1. Txini yalibihile emeleli ororomeleya a masaka a mundduni?

 BIBILIA onowaloga emeleli ororomeleya a masaka a wale ninga attu anna owodha vina oliba. Mbwenyi dila dhina abale akala ninga oliba masaka mena kavyona dhawene. Motagiha midhidhi dhina Mwene David wanvyona wi ohiliba ninga mwango, mbwenyi midhidhi dhina wangulugudheya. (Masal. 30:7) Oku Sansau wali muttu woliba vaddiddi sabwa ya muya wa Mulugu, masiki dhawene iyene wannonelamo wi se nikamihedho na Mulugu, guru dhaye dhigahittawa, bakala ninga alobwana ena. (Anam. 14:5, 6; 16:17) Alobwana aba aliba sabwa ya nikamihedho navaha Yehova.

2. Sabwaya jani murumiwi Paulo aloga wi vobaniye palibiye? (2 Korinto 12:9, 10)

² Murumiwi Paulo vina wanfuna guru dha Yehova. (Kengesa 2 Korinto 12:9, 10.) Dhahene ninga enji wa iyo, Paulo wanwanana makattamiho a egumi. (Gal. 4:13, 14) Vina masaka mena wela ovilibihedha wi akose dhilobo dhaderetu. (Rom. 7:18, 19) Midhidhi dhina wannova ejile egadhile ompadduwela. (2 Kor. 1:8, 9) Masiki dhawene mudhidhi wobana Paulo palibiye. Eji yapadduwa sabwani Yehova waninvaha guru wi awodhe owanana makattamiho aye.

3. Mavuzo gani anakuliwe mwari mwa nsunzo ntti?

³ Yehova ohipikirhela wi onele onivaha guru enfunihu wi niwodhe ovilela. (1 Ped. 5:10) Mbwenyi wi niwodhe wakela nikamihedho ntti enofuneya okosa mpaddi wehu. Motagiha, mutori buneddiha karo. Mbwenyi nameddiha karo agahimunyigale acelerador, karoya kinedda. Na mukalelo wakakene, Yehova onofuna onivaha guru enfunihu, mbwenyi iyo ninofwanyela okosa mpaddi wehu. Txini ennivaha Yehova wi anilibihe? Vina dhilobo gani dhinfwanyelihu okosa wi nakele guru eji? Ninele wona dhowakula dha mavuzo aba nigasunzaga sabwa  ya mukalelo omulibihile Yehova—namavuhulela Jona, Maria mayi wa Yezu vina murumiwi Paulo. Ninele wona vina mukalelo onalibiha Yehova emeleli aye masaka abano.

4. Ninawodhe dhavi wakela guru dha Yehova?

⁴ Mukalelo mmodha ya wakela guru dha Yehova ja onfiyedha iyene na nlobelo. Yehova onele wakula malobelo ehu modhela onivaha owodha onddimuwa. (2 Kor. 4:7) Vina ninowakela guru modhela omwengesa Bibilia vina otanalela esile dhinengesihu. (Masal. 86:11) Muselu wa Yehova onfwanyeya mBibiliani ohikana owodha. (Aheb. 4:12) Weyo ogamulobelela Yehova vina ogengesa Nzu naye onowakela guru enfuniwe wi owodhe ovilela, onokana wagalala vina onele owodha wakwanihedha mabasa anttomeliwiwe masiki akale orutxa. Ovano koona mukalelo omulibihile Yehova namavuhulela Jona.

5. Jona wafunelani guru?

⁵ Namavuhulela Jona wanfuna oliba murima. Mumaleliye ottomeliwa mabasa orutxa na Yehova Jona wahittawela wolapela vaddiddi. Sabwa ya ejuwene, wahidha okala nena na oyelela egumi yaye mudhidhi watatamuwile pevo yowali munyaza vina wahifiyedha wika egumi ya akwaye vangovini. Anamatxerhenga mumponyedhilani Jona mbara, iyene wahidhowa mburho wahobuweliye wi agahikala mwenemo—mbani mwa oba enddimuwa. Onubuwela ninga Jona oviwilemo dhavi? Iyene txino obuwela wi agahikwa mwenemo? Obe obuwela wi Yehova wahimunyanyala? Enoneya ninga Jona wahittiddiwa wova vaddiddi.

