1, 2. Txini empadduwele Paulo na Sila o Filipi? (Koona foto eli omaromo.)

KOBUWELA nipadduwo dhahi. Yali vari va mattiyu. Amisionario eeli, Paulo na Sila, ali epaddi yoridha vina veddimani mu kambura y’o Filipi. Awene kawodha wedda sabwa myeddo dhawa dhahimagiwa, vina maningo ela wapa vowi ahivadiwa vaddiddi. (Merelo 16:23, 24) Labonene nttile, muttitti wahidha omuttidda Paulo na Sila badhowana omuttegoni. Momaguva-mwene aroma wattonga. Mohigonela, attuya ataya guwo dha Paulo na Sila, aroma wavada na muwasulo. (Merelo 16:16-22) Oku wali opuja. Paulo wali mukadda Roma, noona wanfanyeela ottongiwa na nriho. *—Koona yowenjedha.

² Bali mu kambura, txino Paulo wanubuwela yapadduwile labonene nttile, vina wanazuzumela akadda Filipi. Awene aali ahinatti okaana masinagoga wila atugumanegemo,  ninga mwali kwatti dhina dheddelela Paulo. Sabwa ya ejuwene, ayuda ambudduwa wi ebeedhe otakulu wa sidadi waddamela mwinje waliwo. (Merelo 16:13, 14) Ejo yapadduwile sabwa yawi kuwali attu owakwana kumi wila emagiwe sinagoga? Makaniya ali awi attu akala o Filipi annivittukulela vaddiddi sabwa y’okala akadda Roma. (Merelo 16:21) Txino awene kawodhile otanaalela wila Paulo na Sila masiki valani ayuda, aali akadda Roma. Kaninziwa deretu akala pumwenemo, enziwa iyo jawi Paulo na Sila, ahivadiwa vina ahifugeliwa mukambura ahina muladdu.

3. Paulo odhile waganyedhiwa dhavi mwekiwiye mukamburha, nanda iyene wana yimelelo gani?

³ Txino Paulo wannubuwela mukalelo ogagomihiliye mabasaye o Filipi. Myeri dha mundduni iyene wali epaddi yina ya Mar Egeu o Ásia Menor. Bali wenewo, muya wa Mulugu kàfunile wi awene olaleya muttaka mwilaboni y’o Ásia. Ejo yakala ninga muyayá wa Mulugu wela wakukusa wila adhowe alaleye mmimburoni dhina. (Merelo 16:6, 7) Agadhowile wuvi? Mufiyelani o Tróade, Paulo opadduweliwa yotikiniha, omoona mulobwana amulobaga: “Kabuwele owanihu o Masedónia.” Ejo yali efunelo ya Mulugu! Novenya Paulo omaga oleddo odhowa o Masedónia. (Kengesa Merelo 16:8-10.) Kito txini epadduwile musogorhomwa? Mwabuwelani o Masedónia, awene afugeliwa mu kambura! Koddi, Yehova ottiyeleni elobo ninga ejuwene ompadduwela Paulo? Iyene agafugeliwe mudhidhi mungasi? Masiki akala Paulo wannivivuza dhawene, nroromelo naye nali noliba, vina wanagalala. Nona vari va mattiyu Paulo na Sila “anlobela, amwibelaga jibo Mulugu.” (Merelo 16:25) Murenddele wa Mulugu wahimala okoya mirima na mobuwelo awa.

4, 5. (a) Makattamiho ehu anligana dhavi na a Paulo? (b) Makattamiho a Paulo adhile osadduwa dhavi momaguva?

⁴ Waromaga ovyona ninga Paulo? Onokalagawo mudhidhi onimukumbirhaga weyo Mulugu nikamihedho, wila okose yosakula yapama, nanda buwoona wila dhinkosa weyo dhinowiwanana na efunelo ya muya wokoddela. Mbwenye movira mudhidhi buroma ogumanana makattamiho. (Kohelét 9:11) Ovano vangumaniwena makattamiho, txino onovivuza wi Yehova ottiyeleni opadduwa dhahene. Txini enokamihedhe ovilela, vina omuroromela Yehova? Wila noone yowakulaya, ndowe nitanaalele empadduwele Paulo na Sila.

