1-2. Ottekenyeya gani ologile namavuhulela Agewu ogapadduwile masaka abano ehu?

“MUDHIDHI mung’onovi, maloja na prédio dhawale dhahiroma onyongeya.” “Attu otene elogurumela . . . Attu owinjiva alogile ottekenyeyawa ogonelile mitala minli bahi. Miyo ddonile ninga egonelile mudhidhi mwinjene.” Esi dhologa dha attu ang’onovi aviluwile ottekenyeya opattile elabo ya Nepal yaka ya 2015. Weyo kowona nipadduwo ninga ntti txipo kugadduwalile.

² Masaka abano, iyo ninowona mukalelo mwina wa ottekenyeya wa elabo. Ottekenyeya oku kumpatta sidadivi modha, nne vina elabo modha, mbwenye onopatta malogo otene a mwilaboni vina onopadduwa mwari mwa vyaka dhinji. Namavuhulela Agewu wahibaza ologa wi nipadduwo ntti nigawonehile mmasakani mwehu. Iyene ohileba: ‘Yehova Mulugu wa anyakoddo, ‘ologile dhahi—owalile mudhidhi mung’onovi—miyo ddinele ottekenya odhulu na vati, bara na mattaka.’’—Ajeu. 2:6.

3. Ninlogela nni ottekenyeya ologile Agewu ohittiyana na ottekenyeya wa elabo onnyonga dhilobo?

³ Ottekenyeya ologile namavuhulela Agewu, kahiyo ottekenyeya okule ongujula dhilobo. Ottiya ejo, ottekenyeya ondhana dhopurelamo dhapama. Mwinyene Yehova ohiloga: ‘Ddinele wattekenya attu a malogo otene adhena dhorela dhawa; attittimihena mpara obu waga.’ (Ajeu. 2:7) Mazu aba antapulela nni mwa attu abale akalilewo nsaka na Agewu? Mazu aba antapulela nni mwa iyo onkala masaka abano? Ninele wona dhowakuladha vina ninele wona epaddi yehu mmabasani aba anttekenya dhilabo.

4. Yehova omurumelini Agewu wi akamihedhe nlogo Naye?

⁴ Yehova wahimuttomela Agewu mabasa a makamaka afwanyeliye okosa. Koona epadduwile Agewu ahinatti ottomeliwa mabasa aba. Enoneya ninga Agewu, wali vamodha na Ayuda abale abudduwile o Babilonia eyelelaga o Jerusalemi yaka ya 537 Kristu Ahinabaliwa. Mufihilani wenewale, emeleli aba ororomeleya a Mulugu ahiroma otiba maleje a mpara. (Ezd. 3:8, 10) Mbwenye mohigonela, yahipadduwa elobo yokubanyiha. Amwiddani awa ahikosa muli-mwetemwene wi awobanihe vina attiye omaga mparaya. (Ezd. 4:4; Ajeu. 1:1, 2) Vasogorova, yaka ya 520 Kristu Ahinabaliwa, Yehova wahimuruma Agewu wi akamihedhe emeleli aye okaana guru wi eyelele omaga mpara. *—Ezd. 6:14, 15.

5. Muselu ologile Agewu olibihile dhavi nlogo na Mulugu?

⁵ Muselu wadhowile Agewu wawaddela Ayuda, wali wa olibiha omuroromela wawa Yehova. Na oliba murima, iyene wahaddela dhahi nlogo nttile nakukumuwile: ‘‘Ovano maganí murima nyuwo attu otene a nlogo,’ onloga ddi Yehova, ‘romani mabasa.’ Miyo ddili na nyuwo, onloga ddi Yehova Mulugu wa anyakoddo.’ (Ajeu. 2:4) Mazu aba ‘Yehova Mulugu wa anyakoddo’ ahapangaraza venjene nlongo nttile. Yehova okaana nikuru ninddimuwa na anyakoddo a anju ali omala na wale wi amwiwelele. Noona, Ayuda abale kofuna wi dhilobo dhaweddele pama anfwanyelela omwiwelela Yehova.

6. Ottekenyeya ologile Agewu ogadhilena yopurelamo gani?

⁶ Yehova wahimuruma Agewu wi awaddele Ayuda wila iyene agahittekenya malogo otene. Muselu obu wahapangarhaza Ayuda abale akukumuwile vina attihile omaga mpara; muselu obu watonyihedha wi Yehova agahittekenya elabo ya Persia. Nsaka nttile nlogo na Persia nali nlogo noliba vaddiddi sabwani wali olamulela wa malogo otaganyiheya. Ottekenyeya wa nlogo ntti ogadhilena yopurelamo gani? Yoroma, nlogo na Yehova nigahiwodha opuliha mpara. Vasogorova, attu abale ahali Ayuda agahivitaganyiha nawene wi amwebedhege Yehova mumparani. Muselu wa Agewu wahipagarhaza venjene nlogo na Mulugu!—Zak. 8:9.

