YEHOVA onvudhelela murumiwi Paulo oleba mikalelo mitanu na minai dhili misapo dha muya wokoddela. (Galásia 5:22, 23) Mikalelo esi dhaderetu dhetene dhinkuweliwa “dhinbala muya.” * (Koona yowenjedha.) Misapo esi dha muya dhinokosa epaddi ya “muthu muswa” esuwene dhinfwanyeela okaana Akristu otene. (Kolosi 3:10) Dhahene ninga muri ombala misapo dhapama sabwa y’onyettihiwa, muttu onrumeela weddihiwa na muya wokoddela mwigumini mwaye, onele okaana mikalelo esi.—Masalmo 1:1-3.

Mukalelo woroma ologile Paulo ku okwela. Yimelelo y’okwela ekaleli nni yamakamaka? Paulo wahiloga wi kohikaana okwela ‘kagali elo-wene.’ (1 Korinto 13:2) Koddi okwela txini, nanda ninawodhe dhavi wunuwiha vina olagiha okwela malabo etene?

Masiki egali yorutxa otapulela mowakwana okwela, Bibilia onologa merelo na mobuwelo a muttu wokwela. Motagiha, muttu onkwela “onovilela, onowakoddelela murima athu” vina “onothaba na dhebaribari.” Txibarene muttu onkwela “onoziwa wavunela etene, onoaroromela etene, onovilela dhetene.” Onowariha attu etene, onowatanaala vina marho webaribari. Mbwenye muttu ohina okwela, onkala w’opanela, wa nrima, wovittukulela, onomaguvela onyanyuwa vina onoziveliwa dhopuja. Ottiya okala attu ahina okwela, ninfuna nikose guru wi nilagihe okwela webaribari; kuloga okwela ‘ohintamela dhofuna dhaye-dhene.’—1 Korinto 13:4-8.

“Mulugu ddi okwela.” (1 Joau 4:8) Mabasa na merelo aye, anolagiha wila iyene ddi okwela. Iyene olagiha okwela onddimuwa modhela omuruma mwanaye Yezu odha otabuwa vina okwa velaboni ya vati sabwa ya ottega wehu. Murumiwi Joau ologa: “Mulugu ohoniha okwela waye n’eji: Mulugu omúruma Nammodha waye mwilaboni, wi n’ovilevela waye nakele egumi. Okwela ononeya apa: kaiye iyo omukwelile Mulugu, onikwenle ddi iyene onirumele Mwanaye wi akale mukutho wonobolelana muthegani mwehu.” (1 Joau 4:9, 10) Sabwa ya okwela wa Mulugu, dhottega dhehu dhileveleliwa nanda nikana njedhelo na ojavo egumi n’osanzaya.

Yezu otonyihedha wi wankwela nlogo na attu noona ofiyedha ovaha egumi yaye wi akose ofuna wa Mulugu. Murumiwi Paulo ologa dhahi: “Dhahene Kristu omariha mikutho dhawale, ohita muswa.” (Ahebreu 10:9, 10) Kawo muttu onwodha olagiha okwela onddimuwa. Yezu ologa: “Kawo onna okwela ompitha ole onalevela akwaye egumi yaye.” (Joau 15:13) Enowodheya attu ali attegi otagiha okwela olagihile Yehova na Yezu? Ndde! Ndowe noone mukalelo onwodheyani olagiha okwela oko.

Paulo ononilibiha dhahi: “Tamelani othukula mweddelo wa Mulugu, vowi mulí anaye anakweliye. Eddagani mukwelani, mumfwaraga Kristu onikwele, ovilevele iyo mwinyene, aviperhekelaga okala mukutho wonúkela, onimuzivela Mulugu.” (Éfeso 5:1, 2) Kito ologa wila “eddagani mukwelani” ontapulela nni? Eji entapulela olagiha okwela mudhidhi oli wotene. Kahiyo ologa bahi wila ninowakwela attu ena. Ninolagiha wakwela modhela merelo ehu. Joau oleba: “Anaga, kanikwelege na mazu, na makani oziva; nikwelege na merelo, na ebaribari.” (1 Joau 3:18) Motagiha, ninolaleya “muthaka wapama” wa Omwene sabwa ninomukwela Yehova vina anamwanddamani ehu. (Mateu 24:14; Luka 10:27) Ninele wedda “mukwelani” nigalagiha ovilela, okurumuwa na olevelela. Ninofuniwana ovirihamo malago a Bibilia: “Muthu-muthu amulevelele mukwaye n’ekalelo euleveleleni Nabuya.”—Kolosi 3:13.

Akala ninowalaga obe wasisigula attu eena, ejo kintapulela yawi kaninakwela. Motagiha, amambali enjene afunaga ommaliha mwanawa onunla, anokosa dhetene dhinunlela mwana. Mbwenye mambali onimukwela mwanaye, onele omusisigula egafuneya. Mwakakene, masiki niziwaga wi Mulugu ddi okwela, iyene “onomulaga onimukweliye.” (Ahebreu 12:6) Noona ovaha malago jofuneya vowi epaddi ya okwela. (Gano 3:11, 12) Japama wubuwela yawi nattu ottega, nanda dila dhina enorutxa olagiha okwela mowakwana. Noona nikose kukuttu wila nivilibihedhe okaana okwela. Ninawodhe dhavi okosa ejiya? Ndowe nitanaalele tharho ttaru.

