1. Murumiwi Paulo wavahile nlago gani Akristu ottikitteliwa?

“KAMUFWARE,” ntti nali nlago navahile murumiwi Paulo. Kamufware nni? “Kamufware yeddelo y’elabo ejino.” (Rom. 12:2) Paulo walebele mazu aba Akristu a vyaka zana dhoroma. Sabwaya jani yamuttukulele iyene wavaha malago a nikokomezo Akristu abale avivelele vina attikitteliwe na muya wokoddela wa Mulugu?—Rom. 1:7.

2-3. Satana onikwekwetta dhavi wila nimusadduwele Yehova, nanda ninawodhe dhavi “obwanyula ngome” dhabure dhili muyubuweloni mwehu?

² Paulo wahikaana sabwa yamuttukulele okala wozuzumene, txino Akristu abale ankwekwettiwa na onona wa attu ovuwa mwilaboni ya Satana. (Ef. 4:17-19) Yakakene endaga opadduwa na iyo. Satana, mulugu wa elabo eji yabure, onokosa guru wi anikoddihe omulabela Yehova, alabihedhaga mirega dhaye dhottiyana-ttiyana. Motagiha, agaziwa wi nihikaana efunelo ya ovittukulela, onolabihedha efunelo eji wila nittiye omulabela Yehova. Txibarene iyene onopura merelo a mwigumini mwehu, elemelelo y’elabo yehu vina masunzo ehu wila nubuwelege ninga iyene.

³ Enowodheya “obwanyula ngome” dhabure dhili muyubuweloni mwehu? (2 Kor. 10:4) Paulo onowakula: “Na guru eso ninokona onona wa athu, ovithukulela wetene ongudulana na onona wa Mulugu. Ninofunyana mubuwelo  etene a athu, adhé omurumela Kristu.” (2 Kor. 10:5) Pumwenemo, na nikamihedho na Yehova ninele owodha wang’anela dhubuwelo dhehu. Mazu a Mulugu murobwe wamakamaka oliwo onnikamihedha ovibarelana onona wa elabo eji ya Satana.

4. Matxinjo gani akosile ena wa iyo wila nirome osunza ebaribari?

⁴ Kobuwela, varomiliwe osunza Mazu a Mulugu ohikosa matxinjo wi omulabele Yehova. Enjiya wa iyo, nihittiya meddelo abure. (1 Kor. 6:9-11) Ninomutamaalela Yehova vowi onnikamihedha ottiya merelo abo abure!

5. Mowiwanana na nivuru na Roma 12:2, dhilobo gani bili dhinfanyeelihu okosa?

⁵ Iyo kaninfanyeelela okala wogonene. Nivilibihedhe orabela mubuwelo wabure, nigahikose dhahene ninele wiyelela okosa dhottega dhakosa iyo nihinatti obatiziwa. Ninakose dhavi? Paulo onowakula : “Kamufware yeddelo y’elabo ejino; vithiyení osadduliwa na Mulugu, muthukulaga mubuwelo maswa.” (Rom. 12:2) Mowiwanana na versu eji, dhilobo bili dhinfwanyeelihu okosa. Yoroma, ninofanyeela ‘orabela yeddelo y’elabo ejino.’ Yanawili, ninofanyeela ‘ovittiya osadduliwa’ na mubuwelo muswa.

6. Mowiwanana na nivuru na Mateu 12:43-45, ninsunzavo eni na mazu alogile Yezu?

⁶ Osadduliwa oku wa mmirimani waloga Paulo onopitta osaddula kove. Eniwanana na otxinja mukalelo wotene wa muyubuweloni mwehu. (Koona kasha “ Osadduwa obe Osalapitta?”) Osadduliwa oku ontapulela otxinja mubuwelo wehu—merelo, etanaalelo vina dhifunelo dhehu. Nivivuze, ‘matxinjo ankosimi ddinkosela wila  ddikale Mukristu wosalapitta obe ddinovilibihedha okala Mukristu webaribari?’ Jamakamaka oziwa ottiyaniha. Munivuruni na Mateu 12:43-45, Yezu ononilagiha enfwanyelihu okosa. (Kengesa.) Yaloga Yezu na mazu aba enolagiha ebaribari yattima: ofuruliwa mubuwelo wabure kinakwana; ninofwanyela ozuzumela dhubuwelo dhinimuzivela Mulugu.

