NSUNZO 38
Onfiyedhe Yehova Vamodha na Abali vina Arogora Ororomeleya
“Ddinowiyelela wa Babaga oli Babinyu vina.”—JO. 20:17.
JIBO 3 Yehova Ddinnivaha Njedhelo vina Guru
DHINASUNZE IYO *
1. Attu ororomeleya anakane mandano gani na Yehova?
YEHOVA okaana anamudhi animwebedha. Mwa anamudhi aba woromaya ddi Yezu, oli “mutaji wa dhopadduwa dhotene,” vina anju matxikwi na matxikwi. (Kol. 1:15; Masal. 103:20) Ottiya ejo, vali Yezu velaboni ya vati iyene owasunziha attu otene ororomeleya omukuwela Yehova Babi. Yezu wahapanga anamafwara aye wi “Babaga oli Babinyu vina.” (Jo. 20:17) Iyo nigaviperheka vina banibatiziwa, ninoroma okosa mpaddi wa abali na arogora annikwela.—Mk. 10:29, 30.
2. Txini enone iyo mwari mwa nsunzo ntti?
2 Attu ena anorutxiwa omoona Yehova ninga Babi wokwela. Oku ena kanwodha watonyihedha okwela abali na arogora ororomeleya. Nsunzo ntti, ninele onitonyihedha mukalelo onnisunziha Yezu omona Yehova ninga Babihu wokwela vina Babi onwodha iyo onfiyedha. Ninele vina osunza mukalelo onamutagihe iyo Yehova nigaweddihaga abalihu na arogora ororomeleya.
YEHOVA ONFUNA WI WEYO OKALE WOFIYEDHEYA NA IYENE
3. Elobo gani yamakamaka enfwanyeya va nlobelo nasunzihile Yezu anamafwara aye ennikamihedha onfiyedhavi Yehova?
3 Yehova Babi wokwela. Yezu onfuna wi nimonege Yehova ninga munimona iyene—ninga Babi wokwela, wofiyedheya ottiya ninga muttu woridhela obe mulamuleli. Ejo enowoneya va nlobelo nasunzihile Yezu anamafwara aye. Iyene oroma nlobelo ntti na mazu aba: “Babi wehu.” (Mt. 6:9) Yezu kofuna agahinisunziha omukuwelaga Yehova ninga “Namawodha-wodha,” “Muttanddi,” obe “Mwene wa mukalakala”—vowi mazina aba a ettomo anofwanyeya mBibiliani. (Wita 49:25; Iza. 40:28; 1 Tim. 1:17) Mbwenye Yezu onisunzihile omukuwela Yehova ninga “Babihu,” nzu novevuwa vina ninittukulela onfiyedha Yehova nihiwovaga.
4. Ninziwa dhavi wi Yehova onofuna onaddamela?
4 Weyo onorutxiwa omona Yehova ninga Babi wokwela? Attu ena anonamo dhawene. Eji txino empadduwa sabwa ya mukalelo oleliwani. Jopangarhaza oziwa wi Yehova onononelamo mukalelo oniwamo iyo! Iyene onofuna onifiyedha. Noona nzu naye nigalogaga: “Munfiyedhe Mulugu, iyene onele wufiyedhani.” (Tia. 4:8) Yehova ononikwela vina iyene Babi wamakamaka onfwanyelela muttu ddi muttu okaana.
5. Mowiwanana na Luka 10:22, Yezu onnikamihedha dhavi okala ofiyedheya na Yehova?
5 Yezu onowodha onikamihedha onfiyedha Yehova. Kavo onimuziwa Yehova deretu opitta Yezu. Iyene ohitagiha deretu mikalelo dha Babe noona aloga: “Onddona miyo, onomona Baba.” (Jo. 14:9) Yezu onoladdanihiwa na mbali owunuwelavo onnisunziha omwiwelela vina omuriha Babihu vina mukalelo womwagalaliha vina orumeliwa na Iyene. Yamakamakaya jawi Yezu ohinisunziha mikalelo dhaye, ninga okwela onddimuwa vina opama. (Kengesa Luka 10:22.) Ninele woona dhotagiha dhing’onovi dhinnitonyihedha wi Yehova Babi wokwela.
