1, 2. (a) Ninziwa dhavi yawi enowodheya wabala omuttu oswa? (b) Va Kolosi 3:10-14 ninsunzavo mikalelo gani dha omuttu oswa?

MBIBILIANI mwa Tradução do Novo Mundo da Bíblia Sagrada, ninofwanyamo nzu ntti “muthu muswa” dila bili. (Éfeso 4:24; Kolosi 3:10) Omuttu oswa onaddiwana mukalelo wa muttu onimetxiwa na “efunelo ya Mulugu.” Koddi enowodheya wabala ekalelo ya muttu muswa? Ndde. Yehova omuttandda muttu na nladdaniho naye, noona enowodheya otagiha mikalelo dhaye dhapama.—Wita 1:26, 27; Éfeso 5:1.

² Joziweya wi sabwa ya okala attegi, ninokaanaga dhubuwelo dhotakala. Dila dhina sabwa ya mburo onkalihu. Mbwenye na nikamihedho na Yehova, enowodheya osadduwa banikala attu anakweliye. Wila niwodhe osadduwa nikale muttu onimukweliye, ndoweni niloge mikalelo  dhinkosa epaddi ya omuttu oswa. (Kengesa Kolosi 3:10-14.) Nigamala ninele woona mukalelo onfanyeelihu olagiha mikalelo eso mmabasani mwehu a olaleya.

3. Ekalelo modha yamakamaka ya omuttu oswa jivi?

³ Paulo otapulela yawi ohikaana nsakulano, onokosa epaddi ya omuttu oswa. Iyene ologa: “Ddabuno kulí vina othiyana wa muyuda na mugrego, mudhari na furu,” mmalabo na muttu wotxetteliwa. * (Koona yowenjedha.) Mmulogoni mwa Okristu kamo oli wa makamakaya opitta akwaye txino sabwa ya ottiyana wa ttebe, elabo y’obaliwa obe ettomo ya mabasa. Sabwaya jani? Sabwani anamafwara etene a Kristu alí “muthu mmodha bahi”.—Kolosi 3:11; Galásia 3:28.

4. (a) Emeleli a Yehova anaweddiha dhavi akwawa? (b) Makattamiho gani ansaddula wiwanana wa Akristu?

⁴ Nigattukula ekalelo ya omuttu oswa, ninele wariha attu etene, nihang’anaga ekalelo ya muttuya. (Roma 2:11) Mbwenye okosa ejene enorutxa mwari mwa dhilabo dhina. Motagiha, masaka a mundduni, o África do Sul, alamuleli ahisakula mburo wila okalegewo attu a ttebe dhottiyana-ttiyana. Attu eena mmimburoni eso, ali Anamoona a Yehova. Abali a Nikuru Nolamulela ahikosa marhe a walibiha abaliya wila “abudduwe” mmiruddani esile. Outuburu wa 2013, ahikosiwa masasanyedho amakamaka wila akamihedhiwe abali a ttebe yottiyana, azugu na akafiri ononelamo txini entapulela okala mumodhani.—2 Korinto 6:13.

5, 6. (a) Masasanyedho gani akosiwe wila akamihedhiwe abali okala owiwanana? (Koona foto eli omaromo.) (b) Yopurelamo gani edhilevo?

⁵ Abali abo ahikosa masasanyedho wi omamalelo wa sumana abali a milogo dhottiyana, akale vamodha aredhaga vina alibihagana omuyani. Abali na arogora a mmilogoni eso, andowa vamodha mmabasani a olaleya, otugumana vina ofiyedhana mmawani mwawa. Abali a milogo zana, avirihamo malago abo, abali asogorhela katti ahakela miselu dhaloga dhopurelamo dhapama. Ejo yahidha watikiniha attu enjene a mmuruddani. Musogorheli wa kapela dhahi ologa: “Miyo kaddili Munamoona wa Yehova, mbwenye enloga miyo jawi nyuwo munokosa mabasa aderetu a olaleya masiki mukalevi ottiyana ttebe.” Kito abali na arogora onilemo dhavi masasanyedho abo?