7. Masaka abano ninkosa mabasa gani anttekenya malogo? Katapulela.

⁷ Txini entapulela nivuhulo na Agewu masaka abano? Dhahene ninga masaka a Agewu, masaka abano Yehova onottekenya malogo otene; mbwenye dila eji iyo nili mwari mwa mabasaya. Kobuwela dhahi: Omwene wa Mulugu oromile olamulela wirimu yaka ya 1914, vina Yehova ohimuttoma Yezu wi akale Mwene wa Omweneya. (Masal. 2:6) Muselu obu wa Omwene kuwaziveli alamuleli amwilaboni. “Olamulela wa amwene a mwilaboni”—wahimala ogoma, na mazu mena mwilaboni kamwali—mulamuleli wattomiwe na Yehova. (Lk. 21:24) Noona, yaka ya 1919 nlogo na Yehova nahiroma walaleyela attu otene njedhelo nina attu wi onagomihe makattamiho a mwilaboni ku Omwene wa Mulugu. Oromana vyaka dhene esile “olaleya miselu dha pama dha Omwene” onottekenya elabo yotene mpaka masaka abano.—Mt. 24:14.

8. Mowiwanana na Masalmo 2:1-3, malogo awinjiva anona dhavi miselu dha omwene?

⁸ Attu ena anona dhavi miselu dhehu?  Attu enjene kanziveliwa. (Kengesa Masalmo 2:1-3.) Malogo adhugudheya. Awene anomukodda Mulamuleli osakuliwe na Mulugu. Miselu dha Omwene dhinalaleya iyo awene kanona ninga “miselu dhapama.” Mwebaribari, alamuleli ena anokoddiha mabasa olaleya! Masiki alamuleli enji alogaga wi anomulabela Mulugu, aweneya kanfuna ottiya ettomo enani yolamulela elabo. Dhahene ninga alamuleli a masaka a Yezu, awene anotonyihedha wi kanimurumela Muttikitteliwi wa Yehova sabwa yowafwara-fwara anamafwara aye ororomeleya.—Mer. 4:25-28.

9. Txini enkosa Yehova masiki attu ahirumelaga ebaribari?

⁹ Yehova onona dhavi malogo a mwilaboni ankodda miselu dhapama? Masalmo 2:10-12 onowakula: “Ovano nyuwo amwene mutxenjerhe, nyuwo anamathonga rumelaní olagiwa! Mwimelelenì Nabuya na nriho, mwirelení labà n’omukurumuwèla, anadhe osilidhiwa, nyuwo murimele mudila mwenyu, sabwa owali waye kunrutxa wavuwa. Agari babale anthawela wa iyene.” Yehova na okwela waye, onowavaha mudhidhi amwiddani aba wila akaane gari yotxinja egumi yawa vina arumele Omwene waye. Mbwenye mudhidhiya onogwaddeya. Ninkalawo “masaka omariha” a elabo ejino. (2 Tim. 3:1; Iza. 61:2) Ovano bu mudhidhi wa attu osunza ebaribari vina okosa dhosakula dhaderetu.

10. Ajewu 2:7-9 onloga wi ottekenyeya wa malogo ogadhilena yopurelamo gani yapama?

¹⁰ Attu ena anorumela miselu dhivuhuleli Agewu. Iyene ononipanga yodhelavoya ya ottekenyeya oku: ‘Dhilobo dha ttima, obe attu a pama a malogo otene anele odha’ omulabela Yehova. * (Kengesa Ajewu 2:7-9.) Anamavuhulela ena ninga, Izaiya na Mikeya, ahiloga sabwa ya mapadduwo aba, agapadduwile ‘masaka omariha.’—Iza. 2:2-4; Mik. 4:1, 2.

11. Mbali Ken okosile nni mwiwaliye miselu dha Omwene dila yoroma?

¹¹ Motagiha, koona empadduweli mbali Ken  onlaba o katti enddimuwa. Mudhidhi osunziliye ebaribari ya Omwene mpaka ovanene dhihivira vyaka 40, mbwenye iyene onona ninga osunzile ebaribari ddabuno. Ken ohiloga: “Vewalemi ebaribari mwaha wa Mazu a Mulugu dila yoroma, miyo ddahagalala sabwa yosunza wi ninkala masaka omariha a elabo ejino. Wila ddirumeliwe na Yehova vina ddikaane njedhelo na egumi ya mukalakala, ddahinonelamo wi ddanfwanyelela orabela elabo eji. Noona ddahilobela ddikumbiraga nikamihedho vina ddahiroma ofwara dhakumbirilemi. Ddahittiya wedda na mikalelo dhamwilaboni, badditamela okaana nibarelo muMweneni mwa Mulugu. Omwene obu kunatolotxiwe wene.”

