1. Nigamubuwelaga muttu ona ttagaraga txini endha muyubuweloni mwehu?

NIGAMUBUWELA muttu ona ttagaraga, ondha muyubuwelo mwehu muttu wapama, wemwerumweru, wa supaje vina wovaha. Muttu ninga odduwene ononubutxedha musibo ologile Yezu sabwa ya Musamariya wapama. Mulobwana oddule wali wa elabo yina, masiki dhawene “omweddela thagaraga” Muyuda wamalile wiyeliwa vina bavadiwa na atimbwini. Musamariya ‘omweddela ttagaraga’ Muyuda wavoreyiwe na okwela wahimukamihedha. (Lk. 10:29-37) Musibo obo onotonyihedha mukalelo wa Mulugu—ttagaraga. Labo na labo Yehova ononitonyihedha ttagaraga na mikalelo dhottiyana-ttiyana sabwani ononikwela.

2. Elobo gani yina eniwanana na okala muttu wa ttagaraga?

² Wiwa nzu ntti ttagaraga txino ninonubutxedha elobo yina. Eji eniwanana na ohimutxinutxa muttu akala okalawo mwahaya wokasa ejuwene. Yehova dda ttagaraga sabwa ya ejuwene munasalmo ohiloga dhahi: “Keddile na iyo apimelelaga dhothega dhehu.” (Masal. 103:10) Mbwenye masaka mena Yehova txino onomulaga muttu ottegile.

3. Mwari mwa nsunzo ntti ninakule mavuzo gani?

³ Mwari mwa nsunzo ntti, ninele wona mukalelo onakula Nzu na Mulugu mavuzo aba: Sabwaya jani Yehova Mulugu wa ttagaraga? Vahikala wiwanana omulaga muttu vina omweddela ttagaraga? Txini enanikamihedhe okala attu attagaraga?

4. Yehova ontonyihedhelani ttagaraga?

⁴ Yehova Mulugu wa ttagaraga. Murumiwi Paulo ohiloga wi Mulugu ‘dda ttagaraga.’ Paulo ologile mazu aba sabwani Yehova ohavaha attu ohiligana njedhelo n’okala wirimu. (Ef. 2:4-7)  Mbwenye Yehova kanatonyihedha ttagaraga yaye attikitteliwivi bahi. Munasalmo David ohileba: ‘Yehova onowafewela murima attu etene, ttagaraga dhaye dhinowoneya mwa dhotedhene dhittanddiliye.’ (Masal. 145:9) Yehova onowakwela attu, nona agafwanya mwaha wa omutonyihedha ttagaraga muttu, onomweddela ttagaraga.

5. Yezu osunzile dhavi ttagaraga ya Yehova?

⁵ Yezu onoziwa opitta muttu mwina mukalelo onkwela Yehova otonyihedha ttagaraga. Ahinatti odha velaboni ya vatti iyene wakala na Babe wirimu mwari mwa mudhidhi mwinjene. (Gano 8:30, 31) Dila dhinjene iyene omona Yehova atonyihedhaga ttagaraga attu ottega. (Masal. 78:37-42) Mudhidhi wasunziheye attu ena, Yezu wanloga sabwa ya mukalelo obu wokoddela wa Babe.