⁶ Omaromo, murogora dhahi onloga elogelo y’a xhoza oniliwa Noma, wansilidhiwa vaddiddi agobuwela omuwoba murogora wa mulogo w’engelezi wi adhowe vani vaye. Mbwenye mmaleliye olaleya na murogora wa muzugu nanda badhowana vani vaye iyene wahoona wila yali elobo yaderetu. Noona iyene ologa:  “Awene attu oligana na iyo!” Oromana venevo abali a mulogo wa elogelo ya engelezi agadhowa olaleya na abali a elogelo y’a xhoza, Noma wanawoba enaya wila afiye vani vaye aje elobo eng’onovi. Iyene wahiziveliwa vaddiddi mmooneliye mbali wa muzugu bagilatile va mpaddoni. Modhela masasanyedho aba, abali enjene na arogoraya, ahipura gari ya wimetxa omarho na abali a mimburo dhottiyana.

7. Enfuneyela nni okala attu a ttagaraga?

⁷ Mpaka nsaka ninagome elabo ejino ya Satana, attu a nlogo na Mulugu anelege ogumanana makattamiho. Oyelela ganyo, oredda wogonelana, ofwarafwariwa, ngovi ya elabo, opanga na dhilobo dhina dhinowapatta attu etene. Mbwenye wila nikamihedhane muttu na mukwaye mwari mwa nsaka norutxa, jofuneya okurumuwa vina okaana ttagaraga. Okurumuwa onele onikamihedha omukaanela ttagaraga muttu mukwehu. (Éfeso 4:32) Okurumuwa na ttagaraga dhinokosa epaddi ya omuttu oswa. Esi dhinele onikamihedha omutagiha Mulugu vina olibihana muttu na mukwaye.—2 Korinto 1:3, 4.

8. Nigakala attu a ttagaraga vina okurumuwa na otene andha mmulogoni, txini enapadduwe? Kaloga yotagiha.

⁸ Ninaweeddihe dhavi na okurumuwa vina ttagaraga abali a mmulogoni mwehu ali a dhilabo dhina obe ali ayelegi? Japama wattambirha n’oderetu, wandana na awene vina wakamihedha woona wi anokweliwa mmulogoni. (1 Korinto 12:22, 25) Motagiha, Dannykarl w’o Filipina omwaleli o Japão. Sabwa y’okala muttu wa elabo yina, keddihiwa n’oderetu omabasani waye. Labo dhahi, wahidhowa woona matugumano a Anamoona a Yehova. Dannykarl ologa: “Attu etene ali omatugumanoni ba wenewo o Japão, masiki dhawene ahiziveliwa oddoona, okalaga ninga addiziwile na wale.” Oderetu wa abali, omukamihedha onfiyedha Yehova. Musogorhomwa Dannykarl obatiziwa, ddabuno munddimuwa wa mulogo. Anddimuwa a mulogo akwaye anohagalala vaddiddi okala na iyene vamodha na mwadhiye, noona aloga dhahi: “Awene avevutxa egumi yawa, anlaba ninga apionero vina tagiha ya attu antamela “voroma Omwene wa Mulugu.”—Luka 12:31.

9, 10. Kaloga yopurelamo y’okala muttu wokurumuwa vina wa ttagaraga mmalaleyoni.

⁹ Nikana gari enddimuwa ya wawirela “dhapama athu etene” makamaka nigalaleyaga miselu dha Omwene. (Galásia 6:10) Anamoona a Yehova anowatanaala anaweedda, nanda anokosa guru wila asunze elogelo yawa. (1 Korinto 9:23) Guru dhinkosani dhinodhana dhopurelamo dhaderetu. Motagiha murogora Tiffany onkala o Australia, osunza elogelo y’a Swahili, na efunelo ya okamihedha mulogo wa elogelo ya Swahili, oli murudda w’o Brisbane. Masiki voniye wila osunza elogelo ejile yali yorutxa, ddabuno ohona wila ekosile iyene japamayá. Tiffany ologa: “Akala onofuna okaana mabasa a olaleya ohagalaliha, katamela okamihedha mulogo wa elogelo yina.  Enkala ninga okosa oleddo buli vatakulu vawo. Onele woona wila wiwanana wa abali oli orugunuwa elabo yotene, vina onele osanzaya.”