Sabwa yokala Babi wokwela, Yehova ohimuruma anju wi amulibihe Mwanaye (Kang’ana ddima 6) *
6. Ninziwa dhavi wi Yehova wanvuruwana malobelo a Yezu?
6 Yehova onowavuruwana anaye. Koona mukalelo onvuruwanile Yehova Mwanaye woroma. Vali Yezu velaboni ya vati iyene wahilobela dila dhinjene nanda Yehova wahinvuruwana. (Lk. 5:16) Yehova wahinvuruwana mwanaye alobelaga mwaha wa dhogana dhamakamaka dhafuniye okosa, ninga motagiha aasakulaga arumiwi aye 12. (Lk. 6:12, 13) Iyene vina wahinvuruwana mudhidhi walobela Yezu valiye wodhugudheyene. Mudhidhi mung’onovi ahinatti ogulihiwa, Yezu wahimulobelela Babe na murima wotene mwaha wa makattamiho afuna omugwela. Mudhidhene obo, ottiya ovuruwanavi nlobelo na Mwanaye, wahimuruma anju wi amulibihe Mwanaye wokweleya.—Lk. 22:41-44.
7. Weyo oniwamo dhavi mwaha woziwa wi Yehova onovuruwana malobelo awo?
7 Masaka abano Yehova onodhowavi bagavuruwana vina agakulaga malobelo a emeleli aye ororomeleya, na mudhidhiya vina na mukalelo wofwanyelela. (Masal. 116:1, 2) Murogora mmodha onkala o India, owona eji epadduwaga mwigumini mwaye. Iyene wahipattiwa makattamiho a muyubuweloni. Venevo ohimulobelela Yehova amwadelaga dhotedhene dhampadduwela. Iyene ohileba: “Porogarama ya JW Broadcasting® ya Mayu wa 2019 waloga sabwa wa mukalelo wopembera makattamiho vina odhugudheya. Porogarama eji yowakula ya malobelo aga sabwani jijene yafunimi.”
8. Yehova wonihile dhavi wi wanimukwela Yezu?
8 Yehova ohimukwela vina ohimuzuzumela mwanaye Yezu Kristu mudhidhi waliye velaboni ya vati agumanagana makattamiho, masaka abano Yehova ononikwela vina ononizuzumela. (Jo. 5:20) Yehova wahizuzumela dhofuna dha Yezu dhomuyani vina dhomaningoni. Iyene wahoniha kakamwe wi wanimukwela Mwanaye venjene. (Mt. 3:16, 17) Oziwa wi Babi waye wa wirimu wali na iyene, Yezu kavihona yeka.—Jo. 8:16.
9. Txini enoniha wi Yehova ononikwela?
9 Dhahene ninga Yezu, iyo niwodha woona wi Yehova ononikwela. Kobuwela: Yehova ononittiha wi nikale amaro aye vina onozuzumela epaddi yehu yomaningoni modhela abalihu na arogora ororomeleya. (Jo. 6:44) Yehova vina onozuzumela epaddi yehu yomuyani modhela onivaha dhotedhene dhinfunihu wi nivaddihena nroromelo nehu. Iyene vina ononikamihedha wi nikane yoja ya siku siku. (Mt. 6:31, 32) Nigatanalela mwaha wa okwela ona Yehova na iyo, okwela wehu onowunuwa.
WAWEDDIHE ABALAWO NA MUKALELO ONAWEDDIHA YEHOVA
10. Ninawodhe dhavi omutagiha Yehova?
10 Yehova onowaweddiha abalihu na arogora na okwela. Mbwenye mwa iyo enokala elobo yorutxa watonyihedha okwela abalihu na arogora. Sabwani nili attu a yeddelo yottiyana vina nileliwe na mukalelo wottiyana. Ottiya ejo, notene ninokosa dhilobo dhohikala esuwene dhinasilidha attu ena. Masiki dhawene, muttu-muttu wa iyo onowodha okamihedha wi okwela ona iyo odhowevi bugonuwa. Dhavi? Sabwa yomutagiha Babihu wa wirimu vina nakwelaga abalihu na arogora. (Ef. 5:1, 2; 1 Jo. 4:19) Ndowe noone enasunze iyo na yotagiha ya Yehova.
11. Yezu otagihile dhavi ‘ttagaraga’ ya Yehova?
11 Yehova Mulugu wa ‘ttagaraga.’ (Lk. 1:78) Muttu ona ttagaraga agamona muttu mwina bagatabuwa onoveda marhe omukamihedha obe omulibiha. Dhahene ninga Yehova, Yezu ohitonyihedha wi wanaweddela ttagaraga attu mwaha wa mukalelo wawedhihiye. (Jo. 5:19) Onaga muttitti wa attu “oheddiwa thagaraga, vowi ali owindeya guru, okukumuwa, ninga mabila ahinna namasapiha.” (Mt. 9:36) Ottiya weddiwavi ttagaraga wahikosa elobo wi akamihedhe. Iyene wahavulumutxa aredda vina wahalibiha abele ‘alemile vina akumuwile.’—Mt. 11:28-30; 14:14.
