1. Elobo gani enfwanyelela okosagavi Mukristu obatiziwe?

WEYO ohimala obatiziwa? Akala pumwenemo, eji enoniha wi ohilagiha nroromelo nawo vanamwinjini vina ohoniha efunelo yawo ya olaba munikuruni mwa Yehova. * Txibarene, omuroromela wawo Yehova onofwanyela wunuwavi. Vina onofwanyela wenjedha mmirimani mwawo nikuluvelo nawi Yehova onoweddihavi nikuru naye masaka abano.

2-3. Yehova oneddiha dhavi nikuru naye masaka abano? Kaloga yotagiha.

² Masaka abano Yehova oneddiha nlogo naye mowiwanana na omuttu waye, efunelo yaye, na magano aye. Ndoweni niloge mikalelo miraru dha Yehova esuwene dhili mwari mwa nikuru naye.

³ Voroma, “Mulugu kanimuthiyaniha muthu.” (Mer. 10:34) Okwela wa Yehova ohimuttukulela omuleva Mwanaye wi “awóbole athu otene.” (1 Tim. 2:6; Jo. 3:16) Yehova onowavaha mabasa attu a nlogo naye wi alaleye abale anrumela mazu aye, wi afwanye opurelamo na mukutto wa mwanaye. Yanawili, Yehova onfuna murenddele kanfuna ogudulana. (1 Kor. 14:33, 40) Nona, iyo ninojedhela wi emeleli aye anela omwebedha na murenddele vina nawiwanana. Yanoraru, Yehova ddi ‘Namasunziha Munddimuwa.’ (Iza. 30:20, 21) N’eji, attu a nikuru naye anozuzumela osunziha Mazu aye, mmologoni vina mmabasani a walaleya anamwinji. Mikakelelo esi miraru dha ejile eli Yehova dhoneyile dhavi na Akristu a nsaka noroma? Vina dhinoneya dhavi masaka abano? Muya wokoddela onukamihedha dhavi venevo vanivilibihedhiwe olaba na nikuru na Yehova masaka abano?

4. Ninga munlogela Merelo 1:8, txini yalamulele Yezu anamafwara aye, vina nikamihedho gani nigakelani?

⁴ Vyaka zana dhoroma. Muselu olaleyile Yezu wanavaha njedhelo attu a malogo otene. (Lk. 4:43) Iyene ohalamulela anamasunza aye wi alaleyele attu a “mwilaboni mwetemwene, ofiyedha okomoniwá.” (Kengesa Merelo 1:8.) Txibarene, awene kagawodhile okosa mabasa aba na ewodhelo yawa. Awene agahifuna muya wokoddela, oli ‘mukamihedhi’ walogile Yezu wi agahivahiwa.—Jo. 14:26; Zak. 4:6.

5-6. Muya wokoddela wakamihedhile dhavi anamafwara a Yezu?

⁵ Anamafwara a Yezu akele muya wokoddela vamutugumanoni wa Pentekosti wa 33 N.K. Na nikamihedho na muya obo, awene ahiroma olaleya momaguva, vina mwari mwa mudhidhi mung’onovi attu matxikwi menjene ahakela miselu dhapama. (Mer. 2:41; 4:4) Muromelani ofwara-fwariwa, awene kakumuwile, akumbirile nikamihedho na Mulugu. Awene ahilobela dhahi: “Nivaheni iyo emeleli enyu guru dh’olaleyana mazu enyu nihovaga.” Awene ahenjedhiwa-wene muya wokoddela, sabwani dhopadduwadha dhinloga wi, “mmalelani olobela, numba mwagumanilani othekenyeya: etene adhala muya wokoddela, aroma olaleya nzu na Mulugu ahovaga elo.”—Mer. 4:18-20, 29, 31.

⁶ Anamafwara aba a Yezu ahifwanyiwa dhorutxa dhina. Ninga motagiha, mapapi a Malebo ali mang’onovi. Kawali vipano dhosunzihana obe dhosunzana ninga esi dhinihu masaka abano. Vina anamafwara abale anfwanyela walaleya attu a vilogelo dhinjene. Mwari mwa dhorutxa eso dhetene, anamalaleya abale azuzumela mabasa awa ahikosa dhilobo dhona attu ninga dhohiwodheya—mwari mwa vyaka dhing’onovi, awene ahalaleyela attu a malogo ankala “mwilaboni mwetemwene.”—Kol. 1:6, 23.

