1. Ninfwanyelela nni omwiwelela Yehova?

NINOFWANYELA omwiwelela * Yehova sabwani iyene ddi Muttanddi wehu. Ninga muttanddi wehu, iyene ddinfanyeela onivaha malago. (Ovuh. 4:11) Mbwenye ohikalawo mwaha mwina wa ttima enfwanyelihu omwiwelela Yehova—sabwani mukalelo waye wolamulela bwaderetu. Mwari mwa vyaka dhinjene, alamuleli a attu ahikaana ewodhelo vina ettomo ya walamulela attu ena. Mottiyana na awene, Yehova dwa eziwelo, wokwela, wa ttagaraga vina Mulamuleli wasupaje na attu otene.—Obud. 34:6; Rom. 16:27; 1 Jo. 4:8.

2. Mowiwanana na Ahebreu 12:9-11 sabwaya jani enfwanyelihu omwiwelela Yehova?

² Yehova onfuna wila iyo nimwiwelelege, kahiyo sabwa ya omova, mbwenye sabwa ya omukwela iyene vina omoona ninga Babihu wokwela. Mukartani mwaye ya Ahebreu, Paulo ononihedhamo wi ninofwanyela “omukurumuwela vaddiddi Babihu wodhulu” sabwani iyene onnilagela “opama wehu.”—Kengesa Ahebreu 12:9-11.

3. (a) Ninatonyihedhe dhavi wi ninomwiwelela Yehova? (b) Mavuzo gani anfunihu wakula?

³ Iyo ninomwiwelela Yehova modhela ovilibihedha wila ovirihamo dhetene dhinfuniye vina ohikuluvela malago ehu. (Gano 3:5) Elobo modha enanikamihedhe omwiwelela Yehova, ja oziwa mikalelo dhaye dhapama. Sabwaya? Sabwani mikalelo esi dhinoneya mwa dhotene dhinkosiye. (Masal.  145:9) Nigasunzaga vaddiddi mwaha wa Yehova, okwela wehu onelege wunuwavi. Vina nigamukwela Yehova, kaninatamele muddonddo wa malamulo onanilagihe enfwanyelihu okosa obe ohikosa. Nivilibihedhe wubuwela na otanalela ninga munfunela Yehova vina nirabele dhili dhabure. (Masal. 97:10) Mbwenye, dila dhina, kahiyo yovevuwa omwiwelela Yehova. Sabwaya jani? Vina txini enasunze anddimuwa a mulogo, ababi vina amai na dhotagiha dha Guvernadoro Nehemiya; Mwene David; vina Maria, mayi wa Yezu? Mutoma obu onele onivaha yowakula ya mavuzo aba.

4-5. Mowiwanana na Roma 7:21-23, ekalele nni yorutxa omwiwelela Yehova?

⁴ Ttangwi mmodha entapulela sabwaya enrutxela dila dhina omwiwelela Yehova jawi ninopattiwa yottega vina nili attu ohakwana. Nona nikana efunelo yosadduwela. Vamalile Adamu na Eva omusadduwela Mulugu mpaka oja mulima okooddihiwa, awene ahisakula anyene eli yapama vina eli yabure. (Wita 3:22) Masaka abano, attu enjene anosakula onvanya Yehova vina ahisakula anyene eli yapama vina eli yabure.

⁵ Masiki abale animuziwa vina animukwela Yehova anorutxiwa omwiwelela iyene. Murumiwi Paulo ofwanyiwa makattamiho aba. (Kengesa Roma 7:21-23.) Ninga Paulo, ninfuna nikose esile dhili pama vamentoni va Yehova. Mbwenye dila dhina ninowana na efunelo yokosa dhilobo dhabure.

6-7. Ttangwi gani yina enirutxiha omwiwelela Yehova? Kavaha yotagiha.

⁶ Ttangwi yina enirutxiha omwiwelela Yehova ja opattiwa na elemelelo ya murudda wunuwilehu. Dhubuwelo dhinjene dha attu kadhiniwanana na dhinubuwela Yehova, dila dhina ninovilibihedha ofuruleya mwa mikalelo esi dha wubuwela. Koona yotagiha modha.