12. Masaka abano omariha, mpara wa Yehova ondhalihiwa dhavi na nttittimiho?

¹² Kaninaganyedha wi Yehova onorurihavi nlogo naye. Masaka abano omariha, ninowawona attu owinjiva vaddiddi bagamulabela. Yaka ya 1914, nali amiliyau ang’onovi. Mbwenye masaka abano iyo alabeli a Mulugu ninokwaranya amiliyau 8, vina mudhidhi wa Wubuwela Okwa wa Kristu amiliyau ena anovitaganyiha na iyo. Dhahene mpara osasanyedheliye—wa webedha wa ebaribari—muhidhala ‘dhilobo dha ttima dha malogo otene.’ Eji txibarene enomuttittimiha Yehova. Elobo yina enttittimiha nzina na Yehova matxinjo ankosa matxikwi na matxikwi a attu wila abale omuttu oswa.—Ef. 4:22-24.

13. Winjiva wa attu animulabela Yehova ninakwaniha nivuhulo gani nina? (Kang’ana foto ya kapa.)

¹³ Dhotedhene esi dhimpadduwa dhinowakwaniha mavuhulo anfwanyeya va Izaiya 60. Izaiya 60:22 onologa: “Ziza-nthi na athu añgonovi ninele winjivana afiye txikwi. Miyo Nabuya [Yehova] ddinele wira dhetedhene n’owaguva.” Sabwa yowinjiva attu animulabela Yehova, elobo yotikiniha enopadduwa. ‘Dhilobo esi dha ttima’ dhigavolowaga munikuruni na Yehova anodhana ewodhelo vina efunelo yolaleya “miselu dhapama.” Izaiya wahikuwela owodha oku, ninfwanyeya munikuruni na Yehova ninga ‘dhofuma dha malogo.’ (Iza. 60:5, 16) Na nikamihedho na alobwana vina ayana aba mabasa olaleya anokosiwa dhilabo dhowakwana 240 vina anopidiwa manivuru na elogelo owakwana 1.000.

14. Attu anfwanyelela okosa yosakula gani ovanene?

¹⁴ Masaka abano omariha sabwa ya Yehova ottekenya malogo otene attu anottukuleleya okosa yosakula. Ofwara Omwene wa Mulugu obe olamulela wa elabo. Eji yosakula enddimuwa vaddiddi enfwanyela attu otene okosa ovanene. Ebaribari wi kanili avuruvuru. Ninga alabeli a Yehova, iyo ninowiwelela enloga alamuleli mbwenye kaninkamihedha dhilobo dha politika. (Rom. 13:1-7) Ninoziwa wi onagomihe makattamiho a mwilaboni Omwene wa Mulugu. Omwene obu kunkosa mpaddi wa elabo ejino.—Jo. 18:36, 37.

15. Nivuru na Ovuhulela ninloga wehiwa gani wa nroromelo?

¹⁵ Nivuru na Ovuhulela ninloga wi masaka omariha, ororomeleya wa nlogo wa Mulugu ninele wehiwa. Ofwara-fwariwa wehu onele wunuwa. Alamuleli anele ofuna wi nawebedhe vina nakamihedhe. Abale anakodde anele ofwara-fwariwa. (Ovuh. 13:12, 15) Awene anele ‘wadidela attu—otene ayma na anddimuwa, areli na ahawi, afuru na adhari—opidiwa ezinddihelo mmadani na vakoveni.’ (Ovuh. 13:16) Masaka awale, adhari ampidiwa ezinddihelo yahafudheya, wi oniye wila awene akaana muttu amulabelani. Na mukalelo wakakene, masaka abano alamuleli anele ojedhela wi etene akaane ezinddiyelo obe atonyihedhe bani onimukamihedha awene. Bu mubuwelo vina merele wa attuya onatonyihedhe wi awene anokamihedha dhilobo dha politika.