7. Mwa ovira vyaka 100, emeleli a Yehova adhile dhavi oziwa enafunana Mulugu, vina txini dhikosilani?

⁷ Masaka abano ehu. Yehova onodhowavi eddihaga nlogo naye. Txibarene, malago anvahiwehu anda na muya wokoddela wa Mulugu, mwari mwa mazu aye ovudheleliwa. Iyo nihikana mazu a Yezu aniwanana na mabasa olaleya, vina iyene ohalamulela anamafwara aye odhowaganavi mabasa aromiliye. (Mt. 28:19, 20) Vyaka dha mundduni, revista na Julyu 1881, nihiloga dhahi: “Iyo kanikuweleliwe, nne kanittikitteliwe wakela nttittimiho vamodha na orelawa, nikuweleliwe ovuwiha vina olaleya miselu dhapama.” Folhetu esasanyiwe yaka ya 1919, yahikana mutoma waloga, A quem se confia a obra, mpaddi mmodha wa museluya waloga dhahi: “Mabasaya ahinjiva vaddiddi, mbwenye mabasa a Nabuya, iyene onela onivaha ewodhelo ya ogomihana.” Txibarene, dhahene ninga Akristu oroma, abaali abale oliba murima ahivingela-wene mabasa aba, na nikuluvelo nawi muya wokoddela ogahakamihedha ofiyedha awene walaleyela attu a malogo otene. Iyo nihikana nikuluvelo nakanene masaka abano.

8-9. Marhe gani anlabana nikuru na Yehova wi akosena mabasa a olaleya?

⁸ Nikuru na Yehova ninolabana vipano dhiliwo wi dhivuwihena muselu wapama. Dhipano esi dhintaganyiheya na manivuru opidiwa, “Foto Drama wa Dhottanddiwa,” mafonografu, karo ya muselu, miselu dha muradiyoni, na dhipano dhina dha ovanene. Nikuru na Yehova vina ninokosa mabasa a otapulela ahinattigi opadduwa oroma vattanddiwe attu! Mabasa aba ankoseliwani? Enileliwa wi attu a malogo otene ewe muselu wa ebaribari na elogelo yawa. Yehova, Mulugu  ohina nsakulano; iyene wahipikirela wi muselu wapama ogahilaleyeliwa “athu a vati, a vilabo dhotene, a mahimo, a vilogelo, na malogo etene.” (Ovuh. 14:6, 7) Iyene onfuna wi attu a vilabo dhetene ewe muselu wa Omwene.

⁹ Kito mwa abale anrutxa wafwanyawa, ninga motagiha abale ankala mmanumbani mobareleya venjene? Na efunelo ya wafwanya attu enjene, nikuru na Yehova nihittukuleleya osasanyedha mikalelo dhinjene dha olaleya. Ninga motagiha, yaka ya 2001, abali a Nikuru Nolamulela, ahirumeliha olaleya na karinya na dhipano dhina elabo y’o França, vina vasogorhova mmimburhoni dhina. Dhopurelamodha dhali dhinjene. Yaka ya 2011 ahiroma mabasa a olaleya woriganela o Estados Unidos, muttette w’o Nova Iorque, mpaddi onkaletxa attu enjene. Yaka yoroma, ahipakiwa manivuru 102.129 na marevista 68.911. Vina attu 4.701 ahikumbirha nsunzo na Bibilia! Kinaganyedheya, muya wokoddela ohikamihedha mabasa aba. Nona, abali a Nikuru Nolamulela arumeliha olaleyiwa na karinya orugunuwa elabo yotene.

10. Txini dhinfwanyelihu okosa wi ninjivihe mabasa ehu a olaleya?

¹⁰ Txini enfwanyeliwe okosa. Kakosa guru yetene wi opurelemo masunziho anuvaha Yehova mmulogoni mwa Okristu. Kalaleyana malago asunziliwe. Onela okana nikamihedho ninfuniwe mowiwanana na dhorutxa dha murudda onlaleyiwe, vina onela olibiheya na dhotagiha dhapama dha anamalaleya akwawo. Kakalela ntidi mabasa olaleya. Dhahene ninga munlogela mutoma wa nsunzo nehu, iyo kaninkosa mabasa a Mulugu na guru dhehu, eniwodhiha okosa bu muya waye. (Zak. 4:6, Tradução do Novo Mundo) Iyo ninofwanyela okana ebaribari wi ninkosa ofuna wa Mulugu.