6. Ninga enloga Jona 2:1, 2, 7, txini emulibihile Jona mudhidhi waliye mbani mwa oba?

⁶ Jona valiye mbani mwa oba txini ekosiliye wi akele guru? Elobo yoroma ekosiliye ja omulobelela Yehova. (Kengesa Jona 2:1, 2, 7.) Jona wahikodda omwiwelela Yehova, mbwenyi wahikana nikuluvelo wi Yehova agahivuruwana nlobelo naye sabwani wahitxinuwa. Iyene vina wahitanalela Malebo mang’onovi. Ninlogela nni ejuwene? Sabwani nlobelo naye ninfwanyeya nivuru na Jona kapitulo 2, iyene ohiloga mazu vina dholeba dhinfwanyeya munivuruni na Masalmo. (Motagiha, kaladdaniha Jona 2:2, 5 na Masalmo 69:1; 86:7.) Eji enowoniha wi Jona wanziwa pama malebo. Vina mudhidhi watanalela iyene versu esi mmakattamihoni mwaye Jona wahikana nikuluvelo wi Yehova agahimukamihedha. Yehova wahinvuna Jona, vina vasogorhova iyene wali womala-nawale wi akwanihe mabasa attomeliwiye na Yehova.—Jona 2:10–3:4.

7-8. Txini emulibihile Zhiming muwehiwani mwaye?

⁷ Yotagiha ya Jona enonikamihedha nigagumanana makattamiho orutxa vaddiddi. Motagiha, mbali wo Taiwan onkuweliwa Zhiming, b onotabuwa na makattamiho menjene a oredda. Ottiya ejo amudhaye ena kamweddiha pama sabwa ya iyene okala Munamoona wa Yehova. Mbwenyi iyene onowodha wakela guru dha Yehova sabwa ya olobela vina okosa nsunzo nomwinya. Iyene ohiloga dhahi: “Masaka mena anona miyo wi makattamiho ankala ninga kanagome ddinokubanyaga venjene vina kaddinwodha ofwasa wi ddikose nsunzo nomwinya.” Masiki dhawene Zhiming kaniyelela mundduni. Iyene ohiloga “elobo yoroma enkosa miyo omulobelela Yehova. Vasogorhova, ddinowika foni baddiroma ovuruwana jibo dha Omwene. Dila dhina ddinofiyedhaga wiba vang’ono-vang’ono mpaka ofwaseya.  Vasogorhova miyo oroma nsunzo naga nomwinya.”

⁸ Nsunzo nomwinya nihimukamihedha Zhiming na mukalelo wotikiniha. Motagiha, mudhidhi wavulumuwiye sabwa ya okosa operasau, enfrimera mmodha wahimwaddela wi egahifuneya wikiwa nikami sabwani glóbulos vermelhos dhahitita vaddiddi. Labo dhahi na mattiyu elogiwaga wi operasauya enakosiwe mangwana, Zhiming wahengesa nipadduwo na murogora wakosile operasau moladdana na iyene. Glóbulos vermelhos dha murogora oddo dhahitita vaddiddi opitta dhaye; masiki dhawene iyene karumelile wikiwa nikami, mbwenyi wahivulumuwa. Yotagiha ejile ehimwagalaliha Zhiming vina iyene ohiwodha okalavi ororomeleya.

9. Akala onokubanya venjene sabwa ya makattamiho, txini enfwanyeliwe okosa? (Koona vina mafoto.)

⁹ Yahiromaga wupadduwela buli mmakattamihoni orutxa vaddiddi vina buhiwodha omwaddela Yehova mukalelo oniviwamo weyo? Obe yahiromaga wupadduwela bulema vaddiddi nanda kuhiwodha osunza? Kudduwale Yehova onoziwa pama esile dhinupadduwela. Egapadduwa dhahene, masiki akala okosile nlobelo na mazu mang’onovi, kakana nikuluvelo wi Yehova onele wuvaha ejilene enfuniwe txibarene. (Ef. 3:20) Akala onowiwa opa obe kunwodha wubuwela pama, nanda bikala yorutxa wengesa vina omusunza Bibilia kavilibihedhe wi ovuruwane ogravariwa wa Bibilia obe wa manivuru mena andela mBibiliani. Vina enokamihedha ovuruwana jibo dha Omwene obe wona vidiyu mu jw.org. Ogamulobelela Yehova vina otamela dhowakula dha mBibiliani vina mapublikasau, enkala ninga onimuwoba Yehova wi awulibihe nanda jijuwene enakosiye.

10. Abalihu na arogora annilibiha dhavi?

¹⁰ Yehova onowodha walabihedha abalihu na arogora wi anilibihe. Akala ninogumanana makattamiho obe nivahiwe mabasa orutxa awene anele okala niparha na nipangarhazo. (Kol. 4:10, 11) Iyo ninowafuna amarho makamaka “nsaka nosegedheya.” (Gano 17:17) Nigaviwona wi ninowobana, abalihu anele onikamihedha mpaddi womaningoni, womuyani  vina anele onipangarhaza. Ninfuna none mukalelo olibihiwe Maria mayi wa Yezu na attu ena.

