Kahiye mwenemo sabwani nne nzu na Mulugu nne manivuru a mapadduwo a nsakanene nttile kanloga wi Akristu ahikana elemelelo ejuwene.

Mukalelo otapuleliwe versu eji mmaBibiliani mena enowattukulela attu enjene wubuwela wi nsakanene nttile yahikalawo elemelelo ya obatiziwa muttu na nzina na amarafula. Ninga motagiha Bibiliya—Nova Versão Internacional, versu eji etapuleliwe dhahi. “Akala aliba okwa kanvenya mukwani ki abale ambatizeliwa amarafula anakose dhavi”?

Mbwenye katanalela elogile a’namapepesa eli a Bibilia. Dr Gregory Lockwood ohiloga wi obatiziwa na nzina na amarafula “ogali mukalelo wobatiziwa ohinkana niparha” vowi kuli mpaddi wa Bibilia onlaga ejuwene vina manivuru a mapadduwo kanlagiha wi wahikalagawo “mukalelo obu wobatiziwa.” Namasunziha wa masunzo manddimuwa Gordon D Fee ologile na mukalelo wakakene. Iyene bela dhahi: “Mukalelo obu wa obatiziwa mbibiliani kunfwanyeyamo nne vina mmanivuruni a mapadduwo. Bibilia epaddi ya N[ipagano] N[ipswa] mukalelo obo w’obatizo kunlogiwamo, vina kuli ezinddiyelo enlagiha wi Akristu ankosa obatizo ninga obuwene nne makapela eteyile vasogorhova.”

Bibilia onloga wi anamafwara a Yezu attomeliwe mabasa a ‘wakosa anamafwara a attu a malogo otene na wabatiza vina . . . , wasunziha ovirihamo dhotene’ dhalamuleli Yezu. (Mt. 28:19, 20) Muttu agafuna obatiziwa wi akale namafwara wa Yezu, voroma onofwanyela osunza sabwa ya Yehova na mwanaye. Na olagiha nroromelo vina wiwelela esile dhinrumani, muttu omalile okwa kanwodha ovirihamo tharho esi vina Mukristu oliwo, kanawodhe omukosela.—Koh. 9:5, 10; Jo 4:1; 1 Kor. 1:14-16.

Ovano mazu alogile Paulo afuna atapulele eni?

Attu ena akala elabo ya Korinto karumela wi abale akwile anele ovenya mukwani. (1 Kor. 15:12) Paulo watamela mukalelo w’owanonihedhamo wi mukalelo obu wobuwelani wali “wopela malago.” Iyene wahiloga wi siku-siku ddinovilela okwa. Paulo ologile mazu aba baliwovi, emuttukuleli ologa mazu aba jawi sabwa yofanya makattamiho ottiyana-ttiyana iyene wanziwa wi nalabona agahikwa. Mbwenye agahivenyihiwa mukwani nekalelo yomuyani dhahene ninga muvenyihiwe Yezu mukwani.—1 Kor. 15:30-32, 42-44.

Akristu o’Korinto anfwanyeela ononelamo wi okala muttikitteliwi ogahadhelana makattamiho siku na siku vina kookwa kugali mudhidhene obule ogadhowilani wirimu. “Obatiziwa mumodhani na Yezu” Kristu onedda mumodhani na “obatiziwa mukwani mwaye.” (Rom. 6:3) Paulo afuna aloge wi dhahene ninga Yezu, Akristu ottikitteliwa agabatiziwe obe agahibwinihiwa, mmatabuwoni agattukuleli okwa, vasogorhova agahivenya mukwani n’ekalelo yomuyani.

Dhigavirile vyaka bili mundduni Yezu bamalile obatiziwa na manje wahawaddela dhahi arumiwi eli: “Obatizo onabatiziwena miyo, nyuwo vina munere obatiziwana.” (Mk. 10:38, 39) Yezu kaloga obatiziwa mmanjeni. Iyene wafuna aloge wi sabwa yokala muttu waweddeyana na Mulugu agahirumeela okwa. Paulo wahalebela attikitteliwi wi ‘awene agahitabuwa na Kristu vina agahittittimihiwa vamodha na [iyene].’ (Rom. 8:16, 17; 2 Kor. 4:17) Eji entapulela wi awene vina agahikwa agahivenyihiwa mukwani wi adhowe akale wirimu.

Mowiwanana na dhotedhene esi mazu alogile murumiwi Paulo antapuleliwa deretu na mukalelo obu: “Anakose dhavi abale anbatizeliwa na ovilevela wa okwa? Akala txibarene aliba okwa kanvenya mukwani, ki ena anbatizeliwa nni na ovilevela oku?”