⁵ Oku Paulo na Sila ebaga jibo, dhahiroma opadduwa dhilobo dhotikiniha. Voroma, elabo yahittekenyeya na guru enddimuwa. Momaguva misuwo dha kambura dhahifuguwa. Kabala dhamagiwena afugeliwi etene, dhahipatuwa. Kazembe wa va musuwo moneliye esuwene, wahittukula supadda naye wi avipe, Paulo bamukooddiha, n’eji kazembeya vamodha na amudhaye etene abatiziwa. Omembesiwa asogorheli a sidadi aharuma anddimuwa anyakoddo wila amburutxe mukambura Paulo na Sila, vina ahapanga wila attiye sidadiya ejile na murenddele. Asogorheli aba muziwelani wi Paulo na Sila aali akadda Roma, awene ahoona wila ahikosa  elobo yabure vaddiddi, venevo adha awenene wi anvelele Paulo na Sila mpaka obudduwa mu sidadimwa. Mbwenye ahinatti obudduwa, awene ahididela okumbirha wila ampaganye Lidia murogora wawa wamalile obatiziwa. N’eji, ahipura gari yakakene wila alibihe abali awa akala o Filipi. (Merelo 16:26-40) Dhilobodha dhahisadduwa momaguva!

6. Txini enasunze iyo ovanene?

⁶ Txini ensunza iyo na nipadduwo ntti? Yehova onowodha wira dhahajedha iyo, noona kaninfwanyeela ozuzuma nigagumanana makattamiho. Ninoziwa wi Paulo wahitikina vaddiddi na nipadduwo ntti, sabwa ya ejile yalebeliye abali akala o Filipi, alogaga sabwa ya okala wozuzuma vina otamela murenddele wa Mulugu. Mutoma obu ninele osunza mazu alogile Paulo alebelaga abali o Filipi 4:6, 7. (Kengesa.) Ninele osunza mapadduwo meena a Bibilia anlagiha wila Yehova onowodha okosa dhilobo dhahajedhihu. Nigamala ninele woona mukalelo onwodha “murenddele wa Mulugu” onikamihedha wila nivilele makattamiho na manyengetto oku nimukuluvelaga Yehova.

7. Txini enisunzihile Paulo valebeliye abali o Filipi?

⁷ Abali o Filipi mmalelani wengesa mazu alebile Paulo, awene onilemo dhavi? Txino awene ahubuwela ejile yampadduweli Paulo na Sila vina mukalelo okamihedhiwe awene na Yehova. Nsunziho gani nilogile Paulo va kartani ejo? Yosunzaya jawi: Kanove. Nilobelege, sabwani ninele wakela “murenddele wa Mulugu onpitha thontho ya muthu.” Kito ejiya enfuna etapulele nni? Mabibilia meena antapulela dhahi ‘opitta dhubuwelo dhehu obe onowela vadhulu va dhubuwelo na dhogana dha muttu.’ N’eji enkala ninga Paulo aloga wi, “murenddele wa Mulugu” botikiniha vaddiddi opitta munubuwelihu. Mudhidhi ohinjedhihu okana marhe ogomihana makattamiho ehu, pavenevo vangomiha Yehova makattamihoya. Iyene onowodha okosa yahajeedhela iyo.—Kengesa 2 Pedro 2:9.

8, 9. (a) Masiki Paulo mutabuweliye o Filipi, txini yaderetu epadduwile wenewo? (b) Abali o Filipi akuluvela dhavi mazu a Paulo?

⁸ Karta ya Paulo yahalibiha abali o Filipi, ttabwattabwa vobuwelani mukalelo wavuniwe Paulo na Yehova vyaka kumi mundduni. Masiki Yehova vattiyiliye wi Paulo na Sila atabutxiwe, mapadduwo adhilevo ahavaha gari “yolibiha olaleya muthaka” wapama. (Filipi 1:7) Asogorheli a sidadi y’o Filipi, kagakosile elobwene wila atolotxe mulogo wa Okristu wamalile wimetxiwa. Sabwa ya Paulo ologa wila wali mukadda Roma, murumiwi Luka wahipura gari y’okala o Filipi mumaleli Paulo na Sila odhowa elabo yina.  Luka wahikala wenewo vina wahakamihedha vaddiddi abali a mulogo obule muswa w’o Filipi.