Yoroma, omukumbirhe Mulugu wi ovahe muya wokoddela ondana okwela. Yezu ologa wila Yehova “onowavaha muya wokoddela abale animuloba.” (Luka 11:13) N’eji nikaane ebaribari yawi akala ninolobela nikumbirhaga muya wokoddela nanda nirumela wi oneeddihe mwigumini mwehu, ninele okala attu okwela vaddiddi. (Galásia 5:16) Motagiha, akala oli munddimuwa wa mulogo, japama okumbirha muya wa Mulugu wi oukamihedhe okala wokwela ogavahaga malago andela mBibiliani. Akala oli mambali, kakumbirha muya wa Mulugu wi oukamihedhe walela anawo, n’oderetu ottiya wasilidhiha.

Yanawili, kobuwela mukalelo walagiha Yezu okwela masiki vatabutxiwiye. (1 Pedro 2:21, 23) Akala muttu onowukosela elobo yabure obe enusilidha, kavivuze, ‘Txini egakosile Yezu na makani ninga aba?’ Murogora dhahi oniliwa Leigh ologa wila ovivuza mwinya wanimukamihedha wubuwela deretu ahinatti okosa elobo. Iyene belaga: “Labo dhahi muttu walaba na iyo, wahivahedha miselu dhonyakuwa addilogaga bure sabwa ya mabasa akosimi. Ddahisilidhiwa vaddiddi. Venevo ddahivivuza, ‘Ddinawodhe dhavi omutagiha Yezu na merelo opuja addikosile muttu oddu?’ Mmalelimi otanaalela egakosile Yezu, ddahubuwela ottiya makaniya abale ovira, nne kadditamelile ovuzela. Musogorho-mwa ddidha ononelamo yawi muttuya walogile wahikaana eredda yamutabutxa nanda weedda wosilidhiwene. Venevo miyo woona wila dhilogiliye mmuseluni, kakosile n’ofuna waye. Otanaalela yotagiha ya Yezu ya olagiha okwela masiki aligiwaga, eddikamihedha omulagiha mukwaga womabasani wila ddinomukwela.” Txibarene, nigamutagiha Yezu, ninele olagiha wakwela attu etene.

Yanoraru, kasunza olagiha okwela webaribari. Okwela oko, kukuwene onazinddiyeliha anamafwara ebaribari a Yezu. (Joau 13:34, 35) Yezu wahikaana okwela ninga okuwene noona iyene onittiyedha yotagiha yapamaya. Na mukalelo gani? Muttiyeliye erimu, “oviyeviha vothabwa” sabwa yehu “ovikaliha muthu worumeya mpaka okwa.” (Filipi 2:5-8) Nigatagiha mukalelo onikwelile Yezu, merelo na dhubuwelo dhehu dhinele wiwanana na dhubuwelo dhaye, vina ninele wika dhofuna dha attu eena vasogorho va dhofuna dhehu.

Nigalagiha okwela, ninele woona dhopurelamo dhinjene. Ndowe noone dhotagiha bili:

• WIWANANA WEHU NA ABALI: Ninoziwa yawi sabwa ya okwelana onddimuwa oliwo muttu na mukwaye, nigadhowa wawaredhela abali a milogo dhina, anele onakela nosanzaya. Ninowakela mareliho menjene modhela oziwa wila ‘abali ali orugunuwa elabo yotene’ anonikwela! (1 Pedro 5:9) Okwela ninga oko, ninfanya munlogoni na Mulugu.

• MURENDDELE: “Mukale ovyeviha, ofwaseya, ovilela; mpiselagane murima mukwelani” mugakosa dhawene munele weeddaga na “murenddele onukalihani mumodhani.” (Éfeso 4:2, 3) Murenddele obo ninowoonaga mmatugumanoni mwehu a mmulogoni, asembeleya na kongeresu. Onorumeela yawi murenddele obo, bwebaribari masiki elaboya egali yogaweya? (Masalmo 119:165; Izaiya 54:13) Nigatamela okala mmurenddeleni na akwehu, ninolagiha wi ninowakwela txibarene, vina ninomuhagalaliha Babi wehu wodhulu.—Masalmo 133:1-3; Mateu 5:9.

Paulo oleba dhahi: ‘Okwela onowunuwiha nroromelo’ (1 Korinto 8:1) Ejiya entapulela nni? Va 1 Korinto kapitulu ya 13, attu eena ankuwela nlebo ntti ninga “Masalmo a okwelana” vanologa mukalelo onliba nroromelo sabwa ya okwela. Onkwela onotamela wika vamburoni voroma dhofuna dha attu ena. Onkwela kantamela dhofuna dhomwinya, mbwenye dh’attu eena. (1 Korinto 10:24; 13:5) Nanda sabwa ya okwela, okurumuwa vina olevelela, murala onkala wolibene vina mmulogoni munokala wiwanana.—Kolosi 3:14.

Ahikalawo marhe menjene a olagihana wakwela attu eena, mbwenye omukwela wehu Mulugu ku onddimuwa, wattima vina wamakamaka oliwo. Sabwa yani? Sabwani okwela wehu ononiwananiha mumodhani! Attu a malogo-malogo, mahimo, na dhilogelo dhottiyana-ttiyana anomwebedha ‘mumodhani’ Yehova. (Sofoniya 3:9) Ndoweni nilagihe okwela oli ekalelo yamakamaka ya misapo dhinbala muya wokoddela wa Mulugu, malabo etene.