7. Ninawodhe dhavi otxinja elihu mmirimani mwehu?

⁷ Enowodheya osaddulela elihu mmirimani mwehu? Bibilia onowakula: “Enofuneya muhabihedhe murima na zelu yenyu, muthukule makalelo a muthu muswa, opaddutxeliwe oladdana na Mulugu, mweddagana oligana murima, omukoddelela Mulugu mwibaribarini.” (Ef. 4:23, 24) Indde, enowodheya osaddulela elihu mmirimani mwehu, mbwenye kili yovevuwa. Ninofuna owanana dhifunelo dhabure vina orabela merelo abure. Ninofwanyela ‘osaddulela mubuwelo wehu.’ Entapulela otxinja dhifunelo dhehu, dhogana na dhawira dhehu. Okosa matxinjo ninga aba anofuna ovilibihedha.

8-9. Yotagiha eji ya mbali ennisunziha eni sabwa yokosa masadduwo a mwari?

⁸ Ndoweni none yotagiha ya mbali dhahi wali mutota kani. Vattiyiliye omwa na owana, wahirumeliwa obatiziwa, bagavaha onamoona wapama, attu otene mmuruddani mwaye annimutikina. Musogorhomwa bamalile obatiziwa, wahigumana na makani ehile nroromelo naye. Mulobwana wa mulezeli wahifiya vatakulu vaye amuligaga. Vamaromo mbali oddule kafuna owana. Vowi mulezeli oddule wasutta nzina na Yehova, mbaliya kawodhile ovyag’anela. Iyene ohinvada mulezeliya. Ohiziwa emuttukulele owana? Masunziho a Bibilia, ahimusunziha mbali wang’anela owali waye, mbwenye wali ahinatti osaddula mubuwelo waye.

⁹ Mbali oddu keyelele mundduni. (Gano 24:16) Na nikamihedho na anddimuwa a mulogo wahidhowavi bagonuwa mpaddi womuyani. Musogorhomwa iyene wahikala munddimuwa wa mulogo. Omattiyu dhahi, Vanumbani ya Omwene, wahigumanana mavurhano oligana na abale ampadduweli mundduni. Mulezeli mwina wafuna ombubudda munddimuwa wa mulogo mwina wali venevale. Mbali oddule okosile nni? Wahitonyihedha okurumuwa na oviyeviha, wahiloga na mulezeli oddule bammaliha ofiyedha omutonyihedha dila ya owaniwe. Ottiyana gani okosile mbali oddule? Iyene wahiwodha osaddula mubuwelo waye. Wali muttu woviyeviha vina wa murenddele—omuttittimiha Yehova!

10. Elobo gani enfwanyela iyo okosa wi niwodhe osaddula omuttu wehu wa mwari?

¹⁰ Enofuneya mudhidhi wi muttu awodhe okosa masadduwo ninga aba onilihu. Enofuneya okosavo “guru” nilabaga malabo otene, vyaka dhotene. (2 Ped. 1:5) Masadduwo aba kanda sabwa ya “omulabela Yehova” mwa mudhidhi mwinjene. Enofuneya guru wi nivilibihedhe osaddula omuttu wehu. Dhikalawo dhilobo dhinjene dhinwodha onikamihedha okosa masadduwo. Ovano ndoweni nisekeserhe dhilobodha.

11. Olobela onanikamihedhe dhavi osaddula mubuwelo wehu?

¹¹ Nlobelo ttarho yoroma yamakamaka. Ninga mulogeli munasalmo ninofanyela olobela: “Nyuwo Mulugu, ddubeleni murima wothorhorha; habihedhaní, libihaní ekalelo yaga.” (Masal. 51:12) Nihiziwa wi ninofanyeela osaddula mubuwelo wehu vina nimukumbirhe Yehova wila anikamihedhe. Yehova ananikamihedhe dhavi okosa matxinjo? Ninolibiheya na nipikirelo nakosile Yehova na ana Izrayel awuma murima masiku a Ezekiyel: “Ddinere owikanimo murima muswa, muya muswa . . . ddihelemo murima w’omuthu.” (Ezek. 11:19) Yehova wahakamihedha ana Izrayel otxinja vina onele onikamihedha.

12-13. (a) Mowiwanana na nivuru na Masalmo 119:59, ninfanyeela otanalela eni? (b) Mavuzo gani anfanyeeliwe ovivuza wamwinya?

¹² Otanaalela eji ttarho yanawili yamakamaka. Nigakosaga nsunzo na Bibilia siku na siku, ninofanyeela okana mudhidhi w’otanalela, obe wubuwela epaddi enfwanyelihu osaddula mmirimani obe muyubuweloni mwehu. (Kengesa Masalmo 119:59; Aheb. 4:12; Tia. 1:25) Ninofanyeela ononelamo akala murima na mubuwelo wehu onokwekwettiwa na onona wa mwilaboni. Nikaane murima wofewa wila nirumeele dhawobana dhehu vina nitamele orabela dhubuwelo dhawobaniha.