¹⁰ Anamudhi dhahi o Japão, aloga elobo yoligana. Sakiko na mwanaye wa muyana aloga dhahi: “Mmabasani mwehu olaleya dila dhinjene ninowafwanya anaweedda adhile o Brazil. Nigamala wawooniha malebo mBibiliani wa ezugu, ninga Ovuhulela 21:3, 4 obe Masalmo 37:10, 11, 29, ankala maru ddeyá, mudhidhi mwina anomottihaga muntori.” Anamudhi aba awakaanela ttagaraga anaweedda abale, ahiroma osunza ezugu wila akamihedhe osunza ebaribari ya Bibilia. Musogorhomwa awene afiyedha okamihedha wimetxiwa mulogo wa ezugu. Movira wa vyaka awene ahakamihedha anaweedda enjene okala emeleli a Yehova. Sakiko ologa: “Ovira mudhidhi mwinjene wila ddisunze ezugu, mbwenye marelihoya ahinjiva opitta guru ekosile miyo. Ninomutamaalela vaddiddi-vene Yehova.”—Kengesa Merelo 10:34, 35.

11, 12. (a) Ninkaanela eni sabwa yaderetu wi nabale omuttu oswa? (b) Txini enanikamihedhe okala attu oviyeviha?

¹¹ Ennittukulela okala oviyeviha mmalaleyoni ku omuttittimiha Mulugu ottiya ojeedha wila nitamaaliwe. Japama wubuwela wila masiki mungelo wali woligana wahiroma ovittukulela, omamalelowa bamuttegela Mulugu. (Koona Ezekiyel 28:17.) Sabwa yokala attu ohiligana, enorutxa orabela kakamwe merelo ovittukulela. Masiki dhawene enowodheya okala attu oviyeviha. Koddi txini enanikamihedhe okosa ejuwene?

¹² Wengesa Mazu a Mulugu na otanaalela, onele onikamihedha okala attu oviyeviha. (Olibiha 17:18-20) Japama otanaalela dhilobo dhinisunzihile Yezu vina yotagiha yaye ya okala woviyeviha. (Mateu 20:28) Yezu wali muttu woviyeviha vaddiddi ofiyedha osuwa manyalo a arumiwi aye. (Joau 13:12-17) Elobo yina enanikamihedhe ku omuloba Yehova muya waye wokoddela. Muya wokoddela onele onikamihedha owana vina opemberha efunelo yovittukulela.—Galásia 6:3, 4; Filipi 2:3.

13. Nigakala attu oviyeviha nimpurelamo eni?

 ¹³ Kengesa Gano 22:4. Yehova onfuna wila nikale attu oviyeviha. Oviyeviha onodhana mareliho menjene. Nigakala attu oviyeviha, mmulogoni munele okala murenddele na wiwanana. Ottiya ejuwene, Yehova onele onivaha mahala aye. Murumiwi Pedro ologa: “Kalaganí ovyeviha, muhovege wimelelana, vowi Bíbilia onloga dhahi: Mulugu onowakodda athu opanela, onowavaha mahala anvyeviha.”—1 Pedro 5:5.

14. Bani oli yotagiha ya okurumuwa vina ovilela?

¹⁴ Mwilaboni ya masaka abano, muttu wapama vina wovilela onooniwa ninga wowobana. Ejo kahiyo ebaribari. Mikalelo eso dhaderetu dhindha wa Yehova munddimuwa wa elabo yotene. Iyene yotagiha ya muttu wapama vina wovilela. (2 Pedro 3:9) Kobuwela ovilela wana Yehova venevo vamwakuliye Abramu na Lot modhela Mungelo waye. (Wita 18:22-33; 19:18-21) Kobuwela ovilela wana Yehova mudhidhi wasogorhela iyene nlogo na Izrayel, mwari mwa vyaka 1.500 masiki vakoddani omwiwelela.—Ezekiyel 33:11.

15. Yotagiha gani ettiyile Yezu ya okala muttu wofewa murima vina wovilela?

¹⁵ Yezu wali muttu wa “murima wofwasa.” (Mateu 11:29) Wanwodha ovilela dhawobana dha arumiwi aye. Bali velaboni ya vati, Yezu dila dhinjene oruwaniwa vina ozivaleliwa ahina muladdu. Masiki dhawene iyene okalavi muttu wofewa murima mpaka okwa waye. Ohalaga mudhidhi mung’onovi wila akwe va pingirhizini vakomeliwiye, Yezu wahimukumbirha Babe wila alevelele etene amutabutxa. Iyene ologa: “Babani mwalevelele vowi kanziwa dhinirani.” (Luka 23:34) Masiki voniye opa vaddiddi wahikalavi wapama vina wovilela.—Kengesa 1 Pedro 2:21-23.

