MWARI mwa yaka ya 1970, nikuru na anamasunza dhilobo dhotibeleya alabaga o Ein Gedi, elabo ya Izrayel, nikome na Mar Morto ahifwanya rolo yawale. Mburo obu wahifanyiwa magogoddo a nlogo na attu, nitolotxiwe mwari mwa vyaka 500 mpaka 550 E.C. Atibaga sinagoga yaddumehiwe, awene ahifanya rolo yopigidheya, rolo ejile yali yodduguddeyene kiyawodheya wengesa dhalebiwe mwari mwa. Otapula roloya yanrutxa vaddiddi, mbwenye na nikamihedho na Tecnologia yahiwodheya “otapuliwa” rolo ejile. Alabihedhaga técnica ya escaneamento 3-D na software de edição de imagem, aziwitxi ahiwodha wengesa dhalebiwe mwari mwa rolo ejile.

Txini elagihiwe mwari mwa escaneamento ejile ekosiwe? Rolo ejile txibarene, yali epaddi ya manivuru a Bibilia. Mwahikala maversikulu oroma a nivuru na Onamakutta. Mwari mwa maversikulu abale mwawoneya Tetragrama, nzina na Mulugu na elogelo ya Ebraiko. Mowaganyedha, txino, rolo ejile yalebiwe obudduwa yaka ya 50 waddamela 400 Kristu bakwile, dhawene ehikala rolo yanawili yawale-wale efanyiwe enkosa mpaddi ya malebo a Bibilia a elogelo ya Ebraiko. Atonyihedhaga ttima ya mavuhulo aba Gil Zohar jornalista wa The Jerusalem Post, ohileba: “Oromana nsaka nifanyiwe marolo a Mar Morto alebiwe waddamela yaka 100 Kristu ahinabaliwa na Códice ya Alepo elebiwe nsaka na Idade Média, sekulu 10 Kristu bakwile vahivira vyaka-2.000-ofiyedha mudhidhi ofanyiwe rolo eji yina ya Ein Gedi.” Mowiwanana na aziwitxi, rolo efuguliwe na komputadori enotonyihedha wi malebo a Massorético a Torá “ahikoyeya deretu mwari mwa vyaka matxikwi menjene, vina anamatapulela ena kawodhile osaddula maleboya.”