1. Mowiwanana na nivuru na Kolosi 2:4, 8, elobo gani enkosa Satana wila anipupurutxe?

SATANA onfuna wi attu otene amusadduwele Yehova. Wila akwanihedhe dhogana dhaye, iyene onotamela onyengetta mubuwelo wehu, nona, ononipupurutxa banifiyedha wiwelela dhinfuniye. Mwa dhawene, oninyengetta wila nikale anamafwara aye apuraga dhogana dhehu.—Kengesa Kolosi 2:4, 8.

2-3. (a) Ninfunela nni ofwaseyela ononelamo malago ali munivuruni na Kolosi 2:8? (b) Ninasunze eni mwari mwa mutoma obu?

² Ninowodha ozinddiyela mirega dhawopiha dha Satana? Indde, ninoziwa! Kobuwela, Paulo alebaga nivuru na Kolosi 2:8 kalebela amalabo. Walebela Akristu ottikitteliwa na muya wokoddela. (Kol. 1:2, 5) Akristu a masaka awale anpattiwa na dhilobo dhorutxa, masaka abano vina ninofanyiwa dhilobo dhorutxa. (1 Kor. 10:12) Sabwaya? Satana ovokeliwa mwilaboni, nona iyene onfunetxa wanyengetta emeleli ororomeleya a Mulugu. (Ovuh. 12:9, 12, 17) Kavali waganyedha wila ninkalawo masaka omariha adhalile attu abure na anamanyengetta ‘anttabwiha obure wawa.’—2 Tim. 3:1, 13.

³ Mutoma obu onele onisunziha mukalelo onlabihedha Satana mazu “ópela malago” wila apupurutxe mubuwelo wehu. Ninele wona ‘mirega’ miraru dha ‘oshaga’ wa Satana.  (Ef. 6:11) Mutoma onfwarela ninele ononelamo mukalelo onawodhihu ovibarelana na monelo wabure ondana mirega dhaye muyubuweloni mwehu. Voroma, ninfuna nisunze mukalelo walabihedhile Satana mirega dhaye wila apupurutxena ana Izrayel mufiyelani Mwilaboni Yolibeliwa.

4-6. Mowiwanana na nivuru na Olibiha 11:10-15, malimelo gani maswa afuna ana Izrayel ofwara mufiyelani Mwilaboni Yolibeliwa?

⁴ Satana wahakwekwettela ana Izrayel webedha dhosemiwa. Owodhile okosa dhavi? Iyene wahiziwa wi awene agahitamela okaana yoja. Mudhidhi ovolowile ana Izrayel Mwilaboni Yolibeliwa mukalelo w’olima wawa wahitxinja. Bali Wijipitu, ana Izrayel alabihedha mwinje Nilo wakamihedha owazele manje mmunddani mwawa. Oku Mwilaboni Yolibeliwa mukalelo wa okana dhoja wali wa okuluvela muzogwe warubwa vang’ono-vang’ono na omyo wa mani. (Kengesa Olibiha 11:10-15; Iza. 18:4, 5) Egali dhawene, ana Izrayel anfwanyela osunza malimelo mena. Kigali yovevuwa vowi enjiya asunzile marhe apama olimana ahikwa mwiddeddereni.

⁵ Yehova wahinonihedhamo wila mikalelo dha nlogo naye dhahitxinja. Nona iyene wahavaha malago, voromavene malagoya akala ninga kali malago a malimelo: “Porhe-porhe, kamunyengetheye: kamulapelane na Nabuya, kamwawimelele amulugu ena, kamwawebedhe.” (Olib. 11:16, 17) Yehova wafuna wi ashagihe sabwa ya malimelo, mbwenye ottiya ologa dha malimelo, ologile wi anawebedhe amilugu, sabwaya jani?

 ⁶ Yehova wanziwa wi ana Izrayel agahimageya na malimelo a attu awebedha amilugu osemiwa. Txibarene, anamwanddamani awa ahikaana ewodhelo ya olima opitta awene, nona nlogo na Mulugu nigahifuna ofwara mulimelo wawa, mbwenyi vahikala ngovi. Dhubuwelo dha anamalima abale akadda Kaná dhali dha omwebedha Baal. Amoona Baal ninga mwinya wa erimu na wa muzogwe. Yehova kafuna wi nlogo naye nirumeele manyengetto abale ottambi. Masiki egali dhawene, ana Izrayel ahisakula omwebedha Baal. (Oleb. 25:3, 5; Anam. 2:13; 1 Amwe. 18:18) Koona mukalelo wakwekwettile Satana.