16. Ekaleleni ya namaguve opima mukalelo oli omuroromela wehu Yehova?

¹⁶ Ki iyo, ninele orumela wakela ezinddihelo ejo? Ninele okamihedha olamulela oku? Oddule anakodde okosa ejuwene, onele ofwara-fwariwa vina onele ofwanya dhowopiha dhinddimuwa. Nivuru na Ovuhulela, ninologa wi ‘kavo onawodhe ogula vina onaguliye ahina ezinddihelo ejo.’ (Ovuh. 13:17) Mbwenye alabeli a Yehova anoziwa ejile enakose Yehova na abale anattambire ezinddiyelo eji enfwanyeya va Ovuhulela 14:9, 10. Noona ottiya ottambira ezinddihelo ejo, ena anele oleba mmaddani: ‘Ddili wa Yehova.’ (Iza. 44:5) Ovano mudhidhi wa iyo woniha akala nili ororomeleya na Yehova. Nigakala ororomeleya, Yehova onele wagalala vaddiddi ologa wi nili aye!

17. Txini enfwanyelela iyo wubuwela sabwa ya ovilela wa Yehova?

¹⁷ Yehova onodhowavi bagavilela masiku aba omariha. Vowi iyene kanfuna wi muttu ddi muttu atolotxiwe. (2 Ped. 3:9) Iyene onowavaha attu otene gari yorugunutxa murima wi akose yosakula yamakamaka. Ovilela wa Yehova okala vangomelani. Abale ankodda omwiwelela anovika vangovini yakakene evikile Farao nsaka na Mizé. Yehova wahimwaddela dhahi Farao: “Miyo kofuna, ddigawodha wale oupa n’ezíni: weyo, akadda nlogo nawo, murimela mwilaboni. Miyo ddiuthiya okalawo: ddirelé wi wone guru dhaga, vina nzina naga nthithimihiwe mwilaboni mwetemwene.” (Obud. 9:15, 16) Malogo otene a mwilaboni anele ononelamo wi Yehova, ddi Mulugu mmodha bahi webaribari. (Ezek. 38:23) Ejo enapadduwe dhavi?

18. (a) Ottekenyeya gani onlogiwa va Ajewu 2:6, 20-22? (b) Ninziwa dhavi wi mazu alogile Agewu anele wakwanihedheya musogoro?

¹⁸ Muvirile vyaka dhinjene Agewu bamalile okwa, Paulo wahivuhulela mazu anfwanyeya va Ajewu 2:6, 20-22 wi agahidha wakwanihedheya musogoro. (Kengesa.) Paulo ohileba: ‘Ddabuno onnipikirhela dhahi: ‘Miyo kaddineyelele othekenya elabovi, ddinothekenya  odhulu vina.’ Mazu anloga ‘kaddineyelele’ anoniha wi dhopaddutxiwa dhotedhene dha mwilaboni dhinele ottekenyeya ofihedha otolowa wi dhiwalemo dhihinttekenyeya.’ (Aheb. 12:26, 27) Ottekenyeya oku ohittiyana na obule ologiwe va Ajewu 2:7, ontonyihedha wi abale ankosa dhilobo ninga Farao, akoddaga ottonga wa Yehova anele otolotxiwa kakamwe.

19. Txini ehinattekenyeye vina ninziwa dhavi?

¹⁹ Txini ehinattekenyeye vina ehinatolotxiwe? Paulo ohidhowavi enjedhaga na mazu aba: “Nona nikale athu otamalela, vowi nihakela nvaho wa omwene wa Mulugu ohinthekenyeya. Nonihe omutamalela wehu, nimwimelele n’ekalelo enimuzivela nimurihaga nimukurumuwelaga.” (Aheb. 12:28) Ottekenyeya oku womariha ogavira, elabo bikurumuwa onawalewo bu Omwene wa Mulugu bahi. Bu Omwene wa Mulugu onalamulelege okala-nokala-wene!—Masal. 110:5, 6; Dan. 2:44.

20. Yosakula gani enfwanyelela attu okosa nanda iyo ninawodhe dhavi wakamihedha?

²⁰ Obu kaiyo mudhidhi wovega! Attu anofwanyelela okosa yosakula: Odhowavi bagakamihedha olamulela wa elabo obe ovilibihedha wi akalegewo mowiwanana na efunelo ya Mulugu. Yosakula yoroma enowattukulela attu wotolowani; Yosakula yanawili enowattukulela attu okaana egumi yamukalakala. (Aheb. 12:25) Na mabasa olaleya ninowakamihedha attu okosa dhosakula dhofwanyelela. Nidhowegevi banigakamihedha dhilobo esi dha ttima wi akamihedhe mabasa a Omwene wa Mulugu. Nikanevi muyubuweloni mazu aba alogile Nabuya Yezu: “Muthaka wapama onele olaleyiwa mwilaboni mwetemwene, wi malogo otene ewe. Ngamala panafiye ogoma wa elabo.”—Mt. 24:14.