⁹ Vamaleli abali aba o Filipi wengesa karta ya Paulo, awene anziwa yawi dhologa dha Paulo kadhali dhubuwelo dhaye. Paulo wahigumanana makattamiho orutxa-wene. Mudhidhi walebiye karta eji, wali mukambura o Roma. Masiki dhawene wahilagiha wila wahikaanavi “murenddele wa Mulugu.”—Filipi 1:12-14; 4:7, 11, 22.

10, 11. Nigagulugudheya na makattamiho, txini enfwanyelihu okosa, nanda nijedhaga nni?

¹⁰ Txini enanikamihedhe okala wohigulugudheya na “elo-wene” mbwenye banigatamela “murenddele wa Mulugu”? Mazu alebeli Paulo abali o Filipi, anloga wila kanove sabwa ya makattamiho annigwela, nilibele olobela. Nigadhugudheya, japama woona makattamihoya ninga gari ya malobelo.(Kengesa 1 Pedro 5:6, 7.) Ogamulobaga Yehova, kakaana ebaribari yawi onele wukamihedha. Kamutamaale dila dhetene dhinakeliwe mareliho aye. Kudduwale yawi Yehova okaana ewodhelo ya “wira mwetemwene esile dhinkwaranya vopitha dhinlobihu.”—Éfeso 3:20.

¹¹ Dhahene ninga Paulo na Sila, ninohagalala voziwa wi Yehova ononikwela. Masiki ahinikamihedhe na matikiniho, nikaane ebaribari yawi onela-wene onikamihedha. (1 Korinto 10:13) Eji kintapulela wila nigilati, nihikose kukuttu nimujeedhe Yehova bahi ogomiha makattamihoya. Japama okosa guru mowiwanana na malobelo ankosihu. (Roma 12:11) Guru enkosihu, enolagiha wila ninofuna wene nikamihedho na mareliho a Yehova. Kanidduwale yawi Yehova onowodha okosa dhilobo dhinjene opitta esile dhikumbirhile iyo. Dila dhina iyene ononikosela dhilobo dhotikiniha dhahajedha iyo. Ndowe noone dhotagiha dhing’onovi, dhintonyihedha wila txibarene Yehova onowodha onirela dhilobo dhotikiniha.

12. (a) Txini yakosile Mwene Ezekiya mudhidhi wadhile Mwene Senakeribe olupela elabo yaye? (b) Mukalelo ogomihile Yehova makattamiho aba onnisunziha eni?

¹² Mbibiliani mukala dhotagiha dhinjene dhintonyihedha wila Yehova wahikosa dhilobo dhotikiniha. Motagiha, nsaka nali Ezekiya mwene w’o Juda, Senakeribe mwene w’o Asíria wahiroma olupela mittette dhetene, adhowaga o Jeruzalemi. (2 Amwene 18:1-3, 13) Novenya, Senakeribe odha wila amutolotxe kakamwe Jeruzalemi. Txini ekosile Mwene Ezekiya? Voroma, iyene wahilobela wa Yehova akumbirhaga nikamihedho, nanda wahimukumbirha malago Izaiya wali namavuhulela wa Yehova. (2 Amwene 19:5, 15-20) Yanawili, Ezekiya wahilagiha wila wali muttu wowiwelela modhela opitxa musoko walogosile Senakeribe. (2 Amwene 18:14, 15) Nomala, Ezekiya wahilibiha rhinga dha sidadi yotene. (2 Mapadduwo 32:2-4) Kito makaniya aba agomile dhavi? Yehova wahimuruma mungelo waye badha watolotxa anyakoddo a Senakeribe 185.000 omattiyu omodha bahi. Ezekiya  kajeedha opadduwa elobo dhahene!—2 Amwene 19:35.

13. (a) Ejile empadduweli José ennisunziha eni? (b) Elobo gani yohijedheya empadduweli Sara?