16. Ninalagihe dhavi okurumuwa na oviyeviha?

¹⁶ Paulo olagiha mukalelo mmodha onfwanyelihu ottiddihedha mabasa wila nilagihe ofewa murima vina olevelela valebiye: “Muvilelagane, mulevelelanege dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya.” (Kolosi 3:13) Wila niwodhe omulevelela mukwehu, japama vamaromo okala anamalevelela. Okosa dhawene onele odhana mareliho na murenddele mmulogoni.

17. Okurumuwa na oviyeviha dhikalelini dhamakamaka?

¹⁷ Yehova onfuna wila nalevelele vina nafewele murima akwehu. Ekalelo ejo, enele onikamihedha ovolowa mwilaboni eswa. (Mateu 5:5; Tiago 1:21) Nigakala attu ovilela ninele onvaha nriho Yehova vina ninele wakamihedha attu eena okosa yakakene.—Galásia 6:1; 2 Timóteo 2:24, 25.

18. Okwela oniwanana dhavi na ohikaana nsakulano?

¹⁸ Mikaleleo esi dhisunzile iyo ovanene, dhiniwanana na okwela. Motagiha, murumiwi Tiago wahalaga abali aye sabwa awene anariha areeli opitta ayelegi. Wahiloga wila merelo awa kewanana na malamulo a Mulugu anloga “omukwele mukwawo n’ekalelo envikwelewe wamwinya.” Nomala wahenjedhedha: “Vano mugàthiyanihaga athu, munothega.” (Tiago 2:8, 9) Nigalagiha wakwela attu etene kaninattukuleleye wapwaza eena sabwa yottiyana wa ttebe, obe ettomo yaye mmuruddani. Kaninfwanyeela okala attu a nsakulano. Ohikaana nsakulano elobo yamakamaka vaddiddi wila nikale attu okwela.

19. Ekalelini yaderetu okala attu okwela?

¹⁹ Onkwela “onovilela, onowakoddelela murima attu”, vina “kanna nrima kampanela.” (1 Korinto 13:4) Ninofuniwana okala attu ovilela vina owakoddelela murima attu etene wila niwodhe walaleya miselu dhapama anamwanddamani ehu. (Mateu 28:19) Okala attu okwela vina ovilela, ononikamihedha ologa vina weedda na abali vamodha na arogora etene mmulogoni mwehu. Attu etene agalagiha okwela, mulogo onokala wowiwanana vina Yehova onorihiwa. Attu eena agoona wiwanana oko, anele ofuna osunza ebaribari. Ejo ebaribari sabwa Bibilia onologa: “Enpitha dhetene eso, okwelana; vowi okwelana onowakwaniha wiwanana wa athu.”—Kolosi 3:14.

20. (a) Mavuzo gani anfanyelihu ovikosa noka-noka? Sabwa yani? (b) Njedhelo gani nina iyo na musogorho?

²⁰ Enokala yaderetu ovivuza noka-noka, ‘Masadduwo gani anfwanyeela miyo okosa wila ddirule ekalelo ya omuttu wawale?’ Japama olobela wa Yehova vina omukumbirha wi anikamihedhe. Ninofanyeela okosa guru enddimuwa wila nirule dhubuwelo na merelo abure wi nifwanye “mburo mumweneni mwa Mulugu.” (Galásia 5:19-21) Ekalawo elobo yina enfwanyelihu ovivuza, ‘Ddinokosaga guru wila merelo aga na dhubuwelodha dhimuhagalalihe Yehova?’ (Éfeso 4:23, 24) Sabwa y’okala attu ohiligana, ninofuna veli-veli okosa kukuttu wila nilibihe omuttu wehu oswa. Noona abo mabasa andhowavi. Enele okala yohagalaliha wawoona attu etene battukulile ekalelo ya muttu muswa, wi amutagihe kakamwe Yehova!