1. Yehova onawoona dhavi attu oviyeviha? Katapulela.

YEHOVA onowakwela attu oviyeviha. Abale aniviyeviha anowodha okana mandano, ofiyedheya na iyene. Mwa mpaddi mwina, iyene “onomuziwa wolapa-wene muliba opanela.” (Masal. 138:6) Notene ninofuna omwagalaliha Yehova vina okweliwa na iyene, nikana mwaha wapama wosunza wunuwiha oviyeviha.

2. Txini enfunihu osekeserha mwari mwa mutoma obu?

² Mwari mwa mutoma obu, ninele osekeserha dhowakula dha mavuzo mararu: (1) Oviyeviha txini? (2) Ninfwanyelela nni wunuwiha oviyeviha? (3) Mazuzumo gani anawodhe weha oviyeviha wehu? Ninga munfunelihu wona, nigonuwiha oviyeviha, ninele wagalaliha murima wa Yehova vina ninele opurelamo nanya.—Gano 27:11; Iza. 48:17.

3. Oviyeviha txini?

³ Muttu oviyeviha kanubuwela wi dwamakamaka opitta attu ena, kanivittukulela. Bibilia onowoniha wi muttu ooviyeviha onowika ttima mandano aye na Yehova Mulugu vina mandano aye na attu ena. Muttu oviyeviha onoziwa wi ahikalawo attu ena anna ttima enpitta yaye.—Fil. 2:3, 4.

4-5. Sabwaya jani enlogela iyo wi oviyeviha webaribari kundela mwaha wa ekalelo yehu?

⁴ Attu ena ankala ninga aniviyeviha. Awene txino attu omala sabwa ya mukalelo oleliwani. Awene anotonyihedha nriho mwaha wa elemelelo yawa obe sabwa yosunzihiwa na amambali awa. Mbwenye mmirimani mwawa aliba ovittukulela.  Na mudhidhiya, ekalelo ya mmirimani mwawa enowoneya.—Lk. 6:45.

⁵ Mwa mpaddi mwina, attu ankala ninga owalamuwa obe anloga enubuwelani kahiyo attu ovittukulela. (Jo. 1:46, 47) Egali dhawene, attu owalamuwa anofwanyela okala pasope wi anakuluvele ewodhelo yawa. Masiki akala ninowalamuwa obe nne, notene ninofwanyela wunuwiha oviyeviha mmirimani.

6. Ninga muntonyihedha nivuru na 1 Korinto 15:10, ninsunzavo eni na yotagiha ya murumiwi Paulo?

⁶ Koona yotagiha ya murumiwi Paulo. Iyene wahilabihedhiwa vaddiddi na Yehova modhela wita milogo dhiswa sidadi dhottiyana-ttiyana. Txino iyene owakwanihedha mabasa menjene opitta arumiwi ena a Yezu Kristu. Mbwenye, Paulo kobuwela wi wali wamakamaka opitta abalaye. Na oviyeviha, iyene wahirumeela: “Txibarene, miyo mwa arumiwi ddilí mimayámo; kinddinfwanyela withaniwa murumiwi, vowi ddahidda Mutugumano wa Mulugu.” (1 Kor. 15:9) Nomala, Paulo ologa wi mandano aye na Yehova, kandela sabwa ya mikalelo dhaye obe mabasaye, mbwenye modhela mahala a Mulugu. (Kengesa 1 Korinto 15:10.) Mukartani mwaye Paulo wahavaha Akristu o Korinto yosunziha yapama mwaha wa oviyeviha—makamaka nigobuwela wi mmulogonimwa mwahikala alobwana ena avyona na ttima opitta Paulo!—2 Kor. 10:10.

7. Mbali dhahi wa masaka abano olagihile dhavi wi wali oviyeviha? Kavaha yotagiha.

⁷ Abali enjene ahilibiheya na mapadduwo a mwigumini a Mbali Karl F. Klein, olabile mpaddi wa Nikuru Nolamulela. Mmapadduwoni a mwigumini mwaye, Mbali Klein ohirumeela noviyeviha wi wahifwanyiwa makattamiho  menjene mwari wa vyaka dhinji. Motagiha, yaka ya 1920, alaleyaga numba na numba wahifanyiwa magudulano, nona wahiroma otxima ofiyedha omala vyaka bili s’olaleya. Musogorhomwa, alabaga o Beteli, iyene wahisilidhiwa vamaliliye onvahiwa malago. Vina, iyene wahipattiwa eredda musorho, mbwenye wahidha ovulumuwa. Masiki, na dhotedhene esi iyene wahakela mabasa menjene a ettomo. Japama wubuwela wi mbali oddu orumela noviyeviha dhovirigana dhaye! Nona abali na arogora enjene anowubuwela nokwela mapadduwo a mwigumini a Mbali Klein. *

