NSUNZO 26
Wakamihedhe Attu Ena Owanana Odhugudheya
“Amudhaga mukale na murima modhene: mweddelagane thagaraga, muthabege vamodha, mutabuwelagane, mukale oviyeviha.”—1 PED. 3:8.
JIBO 50 Nitagihe Okwela wa Mulugu
DHINASUNZE IYO *
1. Ninawodhe dhavi omutagiha Babihu wakwela, Yehova?
YEHOVA ononikwela vaddiddi. (Jo. 3:16) Iyo ninfuna nimutagihe Babihu wokwela. Ninfuna nivilibihedhe wi nikale na ‘murima mmodhene, naweddelaga ttagaraga’ attu otene “makamaka amudhihu akristu.” (1 Ped. 3:8; Gal. 6:10) Akala abali na arogora anofwanyiwa masoso, enofuneya wavaha nikamihedho.
2. Txini enfunihu osekeserha mwari mwa nsunzo ntti?
2 Muttu ontamela okala munamoona wa Yehova onojedhela ofwanyiwa odhugudheya. (Mk. 10:29, 30) Kavali waganyedha wi nili omagomo wa elabo nona makattamiho anele ottabwavi. Ninawodhe dhavi wakamihedha attu ena? Ninfuna nisekeserhe mapadduwo a mBibiliani mwaha wa Loti, Job na Nowemi. Ninele wona dhotagiha dha abali na arogora anwanana makattamiho masaka abano vina ejile enfwanyelihu okosa wi nakamihedhe.
OKALE MUTTU WOVILELA
3. Mowiwanana na nivuru na 2 Pedro 2:7, 8, Loti okosile yosakula gani nanda yodhelavoya jivi?
3 Loti wahisakula okala o Sodoma, mbwenye yogana yaye yahimpela malago sabwani mweddelo wa attuyamo wali onyakuwa. (Kengesa 2 Pedro 2:7, 8.) Txibarene elaboya yahikaana mareliho a oja, mbwenye Loti wahigweliwa ntowa. (Wita 13:8-13; 14:12) Txino mwadhiye wagulehile na mikalelo dha elaboya vina mandano anamwanddamani noona wahirutxiwa omwiwelela Yehova. Mudhidhi oddumeyile Yehova elabo ejile na motto wa enxofre egumi yaye yahitolowa. Karoma watanalela anaye abale eeli anayana. Awene ahiroma weddeleliwa na analobwana, aboya vina kavuluwile vatolotxiwe Sodoma. Loti wayelela numbaye, dhobo dhaye, na mwadhiye wamukweliye. (Wita 19:12-14, 17, 26) Koddi mwari mwa mudhidhene obule worutxa, Yehova wahirimeeliwa ovilela waye na Loti? Nne.
Mbwenyi supaje ya Yehova yahimuttukulela waruma anju aye wi anvune Loti na amudhaye (Koona ddima 4)
4. Yehova wonihile dhavi wi wahinvilela Loti? (Koona foto ya kapa.)
4 Ddiyene mwinya wasakulile okala o Sodoma, mbwenyi supaje ya Yehova yahimuttukulela waruma anju aye wi anvune Loti na amudhaye. Anju abale ahimwaddela wi avenyemo momaguva, mbwenyi ottiya wawiwelela, wela ‘ottigiriga.’ Noona anju abale ahimuttidda nlada iyene na amudhaye bagaweta ofiyedha obudduwela otakulu. (Wita 19:15, 16) Anju abale ahimwaddela wi attawele murudda wa mmwangoni. Ottiya omwiwelela Yehova iyene wahimukumbirha Yehova wi amwalele murudda waddameli kattiya. (Wita 19:17-20) Sabwa ya supaje yaye, Yehova wahirumela yokumbirha ya Loti yodhowa okala waddamela kwatti. Musogorhomwa Loti wahiroma wovamo mmuruddani mpule mwasakuliliye nanda wahimukumbirha Yehova wi amwalele omwangoni watonyihedhiwiye bakooddawo. (Wita 19:30) Mohaganyedha Yehova wahimutonyihedha ovilela onddimuwa! Nimutagihe dhavi?
5-6. Ninawodhe dhavi omutagiha Mulugu mowiwanana na nivuru na 1 Tesalónika 5:14?
5 Moligana na Loti, txino ahikalawo abali a mmulogoni ankosa yosakula yohifanyeela enatotela matabuwo. Egapadduwa elobo ninga ejuwene weyo ogoonilemo dhavi? Txino ogahiloga wi iyene osinangile yaliliye, ejo ebaribari. (Gal. 6:7) Enofuneya okosavo elobo. Nimukamihedhe mbali oddo ninga ekosile Yehova na Loti. Dhavi?