11. Nikuru nolamulela na masaka zana oroma nilabile dhavi mumodhani wi nimetxe murenddele vari va nlogo na Mulugu?

¹¹ Vyaka zana dhoroma. Nikuru nolamulela nali o Jeruzalemi nanlaba mumodhani, wi Nlogo na Mulugu nedde na otadeya vina na wiwanana. Ninga motagiha, veteyile makani a otxetteliwa yaka ya 49 N.K., nikuru nolamulela  neddihiwa na muya wokoddela nahiwodha ologela makaniya. Kowiliwa milogo dhelogawana nsaka nttile, mabasa a olaleya agahitxima. Masiki eziweyaga wi muttugumanoya wali otaganyiheya wa Ayuda, arumiwi na anddimuwa aravihiwe yeddelo ya Ayuda obe na masunziho awota. Ottiya ogawana awene ahiwelela mazu a Mulugu vina ahirumeela weddihiwa na Muya waye. (Mer. 15:1, 2, 5-20, 28) Apurelomo eni? Yehova wahiruriha dhogana dhawa, wahavaha murenddele na wiwanana nanda mabasa a olaleya ahidhowavi vasogorho.—Mer. 15:30, 31; 16:4, 5.

12. Txini enoniha wi munikuruni na Yehova dhotedhene dhinowiriwa n’orihana vina na mukalelo wotadeleya?

¹² Masaka abano ehu. Nikuru na Yehova ninolaba na guru wila nikane murenddele onfuneya vari va nlogo na Yehova. Vyaka dha mundduni, Mwang’aneli 15 wa Novemburu wa 1895 wanna mpaddi wa mutoma Nsaka na Odha wa Kristu, wahikana mwanamusorho wattiddiwe mukartani ya 1 Korinto 14:40 onloga, “Dhetedhene dhiriwege n’orihana, na mukalelo wotadeleya.” Masunzihoya ali awi: “Arumiwi ahileba dhinjene mwaha wa milogo dhoroma . . . Jofuneya vaddiddi odhowavi niwelelaga dhetene dhilebiwe wale m’Bibiliani, [vowi] dhilebeliwé onihelamo.” (Rom. 15:4) Ndde, murenddele woneyilena Akristu oroma bwakakene ononeyana vina nikuru na Yehova masaka abano. Ndoweni niladdaniheni dhahi: Akala weyo onofuna wona nsunzo na Mwang’aneli mulogo wottiyana na wawo—masiki elabo yina—onela oziwa mukalelo oneddihiwe nsunzona vina onela oziwa mutomaya onasunziwe. Momaguva, weyo onokala ninga oli mmulogoni mwawo! Obu kahiye muya wa Mulugu onwodha wiwananiha dhahene?—Sof. 3:9.

13. Tiago 3:17 onnittukulela ovikosa mavuzo gani?

¹³ Txini enfwanyeliwe okosa. Yehova onfuna wi nlogo naye neddege n’ekalelo yittaneliwani, akalaga “ovyiyeviha, ovilela; apiselagana murima mukwelanani.” (Ef. 4:1-3) Kavivuze: ‘Miyo ddinotamela murenddele? Miyo ddinowawiwelela abale animelela mulogo? Akala miyo ddihikana mabasa mmulogoni, ddinokanamo wi abali otene addikuluvelege? Miyo kaddinna ekalelo ya owara, ddinowodha  okamihedha, ddinozuzumela mabasa? (Kengesa Tiago 3:17.) Akala ohikana vanoniwe wi onofwanyela wogolelavo kalobela okumbirhaga muya wokoddela wa Yehova. Mudhidhi ogattiyewi muya wa Mulugu odhala mmereloni mwawo, abali vamodha na arogoraya anelege wutamalela venjene vina onele winjiviha ttima yawo.

14. Ninga munlogela Kolosi 1:9, 10, Yehova wasunzihile dhavi attu a nsaka zana noroma?

¹⁴ Nsaka zana n’oroma. Yehova onoziveliwa vaddiddi osunziha nlogo naye. (Masal. 32:8) Iyene onfuna wi iyo nimuziwe, nimukwele, vina nikalegewo na mukala-kala ninga anaye okweleya. Kowiliwa iyene kanivaha nikamihedho, dhetedhene esi kadhigawodheyile. (Jo. 17:3) Yehova wahavaha muya waye Akristu a nsaka zana n’oroma wi asunzihena attu a nlogo naye. (Kengesa Kolosi 1:9, 10.) Muya wokoddela—oli ‘mukamihedhi’ wapikirele Yezu—bunniwodhiha wakwaniha mabasaya. (Jo. 14:16) Muya obu ohavaha anamafwara ewodhelo ya osunziha Mazu a Mulugu, vina ohawubutxedha dhinjidhene dhasunzihile Yezu, esuwene dhiwodhilani oleba Mmittakani. Ononelamo oku ohilibiha nroromelo na Akristu oroma, vina owunuwiha omukwela wawa Yezu Kristu, Mwana Mulugu, na okwelanawa wa muttu na mukwaye.