Dhahene ninga Yehova, kaweddihe abalawo na arogora na ttagaraga vina okale muttu wovaha (Kang’ana ddima 12-14) *
12. Kavaha yotagiha mwaha wa mukalelo onfwanyelela iyo otonyihedha ttagaraga.
12 Wila natonyihedhe ttagaraga abalihu, voroma ninofwanyelela oziwa makattamiho anapatta. Motagiha, txino murogora ohikaana makattamiho a egumi. Iyene kanrogela, mbwenye onodhaga ofuna nikamihedho. Egahikala yapama omukamihedha na mabasa a vatakulu. Ninga okamihedha opiya obe okuputta vatakulu. Txino mbali oyelela ganyo. Egahikala yapama omukamihedha oku iyene atamelaga ganyo yina. Txino onvaha mwanakobiri eng’onovi wila omukamihedhena.
13-14. Ninawodhe dhavi okala attu ovaha ninga Yehova?
13 Yehova Mulugu wovaha. (Mt. 5:45) Iyo kaninfwanyelela ojedhela abalihu okumbira nikamihedho. Dhahene ninga Yehova, ninofwanyelela wubuwela wakamihedha abalihu. Malabo otene iyene onopattutxa nzuwa ahijedhelaga iyo omukumbira! Oviha oku wa nzuwa onowakamihedha attu otene, ottiya animutamalela Yehova bahi. Mwaha wa onivaha dhotedhene dhinjobeliwa iyo Yehova onotonyihedha wi ononikwela. Iyo vina ninomukwela venjene sabwa ya iyene okala muttu wapama vina ovaha!
14 Nimuttagihaga Babihu wa wirimu, abali enji na arogora anovilibihedha wi akale attu ovaha. Motagiha, yaka ya 2013, sikoloni onkuweliwa Haiyan yahinyonga dhilobo dhinjene o Filipina. Abali enji ayelela numba dhawa vina dhananina. Mbwenye anamudhi ehu omuyani a elabo yotene kagonelilena nikamihedho nafunani. Enji ahikosa mivaho vina ahikamihedha mabasa omaga wila avenyihedhe vina amage numba dhowakwana 750 mwari mwa mudhidhi mung’onovi! Mwari mwa ezini eji ya COVID-19, Anamoona a Yehova ahivilibihedha wi akamihedhe abaliwa na arogora na dhojombeliwa dhawa. Nigahigonele na nikamihedho ninfuna abalihu omuyani ninotonyihedha wi ninowakwela venjene.
15-16. Mowiwanana na Luka 6:36, ninawodhe dhavi omutagiha Bibihu wa wirimu?
15 Yehova Mulugu wa nttebwa vina wolevelela. (Kengesa Luka 6:36.) Malabo otene ninowodha woona nttebwa na Babihu wa wirimu. (Masal. 103:10-14) Yezu ohimutagiha kakamwe Babe. Masiki aziwaga wi anamafwara aye ali attu ohiligana, iyene wanaweddiha na nttebwa vina wanalevelela. Yezu vina opereka egumi yaye wi dhotega dhawa dhileveleliwe. (1 Jo. 2:1, 2) Oziwa wi Yehova na Yezu attu anttebwa vina olevelela mowaganyedha onowunuwiha wakwela wehu.
16 Okwela ona iyo na anamudhi ehu omuyani onoliba nigakala attu anziwa ‘olevelela na murima wotene.’ (Ef. 4:32) Ebaribari wi masaka mena kahiyo yovevuwa olevelela, noona ninofwanyelela ovilibihedha epaddi eji. Elobo emukamihedhile murogora dhahi nsunzo na Mwang’aneli wana mutoma “Mulevelelagane Muttu na Mukwaye na Murima Wotene.” * Iyene ohileba: “Osunza makani aba ohiddikamihedha otxinja monelo waga vina woona makaniya na mukalelo waderetu. Nsunzona ninotonyihedha wi omulevelela muttu kintapulela orumela yoddawa ekosiliye obe ovugula makattamiho atatamuliliye. Olevelela ontapulela oburutxa ntxiga mmirimani nitatamuliwe na yoddawaya vina okaana murendele.” Nigalevelela abalihu na arogora na murima wotene ninotonyihedha wi ninomutagiha Babihu Yehova.
