NSUNZO 25
Omukuluvele Yehova Masiki na Odhugudheya wa Mmirimani
“Miyo dhili . . . wosegedheya, ogulugudheyile.”—1 SAM. 1:15.
JIBO 51 Nikalevi na Yehova
DHINASUNZE IYO *
1. Ninfunelani nni osoriha malago a Yezu?
MWARI mwa mavuhulo aye sabwa ya masaka omariha, Yezu wahiloga: “Porhe-porhe! Mirima dhenyu dhinabwine n’ojetxavo elabo . . . n’ozuzumeletxa dha vati.” (Lk. 21:34) Iyo ninofwanyela osoriha malago aba nofwaseya. Sabwaya jani? Masaka abano, attu otene anopattiwa makattamiho oligana na odhugudheya wehu.
2. Masoso gani angumanana abalihu?
2 Dila dhinjene, iyo ninowana na makattamiho ottiyana-ttiyana ofarelana annidhugudha. Ndoweni none dhotagiha dhinfwarela. Mbali onkuweliwa John, * ontabuwa na eredda enromoliwa esclerose múltipla wahikubanya vaddiddi vowi mwadhiye wakala na iyene mwari mwa vyaka 19 wahimuttiya. Osogorhowa, anaye eeli a anayana ahittiya omulabela Yehova. Atelani ena Bob na Linda ahifwanyiwa makattamiho ottiyana nabale afwanyiwe John. Oheeli ayeleela ganyo vina kanna mikalelo dha opitxela numba yakala awene. Yottabwaya, Linda wahifwanyiwa eredda ya murima egamuttukeleli okwana, ottiya ejo wahikaana eredda yina yamobaniha maningo.
3. Mowiwanana na Filipi 4:6, 7, ninfuna nikaane nikuluvelo gani?
3 Nikaane ekuluvelo wi Muttanddi wehu Yehova vina Babihu wokwela ononelamo mukalelo onnipatta odhugudheya. Iyene vina onofuna onikamihedha owanana makattamiho otene annifwanya. (Kengesa Filipi 4:6, 7.) Nzu na Mulugu nihikaana mapadduwo menjene anlagiha wi emeleli aye ahifwanyiwa odhugudheya. Ninolagiha vina mukalelo wakamihedhile Yehova emeleliya okwaranya makattamiho. Ndoweni none dhotagiha dhing’onovi.
ELIYA—‘WALI MUTTU WOBUWELA NINGA IYO’
4. Dhoweha gani dhorutxa dhagumanilena Eliya, nanda iyene wonamo dhavi mwaha wa Yehova?
4 Nsaka na Eliya nali na makattamiho orutxa vaddiddi, wahifwanyiwa dhoweha dhinjene. Ana Izrayel alamuleliwa na Mwene Akab muttu wotowa nroromelo vina wahimutela Jezabeli muyana wawopiha wamwebedha Baal. Oheeli afuna wi attu otene amwebedhege Baal vina ahaapa anamavuhulela enjene a Yehova. Mbwenye Eliya wahittawa. Wawodhile sabwa ya omukuluvela Yehova. (1 Amwe. 17:2-4, 14-16) Mowenjedhedha, Eliya wahimukuluvela Yehova ofiyedha okosa mavurhano na anamavuhulela a Baal. Wahapanga ana Izrayel wi asakule mpaddi wa Yehova. (1 Amwe. 18:21-24, 36-38) Nsaka nttile norutxa Eliya wahinonelamo wi wahikaana nikamihedho na Yehova.
Yehova wahimuruma anju waye wi amulibihe Eliya (Koona ddima 5-6) *
5-6. Mowiwanana na nivuru na 1 Amwene 19:1-4, Eliya wobuwela dhavi, nanda Yehova olagihile dhavi wi wanimukwela?
5 Kengesa 1 Amwene 19:1-4. Mbwenye Nyanyi Jezabeli wahitamela ompa Eliya. Iyene wahova opiwa mpaka ottawela murudda wa Bersabeya. Wahikumuwa ofiyedha okumbirha okwa eraga “ovano ddilema; ddithiyeni ddikwe.” Iyene wobuwelelani dhahene? Eliya wali wohiligana vina “wali muttu ninga iyo.” (Tia. 5:17) Txino wali wodhugudheyene vina wolemene. Eliya wobuwela wi guru ekosiliye y’owakamihedha attu omwebedha Yehova kiyali elobo vina mweddelo wa ana Izrayel kwasadduwile vina kaliwo muttu wamulabela Yehova. (1 Amwe. 18:3, 4, 13; 19:10, 14) Monelo wa namavuhulela obu onitikiniha. Mbwenye Yehova wahinonelamo dhubuwelo dha Eliya.
6 Valoga Eliya dhamudhugudha, Yehova kampambihile. Ottiya ejo, iyene wahimukamihedha Eliya okana guru. (1 Amwe. 19:5-7) Osogorhowa, Yehova wahimukamihedha Eliya osaddula dhubuwelo. Nona, Yehova wahimwaddela wi ahikalawo attu okwaranya 7.000 akoodda omwebedha Baal. (1 Amwe. 19:11-18) Yehova wahimutonyihedha Eliya wila Iyene wannimukwela.