¹³ Kavivuze: ‘Miyo ddikaana nrima na aje mmurimani mwaga?’ (1 Ped. 2:1) ‘Ddinovittukulela opitta attu ena sabwa ya elabo endana miyo, osunza obe orela waga?’ (Gano 16:5) ‘Ddinowawoona attu ena ninga otowa ttima sabwa yohikaana dhilobo dhinna miyo obe ottiyana wa ttebe?’ (Tia. 2:2-4) ‘Mubuwelo waga onofara dhinvaha elabo ya Satana?’ (1 Jo. 2:15-17) ‘Ddinoziveliwa wona mavego anlagiha mararuwo na mavego mena anlagiha opanga?’ (Masal. 97:10; 101:3; Amós 5:15) Dhowakula dha mavuzo aba anele wukamihedha wona vanfanyeeliwe wogola. Txibarene wila nikose matxinjo enofuneya “obwanyula ngome” dhabure dhili mmirimani mwehu, dhawene ninele omwagalaliha Babihu wa wirimu.—Masal. 19:14.

14. Ekalele nni yamakamaka osakula okana mandano apama?

¹⁴ Osakula mandano apama eji ttarho yaneraru ya ttima. Txino iyo kaninwodha wona wi ninopattiwa na dhokosa dha amarho ehu. (Gano 13:20) Omabasani obe oskola, ninorijiwa na attu ahinimulabela Yehova. Mbwenye mmulogoni mwa Okristu ninowafwanyamo amarho apama. Mwenemo ninowodha okana efunelo ya olibiha “okwela, othidda mabasa apama.”—Aheb. 10:24, 25.

15-16. Satana ontamela dhavi otxinja mubuwelo wehu?

¹⁵ Kanidduwale, Satana ohigana otxinja mubuwelo wehu. Iyene onolabihedha masunziho ottiyana-ttiyana wila nirome waganyedha Mazu a Mulugu.

¹⁶ Satana onokosavi mavuzo amukoseliye Eva mmunddani mwa Edeni: “Txibarene Mulugu oukoddihani . . . ?” (Wita 3:1) Elabo ejino enang’aneliwa na Satana, ninowiwa mavuzo okattamiha, ninga motagiha: ‘Txibarene Mulugu onokooddiha otelana  alobwanavi obe ayanavi? Txibarene Mulugu kanfuna wila weyo oje mattanga a natali na obaliwa? Mulugu wawo txibarene kanufunana wikiwa nikami? Akala Mulugu txibarene onokwela, onukoddihelani okana mandano n’abale aburutxiwe mmulogoni?’

17. Txini enfwanyelela iyo wira akala ninokosiwa mavuzo annittukulela waganyedha, nanda mowiwanana na nivuru na Kolosi 2:6, 7 ninakaane yopurelamo gani?

¹⁷ Ninofanyeela okuluvela dhinrumeelihu. Nigakaana mavuzo ahina yowakula mmirimani mwehu, anodha onittukulela waganyedha. Waganyedha onowodha opupurutxa mubuwelo wehu vina wobaniha nroromelo nehu. Egali dhawene, txini enfwanyelihu okosa? Mazu a Mulugu anonipanga wi nisaddule mubuwelo wehu wila niwodhe ononelamo nanyene eninfunana “Mulugu, eli yapama, enimuzivela, eli yawakwana.” (Rom. 12:2) Nsunzo nomwinya, ninele onikamihedha ononelamo wi dhinsunzilihu mBibiliani s’ebaribari. Iyo ninowodha okuluvela wi magano a Yehova boligana. Moligana na muri onna mitxitxi dhotibeleya, ninele okala wolibene vina ‘nroromelo nehu ninele wimela pwi.’—Kengesa Kolosi 2:6, 7.

18. Txini enanikamihedhe ovibarelana na dhubuwelo dhabure dhinvaviha elabo ejino ya Satana?

¹⁸ Kawo muttu onawodhe owimetxela pwi nroromelo nawo, nona odhowegevi otxenihaga mubuwelo wehu. Olobelege mudhidhi wotene okumbiraga nikamihedho na Yehova. Otanaalelege nofwaseya, Otamelege ononelamo dhifunelo na dhubuwelo dhawo. Osakule mandano apama, weeddege na attu anawukamihedhe osaddula mubuwelo wawo. Ogakosa dhawene, onele ovibarela na dhubuwelo dhabure dha elabo ejino ya Satana vina “ninokona onona wa athu, ovithukulela wetene ongudulana na onona wa Mulugu.”—2 Kor. 10:5.