6. Yezu onikamihedhile dhavi ononelamo mukalelo ontonyihedha Yehova ttagaraga?

⁶ Ninga monelihu nsunzo nivirile, Yezu ohiloga musibo wa mwana wopawula wila anisunzihe mukalelo onlagiha Yehova ttagaraga. Mwana wele obuduwa vatakulu, odhowiliye onongawo “muhaku waye wotene eddagana mukalelo wotaduwa.” (Lk. 15:13) Vasogorova, iyene otxinuwa sabwa ya dhottega dhaye, ovikurumutxa vina owiyelela vatakulu. Txini ekosile babe? Mwanaya wahifiyedha ononelamo. Yezu ohiloga: “Babe omona [mwanaye]; thagaraga emwedda, omuthamagela, omukumbatha.” Babe kalogile dhilobo dhimutotile manyazo mwanaye. Ottiya ejo wahimweddela ttagaraga, wahimulevelela vina wahimwakela na mada meli. Ekosile mwana oddule yali yottega enddimuwa vaddiddi, mbwenye mwaha wa iyene otxinuwa babe ohimulevelela. Babi wa ttagaraga ologiwe vamusiboni obu onimutonya Yehova. Na musibo obu woddiginya murima, Yezu ohitonyihedha wi Yehova oli womala na wale wi alevelele antxinuwa mwebaribari.—Lk. 15:17-24.

7. Wiwanana gani oliwo wa ttagaraga na eziwelo ya Yehova?

⁷ Yehova dda ttagaraga sabwa ya eziwelo yaye ehingoma. Eziwelo ya Yehova kinimuttukulela okala woridhela vina wa nsakulano, ottiya ejo mukalelo obu onomukamidha oziwa eli yamakamaka mwa attu otene. Bibilia onologa ‘eziwelo endha odhulu jodhala ttagaraga vina milima dhapama.’ (Tia. 3:17) Ninga babi wokwela, Yehova onoziwa wi otonyihedha ttagaraga enowakamihedha anaye. (Masal. 103:13; Iza. 49:15) Ji sabwa ya ttagaraga ya  Yehova enattukulela alabeli aye ohiligana okana njedhelo nokala velaboni ya vati. Eziwelo ehingoma ya Yehova enomuttukulela olagiha ttagaraga egakala yofuneya okosa ejuwene. Iyene vina onoziwa mudhidhi gani ohinfwanyeliye weddela ttagaraga. Yehova Mulugu wa eziwelo, iyene onoziwa ottiyaniha omweddela muttu ttagaraga na ottiya omuttonga muttu okosile elebo yabure.

8. Txini enfwanyelihu okosa masaka mena, nanda sabwaya jani?

⁸ Kamubuwele Mukristu oganile ottukula mweddelo wonyakuwa. Venevo txini enfwanyelihu okosa? ‘Muttiye wedda na muttuya oddo’ ntti tti nikokomezo nanvahile Yehova Paulo wi afiyena mmulogoni. (1 Kor. 5:11) Attegi ahintxinuwa anofwanyela oburutxiwa mmulogoni. Jamakamaka okosa ejo wi abareliwe abali na arogora ororomela ali okoddela vamentoni va Yehova. Ena anubuwela wi muttu agaburutxiwa mmulogoni Mulugu kamweddele ttagaraga. Ejo ebaribari? Ndowe none.

9-10. Mowiwanana na Ahebreu 12:5, 6, ninlogela ni wi oburutxiwa mmulogoni otonyihedha ttagaraga? Kavaha yotagiha.

⁹ Iyo ninokubanya nigewa mmulogoni yovuwiha enloga wi muttu oddule onimuziwa iyo vina onimukwelihu “ottiya okala Munamoona wa Yehova.” Txino ninofiyedha ovivuza ankala yanfuneya txibarene oburutxiwa mmulugoni. Yogana eji yoburutxiwa mmulogoni ottonyihedha ttagaraga? Nde. Okodda omulaga oddule onfwanyelela kintonyihedha eziwelo, ttagaraga vina okwela. (Gano 13:24) Oburutxiwa mmulogoni onowodha omukamihedha muttegiya otxinuwa vina otxinja merelo aye? Enodhaga opadduwa. Attu enjene akosile dhottega dhinddimuwa nanda aburutxiwa mmulgoni ahifiyedha ononelamo wi yogana ya anddimuwa a mmulogoni ehakamidha otxinuwa, otxinja mukalelo wawa vina omwiyelela Yehova.—Kengesa Ahebreu 12:5, 6.