YEHOVA ONELE ONIKAMIHEDHA
7. Mukalelo okamihedhiwe Eliya na Yehova onnipangarhaza dhavi?
7 Weyo onowanana makattamiho anudhugudha? Ninopangarhazeya oziwa wi Yehova wahinonelamo dhubuwelo dha Eliya! Ninokuluvela wi iyene vina onononelamo masoso ehu. Iyene onoziwa vangomela guru dhehu, mubuwelo na etanalelo yehu. (Masal. 103:14; 139:3, 4) Nigamukuluvela Yehova ninga mwakoseli Eliya, iyene onele onikamihedha owanana odhugudheya wehu.—Masal. 55:23.
8. Yehova anawukamihedhe dhavi owanana odhugudheya?
8 Odhugudheya onodhana dhubuwelo dhabure na wobaniha etanalelo yehu. Akala onofwanyiwa mazuzumo, kudduwale wi Yehova onele wukamihedha owanana odhugudheya. Iyene anawukamihedhe dhavi? Olobela, Yehova onfuna wi weyo omwaddele dhilobo dhinuzuzumiya. Onele wukamihedha wakula wunla wawo. (Masal. 5:3; 1 Ped. 5:7) Kamulobelele Yehova sabwa ya makattamiho angumanana weyo. Iyene kanaloge na weyo ninga mwakoseliye na Eliya, mbwenye onologa na weyo modhela Mazu aye, Bibilia vina na nikuru naye. Ogamwengesaga Bibilia onele opangarhazeya na okana njedhelo. Abali na arogora a mmulogoni anele wulibiha.—Rom. 15:4; Aheb. 10:24, 25.
9. Amarho okuluveleya anawodhe dhavi onikamihedha?
9 Valogile Yehova wi Eliya amusunzihe Elizeu okala namavuhulela, Iyene wafuna wi Eliya akaane marho waye agamukamihedhile na odhugudheya waniye. Yakakene, nigakaana mukwehu wokuluveleya, iyene ononikamihedha owanana odhugudheya wehu. (2 Amwe. 2:2; Gano 17:17) Akala kuna mukwawo wokuluveleya, kamulobelele Yehova wila awukamihedhe onfwanya Mukristu woliba omuyani onawodhe wulibiha weyo ovilela odhugudheya wawo.
10. Yotagiha ya Eliya ennivaha njedhelo gani, nanda nipikirelo nili munivuruni na Izaiya 40:28, 29 ninnikamihedha dhavi?
10 Yehova wahimukamihedha Eliya owanana na odhugudheya vina omulabela na nroromelo mwari mwa vyaka dhinjene. Yotagiha ya Eliya enonivaha njedhelo. Txino ninofanyiwa odhugudheya mwari mwa mudhidhi mwinjene onobaniha maningo na etanalelo yehu. Nigamukuluvela Yehova, onele onivaha guru dha omulabela iyene na ntidi.—Kengesa Izaiya 40:28, 29.
ANA, DAVID, NA “ASAF” AHIMUKULUVELA YEHOVA
11-13. Odhugudheya wapattile dhavi emeleli a Mulugu a nsaka nawale?
11 Bibilia onowaloga attu ena agumanilena odhugudheya onddimuwa. Motagiha, Ana wankaana manyazo vowi munanddaye annipuja-wene sabwa yohikaana mwana. (1 Sam. 1:2, 6) Mudhidhi mwinjene Ana akala onlaga vina kawodha oja sabwani odhugudheya wa mmirimani mwaye wahittabwa.—1 Sam. 1:7, 10.
12 Mwene David vina wahikumuwa vaddiddi sabwa ya odhugudheya. Kobuwela, iyene wahifwanyiwa masoso menjene. David wankubanya vaddiddi sabwa ya dhoddawa dhakosiliye. (Masal. 40:12) Mwanaye Absalau wahimusadduwela osogorhowa Absalau wahifiyedha okwa. (2 Sam. 15:13, 14; 18:33) Marho waye wofiyedheya vina wahimwika ekotti. (2 Sam. 16:23–17:2; Masal. 55:12-14) Manivuru menjene a masalmo alebile David anowoniha odhugudheya waye vina nikuluvelo naniye na Yehova.—Masal. 38:5-10; 94:17-19.
Txini emukamihedhile munasalmo otxinja monelo waye? (Koona ddima 13-15) *
13 Osogorhowa, munasalmo mwina wahiroma okana nrima na attu abure. Txino iyene wali mukadda Levi wa nihimo na Asaf, walaba “mmusanani mwa Mulugu.” Munasalmo oddu wahikumuwa vaddiddi vina wahirimeliwa wagalala. Wahiroma waganyedha mareliho agakelile iyene sabwa yomulabela Mulugu.—Masal. 73:2-5, 7, 12-14, 16, 17, 21.