¹³ Ovano kobuwela yampadduweli muzombwe José. Mudhidhi waliye mu kambura w’Ejipitu, txipo kobuwela wila agahidha okala muttu wanawili wa ettomo ya w’Ejipitu, obe wila agahilabihedhiwa na Yehova wi avunedhe nlogo sabwa ya dala egadhile musogorho. (Wita 40:15; 41:39-43; 50:20) Mohaganyedha, merelo a Yehova ahipitta dhubuwelo dhetene dhaana José. Kobuwela viina yampadduweli Sara bibi wa José. Niloge wila Sara wamalile wuluvala wanjeedha-wene wi Mulugu agahinvaha gari y’ombala mwana wayene, ottiya ovahiwa na mudhari waye? Txibarene obaliwa wa Izaki yali elobo yotikiniha opitta esile dhobuwela Sara.—Wita 21:1-3, 6, 7.

14. Ninamukuluvele dhavi Yehova?

¹⁴ Kaninjeedha wila Yehova agomihe makattamiho ehu na matikiniho nigaddamelaga ovolowa mwilaboni eswa. Ottiya eji kaninamudidele Yehova onikosela dhilobo dhowumiha milomo mwigumini mwehu. Mbwenye enziwa iyo jawi Yehova  wahakamihedha emeleli aye ororomeleya a masaka a mundduni ovilela motikiniha mwene. Iyene txipo kasadduwile. (Kengesa Izaiya 43:10-13.) Noona japama omukuluvela. Nikaane ebaribari yawi onele onivaha guru enfunihu wila nivilele oku nikosaga ofuna waye. (2 Korinto 4:7-9) Yotagiha ya Ezekiya, José na Sara ennisunziha eni? Nigamwiwelela Yehova masiki nigumanena makattamiho orutxa, iyene onele onikamihedha.

15. Ninakaane dhavi “murenddele wa Mulugu” nigafwanyiwa makattamiho?

¹⁵ Ninawodhe dhavi okaana “murenddele wa Mulugu” oku banina makattamiho? Japama olibiha mandano ehu na Yehova. Mandano abo adha owodheya sabwa ya mukutto okosile Yezu Kristu. Yobolo enokosa epaddi ya mabasa otikiniha a Yehova. Sabwa ya yobolo ejo, nikaana gari ya oleveleliwa dhottega dhehu, vina okaana mobuwelo otxena anniwodhiha onfiyedha Yehova.—Joau 14:6; Tiago 4:8; 1 Pedro 3:21.

16. Txini enapadduwe nigakela “murenddele wa Mulugu”? Katagiha.

¹⁶ Txini enanipadduwele nigakela “murenddele wa Mulugu onpitha thontho ya muthu”? Bibilia onloga wila onere “okoya” mirima na mobuwelo ehu. (Filipi 4:7) Nsaka nilogiwe mazu aba “okoya” aladdanihiwa na merelo a anyakoddo, kuloga wila nikuru na anyakoddo nisakuliwe wila nang’anele muttette vina nibarele. Akadda Filipi ahikoyiwa na makuru abo a anyakoddo. Awene anwodha ogona ottugareyene sabwa anziwa wila muttette wawa obareliwa na anyakoddo. Moligana, nigakaana “murenddele wa Mulugu” kanindhugudheya na elo-ene, sabwa murima wehu na dhubuwelodha dhinowodha ovuma. Ninoziwa yawi Yehova ononibarela vina efunelo yaye ja onona wosanzayene. (1 Pedro 5:10) Ejo enonirabeliha onyimuwa sabwa ya dhilobo dhinnidhugudha, obe onobaniha.

17. Nsaka na Goi enddimuwa, txini enanikamihedhe omukuluvela Yehova?

¹⁷ Ovanene goyi enddimuwa enele omottela nlogo na attu. (Mateu 24:21, 22) Kaninziwa txibarene enampadduwele muttu-muttu wa iyo. Masiki dhawene kanikale wodhugudheya sabwa ya nsaka ntto. Masiki nihiziwaga mowakwana enfuna okosa Yehova, iyo ninomuziwa Mulugu wehu. Niziwa deretu dhikosile iyene na emeleli aye ororomeleya a masaka a mundduni. Nihoona yawi masiki makattamihoya akale manddimuwa, Yehova onowakwaniha efunelo yaye. Vina onowodha okosa na mukalelo wotikiniha! Noona dhetene dhinnikosela Yehova, dhinonivaha gari ya wakela dila yanawili “murenddele wa Mulugu ompitha thontho ya muthu.”