15. Na mukalelo gani ononiwe wakwanihedheya wa nipikirelo na Yehova nili va Izaiya 2:2, 3?

¹⁵ Masaka abano. Yehova wahivuhulela wi “omagomelo wa masaka,” attu a malogo otene agahittamagela “vamwangoni” wa nladdaniho, wi asunzihiwe dila dha Nabuya. (Kengesa Izaiya 2:2, 3.) Iyo ninowodha wona wakwanihedheya wa nivuhulo ntti. Webedha wa ebaribari ohimala wimetxiwa, vanowoneya ottiyana onddimuwa vaddiddi wa webedha oku na okule ohile webaribari. Txibarene, Yehova ononivaha yoja yomuyani yawinjiva-wene!  (Iza. 25:6) Na nikamihedho na “mwimeleli wororomeleya wa malago,” iyo ninokana dhoja dhomuyani dhawinjiva-dhene, dhottiyana-ttiyana, oromana miselu dholebiwa, madiskursu mavidiyu a ayima na anddimuwa. (Mt. 24:45) Txibarene, ntamalo nehu ninoligana na nttile na marho wa Job, Eliyú, ologile: ‘Kawo namasunziha oninfiyedha Mulugu.’—Job 36:22.

16. Txini enfwanyeliwe okosa wi wunuwihe mpaddi wawo womuyani?

¹⁶ Txini enfwanyeliwe okosa. Muya wa Mulugu onela wuwodhiha ovirihamo dhisunzilewi Munzuni naye. Kalobela dhahene ninga mukosile munasalmo, iyene bela: “Nabuya, ddisunzihení dila yenyu; ddinere weddamo mofwanyela-wene.” (Masal. 86:11) Nona kadhowavi opurelagamo yoja ya omuyani enuvaha Yehova, ejuwene enda mmazuni aye vina mwari mwa nikuru naye. Enoziweya wi yofuna yawo kahiye ya okana ononelamo bahi. Weyo onfuna wi wike ebaribari eji mmirimani mwawo vina ovirihemo mwigumini mwawo. Muya wa Yehova onela wukamihedha okosa ejuwene. Weyo vina onofwanyela okana ekalelo ya walibiha abalo vamodha na arogoriyoya. (Aheb. 10:24, 25) Sabwaya jani? Sabwani awene ba amudhawo omuyani. Kalobelela muya wa Mulugu wi wuvahe elemelelo ya otamalela sabwa ya matugumano a Okristu, vina ovilibihedhe mpaka vanwodhiwe wi okosege dhipaddi dhinttomeliwa weyo, n’ekalelo yofwanyelela. Ogakosa dhahene onela woniha wi onomukwela Yehova vamodha na Mwanaye vina na “mabilaya” awa ambonani vaddiddi.—Jo. 21:15-17.

17. Txini dhinfwanyeliwe okosa wi wonihe okamihedha wawo na nroromelo notene nikuru na Yehova?

¹⁷ Ovanene, mpaddi wa nikuru na Mulugu na vati ninakale nttene nimodha bahi, nigeddihiwa kakamwe na muya wa Mulugu. Nona, kalaba na guru dhetene na nikuru na Yehova. Katagiha ekalelo ya Yehova ya ohikana nsakulano mwa wavuwihedha muselu wapama attu a malogo otene angumaniwena. Katagiha okwela waye mwa warihaga attu akwawo vina mwa otamelaga murenddele na wiwananawa mmulogoni. Kamvuruwane Namasunziha wawo Munddimuwa mwa opurelagamo masunziho otene omuyani anuvahiye. Ogakosa dhawene, weyo kunove elo, sabwani kunakale munikuruni na abale ali mwilaboni ya Satana abuwene anfuna orimelihiwa ovanene. Nsakanene ntto nigafiya weyo onela wimela pwi, na nikuluvelo notene, vina onakale na abale anlaba na nikuru na Yehova.