14-15. Dhotagiha esi ttaru dhili Mbibiliani dhinnisunziha eni mwaha wa nikamihedho ninvaha Yehova?
14 Emeleli aba araru alogiwe, ahimukuluvela Yehova vina ahimukumbirha nikamihedho. Awene ahilobela na murima wotene amwaddelaga Yehova dhokubanyiha dhawa. Ahiloga motapuwa-mwene mwahaya wattukulela okala odhugudheya. Awene andowavi omparhani wila amwebedhe Yehova.—1 Sam. 1:9, 10; Masal. 55:22; 73:17; 122:1.
15 Ttagaraga ya Yehova yahimuttukulela omukamihedha muttu-muttu wa emeleli abale. Ana wahakela murenddele mmirimani. (1 Sam. 1:18) David wahileba: “Segedho dhinimugwela muthu wapama dhili gwè; mwa dhetene onimvunela ddi Nabuya.” (Masal. 34:19) Nanda munasalmo oddule wahoona wi Yehova ‘wahimuttiddela nlada’ amweddihaga na malago okwela. Iyene wahiba: “Miyo, osanzaya waga kukala vamodha na Mulugu, kutamela othawela wa Nabuya.” (Masal. 73:23, 24, 28) Ninsunzavo eni na dhotagiha esi? Dila dhina, ninele ofwanyiwa makattamiho ananittukulele okala odhugudheyene. Mbwenye nitanaalele mukalelo wakamihedhile Yehova attu ena, nimulobelele iyene na nikuluvelo vina niwelelege dhotene dhinfuniye wila iyo nikose.—Masal. 143:1, 4-8.
OMUKULUVELE YEHOVA ONELE OPEMBERHA
Vamaromo, murogora dhahi kafuna otugumana na attu, mbwenye wahisaddula mubuwelo waye ovano ontamela wakamihedha attu ena (Koona ddima 16-17)
16-17. (a) Ninlogelani wi ottiya otugumana na attu ena elobo yabure? (b) Ninawodhe dhavi okala oliba?
16 Dhotagiha dha emeleli aba araru dhinonisunziha elobo yina yamakamaka—kanittiye omukuluvela Yehova vina otugumana na nikuru naye. (Gano 18:1) Nancy, wahifwanyiwa makattamiho menjene okubanya vamwaliwiye na mamune, iyene ohiloga: “Miyo kaddafuna omoona muttu nne vina ologa na muttu mwari mwa malabo menjene. Mbwenye, ottiya okala vamodha na attu wanttabwiha okubanya waga.” Nona, Nancy wahisaddula mubuwelo waye vina ovano onotamela wakamihedha attu anfwanyiwa makattamiho. Iyene ohiloga: “Vafwaseyela miyo wavuruwana attu ena vina ddankubanya sabwa ya makattamiho apattiwa awene opitta aga.”
17 Matugumano anonikamihedha okana guru. Nigakala vamatugumanoni, Yehova ononivaha gari ‘yonikamihedha vina y’onipangarhaza.’ (Masal. 86:17) Iyene ononivaha guru modhela muya waye wokoddela, Mazu aye, vina nikuru naye. Matugumano anovaha gari ‘yolibihana nroromelo nehu.’ (Rom. 1:11, 12) Murogora oniliwa Sophia ohiloga: “Ddi Yehova na abali anddikamihedha. Mwa miyo okala mmatugumanoni elobo yamakamaka vaddiddi. Ddinononelamo vina wi odhowa mmabasani a olaleya na abali a mmulogoni enoddivaha guru yowanana odhugudheya waga.”
18. Nigadhugudheya, Yehova onivaha eni?
18 Nigadhugudheya, kanidduwale wi Yehova ohigana onifurula mwa makattamiho otene musogorho, mbwenye ovanene ononikamihedha owanana odhugudheya wehu. Iyene ononivaha guru “dhowirana dhinfuneye” wila nipemberhe dhubuwelo dhawobana na odhugudheya.—Fil. 2:13.
19. Nikuluvelo gani ninnivaha nivuru na Roma 8:37-39?
19 Kengesa Roma 8:37-39. Murumiwi Paulo ohiroromeliha wi kavo elobo enwodha onimwalaniha na okwela wehu na Mulugu. Ninawodhe dhavi wakamihedha abali na arogora anwanana na odhugudheya? Mutoma onfwarela ninele wona epaddi enfunihu omutagiha Yehova mwa otonyihedha ttagaraga vina wavilela abalihu anwanana makattamiho okubanyiha.
JIBO 38 Kamurulele Nabuya Goi Dhawo
^ par. 5 Mwari mwa nsunzo ntti mazinaya ahitxinja.
^ par. 2 Ovira mudhidhi mwinjene banili wodhugudheya onowobaniha yubuwelo na maningo ehu. Yehova onanikamihedhe dhavi? Ninele wona mukalelo wakamihedhiwe Eliya na Yehova valiye wokubanyene. Dhotagiha dhina dha mBibiliani dhinele onitonyihedha mukalelo onanikamihedhe Yehova nigakala wodhugudheyene.