⁷ Mimburo dhina azombwe anodideliwa wila azuzumele okana kobiri dhinjene mwigumini mwawa. Jijuwene empadduweli murogora oniliwa Mary. * Ahinatti osunza mwaha wa Yehova, iyene wahikosa masunzo manddimuwa mwilaboni mwaye. Anamudhi a Mary ahimudidela okana ganyo ettomo eganvahile kobiri yinjene. Iyene vina wanfuna ganyoya. Masiki dhawene, mumaleliye osunza mwaha wa Yehova vina omukwela, iyene wahitxinja yogana yaye. Iyene ohiloga: “Dila dhina ddinofwanyaga mikalelo dhokaana kobiri yinjene, mbwenye miyo ddinoziwa wi esi kadhinvahana na mabasa a animukoselimi Yehova ovanene. Sabwa ya mukalelo oleliwemi, enoddirutxaga okodda. Ddinomukumbiraga Yehova wila addikamihedhe okodda ganyo egadhile ozuzumiha mabasa animukoselimi.”—Mt. 6:24.

8. Txini enfunihu osekeserha ovanene?

⁸ Ninga mumalilehu osunza, japama iyo omwiwelela Yehova. Mbwenye mwa abale anna ettomo, ninga anddimuwa a mulogo, ababi, na amai akana mwaha mwina wa omwiwelela Mulugu; vowi awene akana gari ya wakamihedha attu ena. Ndoweni nisekeserhe dhotagiha dhing’onovi dha mBibiliani dha mukalelo olabihedha ettomo wila amwagalalihe Yehova.

9. Magudulano gani agumanilena Nehemiya?

⁹ Yehova ohavaha anddimuwa a mulogo muttorho wamakamaka wosapiya nlogo  naye. (1 Ped. 5:2) Enowodheya anddimuwa a mulogo osunza  mukalelo weddihile Nehemiya nlogo na Yehova. Ninga guvernadoro w’o Judá, Nehemiya wahikaana ettomo enddimuwa. (Nem. 1:11; 2:7, 8; 5:14) Katanalela magudulano agumanilena Nehemiya. Iyene wahiwa wi athu kattittimiha mparha nne katonyihedha nriho na omwebedha Yehova vina kapereka mivaho dhaloga Malamulo wila avahiwege Alevita. Ayuda ahittiya ovirihamo Nlamulo naloga na Sabuddu, vina alobwanaya ahitela ayana a malogo mena. Guvernadoro Nehemiya wanfwanyela okosavo elobo mwaha wa makattamiho abale.—Nem. 13:4-30.

10. Nehemiya wakosile nni wila avilele makattamiho agumaniliyena?

¹⁰ Nehemiya kapujile onddimuwa waye modhela odidela nlogo na Mulugu wiwelela dhubuwelo dhaye. Ottiya ejo, iyene wahimuloba Yehova nikamihedho, vina wahasunziha attu Malamulo a Yehova. (Nem. 1:4-10; 13:1-3) Noviyeviha Nehemiya wahilaba vamodha na abali aye, wahakamihedha awene ovenyihedha rhinga dha Jeruzalemi.—Nem. 4:15.

11. Mowiwanana na 1 Tesalónika 2:7, 8, anddimuwa a mulogo anfwanyela waweddiha dhavi ena mmulogoni?

¹¹ Anddimuwa a mulogo txino kanakaane makattamiho akene a Nehemiya, mbwenye enowodheya omutagiha na mikalelo dhinji. Motagiha, awene anolaba na guru wila aakamihedhe abali na arogora. Awene vina kanivittukulela sabwa ya ettomo enani. Ottiya ejo, awene anoweeddiha mulogo nokwela. (Kengesa 1 Tesalónika 2:7, 8.) Okwela wawa onddimuwa vina oviyeviha onopatta mukalelo onlogani na attu ena. Andrew, oli munddimuwa wa mulogo nawalene ologa: “Ddihona wi, munddimuwa wa mulogo agalagiha oderetu na omarho, onoddiginya mirima dha abali na arogora. Mikalelo esi dhinowattukulela abali olaba vamodha na  anddimuwa a mulogo.” Munddimuwa mwina oniliwa Tony, ologa: “Miyo ddinotamela ovirihamo malago anfwanyeya mukartani ya Filipi 2:3 vina ddinovilibihedha wona ttima ya attu ena opitta yaga. Esi dhinoddikamihedha orabela wadidela attu ena oddiwelela miyo.”

