NSUNZO 38
“Mudhe vali Miyo, Ddinoulibihani”
“Nyuwo motene mulemile, mukukumuwile mudhe vali miyo, ddinoulibihani.”—MT. 11:28.
JIBO 25 “Nilagihe Wi Nili Anamafara”
BHINASUNZE IYO *
1. Mowiwanana na Mateu 11:28-30, nipikirelo gani nikosile Yezu?
YEZU wahikosa nipikirelo namakamaka valiye na muttitti wanvuruwana. Iyene wahiloga “mudhe vali miyo, ddinoulibihani.” (Kengesa Mateu 11:28-30.) Nipikirelo ntti kahiyo na vayovi. Kobuwela, motagiha, yakosiliye na muyana ddule watabuwa na eredda yawopiya.
2. Yezu wamukoseli eni muyana wa muredda?
2 Muyana oddule wasegedhehile wanfuna nikamihedho. Wahidhowa wa ang’anga enjene, atamelaga ovulumutxiwa. Iyene wahitabuwa vyaka 12 na eredda, mbwenye kafanya nikamihedho. Mowiwanana na Malamulo, iyene wakala wokwarulene. (Onam. 15:25) Iyene wahiwa wi Yezu wannavulumutxa abale atabuwa na eredda, venevo iyene wanfuna ogumanana. Munfanyeliye, iyene omususela oddiginya yabalo yaye, vina wahivulumuwa momaguva! Mbwenye Yezu wahikosa dhilobo dhikwaranyile onvulumutxa—iyene wahimweddiha na nriho vina oderetu. Motagiha, Yezu wahiloga na iyene, alabihedhaga mazu aba “Mwanaga” amulagihaga okwela vina nriho. Katanalela mukalelo walibihiwe, obe wavahiwe guru muyana oddule!—Lk. 8:43-48.
3. Mavuzo gani anfunihu wakula?
3 Katanalela ekosile muyana oddule. Iyene ddiromile odhowa vali Yezu. Txibarene enofuneya okosa yakene masaka abano—nivilibihedhe ‘odhowa vali’ Yezu. Masaka abano, Yezu kankosa matikiniho a wavulumutxa aredda ‘andowa’ valiye. Mbwenye niwobo ntti: “Mudhe vali miyo, ddinoulibihani” nihikalawovi. Mwari mwa mutoma obu, ninele wakula mavuzo matanu: Ninawodhe dhavi ‘odhowa vali’ Yezu? Txini yatapulela mazu a Yezu valogiliye: “Kanga yaga kinwoma”? Txini enasunzehu na yotagiha ya Yezu? Mabasa anivahiliye wi nikose annilibiha dhavi? Vina ninawodhe dhavi odhowavi nilibihiwaga na kanga ya Yezu?
“MUDHE VALI MIYO”
4-5. Na mikalelo gani egawodhilihu ‘odhowa vali’ Yezu?
4 Mukalelo mmodha wa ‘odhowa vali’ Yezu bwa iyo ovilibihedha osunza mwaha wa dhilobo dhisunzihiliye vina dhikosiliye. (Lk. 1:1-4) Kavo anawodhe onikosela—iyo nanya ninofwanyela osunza dhopadduwa esi. Vina ninawodhe ‘odhowa vali’ Yezu nigagana obatiziwa vina okala anamafwara a Kristu.
5 Mukalelo mwina wa ‘odhowa vali’ Yezu bwa okumbirha nikamihedho na anddimuwa a mulogo. Yezu onalabihedha “mivaho” esi dha attu wila asapihena mabilaye. (Ef. 4:7, 8, 11; Jo. 21:16; 1 Ped. 5:1-3) Ninofwanyela okumbirhaga nikamihedho nawa. Kanijeedhele wila anddimuwa a mulogo anele oziwa dhili muyubuweloni mwehu vina dhinfunihu. Koona elogile mbali oniliwa Julian: “Miyo ddahittiya mabasa attomeliwemi o Betel sabwa ya eredda, vina mukwaga oddaddela wi enofuneya wahapanga anddimuwa a mulogo wila addilibihe. Vamaromo, ddobuwela wi kili yofuneya. Mbwenye osogorhowa ddahikumbirha, vina ddahoona wi waredheliwa okule wali mvaho wa ttima wattambirhile miyo.” Anddimuwa a mulogo a weddeyana, ninga abale adhowile omwaredhela Julian, anowodha onikamihedha oziwa “zelu ya Kristu,” kuloga, ononelamo vina otagiha dhubuwelo na merelo a Yezu. (1 Kor. 2:16; 1 Ped. 2:21) Txibarene mukalelo obu mvaho wapama onwodha awene onivaha.