6 Yehova waharuma anju wi amwaddele Loti ngovi yafuna opadduwa, ottiya ejo, awene ahimukamihedha, ahimuttidda nlada ofiyedha obudduwa mu Sodoma. Nifware yotagiha eji nigamona mbali onfuna okosa yosakule yohifwanyelela. Nikale womala-nawale wi nimukamihedhe. Masiki muttuya akala onottigiriga olabihedha nikamihedho na mBibiliani nimwaddele iyo, enofuneya ovilela. Nifware ekosile anju abale. Enofuneya wakamihedha abalihu, nitanalelaga elobo enfwanyelihu wakamihedhana. (1 Jo. 3:18) Mudhidhi mwina txino enofuneya onvahedha nlada, nimutonyihedhe mukalelo wottiddihedha mabasa a malago anvahile iyo.—Kengesa 1 Tesalónika 5:14.
7. Ninawodhe dhavi ofwara yotagiha ya Yehova vanvileliye Loti?
7 Yehova txino agahizuzumela wang’ana dhovirigana dha Loti. Ottiya okosa ejuwene, iyene ohinvudhelela murumiwi Pedro oleba wi Loti wali muttu woligana. Japama oziwa wi Yehova onolevelela dhoddawa dhehu! (Masal. 130:3) Ninawodhe otagiha dhavi ovilela wa Yehova? Nitamelege wona merelo apama atonyihedhe abalihu, ninele owodha ovilela. Nigakala attu oviyeviha, awene anele owodha orumela nikamihedho nehu momaguva.
OTONYIHEDHE TTAGARAGA
8. Ttagaraga ennittukulela okosa eni?
8 Moligana na Loti, Job ohitabuwa vina mbwenye katabuwele sabwa ya yokosa yosakula yovirigana. Job wahiyelela dhorela dhaye dhotene, egumi yaye vina nrhemezo naniye na attu a vamuruddani. Ottiya
ejo, anaye otene akwile labo nimodha. Job wahimageedhiwa na akwaye araru adhile omoona. Akwaye aba araru akooddelini omutonyihedha ttagaraga? Awene kawodhile ononelamo mwawakwana makaniya, sabwa yawi monelo wawa wali w’otakuluvi. Nona ahimuttonga Job anpwattelihaga muladdu. Nirabele dhavi okosa elobo yoligana na ejile yirile amarho a Job? Nihidduwale wi Yehova onoziwa deretu esile dhinapatta attu otene. Enofuneya onvuruwana nofwaseya muttu onfwanyiwa masoso. Ottiya ovuruwana bahi esile dhinlogiye enofuneya vina opattiwa na mukalele woligana. Ogera dhawene onele owodha watanaalela abalawo.9. Nigakaana ttagaraga ninarabele okosa eni, nanda sabwaya jani?
9 Ttagaraga enele onikamihedha ohivuwiha masoso anfwanyiwa abalihu. Muttu onloga ottambi kanunuwiha mulogo mbwenye onowobaniha. (Gano 20:19; Rom. 14:19) Muttuya onloga ottambi kana ttagaraga onologa mazu osuva anttabwiha masoso a mbali ontabuwa. (Gano 12:18; Ef. 4:31, 32) Enfuneya ku ofwaseyela wang’ana mikalelo dhapama dha muttuya vina wubuwela marhe ananiwodhihe omukamihedha mmakattamihoni mwaye!
Onvuruwane n’ovilela akala mbali onologa ‘mazu ohitanaleleya,ʼ osogorhowa onvahe ninpangarhazo nofwanyelela (Koona ddima 10-11) *
10. Ninsunzavo eni na mazu ali munivuruni na Job 6:2, 3?
10 Kengesa Job 6:2, 3. Nsaka nttile Job wahiloga ‘mazu ohitanaleleya.’ Nona osogorhowa iyene wahinonelamo wi wahiloga mazu abure. (Job 42:6) Moligana na Job, masaka abano muttu onkubanya na makattamiho onologa mazu ohitanaleleya anamuttukelele otxinuwa. Ninakose dhavi egapadduwa dhawene? Ottiya ompambiha ninofwanyela omutonyihedha ttagaraga. Kudduwale wi Yehova txipo kanfuna wi attu otene atabuwege na makattamiho vina odhugudheya onnipatta ovanene. Nona, masiki mwimeleli wororomeleya wa Yehova onologa mazu wohitanaleleya agakala wodhugudheya. Iyene txino onologa dhilobo dhabure mwaha wa Yehova obe iyo, dhawene kanimaguvele omuttonga sabwa ya dhilobo dhinlogiliye.—Gano 19:11.