8. Nivuru na 1 Pedro 5:6 ninnikamihedha dhavi wona wi oviyeviha onomwagalaliha Yehova?

⁸ Ttangwi yamakamaka ya wunuwiha oviyeviha ja omwagalaliha Yehova. Murumiwi Pedro otapulelamo mowakwana-mwene. (Kengesa 1 Pedro 5:6.) Naaddagana mazu a Pedro, nivuru “Kadhawuno Okale Namafara Waga” ninologa: “Ovithukulela onkala ninga nddibwi. Dhodhavodha poddi okala dhabure vaddiddi. Eji ekalelo entota okoodda ofanyeela onddimuwa wa muthu vamentoni va Mulugu. Oku, oviyeviha, poddi omukosiha muthu wohikala elobo ofiyedha okala waderetu vaddiddi vamentoni va Yehova.  . . Mulugu wehu onele . . . wuliva sabwa ya oviyeviha wawo.” * Txibarene, elobo yapama enfwanyelihu okosa ku omwagalaliha Yehova!—Gano 23:15.

9. Oviyeviha wehu onaattukulele dhavi attu ena onifiyedha?

⁹ Ottiya omwagalaliha Yehova, iyo ninopurelamo sabwa ya wunuwiha oviyeviha. Oviyeviha ononikamihedha wafiyedha attu ena. Na mukalelo gani? Modhela wika dha attu ena vamburoni voroma. (Mt. 7:12) Attu enjene mwa iyo kaninziveliwa okala vamodha na attu anddiddela monelo wawa vina ahinrumeela wiwa monelo wa attu ena. Mwa mpaddi mwina, ninolibiheya okala na abali anfara malago aba awi “mweddelagane thagaraga, muthabege vamodha mutabuwelagane, mukale ovyeviha.” (1 Ped. 3:8) Akala ninofuna wafiyedha attu anna mikalelo esi, ninofwanyela okala oviyeviha—awene anele onifiyedha noviyeviha.

10. Oviyeviha onkosiha dhavi egumi yehu okala yovevuwa?

 ¹⁰ Oviyeviha onokosiha egumi yehu okala yovevuwa. Ebaribari wi, dila dhina ninowona dhilobo dhinkala ninga kadhili dhapama obe dha wogowa. Muziwitxi Mwene Salomau ologa: “Ddiawona adhari eddaga na makavalo, athu a ethomo eddaga na myeddo ninga adhari.” (Koh. 10:7) Abale anna ewodhelo dila dhina kanakela nriho. Vina abale ahina ewodhelo dila dhina anowakelaga nriho. Masiki dhawene, Salomau wahinonelamo wi ninofwanyela orumela ebaribari yehu ottiya wang’ana dhilobo dhohikala. (Koh. 6:9) Akala iyo ninoviyeviha, kinarutxe orumeela dhilobo mwigumini mwehu ninga mulani—ottiya ninga mwafunelihu.

11. Ninfwanyelela okosa eni nigavahiwa malago?

¹¹ Siku na siku, iyo ninokaanaga gari yotonyihedha oviyeviha. Koona dhipaddi dhing’onovi. Nigavahiwaga malago. Ninofwanyela wubuwela wi akala muttu ohivilibihedha onivaha malago, txino enlagiha wi eloboya ekosilihu kikalile. Vamaromo, txino efunelo yehu enkala ya oruna malagoya. Txino ninonvanya muttuya onivahile malago obe kaninziveliwa na mukalelo onivahiliye malago. Mbwenye akala ninoviyeviha, ninele ovilibihedha wakela malagoya na mukalelo wapama.

12. Mowiwanana na Gano 27:5, 6, ninfwanyelela nni omutamaalela muttu onnivaha malago? Kavaha yotagiha.

¹² Muttu oviyeviha onotamalela agavahiwaga malago. Motagiha: Kobuwela wila weyo oli mmatugumanoni. Ogamalile ologa na abali enjene, mbali mmodha onowaddamela moviteyani wila awaddele wi elobo yajiwe ehala muninoni. Mohaganyedha, ogahikaana manyazo. Mbwenye weyo kugatamaaleli sabwa ya iyene wuwaddela? Mwebaribari, txino weyo ogaziveliwe muttu mwina kowaddela wale! Na mukalelo wakene, ninofwanyela oviyeviha wi nitamalele oliba murima wa mbali onivahile malago. Iyo ninomoona muttuya ninga mukwehu, ottiya ninga mwiddanehu.—Kengesa Gano 27:5, 6; Gal. 4:16.