¹⁰ Katanalela yotagiha eji. Mukumbuzi oziwa wi nibila naye nimodha nili muredda. Iyene onoziwa wi awodhe okamidha nibilana onofwanyela ottiya vawa-vene. Mabila anenama anziveliwa okala vamodhavene, sabwa ya ejuwene anodhogudheya agattiwa vawavene. Eji enlagiha wi mukumbuzi onttiha nibila nili muredda vayevene kana ttagaraga? Nne kaye mwenemo. Iyene onoziwa wi agattiya nibila nttile nili muredda okala vamodha na mabila mena anele orava ereddaya. Mwaha wa ottiya vayevene nibila nili muredda iyene onobarela mabila mena.—Kaladdaniha na Onamakutha 13:3, 4.

11. (a) Na mukalelo gani muttu oburutxiwe mmulogoni oli ninga nibila na muredda? (b) Txini enfwanyelela okosa attu abale aburutxuwe mmulogoni vina nikamihedho gani ninakela awene?

¹¹ Mukristu agaburutxiwa mmulogoni onofwanyela woniwa ninga nibila nttile nili muredda. Mbwenye eredda yaye jomuyani. (Tia. 5:14) Ninga maredda mena aziwehu, eredda y’omuyani vina enoraveya. Nona jofwanyelela nibila nili muredda niburutxiwe mmulogoni. Olagiwa oku otonyihedha okwela wa Yehova wa mabila mena ororomeleya ali muttangani, eji enomukamihedha muttu oddule ottegile ofiyedha otxinuwa. Akala muttu onoburutxiwa mmulogoni onowodha okosa dhilobo dhina iyene okana ofuru wa odhowa omatugumanoni, wi alibe mpaddi w’omuyani vina alibihe nroromelo naye. Iyene vina onottabimrha manivuru wila akose nsunzo naye nominya vina wona programa ya JW Broadcasting^®. Anddimuwa a mulogo agona matxinjo ankosa muttuya, mudhidhi na mudhidhi anonvaha malago wi awodhe ovulumuwa mpaddi  womuyani ejo enele omukamihedha wiyelela wili okala Munamoona wa Yehova. *

12. Anddimuwa a mulogo anatonyihedhe dhavi omukwela vina omweddela ttagaraga muttegi ohintxinuwa?

¹² Jamakamaka wubuwela wi muttu onttega ahitxinuwa ddimburutxiwa mmulogoni. Anddimuwa a mulogo anoziwa wi anofwanyela wubuwela n’ofwaseya ahinatti omburutxa muttu mmulogoni. Awene anoziwa wi nlago na Yehova ninofwanyelela ovahiwa ‘n’ofwanyelela.’ (Jer. 30:11) Andimuwa a mulogo anowakwela abali vina kanfuna okosa elebo-txilobo ejuwene eganongile mandano awa na Yehova. Mbwenye masaka mena mukalelo wotonyihedha okwela vina ttagaraga, ja omburutxa muttuya mmulogoni.

13. Mukristu mmodha w’Okorinto wafwanyelelani oburutxiwa mmulogoni?

¹³ Ndoweni none mukalelo omuttongile murumiwi Paulo muttegi wahatxinuwile. Mukristu mmodha w’Okorinto wanimugoniha mwadhi babe. Elobo gani yonyakuwa! Yehova wahimala ologa makanene abo na ana Izrayel: “Mulobwana onimugoniha mwadhi babe, omveyiha babeyá: obili athongeliwe goi yokwa.” (Onam. 20:11) Ebaribari, murumiwi Paulo kafwanyela omuttongela mulobwana oddule opiwa. Mbwenye iyene wahakokomeza abali o Korinto wi amburutxe mmulogoni. Mweddelo wonyakuwa wa mulobwana oddule wela wapatta abali a mmulogoni, ena afiyedha wubuwela wi yakosiliye kiyalitxi yabure!—1 Kor. 5:1, 2, 13.

