masunziho okwela, ofiyedha awene okuluvela Mazu a Mulugu agafwanyiwa dhorutxa. (Kengesa Gano 2:1-6.) Ninga motagiha, akala mmodhavo wa vatakulu venyu ononyanyala omulabela Yehova, kasunziheni aninyu okuluvela Mazu a Mulugu vina mwaziwihe yopurelamo ya awene okalavi ororomeleya na Yehova. (Masal. 31:23) Obe akala munammudhi wenyu onokwa, kalagihe anawo mazu a Mulugu ampangarhaza vina anwodha wafwanyiha murenddele.—2 Kor. 1:3, 4; 2 Tim. 3:16.

8. Ninga munlogela Olibiha 6:6, 7, txini yafwanyela okosa José na Maria?

⁸ Amambali a Yezu ahimukamihedha iyene okana merelo orumeliwana vamentoni va Mulugu; awene ahivirihamo malago anavaha Yehova amambali. (Kengesa Olibiha 6:6, 7.) José na Maria annimukwela venjene Yehova, vina efunelo yawa yali ya walibiha anawa okana okwela wakakene.

9. José na Maria akosile yosakula gani?

⁹ José na Maria ahisakula oviwaraliha mpaddi wa omuyani. Kavali waganyedha, awene andowa musinagoga y’o Nazareti wi asunzemo mazu a Mulugu, vina andowa o Jeruzalemi wi atugumanele mattanga a Paskwa. (Lk. 2:41; 4:16) Enoneya ninga mudhidhi wadhowani o Jeruzalemi, annimusunziha Yezu vamodha na abale mwaha wa dhopadduwa dhirile Yehova na nlogo naye, mudhidhi wavirani mimburho dha mapadduwoya ali Mmaleboni. Enoziweya wi yannimurutxa José na Maria wang’anela murala wawa mpaddi womunyani venevo venjivana anamudhiya. Mbwenye guru dhikosilani dhihapurelamo venjene! Sabwa ya awene wika webedha wa Yehova vamburhoni voroma anamudhi awa otene ali obareleya mpaddi womuyani.

10. Yotagiha ya José na Maria enavaha masunziho gani amambali ali Akristu?

¹⁰ Amambali animuttittimiha Yehova ansunza eni na yotagiha ya José na Maria? Enddimuwaya ja wasunziha anawo na mazu vina na merelo wi weyo onomukwela venjene Yehova. Oziwe wi mvaho wa ttimaya-ttimaya onfwanyeliwe omvaha mwanawo bwa omusunziha omukwela Yehova. Yina enfwanyeliwe wasunziha jawi awene anofwanyela okana elemelelo ya omusunza Bibilia na guru dhotedhene, olobela, odhowa omatugumanoni vina odhowa mmalaleyoni. (1 Tim. 6:6) Enoziweya wi  weyo onofwanyela wasapela anawo dhojombeliwa dhawa. (1 Tim. 5:8) Mbwenye wubuwele wi mwanawo onapureletxemo agakana mandano ofiyedheya na Yehova ottiya dhokana dhamwigumini; okana mandano na Yehova onele omukamihedha ovuneya siku nomariha na elabo ejino, bawodha ovolowa mwilaboni eswa ya Mulugu. *—Ezek. 7:19; 1 Tim. 4:8.

11. (a) Nikokomezo nili va 1 Timóteo 6:17-19 ninowakamihedha amambali okosa yosakula yapama agalelaga aniwa? (b) Dhogana gani dhinfwanyelinyu otanalela ninga anamudhi nanda mareliho gani anapurenyu? (Kang’ana kasha “ Txini Enfuniwe Okosa Mwigumini Mwawo?”)

¹¹ Enohagalaliha wawona amambali enjene Akristu anakokomeza amudhawa winjiviha merelo awa a omwebedhana Yehova! awene anolobela vamodha. Anodhowa vamodha omatugumanoni wa vasumanani na omatugumanoniwa wa ttattamwa. Anodhowa vamodha mmalaleyoni. Akalawo anamudhi ena anlaganela olaleya mmiruddani muhinlaleyiwetxa. Ena anolaganela odhowa wona obeteli obe okamihedha mparha dhomaga numba munlabiwa mabasa a Mulugu. Anamudhi ankosa mabasa aba, anononga kobiri vina enoziweya wi awene anofwanyaga dhowarutxa. Mbwenye dhopurelamodha dhinkanani sawi, awene anorela venjene mpaddi wa omuyani. (Kengesa 1 Timóteo 6:17-19.) Ayima ambaliwa vari va anamudhi ninga aba, anodhowavi na merelo apama vina kantxinuwa mwaha wa dhosakula dhinkosani! *—Gano 10:22.

12. Txini emukosihile Yezu wunuwana malago?

¹² Babi wa Yezu wa wirimu, mudhidhi wetene onokosa dhosakula dha malago vina amambali aye a vati ahikosa dhosakula dhapama. Mbwenye mudhidhi wonuwa Yezu, iyene wanfwanyela okosa dhosakula dheye mwinya. (Gal. 6:5) Moligana na iyo notene, iyene wahikana mvaho wosakula enfuniye. Kofuna agahisakula okosa dha mmirimani mwaye. Ottiya osakula dhotowa malago, iyene osakule okala marho wa Yehova. (Jo. 8:29) Yotagiha yaye enakamihedha dhavi azombwe a masaka abano?