12. Ekalele nni yamakamaka anddimuwa a mulogo okala oviyeviha?

¹² Anddimuwa a mulogo anofwanyela oviyeviha, dhahene ninga Yehova oli oviyeviha. Masiki Yehova valiye Namadhulu-dhulu wa elabo yotene, iyene “onoworamela wona” vina “onomvenyiha vambwebweni muhawi.” (Masal. 18:35; 113:6, 7) Nona, Yehova onowawidda abale anivittukulela vina anpanela.—Gano 16:5.

13. Munddimuwa wa mulogo onfanyeelela nni “omaga nlumi naye”?

¹³ Munddimuwa wa mulogo onimwiwelela Yehova onofwanyela “omaga nlumi naye.” Agahikosa dhawene, txino ondhaga ologa na mukalelo wabure akala muttu mwina kanimuriha. (Tia. 1:26; Gal. 5:14, 15) Andrew, ologiwe mundduni, ologa: “Dila dhina, ddanubuwela omwakula nobure mbali obe murogora wakoodda oddiriha. Mbwenye, miyo ddahitanalela dhotagiha dha alobwana ororomeleya ali mBibiliani, eji ehiddikamihedha wona ekalelani yamakamaka oviyeviha vina okurumuwa.” Anddimuwa a mulogo anotonyihedha omwiwelela Yehova modhela ologa na mukalelo wokwela vina oderetu na abali a mmulogoni, vina anddimuwa ena a mulogo.—Kol. 4:6.

14. Ababi attomiwe eni na Yehova, nanda txini enfuna iyene wi awene akose?

¹⁴ Yehova ohimuttoma babi wi akale musorho a vamuralani, Mulugu onfuna wi iyene ashagihe vina aalele anaye na malago. (1 Kor. 11:3; Ef. 6:4) Mbwenye vahikala vangomela ettomo ya babi—iyene onofanyeelela wakulela wa Yehova, oli mwinya wa murala onttukula nzina naye. (Ef. 3:14, 15) Ababi anlagiha omwiwelela Yehova modhela olabihedha ettomo yawa na mukalelo wa omwagalaliha Mulugu. Enowodheya awene osunza vaddiddi na yotagiha ya Mwene David.

15. Mwene David okalele nni yotagiha yapama wa ababi?

¹⁵ Yehova ohimuttoma David ninga musorho wa vamuralani vina musorho wa nlogo na ana Izrayel. Sabwa yokala mwene, David wahikaana kopolo. Masaka mena, iyene wahilabihedha mubureni kopolo esi vina wahira yoddawa enddimuwa. (2 Sam. 11:14, 15) Mbwenye iyene wahitonyihedha omwiwelela  Yehova modhela orumela olagiwa. Iyene wannimulobelela Yehova na murima wotene. Vina wankosa muli mwetemwene wi ewelele malago a Yehova. (Masal. 51:1-4) Mowenjedhedha, iyene waviyeviha vaddiddi ofiyedha orumela malago apama avahiwiye na alobwana vina a ayana. (1 Sam. 19:11, 12; 25:32, 33) David wahisunza na dhoddawa dhaye vina wahizuzumela omulabela Yehova mwigumini mwaye.

16. Txini enasunze ababi na yotagiha ya David?

¹⁶ Enowodheya ababi osunza na dhotagiha dhing’onovi dha Mwene David: Kulabihedhe nobure ettomo yuvahile Yehova. Karumela dhovonya dhawo, vina kakela ogavahiwa malago a mBibiliani. Ogakosa dhawene, amudhawo anele wuriha sabwa yoviyeviha wawo. Ogalobelaga na amudhawo, kampange Yehova dhili mmurimani mwawo—awene anele oziwa wi onomukuluvela. Yamakamakaya ja, omulabela Yehova mwigumini mwawo. (Olib. 6:6-9) Kobuwela wi yotagiha yawo elobo yattima enfwanyeliwe wattiyedha amudhawo.