“KANGA YAGA KINWOMA”
6. Txini entapulela mazu a Yezu valogiliye: “Kanga yaga kinwoma”?
6 Valogile Yezu: “Kanga yaga kinwoma,” txino wafuna atapulele wi “murumele ottonga waga.” Txino vina aafuna atapulele “Volowaní mukangani mwaga, nyuwo na miyo ninele omulabela Yehova vamodha.” Masiki dhahene, kanga eniwanana na mabasa.
7. Mowiwanana na Mateu 28:18-20, mabasa gani avahiwehu wila nikose, nanda ninakaane nikuluvelo gani?
7 Iyo ninrumeela niwobo na Yezu nigamperhekela egumi yehu Yehova vina nigabatiziwa. Yezu onowawoba otene odhowa valiye—vina iyene kananyanyala abale anfuna omulabela Mulugu na murima wotene. (Jo. 6:37, 38) Anamafwara otene a Kristu avahiwa gari yolaba vamodha na Yezu mmabasani a Yehova. Nikuluvele wi Yezu onele okalavi vamodha na iyo vina onikamihedha wakwaniha mabasa aba ankosihu.—Kengesa Mateu 28:18-20.
“SUNZANÍ DHINIRA MIYO”
Walibihege attu ena ninga mwakosela yezu (Koona ddima 8-11) *
8-9. Sabwaya jani yafunela athu oviyeviha okala vakuvi na Yezu, nanda mavuzo gani anfwanyelihu ovivuza nanyene?
8 Athu oviyeviha anfuna okala vakuvi na Yezu. (Mt. 19:13, 14; Lk. 7:37, 38) Sabwaya? Sabwani Yezu wali wottiyana na Afarizi. Anddimuwa abale a marelijiau ali athu ovithukulela. (Mt. 12:9-14) Yezu wali wokwela vina oviyeviha. Afarizi aali anamakumbela vawa vina anivithukulela sabwa yokaana ethomo yamakamaka. Yezu wahiloga wila obule kuwali mukalelo wapama, iyene wahasunziha anamafwara aye okala oviyeviha vina walabela athu ena. (Mt. 23:2, 6-11) Afarizi annakwekwettela athu wiwelela dhasunzihani na wova. (Jo. 9:13, 22) Yezu wanalibiha athu ena na merelo a okwela vina mazu a thagaraga.
9 Osunzile eni na yotagiha ya Yezu? Kavivuze: ‘Athu anoddona na mukalelo wokurumuwa vina oviyeviha? Ddili womala nawale wila ddikose mabasa oviyeviha wila ddalabele ena? Miyo ddinowaweddiha athu ena noderetu?’
10. Yezu wetile eni na alaba na iyene?
10 Yezu owita mukalelo wa murenddele, wofiyedheya na anamafwara aye, vina iyene wanziveliwa washagiha. (Lk. 10:1, 19-21) Iyene wahalibiha anamafwara aye okosa mavuzo, vina wantamela ovuruwana monelo wawa. (Mt. 16:13-16) Dhahene ninga milima dhinunuwa vego vofewa, anamafwara aye ahunuwa na mukalelo wapama. Awene ahifwaseyela ovuruwana masunziho a Yezu vina ahibaala milima dha mabasa apama.
Okale wofiyedheya vina womarho
Okale wohimela pwi vina ottidda mabasa
Okale oviyeviha vina wolaba *
11. Mavuzo gani anfwanyelihu ovikosa nanyene?
11 Weyo okana ethomo yamakamaka? Akala okana, kavivuze: ‘Ddinaweddiha dhavi athu ena omabasani obe vatakulu? Ddinoziveliwa murenddele? Ddinowalibiha athu ena okosa mavuzo? Ddinofwaseyela ovuruwana dhubuwelo dha athu ena?’ Iyo kaninfuna okala ninga Afarizi, asilidhiwa sabwa yovuziwaga vina afwara-fwara abale anna monelo wottiyana na wawa.—Mk. 3:1-6; Jo. 9:29-34.
“MUNOFWANYA OSANZAYA”
12-14. Sabwaya jani enlogelihu wi mabasa aba anivahile Yezu anonilibiha?
12 Sabwaya jani enlogelihu wi mabasa anivahile Yezu anonilibiha? Vahikala mwaha dhinjidhene, mbwenye ninfuna none dhing’onovi.
