Muttaka wa Mateu sabwa ya egumi ya Yezu, ohittiyana vaddiddi na muttaka wa Luka, sabwa anamaleba aba eeli kamulogile muttu mmodha bahi.

Muttaka wa Mateu, onologa vaddiddi dhilobo dhipadduwile na José. Onologa moonelo wa José mmaleliye oziwa yawi Maria wahikaana yari, dhoroha dhaye venevo vadhile mungelo bagamwaddela yapadduwile vina mukalelo ovirihilemo iyene malago alogile mungeloya. (Mateu 1:19-25) Onologa vina mukalelo wadhile mungelo murohani bamwaddela José wila attawele w’Ejipitu na amudhaye, vamodha na mukalelo ovirihilemo José malago aba. Mateu ologa yoroha yina ya José, venevo vaddeliwiye na mungelo wi eyelele na amudhaye w’Izrayel, nomala awene badhowa okala muttette w’o Nazareti. (Mateu 2:13, 14, 19-23) Kapitulu bili dhoroma dha muttaka wa Mateu, dhinologa nzina na José dila tanu na ttaru, mbwenye na Maria dila nayi bahi.

Muttaka wa Luka, onimulogetxa makamaka Maria. Onologa oromana labo nadhile mungelo Gabriyel, ologa na Maria, mudhidhi wadhowiliye omoona mmudhaye Elizabeti, vamodha na mazu alogiliye omutamaalana Yehova. (Luka 1:26-56) Onologa viina mukalelo waddeliwe Maria na Simeau sabwa ya goi na matabuwo a Yezu. Luka vina ologa mudhidhi wadhowile Yezu omparhani na amambali aye bana vyaka 12. Mudhidhene obu, Luka onlogetxa mazu a Maria, ottiya a José, nanda anowenjedhedha eraga, mapadduwo aba ahifiya vamurimani va Maria. (Luka 2:19, 34, 35, 48, 51) Mu kapitulu bili dhoroma dha Muttaka waye, Luka onologa dila 12 nzina na Maria, mbwenye dila 3 bahi na José. Noona Mateu, ologile esile dhipadduwile mwigumini vina dhikosile José. Oku Luka ologile esile dhipadduwile vina dhikosile Maria.

Anamaleba aba eeli, ahaloga mottiyana-mwene, makolo a Yezu. Mateu, onroma ologa oromana José, alagihaga yawi Yezu ninga mwana wa José wahikaana gari y’ohaba mpaddo wa omwene wa David. Dhavi dhawene? Sabwa yawi José wadhile mu nihimoni na Mwene David, oromana Salomau mwana wa David. (Mateu 1:6, 16) Mbwenye Luka onloga dha anamudhi a Maria, alagihaga wi ‘epaddi ya omaningoni’ Yezu wanfanyeela ohaba mpaddo wa omwene wa David. (Roma 1:3) Na mukalelo gani? Sabwani Maria odhile mu nihimoni na Mwene David, modhela mwana waye Natam. (Luka 3:31) Koddi, Luka okooddeli nni omuloga Maria ninga mwana wa Heli, ninga mwalani? Sabwani olebeliwa wa mahimo wakosiwa, alogiwetxa makamaka abale aali oroma obaliwa. Masiki dhawene, Luka onomuloga José ninga mwana wa Heli, noona attu eena anubuwela wila José wali mwana wa Heli mowiwanana na nlamulo.—Luka 3:23.

Ologiwa oko wa makolo a Yezu, mmuttakani wa Mateu na Luka, onolagiha wi Yezu ddi Mesiya walogiwe na Mulugu. Ologa wila Yezu wali mudhuli wa Mwene David, yali elobo yoziweya na attu etene, masiki Afarizi vamodha na Asaduseyi kawodha opambiha. Mateu na Luka, oheeli ahaloga makolo a Yezu na mukalelo wolibiha nroromelo nehu, vina wimetxa ekuluvelo yawi malibelo etene akosile Yehova anele wireya.