KATAMALELA MWAHA WA OKOSA MPADDI WA MURALA WA YEHOVA
Attu etene ankosa mpaddi wa anamudhi ehu, anotonyihedhana wi anozuzumelana muttu na mukwaye (Kang’ana ddima 17) *
17. Mowiwanana na Mateu 5:16, ninawodhe dhavi omuttittimiha Babihu wa wirimu?
17 Gari enddimuwa vaddiddi okosa mpaddi wa murala onfwanyeya ozugunuwa elabo yotene ankwelana. Ninofuna wi attu owinjiva avitaganyihe na iyo wi nimwebedhe Yehova. Noona ninofwanyela okosa muli-mwetemwene wi nihire elobo enamutakalihe Babihu Yehova na nlogo naye. Ninovilibihedha odhowavi banigatonyihedha mikalelo dhinakamihedha attu ena osunza ebaribari.—Kenegesa Mateu 5:16.
18. Txini enanikamihedhe ohova ovaha onamoona?
18 Masaka mena ninologiwa bure obe ninofwara-fwariwa sabwa yomwiwelela Babihu wa wirimu. Ejo enowuttukulela weyo wova wapanga attu ejile enrumeliwe? Kakana ebaribari wi Yehova na Yezu anele wukamihedha. Yezu wahalibiha anamafwara aye alogaga wi kafwanyelela ozuzumela na yologa vina mukalelo wologa. Sabwaya jani? Yezu ohitapulelamo: ‘Mudhidhene obo Mulugu onowuvahani yowakula, analoge kahiye nyuwo bu muya wa Babinyu onakulege na mulomo wenyu.’—Mt. 10:19, 20.
19. Kavaha yotagiha ya muttu olalehile na oliba murima.
19 Koona yotagiha ya Robert. Iyene ela oroma-wene osunza Bibilia kaana eziwelo yinjene. Venevo iyene wahikuweliwa omuttegoni wasupayi onkala elabo ya Africa do Sul. Na oliba murima iyene wahimutapulelamo namattonga wi kanfuna odhowa okoddoni sabwa yowakwela abalaye. Iyene wantamalela sabwa yokosa mpaddi wa anamudhi a Yehova! Venevo namattongaya onvuza: “Abalawo bani?” Robert kajedhela nivuzo ntti. Pavenevo vawodhiliye wubuwela nlebo na siku siku Mateu 12:50: “Muthu ddi muthu onvirihamo enfuna Babaga oli wirimu, oddo ddi mbalaga ddi murogoraga ddi mma.” Masiki aziwaga wi Robert wela oroma-wene omusunza Bibilia Yehova ohinvaha muya waye wokoddela wi awodhena wakula nivuzo ntti vina na mena ahajedheliye. Yehova wahagalala vaddiddi na Robert! Yehova vina onowagala iyo nigamukuluvela vina nigaliba murima wi nilaleye masaka orutxa.
20. Txini enfwanyelela weyo ogana okosa? (Joau 17:11, 15)
20 Kadhowavi bugavaha ttima gari ena weyo yokosa mpaddi wa anamudhi omuyani ankwelana. Yehova Babi wa pama opitta ababi otene vina nikaana abalihu na arogora ororomaleya. Ninofwanyelela odhowavi banigatamaalela. Satana na akwaye na owogo onddimuwa anotamela onikosiha wi naganyedhe akala Yehova ononikwela-wene vina onotamela onigawa. Yezu ohinilobelela wi Babe adhowegevi anibarelaga wi murala wehu womuyani ohigaweye vina okale mumodhani. (Kengesa Joau 17:11, 15.) Yehova onowakula nlobelo ntti. Dhahene ninga Yezu, txipo kuwaganyedhe okwela wa Yehova. Kakana ebaribari yawi iyene onelege wukamihedha. Kagana odhowavi bugakosa mpaddi wa anamudhi aba omuyani.
JIBO 99 Ddinedda Vamodha na Abali Aga
^ par. 5 Iyo nikaana gari yokosa mpaddi wa anamudhi okweleya wa abali na arogora ororomeleya. Notene ninofuna okamihedha wi okwela ona iyo odhowegevi bugonuwa. Ninawodhe dhavi okosa ejuwene? Ninowodha okosa ejuwene sabwa yomutagiha Babihu wokwela na ofwara yotagiha ya Yezu vina ya abalihu na arogora.
^ par. 57 MAFOTO NIKUKU: Yehova ohimuruma anju wi amulibihe Yezu muddebe mwa Getsêmani.
^ par. 59 MAFOTO NIKUKU: Mwari mwa ezini eji ya COVID-19, abali enji anosasanyedha vina anopaka dhoja.
^ par. 61 MAFOTO NIKUKU: Murogora onomukamihedha mwanaye oleba vina operengesa karta mukambura wila amulibihena mbali oli mukambura.