13 Iyo nikaana anameddelela apama. Yehova, Nameddelela wehu Munddimuwa, kahiyo mwene wawopiha obe wohitamaalela. Iyene onovaha ttima mabasa ankosihu. (Aheb. 6:10) Vina iyene ononivaha guru dhinfanyeelelihu wila niwodhe ottukula muthorho wehu. (2 Kor. 4:7; Gal. 6:5) Yezu, Mwene wehu, ononivaha yotagiha yawakwana ya mukalelo wa waweddiha attu ena. (Jo. 13:15) Vina anddimuwa a mulogo annisapiha anotamela omutagiha Yezu, oli “mukumbuzi munddimuwa.” (Aheb. 13:20; 1 Ped. 5:2) Wila anisunzihe vina anibarele, awene anovilibihedha na mukalelo woderetu vina anonilibiha noziveliwa.
14 Nikana amarho apama. Kawo nikuru nina na attu anna amarho okweleya ninga iyo. Kobuwela: Iyo nikaana gari yolaba vamodha na attu anna mweddelo wottukuwa vina wapama mbwenye kanivittittimiha. Awene akana ttontto mbwenye anovipimelela, vina anowawoona attu ena ttima opitta yawa. Awene kannona ninga akwawa omabasani bahi mbwenye ninga amarho. Ofiyedheyana oku koliba mpaka awene okala womala nawale wila aniperhekele egumi yawa!
15. Ninfwanyelela wubuwela dhavi mwaha wa mabasa ankosihu?
15 Nikana mabasa apama. Iyo ninowasunziha attu ebaribari mwaha wa Yehova vina ninowoniha ottambi wa Ddiabo. (Jo. 8:44) Satana onowatabutxa attu na ottambi obuwene onakosiha awene orimeliwa njedhelo. Motagiha, iyene onfuna wi nirumeele wi Yehova kanalevelele dhothega dhehu vina kannikwela. Eji elobo yabure vina ottambi wawopiha! Iyo ‘nigadhowa vali’ Kristu, dhottega dhehu dhinoleveleliwa. Ebaribariya jawi, Yehova onowakwela vaddiddi attu. (Rom. 8:32, 38, 39) Jowagalaliha vaddiddi wakamihedha attu osunza omukuluvela Yehova vina okana egumi yapama!
NIDHOWEGEVI NIPWATTELAGA KANGA YA YEZU
16. Ottiyana gani onna muttorho onnikumbirha Yezu wila nittukule na mittorho dhina dhinkanihu?
16 Muttorho wa Yezu onikumbirhiye wi nittukule ottiyana na dhina dhinkanihu. Motagiha, empadduwa jawi, attu enjene ageyelaga oganyoni ankala olemene vina osilidhiwene sabwa ya mabasaya. Mwa mpaddi mwina, nigavira mudhidhi mwinjene nimulabelaga Yehova na Kristu, ninkala ohagalalene. Txino ninkala olemene nigeyelaga omabasani omagomelo wa siku, masiki dhawene ninodhowaga omatugumanoni. Mbwenye nigeyelaga omatugumanoniwa ninkala olibene vina opangarhazeyene. Yakene enopadduwa nigavilibihedha olaleya vina okosa nsunzo nehu nomwinya na Bibilia. Mareliho anakelihu manddimuwa onopitta guru enonga iyo!
17. Ninfwanyela ononelamo eni, nanda txini enfwanyelihu okalela pasope?
17 Ninofwanyela ononelamo ebaribari. Muttu-muttu wa iyo okana vangomela guru dhaye. Nona ninofwanyela okala pasope nigasakulaga dhilobo dhokosa. Motagiha, nigahinonga guru dhehu nitamelaga ozuzumela dhilobo dhomaningoni. Koona txini yalogile Yezu na muzombwe wa mureli wanvuzile iyene: “Ddirege nni wi ddifwanye okalawo wamukala-kala?” Muzombwe oddule wanniwelela Malamulo. Txino iyene wali muttu wapama sabwani Muttaka wa Marko onologa wi Yezu “omwañgana n’okwela.” Nona Yezu ohimukosa niwobo muzombwe oddule. Ohiloga “dhowa wagulihe dhetene dhinewe,” vina “Ngamala odhe, oddifware.” Muzombwe oddule wanfuna onfwara Yezu, mbwenye iyene kawodha odduwala dhotene “vowi wali mureli vaddiddi.” (Mk. 10:17-22) Yodhelavoya jawi, iyene karumelile kanga yanvahile Yezu nona wahikalavi mudhari wa “muhaku.” (Mt. 6:24) Koddi weyo onakose yosakula gani?