11. Maria wafunelani guru?

¹¹ Maria wanfuna guru wi akose efunelo ya Yehova. Karoma otanalela mukalelo wazuzumile iyene mumaleliye oziwa mabasa orutxa attomeliwiye na anju Gabriyel. Iyene wali ahinatti oteliwa; mbwenyi agahikana yari. Wali ahinattigi walela aima mbwenyi wanfwanyela omulela mwana agadhile okala Mesiya. Vowi iyene wali ahinatti oteliwa, agawodhile dhavi omutapulelamo José mulobwana wamweddelela wi wahikana yari?—Lk. 1:26-33.

12. Maria owodhile dhavi ofwanya guru yafuniye? (Luka 1:39-45)

¹² Maria owodhile dhavi okana guru wi awodhe wakwaniha mabasa orutxa attomeliwiye? Iyene wahiveda nikamihedho na attu ena. Motagiha, iyene wahimukumbirha anju Gabriyel wi amwaddele dhilobo dhina dhewanana na mabasa amuttomeliye. (Lk. 1:34) Vasogorhova, wahikosa oleddo mpaka omwangoni murudda wo Judeya wi amone munammudhi waye Elizabeti. Oleddo obule wahimukamihedha. Elizabeti wahimutamalela Maria vina na nikamihedho na Yehova wahiloga nivuhulo sabwa ya mwanaya. (Kengesa Luka 1:39-45.) Maria ohiloga wi Yehova wahoniha guru dhaye dhotene. (Lk. 1:46-51) Yehova ohimulabihedha anju Gabriyel vina Elizabeti wila amulibihe Maria.

13. Txini epadduwile na murogora wo Bolívia mudhidhi wakumbiriliye nikamihedho na abali na arogora?

¹³ Dhahene ninga Maria weyo vina onele owodha okana guru na nikamihedho na abale animulabela Yehova. Dasuri, murogora w’o Bolívia, wanfuna guru. Mufwanyiwe babe eredda egamuttukuleli okwa vina akala osipitale, Dasuri na murima wotene wahittukula muttorho obule wa omuzuzumela babe. (1 Tim. 5:4) Mbwenyi okosa ejo kiyali yovevuwa. Iyene ohiloga, “Dila dhinjene ddanfiyedha wona wi kaddinawodhe odhowa vasogorho.” Koddi iyene wahikumbirha nikamihedho? Vamaromo kakumbirhile. Iyene ohitapulelamo mwahaya, “Miyo kaddafuna wanyonya abali na arogora. Ddobuwela dhahi, ‘Yehova ddinwodha oddivaha guru enfunimi’ mbwenyi vasogorhova ddahinonelamo wi okala wolapela na abali yakala ninga ddatamela ogomiha makattamiho abale meka.” (Gano 18:1) Dasuri wahigana walebela akwaye atapulelagamo makattamiho agumaniyena. Iyene ohiloga dhahi, “miyo kaddina mazu a ologa mukalelo oddilibihile abali aga. Awene andana dhoja osipitale vina annengesa na miyo maversu opangarhaza a mBibiliani. Yali yowagalaliha vaddiddi oziwa wi kaddali meka, iyo ninokosa mpaddi wa murala munddimuwa wa Yehova, anamudhi ali omala-nawale—wi anikamihedhe vina alivi na iyo wi niwanena makattamihoya mumodhani.”

14. Ninfunelani wakela nikamihedho na anddimuwa a mulogo?

¹⁴ Mukalelo mwina onnivaha Yehova guru ku walabihedha anddimuwa a mmulogoni. Awene nvaho wa Yehova wi anilibihe vina anakele ottukula mittorho dhehu. (Iza. 32:1, 2) Nona akala onogumanana makattamiho kawaddele dhozuzumiha dhawo anddimuwa a mmulogoni. Kuwubuwele dila bili, katamela nikamihedho nawa. Yehova onowodha wulibiha alabihedhaga anddimuwa a mmulogoni.

15. Njedhelo gani nina Akristu otene?

¹⁵ Njedhelo ninehu nindela mBibiliani ninowodha onivaha guru. (Rom. 4:3, 18-20) Akristu otene ahikana njedhelo notikiniha—okalawo namukalakala mparaizu velaboni  ya vati obe Mumweneni wa wirimu. Njedhelo nehu ninowodha onikamihedha ovilela mmakattamihoni, olaleya miselu dhapama vina wakwanihedha mabasa anttomeliwihu mmulogoni. (1 Tes. 1:3) Njedhelo-nene ntti ttimulibihile murumiwi Paulo.