7. Elobo gani yehile nroromelo ana Izrayel mufiyelani Mwilaboni Yolibeliwa?

⁷ Murega woroma, Satana wahilabihedha dhifunelo dhawa dha omoona muzogwe arubwaga. Mwilaboni Yolibeliwa vayakani muzogwe warubwa vang’onovi mweri wa Abrili mpaka Setemburu. Wi akaane dhoja amuroromela muzogwe warubwa omaromelo wa mweri wa Otuburu. Satana wahanyengetta ana Izrayel wubuwela wila akaane dhoja anfwanyela ofwara dhilemelelo dha attu abale aawebedha amilugu osemiwa. Amalabo abale arumeela wi agawebedha amilugu awa agahikaana muzogwe wawakwana. Abale akoodda omuroromela Yehova anrumeela wi agafwara dhilemelelo dhawa agahiviluwa na yumwi, nona ahiroma omwebedha mulugu wottambi Baal.

8. Murega wanawili olabihedhi Satana buvi? Katapulela.

⁸ Murega wanawili. Satana wahilabihedha dhifunelo dhonyakuwa. Malogo awebedha amilugu ahikaana mweddelo wonyakuwa. Mweddelo wonyakuwa webedhani wali w’ojeberuwa wakosiwa mumparhani. Malogo abale anrumeela merelo orarutxana alobwanavi obe ayanavi na mikalelo dhina dhogonihana dhonyakuwa! (Olib. 23:17, 18; 1 Amwe. 14:24) Malogoya ankuluvela wi ofwara dhilemelo esile agahirumeeliwa na amilugu awa, agahikana nikamihedho n’okana munyotto mmunddani mwawa. Ana Izrayel ahimageya na malogo abale akosa dhilobo dhonyakuwa vina aawebedha amilugu wottambi. Txibarene, awene ahipupurutxiwa na Satana.

9. Mowiwanana na nivuru na Ozeya 2:16, 17, Satana wattittile dhavi monelo wa ana Izrayel na ohifuna omulabela Yehova?

⁹ Murega waneraru. Satana wahattitta ana Izrayel na monelo wohifuna omulabela Yehova. Nsaka na namavuhulela Jeremiya, Yehova wahiloga wi anamavuhulela ottambi agahittukulela nlogo Naye odduwala nzina Naye ‘sabwa ya Baal.’ (Jer. 23:27) Veli-veli nlogo na Mulugu nahittiya oromola nzina na Yehova batxinja na nzina Baal, amukuwelaga “Mwinya” obe “Mesirhi.” Dhawene, ana Izrayel anrutxiwa ozinddiyela ottiyana wana Yehova na Baal, nona antaganyiha mukalelo omwebedha Yehova na Baal.—Kengesa Ozeya 2:16, 17.

10. Mirega gani onlabihedha Satana masaka abano?

¹⁰ Satana onolabihedha mirega dhakene masaka abano. Iyene onowattitta attu na dhifunelo dhokosa mararuwo vina otxinja monelo wa omwebedhana Yehova. Ovano  ndoweni none enfunihu osunzavo na murega womariha walabihedhi Satana.

11. Satana onattitta dhavi attu na monelo wohifuna omulabela Yehova?

¹¹ Satana onowattitta attu na monelo wohifuna omulabela Yehova. Vakwile arumiwi otene a Yezu, Akristu ahiroma osadduwa bagasunziha ottambi. (Mer. 20:29, 30; 2 Tes. 2:3) Asadduweli aba ahiroma ottitta ebaribari ya Mulugu. Motagiha, ahittiya olabihedha nzina na Mulugu mwari mwa dhipaddi dha Bibilia dhatapulelani, bekavo “Nabuya.” Mfudhelani nzina na Mulugu bekavo “Nabuya,” enowarutxa anamengesa ozinddiyela ottiyana onna Yehova na “anabuya” ena anromoliwa mBibiliani. (1 Kor. 8:5) Awene anolabihedha mazu akakene “Nabuya,” awaddagana Yehova na Yezu, dhahene attu anorutxiwa omuziwa Yehova vina Mwanaye, anna ewodhelo na ttima yottiyana. (Jo. 17:3) Maguddulano aba anowunuwiha masunziho a mulugu Oraru—masunziho ahili mBibiliani. Yodhelavoya jawi, attu enjene anubuwela wi Mulugu kannoneleyamo vina masunziho aye borutxa. Obu ottambi wawopiha!—Mer. 17:27.

12. Mowiwanana na nivuru na Roma 1:28-31, marelijiau onyengetta ansunziha eni, nanda yodhelavoya txini?

¹² Satana onolabihedha dhifunelo dhonyakuwa. Nsaka na ana Izrayel, Satana wahilabihedha marelijiau onyengetta wila asunzihe merelo onyakuwa. Iyene onokosa yakakene masaka abano. Marelijiau onyengetta anottiya merelo onyakuwa opadduwa vina anorumeela wi kahiyo dhilobo dhabure. N’ejuwene, attu enjene anrumeela wi anomulabela Mulugu ahittiya mweddelo wapama. Murumiwi Paulo alebaga nivuru na Roma kavubele yodhelavoya. (Kengesa Roma 1:28-31.) “Afwaraga mobuwelo awa abure” anokosa merelo otene ogonihana wonyakuwa ninga ogonihana alobwanavi obe ayanavi. (Rom. 1:24-27, 32; Ovuh. 2:20) Jamakamaka ofwara dhinsunziha Bibilia!