18. Na mudhidhiya, txini enfanyeelelihu okosa, nanda sabwaya jani?
18 Mudhidhi bu mudhidhi, japama opepesa dhili vamburoni voroma mwigumini mwehu. Sabwaya? Sabwani enele onikamihedha wona akala ninolabihedha deretu guru dhehu. Koona elogile muzombwe Mark: “Movira mwa vyaka dhinjidhene, miyo ddobuwela wi ddahikaana egumi yovevuwa. Ddali pionero, mbwenye ddobuwela mwaha wa kobiri vina okana egumi yofwasa. Ddanvivuza txini yakosiha egumi yaga okala yorutxa. Nona, ddahinonelamo wi miyo ddazuzumela dhofuna dhaga vina ddamulabela Yehova na mudhidhi mung’onovi bahi.” Mark wahogola mubuwelo waye vina wahikosa matxinjo mwigumini mwaye wila alabihedhe mudhidhi wotene mmabasani a Yehova. Mark ohiloga: “Dila dhina, ddinozuzumaga, mbwenye na nikamihedho na Yehova vina Yezu, ddinowodha okwaranya makattamihoya.”
19. Ekaleleni yamakamaka okana monelo wapama?
19 Wila nidhowegevi nilibihiwaga na kanga ya Yezu ninofanyela okosa dhilobo tharu. Yoroma, okaana monelo wapama. Vowi ninkosa mabasa a Yehova, ninofanyela olaba ninga munfunela Yehova. Iyo nili anamalabaya, Yehova ddi Mwinya. (Lk. 17:10) Akala ninolaba mabasa a Yehova ninga munfunelihu, ninkala ninga ninwanana kangaya. Kobuwela empadduwa na ñgombe, entamela ovenyamo mukangani ottiya weddihiwa na mwinya, mbwenye masiki ekaane guru kinarutxe olema vina enddaga ovoreyeya. Mwa mpaddi mwina, akala ninofara magano a Yehova, ninele owodha okana dhopurelamo dhotikiniha vina okwaranya makattamiho. Kobuwela wi kawo elobo enawodhe wimetxa mabasa a Yehova!—Rom. 8:31; 1 Jo. 4:4.
20. Txini enattukulele ovijela kanga ya Yezu?
20 Yanawili, olaba na efunelo yapama. Yofuna yehu ja omuttimiha Babihu wokweleya, Yehova. Attu a masaka a Yezu alaba na efunelo yomwinya obe okumbela vawa nona mohigoneela ahikubanya vina ahittiya ottukula kanga ya Yezu. (Jo. 6:25-27, 51, 60, 66; Fil. 3:18, 19) Mwa mpaddi mwina, abale alaba na efunelo ya omukwela Mulugu vina wakwela anamwanddamani awa attukula kanga ya Yezu nowagalala mwigumini mwawa velaboni ya vati, vina ahakela njedhelo na olaba vamodha na Kristu odhulu. Ninga awene, ninele wagalala nigattukula kanga ya Yezu na efunelo yapama.
21. Mowiwanana na Mateu 6:31-33, txini enjeedhela iyo wi Yehova onele onikosela?
21 Yaneraru, okaana njedhelo na pama. Iyo nisakula ottukula egumi yokwela vina mabasa ovadda. Yezu wahiloga wi nigahifwara-fwariwa. Mbwenye ninojeedha wi Yehova onele onivaha guru wila nivilele makattamiho ottiyana-ttiyana. Nigavilela vaddiddi, ninele okala owarala. (Tia. 1:2-4) Ninojeedhela wi Yehova onele onivaha dhinfunihu, Yezu onele onisapiha, vina abalihu na arogoraya anele onilibiha. (Kengesa Mateu 6:31-33; Jo. 10:14; 1 Tes. 5:11) Kavali waganyedha wi, nikaana dhotene dhinfunihu wila nivilele!
22. Ninfwanyela otamalela eni?
22 Muyana oddule wali muredda wahilibiheya labonene nttile nanvulumutxile Yezu. Mbwenye wila odhowegevi alibihiwaga na Yezu anfanyela okala namafwara oweddeyana a Kristu. Wonamo wawo txini yakosiliye? Akala iyene onosakula odhowa vali kanga Yezu, kobuwela mareliho attambiriliye—olaba vamodha na Yezu wirimu! Guru yakosiliye yonfwara Yezu kinligana na mareliho akeleliye. Masiki akala njedhelo nehu—okala odhulu obe velaboni ya vati—enowodheya otamalela sabwa yorumeela niwobo na Yezu: “Mudhe vali miyo!”
JIBO 5 Kristu Yotagiha Yehu
^ par. 5 Yezu ononiwoba wi nidhowe vali iyene. Txini eniwanana na orumela niwobo ntti? Mutoma obu onele wakula nivuzo ntti, vina onele onubutxedha mukalelo onawodhihu olibihiwa sabwa yolaba vamodha na Yezu.