11. Anddimuwa a mulogo anawodhe dhavi omutagiha Eliyú agavahaga malago?
11 Dila dhina, muttu onwana na odhugudheya onofwanyela ovahiwa nikamihedho malago obe wogolela mubuwelo. (Gal. 6:1) Anddimuwa a mulogo anawodhe dhavi ovaha malago? Awene anofwanyela omutagiha Eliyú, wanvuruwanile Job nofwasa. (Job 33:6, 7) Eliyú wahinonelamo dhubuwelo dha Job nona wahinvaha malago. Anddimuwa a mulogo anofwanyela ofwara yotagiha ya Eliyú, avuruwanege n’ofwaseya wi anonelemo dhinubuwela muttuya. Dhawene, awene agavahaga malago anele oddiginya murima wa anamewaya.
OLOGE NA MAZU OPANGARHAZA
12. Nowemi wewilemo dhavi vakwile mamunaye na anaye eeli?
12 Nowemi wali muyana waweddeyana wamukwela Yehova. Mbwenye vakwile mamunaye na anaye eeli, wahikubanya afunaga otxinja nzina na Nowemi wila nikale “Mara,” nintapulela “owawa.” (Ruti 1:3, 5, 20, 21) Muwenyaye mmodha oniliwa Ruti ohikala na iyene mmakattamihoni mwaye mwetemwene. Ottiya omukamihedha bahi, Ruti wanloga mazu a nipangarhazo. Ruti wahitonyihedha wi onomukwela Nowemi vina wanimukamihedha na mazu okurumuwa.—Ruti 1:16, 17.
13. Sabwaya jani abale akweliwe awadhiwa obe amamunawa anofuna nikamihedho nehu?
13 Akala mmudhihu womuyani okweliwa mwadhiye obe mamunaye iyene onofuna nikamihedho nehu. Atelani ankala ninga miri minli dhinunuwa vamodhavi. Movira wa vyaka dhinjene, mitxitxi dha miri esile dhinogumana vati-vati. Mbwenye akala muri mmodha onogwaddiwa, muri obule ohalile onopattiwa. Na mukalelo wakakene, akala muttu onokweliwa mwadhiye obe mamunaye iyene onowana na matabuwo muyubuweloni mwaye mwari mwa mudhidhi mwinjene. Paula, * okweliwe mamunaye mohijedheleya, ohiloga: “Egumi yaga yahisadduwa, ddihiziwaga yokosa. Sabwa ya orimeleliwa mukwaga. Wali iyene walogana miyo makani. Sabwa yawi mudhidhi wotene nakala vamodha. Wali iyene wamwaddela miyo makattamiho aga. Mukweliye ddagana ninga nikwe vamodha.”
Ninawodhe dhavi wavaha nikamihedho abale akweliwe awadhiwa obe amamunawa? (Koona ddima 14-15) *
14-15. Ninawodhe dhavi ompangarhaza muttu okweliwe mamunaye obe mwadhiye?
14 Ninawodhe dhavi ompangarhaza muttu okweliwe mamunaye obe mwadhiye? Ttarho yoroma yamakamaka ja ologa na iyene, masiki akala onokaana manyazo obe txino kunziwa enfuniwe ologa. Paula oromoliwe ohiloga: “Ddinoziwa wi okweliwa elobo enkumula maningo a attu. Awene anozuzuma ofiyedha ologa mazu onyimula obe osilidha. Mbwenye entabwa akala muttuya onomala.” Ebaribari wi dila dhinjene a mamukwela kanjeedhela wila iyo ninele ologa elobo enfuna osaddula egumi yawa mudhidhi onkubanyani. Paula ohiloga: “Akwaga adha oddoona anloga ‘ddinowukubanyedha,’ nona ddahiwodha oliba murima.”
15 William, okweliwe mwadhiye vyaka dhinjene mundduni, ohiloga: “Dinoziveliwa vaddiddi attu ena agobuwela dhakosa mwadhaga dhawene ddinowoona wi attu ena annimukwela vina annimuriha mwadhaga. Nikamihedho ninga ntti ninolibiha murima waga. Nona mubuwelo waga onofwanya nipangarhazo sabwani mwadhaga wali wattima vamentoni vaga vina wali epaddi yamakamaka mwigumini mwaga.” Bianca oli mamukwela onotapulela: “Elobo enddivaha nipangarhazo ja attu ena olobela vamodha na miyo vina oddengesela malebo a Bibilia. Awene agalogaga dhakosa mamunaga enoddilibiha vaddiddi vina anofwaseyela oddivuruwana ddigalogaga mwaha wa mamunaga.”