13. Murega mwina onlabihedha Satana buvi?

¹³ Satana onolabihedha monelo wa attu modhela dhofuna dhawa. Iyo nihikaana efunelo yosunza dhilobo vina ya wasapela  amudhihu. (1 Tim. 5:8) Dila dhinjene, ninwodhela sabwa yodhowa oskola vina okala anamasunza apama. Mbwenye ninofanyeela okala pasope. Dhilabo dhinjene anamasunzaya ansunzihiwa onona wa elabo obe filozofia wa attu. Awene anosunza wi Mulugu kawo, vina okodda orumela dhinloga Bibilia. Anosunzihiwa wi dhilobo dhipadduwile woka, kadhina muttanddi. (Rom. 1:21-23) Masunziho ninga aba kanvahana na ‘eziwelo ya Mulugu.’—1 Kor. 1:19-21; 3:18-20.

14. Onona wa attu onsunziha eni?

¹⁴ Onona wa attu kuniwanana na magano oligana a Yehova. Awene kansunziha esile dhinbala muya wa Mulugu, mbwenye “dhinthopa maningo.” (Gal. 5:19-23) Nona anokala anamavittukulela na anamagaya omagomelowa ankala “anamakumbela vawa.” (2 Tim. 3:2-4) Mweddelo obu onowasilidha attu okoddela murima vina oviyeviha, mikalelo dhinfuniwana emeleli a Mulugu. (2 Sam. 22:28) Akristu ena ankosa masunzo a vadhulu ansorihiwa na mubuwelo wa attu, ottiya na mubuwelo wa Mulugu. Ndoweni none empadduweli murogora dhahi.

15-16. Onsunzavo eni na yotagiha ya murogora oddu?

¹⁵ Murogora dhahi onlaba mmabasani a mudhidhi wotene mwari mwa vyaka 15, ohiloga: “Mmalelimi obatiziwa ninga Munamoona wa Yehova, ddanziwa dhawopiha dhindela sabwa ya masunzo a vadhulu, mbwenye kaddisorihile malagoya. Ddobuwela  wi malago aba kanddipatta.” Magudulano gani afanyiliye? Iyene onowakula: “Kursu dhakosimi dhanddijela mudhidhi mwinjene kaddawodha omulobelela Yehova, kaddawaddela attu miselu dha Bibilia vina ddakala wolemene kaddawodha osasanyedha deretu matugumano aga. Eddiziveli jawi, ddahiwodha ozinddiyela wi mandano aga na Yehova ahobana, ddahoona wi ddinofwanyela ottiya masunzoya. Nona ddahittiya-wene.”

¹⁶ Masunzo manddimuwa apattile dhavi mubuwelo wa murogora? Iyene ohakula: “Miyo dhinokaana manyazo orumeela wi dhahiroma waganyedha na opambiha masunziho a mBibiliani vina ddanfwaseyela wang’ana dhovonya dha abali na arogora nona ddanatxatxama. Vahivira mudhidhi mwinjene wila ddittiye masunzo abale. Yopadduwa eji txibarene ehidditonyihedha wila jawopiha ohiwelela malago a Babihu wa wirimu onnisunziha modhela nikuru naye. Yehova onoddiziwa pama opitta ddamwinya. Miyo kovirihamo mudhidhene obule esidha kadhigapadduwile!”

17. (a) Txini enfwanyelihu okosa wi nikale ovikomene? (b) Txini enasunze iyo mwari mwa mutoma onfwarela?

¹⁷ Nikale ovikomene nihipupurutxiwe na “mazu awota, ópela malago” a mwilaboni eji ya Satana. Kanittiye mirega dha Satana onikwekwetta. (1 Kor. 3:18; 2 Kor. 2:11) Txipo kanittiye wi iyene attitte monelo wehu na Yehova. Nifwaregeni magano oligana a Yehova. Kurumeele Satana olabihedha mirega dhaye wi weyo okale wolapelana na magano a Yehova. Onakose nni akala onozinddiyela wi ohiroma opattiwa na mubuwelo wa mwilaboni? Mutoma onfwarela onele onitonyihedha mukalelo onanikamihedhe Nzu na Mulugu “obwanyula ngome” dha masunziho na dhilemelelo dha attu.—2 Kor. 10:4, 5.