13. Yosakula gani ekosile Yezu muzombweni mwaye?

¹³ Yezu bana ekalelo ya omuttu, ohisakula wawiwelela amambali aye. Txipo kanyinddile avahiwaga malago na amambali aye, obuwelaga wi iyene ohikana eziwelo opitta amambali aye. Ottiya ejo, iyene wanrumela “dhetene dhalogani.” (Lk. 2:51) Mohaganyedha, Yezu wahilaba na malago aye otene ninga mwana wa muttajiya. Iyene ohilaba na guru dhaye dhotene wi amukamihedhe babe mabasa a osema wi asapelena amudhe.

14. Iyo ninziwa dhavi wi Yezu wali namasunza waderetu wa Mazu a Mulugu?

 ¹⁴ Enoneya ninga amambali a Yezu ahimwaddela mwaha wa obaliwa waye wotikiniha vina mwaha wa miselu dhotene dha Mulugu. (Lk. 2:8-19, 25-38) Mbwenye kadhali esuwenevi bahi; iyene vina wahisunza mMaleboni mwaha wa mavuhulo aloga dha odha waye. Ninziwa dhavi wi Yezu wankanela ntidi osunza Mazu a Mulugu? Sabwani bali muzombwe anamasunziha a mu Jeruzalemi “animutikina mwaha w’ononelamo waye, na dhawakula dhaye.” (Lk. 2:46, 47) Na vyaka 12, Yezu wanziwa woniha wi Yehova ddi Babe.—Lk. 2:42, 43, 49.

15. Yezu wonihile dhavi wi ohisakula okosa ofuna wa Mulugu?

¹⁵ Muziwele Yezu mwaha wa efunelo ya Babe na egumi yaye, iyene ohirumela na murima waye wotene. (Jo. 6:38) Yezu wanziwa wi onela widdiwa na attu, vina dhobuwelo esi dhigahidha omukumula. Txibarene, iyene ohirumela okosa ofuna wa Yehova. Mubatizeliwiye iyene yaka ya 29 N.K., yakosetxiye mwigumini mwaye yali ya ovirihamo dhotedhene dhamwaddela Yehova. (Aheb. 10:5-7) Masiki wokomeliwene vapingirhizini, Yezu txipo kanyanyale okosa ofuna wa Babe.—Jo. 19:30.

16. Dhawira dha Yezu dhinasunziha eni ayima?

¹⁶ Wawiwelelege amambali awo. Amambali awo attu ottega, dhahene ninga José na Maria. Mbwenye ba abuwele asakuliwe na Yehova wi aubarele, ausunzihe vina aweddihe. Akala weyo onoriha malamulo awa, onele ‘wedda na murenddele.’—Ef. 6:1-4.

17. Mowiwanana na Josuwé 24:15, dhogana gani dhinfwanyela okosa azombwe mwigumini mwawa?

¹⁷ Kagana onamulabeliwe. Weyo onofwanyela woniha wamwinya wi onomuziwa Yehova, onoziwa mapikirelo aye, vina onoziwa txini enupurihamo iyene mwigumini mwawo. (Rom. 12:2) Ogakosa dhawene onele owodha ogana omulabela Yehova mwigumini mwawo mwetemwene. (Kengesa Josuwé 24:15; Koh. 12:1) Akala weyo onodhowavi omwengesaga vina omusunzaga Bibilia, omukwela wawo Yehova onelege wunuwavi, vina nroromelo nawo ninela owarala.

18. Yosakula gani enfwanyela okosa azombwe ,vina yodhavoya enakale evi?

¹⁸ Kasakula wika ofuna wa Yehova vanburoni voroma mwigumini mwawo. Attu a elabo ya Satana anloga wi weyo ogalabana eziwelo yawo wi ovipurhihenamo wamunya, onela ohagalala venjene. Mbwenye abale anzuzumela dhorela  anovitotela “goyi dhinddimuwa”. (1 Tim. 6:9, 10) Mwa mpaddi mwina akala weyo onomvuruwana Yehova vina onosakula wika ofuna wa waye vamburoni voroma, egumi yawo enele ofuma, ‘dila dhawo dinomyala, dhigeddeliwe ogampura.’—Jos. 1:8.

19. Txini enfwanyela wubuwela amambali?

¹⁹ Amambali, kakosani guru dhotedhene wi mwakamihedhe amudhinyu omulaba Yehova. Kamukuluveleni, iyene onela wukamihedhani okosa dhosakula dha malago. (Gano 3:5, 6) Oziwe wi anawo ansuzetxa na esile dhinkosiwe vina dhinlogiwe. Nona kasakulele merelo anattukelele awene weddana dila dhapama esuwene dhinakosihe orumeliwa na Yehova.

20. Maruriho gani anakele azombwe agasakula omulabela Yehova?

²⁰ Nyuwo azombwe, amambali enyu ahikaana ewodhelo ya wusakulelani dhamalago mwigumini mwenyu. Mbwenye, akala munfuna murumeliwe na Mulugu, munofwanyela osakula mwanya. Katagihani merelo a Yezu; sakulani omwiwelela Babinyu wokwela wa wirimu. Mugakosa dhawene munele orurihiwa venjene, vina munela wakela egumi yohimala. (1 Tim. 4:16) Musogorho munele opurelamo egumi yoziva vaddiddi!