14. Paulo omutonyihedhile dhavi ttagaraga mulobwana waburutxiwe mmulogoni w’Okorinto, nanda iyene okoselini ejuwene? (2 Korinto 2:5-8, 11)

¹⁴ Vasogorhova Paulo wahifiyedha ononelamo wi mulobwana oddule wattegile wahifiyedha okosa matxinjo manddimuwa. Iyene wahitxinuwa na murima wotene! Mulobwana oddule wahitota manyazo mmulogoni, mbwenye Paulo wahiloga na anddimuwa a mulogoya wi iyene kafuna ‘ottabwiha makaniya.’ Iyene ohavaha nikokomezo ntti: ‘Nyuwo munofwanyelela omulevelela vina ompagarhaza.’ Paulo ohitapulelamo sabwaya yafwanyelelani okosa ejuwene: “Wi anadhe orimela na okubanya onimuthabwela.” Paulo wahimweddela ttagaraga mulobwana oddule watxinuwile. Iyene kafuna wi mulobwana oddule attiddiwe okubanya onddimuwa mpaka ofiyedha ottiya otamela oleveleliwa na Yehova.—Kengesa 2 Korinto 2:5-8, 11.

15. Anddimuwa a mulogo anawodhe dhavi omulaga muttegi vina omweddela ttagaraga mudhidhi wakakene?

 ¹⁵ Afwaraga yotagiha ya Yehova, anddimuwa a mmulogoni anokwela olagiha ttagaraga. Awene anomulaga muttegiya egakala yofuneya vina anomweddela ttagaraga egawodheya. Anddimuwa a mulogo anoziwa wi ohimulaga muttu onfwanyelela olagiwa kaye otonyihedha ttagaraga orumela dhilobo dhinkosiye. Ba anddimuwa a mulogo bahi anfwanyelela weddela ttagaraga?

16. Mowiwanana na Gano 21:13, txini enkosa Yehova akala muttu kantonyihedha ttagaraga?

¹⁶ Iyo notene ninofuna okala attu a ttagaraga ninga Yehova. Sabwaya? Sabwani Yehova kanvuruwa malobelo attu abele ahintonyihedha ttagaraga. (Kengesa Gano 21:13.) Iyo kanifuna wi ejo enipadduwele nona ninovilibihedha wi ninakane muriwa wotowa ttagaraga. Kanikodde omukamihedha mbali onfwanyiwa makattamiho, ottiya ejo nivilibihedha onvuruwana “muyeligi onkumbirha nikamihedho.” Vina ninoviriyamo malago aba: “Ohinaweddela thagaraga akwaye, vosoriwani vaye kaneddeliwe thagaraga.” (Tia. 2:13) Novyeviha nigobuwela wi ninofuna weddihiwa na ttagaraga, ninele okala womala-nawale wi naweddihe attu ena na ttagaraga. Iyo ninofwanyelela olagiha ttagaraga makamaka mudhidhi ontxinuwa muttu ottegile vina beyelela mmulogoni.

17. Mwene David otonyihedhile dhavi wi wali muttu wattagaraga?

¹⁷ Mbibiliani muhikala dhotagiha dhinji dhinanikamihedhe okala attu attagaraga. Motagiha, kona enpadduwele Mwene David. Dila dhinje iyene wahitonyihedha wi wali muttu wattagaraga. Mwene Saul wantamela ompa mbwenye David wahimweddela ttagaraga muttikitteliwi oddu wa Mulugu, katamelile omwiyihedha nne vina omputtula.—1 Sam. 24:9-12, 18, 19.

18-19. Mapadduwo gani meli ahiwodhile David otonyihedha ttagaraga?