16. Paulo wafunelani guru?

¹⁶ Paulo wanfuna venjene guru, mukartani yalebiliye akadda Korinto ohiviladdaniha ninga yobo ya ologo ehinrutxa omunyeya. Iyene ohifwanyiwa dhorutxa, dhodhugudha, widdiwa vina makattamiho agamuttukuleli otolowa. Dila dhina wakala nena na okwa. (2 Kor. 4:8-10) Paulo olebile mazu aba mudhidhi wakosiye oleddo wanoraru wa mabasa aye a omisionario. Ottiya eji wanziwa wi agahigumanana makattamiho mena ottabwa. Iyene agahilupeliwa na amwiddani agahikiwa mukambura, agahibwina munyaza.

17. Txini emulibihile Paulo mmakattamihoni mwaye? (2 Korinto 4:16-18)

¹⁷ Sabwa ya ozuzumela njedhelo Paulo wahifwanya guru yafuniye wi awodhe ovilela. (Kengesa 2 Korinto 4:16-18.) Iyene ohawaddela akadda Korinto wi masiki maningo aye alalagavi obu kugakalile mwaha ogamuttukuleli wiyelela mundduni. Paulo wazuzumela njedhelo naye na musogorho. Njedhelo na wakela egumi ya mukalakala wirimu nali na muttengo munddimuwa vaddiddi nona katanala makattamiho-makattamihovi agumaniyena. Paulo wahitanalela njedhelo ntti nona murima waye wandowa alibagavi.

18. Njedhelo nimulibihile dhavi Tihomir na amudhaye?

¹⁸ Njedhelo na musogorho nihimulibiha mbali dhahi wo Bulgaria onkuweliwa Tihomir. Vyaka dhing’onovi mundduni mbale mung’onoya Zdravko, wahikwa na ngovi. Sabwa ya ejuwene, Tihomir wankubanya venjene. Wi awodhe owanana makattamiho aba, iyene vamodha na amudhaye anoroma otanalela mukalelo onakale attu agavenyiwa mukwani. Iyene ohiloga dhahi: “Motagiha iyo nannubuwela onanfwanyehu Zdravko, yoja enasasanyedhihu, attu anawobihu wi akale na iyo vamattanganiva iyene ageyela, vina dhilobo  gani dhinamwaddelihu esuwene dhipadduwile masaka omariha.” Tihomir ohiloga wi ozuzumela njedhelo na musogorho ninowalibiha amudhaye odhowavi avilelaga vina ajedhelaga mudhidhi wofwanyelela onanvenyihe Yehova mbalaye.

19. Txini enfwanyeliwe okosa wi owaralihe njedhelo nawo? (Koona vina foto.)

¹⁹ Onalibihe dhavi njedhelo nawo? Akala njedhelo nawo tta okala velaboni ya vati namukalakala kengesa mapadduwo a Bibilia anloga sabwa ya paraizu vina otanalele. (Iza. 25:8; 32:16-18) Kobuwela mukalelo enakale egumi mwilaboni eswa. Vina kavubuwele buli mwenemo. Bani agaziveliwe weyo omona? Oniwa oruma wa elobo gani? Oniviwamo dhavi? Wi okamihedhe otanalela oku buli mparaizu, koona mafoto anfwanyeya mmapublikasauni ehu obe koona jibo ninga, No Mundo Que Aí Vem, Dhinereye Mohigonela, obe Imagina Um Mundo sem Dor. Nigatamela mudhidhi wi nitanalele mukalelo onakale egumi yehu mwilaboni eswa, masoso anonihu ovanene anakale ninga “kahiyo elo.” (2 Kor. 4:17) Njedhelo ninivahile Yehova ninele onilibiha.

20. Masiki niviwonaga wi nihobana, ninawodhe dhavi okana guru?

²⁰ Masiki akala ninivyona ninga nobanile ninoziwa wi na nikamihedho na Mulugu ninele okana guru. (Masal. 108:13) Yehova ononivaha dhotene dhinfunihu wi nakele guru yaye. Nona ogatamela nikamihedho wi wakwanihe mabasa attomeliwiwe, owodhe owanana makattamiho obe odhowegevi okanaga wagalala kanfugulele Yehova murima wawo na nlobelo, katamela malago aye modhela okosa nsunzo nomwinya. Karumela nipangarhazo vina nikamihedho na abali ena. Mudhidhi wotene kavilibihedhe otanalela mukalelo onakale egumi mparaizu. Ogakosa dhawene Mulugu onele wuwaraliha na owodha waye onddimuwa wi owodhe ovikoma mmakattamihoni mwetemwene.—Kol. 1:11.