17. Ettomo gani evahiwe amai na Yehova?

¹⁷ Yehova ohattomela amai mabasa a makamaka vamuralani, vina iyene ohavaha ettomo eng’onovi ya walaga anawa. (Gano 6:20) Dhokosa vina dhologa dha amai dhinowodha wapatta anawa mwigumini mwawa mwetemwene. (Gano 22:6) Koona enasunze amai na yotagiha ya Maria, mayi wa Yezu.

18-19. Amayi anasunze eni na yotagiha ya Maria?

¹⁸ Maria wanziwa deretu Malebo. Iyene wannimuriha Yehova vina wahikaana mandano ofiyedheyana na iyene. Wali omala na wale wi amwiwelele Yehova, masiki ejo kotapulela osaddula egumi yaye yotene.—Lk. 1:35-38, 46-55.

¹⁹ Enowodheya amai omutagiha Maria mwa mikalelo dhottiyana-ttiyana. Dhavi? Voroma, olibiha mandano na Yehova, okosa nsunzo nomwinya na Bibilia vina olobelaga. Yanawili, modhela okosa matxinjo mwigumini mwawa wi amwagalalihe Yehova. Motagiha, txino weyo oleliwe na amambali aharutxa osilidhiwa vina anyanyuwela anawa. Txino weyo wubuwela wi obu bu mukalelo onleliwa aima. Masiki mmaleliwe osunza magano a Yehova, txino onorutxiwa walela anawo nokurumuwa vina ovilela, makamaka akala kaniwelela dhinfuniwe. (Ef. 4:31) Egali dhawene, enofuneya omukumbirha Yehova nikamihedho modhela nlobelo. Mai dhahi oniliwa Lydia ologa: “Dila dhina, miyo ddinolobelaga vaddiddi wila ddinaloge nowali mwanaga  agattiya oddiwelela. Malabo mena ddigalogaga ddinomalaga miyo olobela na mmirimani, ddikumbirhaga nikamihedho na Yehova. Olobela onoddikamihedha okurumuwa.”—Masal. 37:5.

20. Matxinjo gani angumanana na amai ena, nanda anawodhe dhavi okwaranya magudulano aba?

²⁰ Amai ena txino anogumanana na magudulano akene—awene anorutxiwa otonyihedha okwela onani na anawa. (Tito 2:3, 4) Ayana ena aleliwe vamuralani va amambali ahana mandano okweleya na anawa. Akala weyo oleliwe dhawene, kunfwanyela wiyelela dhovirigana dha amambali awo. Mai onimwiwelela Yehova txino onele osunza otonyihedha mukalelo wa wakwela anaye. Txino eji enele omurutxa iyene otxinja mukalelo waye wa wubuwela, otanalela vina merelo. Mbwenye enowodheya okwaranya, vina matxinjo aba anele omukamihedha iyene vamodha na amudhaye.

21-22. Mowiwanana na Izaiya 65:13, 14, mareliho gani anakelihu nigamwiwelela Yehova?

²¹ Mwene David wanziwa yopurelamo ya omwiwelela Yehova. Iyene oleba: “Dhóruma dha Nabuya kadhinpela malago, dhinothabiha murima; malamulo a Nabuya kanpipiriheya, anomoneya omentoni. Mwimeleli wenyu vina oleliwé n’esiwene; onvirihamo, onopúrana vopitha.” (Masal. 19:8, 11) Masaka abano, ninowodha woona ottiyana wa abale ansakula onimwiwelela Yehova na abale ankoodda malago aye okwela. Abale ansakula omwiwelela Yehova “anerege wiba n’owagalala wetene.”—Kengesa Izaiya 65:13, 14.

²² Anddimuwa a mulogo, ababi na amai animwiwelela Yehova, anokaana egumi yapama, anamudhi awa anowagalala vina anowiwanana na abali a mmulogoni. Yamakamakaya opitta dhotene, jawi awene anowagalaliha murima wa Yehova. (Gano 27:11) Aba mareliho manddimuwa anihuna!