¹⁸ Mbwenye dila dhina, David wahittiya okala muttu wa ttagaraga. Motagiha, Nabal mulobwana wotakala murima valogiliye notowa nriho na David vina akodda onvaha dhoja iyene na anyakoddo aye, David wahisilidhiwa vaddiddi bagana ompa Nabal na attu otene a ntakulu naye. David kafiyedhile ompa Nabal sabwani mwadhi Nabal Abigail wali muttu wapama, wokurumuwa vina wahaguva ogwadda makaniya.—1 Sam. 25:9-22, 32-35.

¹⁹ Mudhidhi mwina namavuhulela Nata, wahimwaddela David wi mulobwana mmodha wofuma wahiya nibila nimodha na munamwanddamani waye wamuyelegi. David wahisilidhiwa venjene vina baloga: “Ddinimuddubela Mulugu oliwo! Muthu oddo okosile dhawene ddofwanyela opiwa!” (2 Sam. 12:1-6) David wannonelamo deretu Nlamulo na Mizé. Mowiwanana na nlamulona mulobwana ageya nibila nimodha wanfwanyelela opitxa mabila manai. (Obud. 22:1) Ovano txini emuttukuleli David ologa wi mulobwana oddule wanfwanyelela opiwa? Oku kuwali ottonga waderetu.  Nata wamwaddela nipadduwo nigamukamihedhile David ononelamo wi—yakoselihe yali yottega enddimuwa vaddiddi! Mbwenye Yehova wahimweddela ttagaraga mottiyana na ejile yobuweliye mudhidhi wewaliye nipadduwo nilogile namavuhulela Nata!—2 Sam. 12:7-13.

20. Yotagiha ya David ennisunziha eni?

²⁰ Sabwa ya David osilidhiwa, wahigana ompa Nabal na attu otene a ntakulo naye. Vasogorhova vewaliye nipadduwo na Nata, iyene wahifiyedha ologa wi mulobwana oddo wanfwanyela opiwa. Nig’engesa nipadduwo na nawili ninofiyedha ovivuza txini emuttukuleli mulobwana waderetu ottonga nohifwanyelela. Katanalela emukosihile ejuwene. Mudhidhene obule David wahikosa dhottega dhamudhugudha. Muttu oli deretu mpaddi womuyani kanttonga na mukalelo wohifwanyelela obe wotowa ttagaraga. Mottiyana na David, Yezu wahakokomeza anamafwara aye dhahi: ‘Na muttongelo onattongana nyuwo attu ena nyuwo vina munele ottongiwana.’ (Mt. 7:1, 2) Nona ninofwanyelela okala txenjewa wi ninakale attu owuma murima, ottiya ejo nikale ‘attagaraga’ ninga Mulugu wehu.

21-22. Namukalelo gani onatonyihedhihu ttagaraga attu ena?

²¹ Muttu ona ttagaraga ottiya wakubanyedhavi akwaye, ‘onokosa elobo-txilobo wi akamihedhe.’ Nona, ninofwanyelela okala txenjewa wi none akala mwari mwa anamudhi ehu, mmulogoni obe anamanddamani anovedda nikamihedho. Dhawene ninele ofwanya mikalelo dhottiyana-ttiyana dhotonyihedha ttagaraga! Onomuziwa muttu onfuna nipangarhazo? Ogahiwodha ompiyela yoja, obe omukosela mabasa muttuya oddo? Okalawo mbali wiyelihedhiwe mmulogoni onveda nipangarhazo agawodhile weyo ompangarhaza? Obe egahiwodheya wapangarhaza attu a mmuruddani modhela walaleyela miselu dhapama? Esi mikalelo dhaderetu vaddiddi dhowapangarhazana attu ena.—Job 29:12, 13; Rom. 10:14, 15; Tia. 1:27.

²² Iyo nigakala txenjewa nizuzumelaga dhojombeliwa dha attu ena ninele wona wi dhihikalawo dhilobo dhinji dhigakosilihu wi nitonyihedhe ttagaraga. Nigakala attu a ttagaraga ninomwagalaliha Babihu wa wirimu Mulugu ‘wattagaraga’!