16. (a) Txini enfunihu okosa wi nakamihedhe attu akweliwe amudhawa okweleya? (b) Mowiwanana na nivuru na Tiago 1:27, muttorho gani onihu?
16 Ninga mwakoseli Ruti na mamukwela Nowemi, iyo ninofwanyela wavaha nikamihedho abale akweliwe amudhawa okweleya. Paula ohiloga: “Vakwile mamunaga ddahikaana nikamihedho na attu enjene. Movira wa mudhidhi, egumi ya attuya yahiyela ninga mwalani. Mbwenye yaga yahisadduwa kakamwe. Jaderetu akala attu ena anononelamo wila mamukwela onofuna nikamihedho mwari mwa mweri—obe mwari mwa vyaka—agamala okweliwa.” Pumwenemo, mutaanalelo wa attu onottiyana. Ena kanrutxiwa olemela mikalelo dhiswa. Oku ena, anokubanya vaddiddi agakosaga mabasa akosani Tiago 1:27.
vamodha na mukwawa oli marafula. Nona okubanya wa attu akweliwe ohittiyana. Kanidduwale wi Yehova onoriha muttorho wehu wa wapangarhaza amamukwela.—Kengesa17. Abale amwaliwe na awadhiwa obe amamuniwa anfunelani nikamihedho nehu?
17 Atelani ena anowanana okubanya vina odhugudheya sabwa yomwaliwa na awadhiwa obe amamuniwa. Joyce, mamunaye wahimwala bamutela muyana mwina, ohiloga: “Okubanya womwaliwa onopa vaddiddi opitta okweliwa mamuno. Kowiliwa wi mamunaga wakwile na ngovi obe eredda ddahiziwa wi kiyali yosakula yaye. Mbwenye, makani bawi mamunaga oloddimwala. Ddahitoteya manyazo sabwa ya opwaziwa.”
18. Ninawodhe dhavi wakamihedha abale ahina awadhiwa obe amamunawa?
18 Akala ninotonyihedha merelo mang’ono a ttagaraga, enele wakamihedha abale amwaliwe obe akweliwe ononelamo wi iyo ninowakwela. Ovano awene ali woka nona anowafuna amarho apama. (Gano 17:17) Onawodhe dhavi olagiha wi weyo oli marho wapama? Txino modhela wakumbirha odha vatakulu vawo wi muje vamodha. Olaganela odhowa vamodha mmabasani a olaleya obe mburo wa mavego. Mukalelo mwina bwa omukuwela wila akale va webedha vawo va ntakulu. Wakosa dhawene, onele omwagalaliha Yehova, vowi iyene “onoawaddamela ansuveya murima” vina iyene “mukoyi w’amamukwela.”—Masal. 34:18; 68:5.
19. Wubuwelaga nivuru na 1 Pedro 3:8, txini eganiliwe okosa?
19 Mohigoneela, Omwene wa Mulugu onele olamulela elabo, vina makattamiho otene “anere odduwaliwa.” Ninojeedha mudhidhi wawi “dhawale kadhinobuweliwe vina, dhivirile dhinodduwaliwa mudduwalelo.” (Iza. 65:16, 17) Nijedhelaga ofiya wa siku ntto, ninofwanyela wakamihedha attu ena na mazu vina merelo nitonyihedhaga wi ninowakwela abalihu.—Kengesa 1 Pedro 3:8.
JIBO 28 Jibo Eswa
^ par. 5 Loti, Job na Nowemi ahifwanyiwa masoso menjene mwigumini mwawa, masiki na makattamiho animuroromela Yehova. Mwari mwa nsunzo ntti ninele osekeserha dhinfunihu osunza na dhotagiha dhawa. Ninele wona vina ekalele nni yaderetu okala wovilela, wa supaje na ologa mazu opangarhaza nigalogaga na abali vina arogora agafwanyiwa makattamiho.
^ par. 13 Mwari mwa nsunzo ntti mazinaya ahitxinja.
^ par. 57 FOTO YA NIKUKU: Mbali odhugudheya vaddiddi ohiloga ‘mazu ohitanaleleya’ mbwenye munddimuwa wa mulogo ononvuruwana n’ovilela. Osogorhowa, mbaliya ohifwaseya, munddimuwa oddule ononvaha malago na mukalelo woderetu.
^ par. 59 FOTO YA NIKUKU: Atelani aswa ali vamodha na mbali okweliwe mwadhiye ovanenevi. Awene anowubuwela merelo apamaakosile mwadhiye.