13. Ninawodhe dhavi wunuwiha oviyeviha akala attu ena anottambirha ettomo ya mabasa?

¹³ Ena agattambira ettomo ya mabasa. Jason oli munddimuwa wa mulogo ologa: “Ddigawonaga attu ena attambirhaga ettomo, ddinovivuza sabwaya ekoddilemi osakuliwa.” Wahiromaga wubuwela na mukalelo obu?  Kahiyo yabure ‘otamela’ okana ettomo mmabasani a Yehova. (1 Tim. 3:1) Mbwenye, ninofwanyela okalela pasope dhubuwelo dhehu. Akala kaninkalela pasope, ninele ottiya efunelo ya ovittukulela wunuwa mmirimani mwehu. Motagiha, Mukristu txino onoroma wubuwela wi iyene ddi mmodhaya onna ewodhelo ya weddiha deretu mabasa attomeliwiye. Obe murogora onowubuwela wi, ‘Mamunaga okana ewodhelo ya weddiha deretu mabasa mmulogoni opitta ngana!’ Mbwenye, akala ninoviyeviha, ninele orabela okala attu ovittukulela.

14. Ninsunzavo eni na mukalelo woonilemo Mizé muvahiwe attu ena ettomo?

¹⁴ Jowodheya osunza na mukalelo woonilemo Mizé muvahiwe attu ena ettomo. Mizé wahitamalela sabwa ya mabasa attomeliwiye a ottonga nlogo na ana Izrayel. Mizé woonilemo dhavi vattomiwe attu ena na Yehova okosa mabasa ninga aye? Iyene kanna nrima. (Oleb. 11:24-29) Iyene wahiviyeviha mwagawiliye attu ena olamulela nlogo. (Obu. 18:13-24) Eji yatapulela wi iyene wahakosela mabasa apama ana Izrayel abuwene attomeliwiye wattonga. Dhahene, enlagiha wi Mizé kazuzumela ettomo yaye mbwenye wazuzumela wakamihedha attu ena. Ninopurelamo na yotagiha eji! Nubuwele wi, akala ninofuna olabihedhiwa na Yehova, ninofwanyela okala attu oviyeviha nihikuluvelaga ewodhelo yehu. Kanidduwale wi “Nabuya ddi munddimuwa, onomwañgana mukurumuwi.”—Masal. 138:6.

15. Matxinjo gani angumanilena abali enjene?

¹⁵ Nigafwanyiwa matxinjo. Ovano, abali enjene alabile vyaka dhinji mmabasani a Yehova ahittomeliwa mabasa mena. Motagiha, yaka ya 2014, anameddelela a mirudda na awadhiwa ahikuweleliwa mabasa mena a mudhidhi wotene. Oromana yakene ejile, abali anlaba ninga anameddelela milogo anottiya  mabasaya agakwaniha vyaka 70. Vina abali anlaba ninga asogorheli anddimuwa a mulogo anottiya mabasa awa agakwaniha vyaka 80. Muttengo mwinjene wa abali o Betel ahittomeliwa masaba opionero. Ena ahittiya mabasa a mudhidhi wotene sabwa ya makattamiho a mwigumini, wazuzumela anamudhi obe mazuzumo mena a omwinya.

16. Abali na arogora enjene awodhile dhavi otonyihedha oviyeviha mufwanyiwani matxinjo?

¹⁶ Masasanyedho akosile abali na arogora aba kahiyo elobo yovevuwa. Txibarene, awene ankwela mabasa attomeliwani wale, dila dhina awene anokubanya mwari mwa mudhidhi vyaka dhinjene. Ena anottukula mudhidhi “asizimarhaga” avisasanyedhaga makalelo maswa. Na mudhidhiya, awene ahilemeelela. Sabwaya? Sabwani awene annimukwela Yehova opitta dhotene. Awene anziwa wi ahivivelela wa Mulugu—ottiya mabasa attomeliwani obe okana ettomo. (Kol. 3:23) Noviyeviha awene anodhowavi amulabelaga Yehova nowagalala masiki na matxinjo. Anokuluvela mazu aba awi “Thiyaní mmadani mwaye dhetene dhunukathamihani,” sabwani anoziwa wi Yehova onowakoya.—1 Ped. 5:6, 7.

17. Ekalele nni yapama otamalela Mazu a Mulugu annikamihedha wunuwiha oviyeviha?

¹⁷ Ninotamaalela vaddiddi sabwa ya Mazu a Mulugu annikamihedha wunuwiha oviyeviha! Nigakala attu oviyeviha, ninele nanya opurelamo vina attu ena anele opurelamo. Ninowodha ovilela makattamiho a mwigumini. Opitta dhotene, ninokala ofiyedheya na Babihu wokweleya wa wirimu. Jowagalaliha oziwa wi masiki valiye “Mulugu Namadhulu-dhulu,” onowakwela vina onowavaha ttima adhari aye oviyeviha!—Iza. 57:15.