1-2. (a) Sabwaya jani atelani aswa anofwanyela omukuluvela Yehova? (Masalmo 37:3, 4) (b) Txini enasekeserhe iyo mwari mwa nsunzo ntti?

WEYO onowubuwela otela, obe otelile ovanenevi? Akala jijuwene, mohaganyedha weyo onofuna ojavo egumi yawo na muttu oddule onimukweliwe venjene. Mwebaribari, matelo anodhana dhorutxa. Vina dhikalawo dhogana dhamakamaka dhinfwanyelinyu okosa. Mukalelo ononinyu dhorutxa esi vina dhosakula dhinele opatta wagalala wenyu vyaka dha musogoro. Nyuwo mugamukuluvela Yehova munele okosa dhosakula dhamalago, matelo enyu anele ovadda vina munele okana wagalala. Atelani agattiya ofwara malago a Mulugu mohaganyedha anele okana makattamiho agadhile ononga matelo awa vina anattukulele ohikana wagalala.—Kengesa Masalmo 37:3, 4.

² Masiki nsunzo ntti vasasanyedheliwani atelani aswa, iyo ninele osekeserha makattamiho angumanana atelani otene. Vina ninele ologa dhinsunzihu na dhotagiha dhittiyiwe na alobwana vina ayana anroromelo a masaka a mundduni. Dhotagiha esi dha mBibiliani dhinonisunziha magano abuwene analabihedhe iyo dhipaddi dhottiyana-ttiyana dha mwigumini mwehu vina vamateloni. Iyo vina ninele wona enasunzihu na dhotagiha dha atelani ang’onovi a masaka abano.

3-4. Makattamiho gani andaga ogumanana atelani aswa?

³ Attu ena anofiyedha wawaddela atelani aswa wi anofwanyela okana egumi yofwasa. Motagiha, amambali vina anamudhi  ena anodhaga wadidela atelani aswa wi akane aima. Obe amarho ofiyedheya vina anamudhi ena anodhaga wakokomeza atelaniya wila agule numba vina dhilobo dhina dhamakamaka.

⁴ Atelani aswa agahivyang’anele anodhaga okosa yosakula egattukuleli okana mangawu. Venevo oheli mulobwana na muyana oroma olaba mudhidhi mwinjene wila awodhe opitxa mangawuya. Mabasaya anodhaga ottukula mudhidhi mwinji mpaka ohikanaga mudhidhi wa okosa nsunzo nomwinya, webedha wantakulu vina mabasa a olaleya. Atelaniya anodhaga ojomba omatugumanoni wila alabe mudhidhi mwinji, akane kobiri dhinji vina ahiyelele ganyo yawa. Yodhelavoya, awene anoyelela gari ya okosa venji mmabasani a Yehova.

5. Txini esunziliwe na yotagiha ya Klaus na Marisa?

⁵ Dhotagiha dhinotonyihedha wi ozuzumela dhilobo dhomaningoni kadhindana wagalala. Ndoweni none esunzile Klaus na mwadhiye Marisa mwaha wa makaniya aba. * Omaromelo wa matelo awa oheli anlaba venjene wi akane egumi yuttugareya. Mbwenye kiyapadduwile, awene kawodha okana wagalala. Klaus onologa epadduwile: “Iyo nahikana dhilobo dhinjene dhavedihu mpaddi womaningoni, mbwenye kanana matadelo okosa venjene mmabasani a Yehova. Ologa ebaribari iyo nankana mazuzumo mwigumini mwehu nakala odhugudheyene.” Weyo onoziwa wi ozuzumela dhilobo dhomaningoni kundana wagalala watxibarene. Akala ejo enowupadduwela kuwojeye. Ninele otanalela dhotagiha dhapama dha attu ena dhinawodhe wukamihedha otxinja. Voroma, ninfuna none dhinawodhe osunza amamuni na yotagiha ettiyile Mwene Josafat.

6. Mowiwanana na malago anfwanyeya va Gano 3:5, 6, txini ekosile Mwene Josafat vagumaniliyena makattamiho orutxa?

⁶ Amamuni, munowonaga ninga muttorho wolemela ozuzumela murala wenyu? Akala pumwenemo, munele osunza venjene na yotagiha ya Mwene Josafat. Ninga Mwene Josafat wahikana muttorho w’obarela nlogo nalamuleliye! Josafat wanfwanyelela wabarela otene alamuleliye. Agawodhile dhavi wakwaniha muttorho ninga obu? Iyene wahilibiha mittette dhotene dho Juda na ringa dhovadda vina wahasasanyedha anyakoddo omala-nawale muttengo wa 1.160.000. (2 Map. 17:12-19) Masiki dhawene, vasogorova Josafat wahigumanana makattamiho orutxa. Muttitti wa anyakoddo wa akadda Amonita, Amowabita vina anyakoddo adha o myangoni dho Seir ahiroma omutxutxa iyene, amudhaye vina nlogo notene. (2 Map. 20:1, 2) Mwa esi dhotene txini ekosile Josafat? Iyene wahimuloba nikamihedho Yehova wi amulibihe. Eji enowiwanana na malago anfwanyeya va Gano 3:5, 6. (Kengesa.) Na ovyeviha Josafat wahikosa nlobelo ninfwanyeya va 2 Mapadduwo 20:5-12, ninoniha  omuroromela waye onddimuwa Babe wa wirimu. Yehova wakulile dhavi nlobelo nakosile Josafat?

7. Yehova wakulile dhavi nlobelo na Josafat?

⁷ Yehova wahiloga na Josafat amulabihedhaga Mulevita wakuweliwa Jaziel. Iyene wahiloga dhahi: ‘Mwimele venevo ovyettekene, munere wona mvunelo onawuvuneni Yehova.’ (2 Map. 20:13-17) Ebaribari wi obu kuwali mukalelo wa owana koddo! Mbwenye malago aba wavahile ddi Yehova ottiya muttu-muttuvi. Na omuroromela oddimuwa Mulugu, Josafat wahivirihamo yalogiwe. Iyene na nlogo notene mbudduwilani wila agumanena amwiddani, Josafat wahawika anameba amwibela Yehova jibo osogorho wa anyakoddo aye. Wi amukamihedhe Josafat Yehova wahatolotxa amwiddani otene.—2 Map. 20:18-23.

8. Txini ensunza amamuni na yotagiha ya Josafat?

⁸ Amamuni, nyuwo munele osunza venjene na yotagiha ya Josafat. Nyuwo muhikana muttorho wowakamihedha amudhinyu, munolaba venjene wi mwabarele vina mwakamihedhe. Mugagumanana makattamiho masaka mena munotamela owanana makattamihoya na mukalelo onwodhinyu. Mbwenye ejo egapadduwa kamulibeletxe owanana na guru dhenyu. Ottiya ejo, munofwanyela okumbirha nikamihedho na Yehova vina enokala ya malago olobelaga na mwadhiyo. Mutamelege malago a Yehova modhela omwengesa Bibilia, osunza mapubilikasau ampakiwa na nikuru na Mulugu vina mutamelege ovirihamo malagoya anfwanyenyu. Mugakosa dhosakula mufwaraga magano anfwanyenyu mBibiliani attu ena anodhaga wubuwela wi muhikosa dhosakula dhotowa malago. Awene anodhaga ologa wi dhindana wagalala vamuralani okana muwaku vina dhilobo dhinguliwa na kobiri. Mbwenye kamudduwale yotagiha ya Josafat. Iyene wahimukuluvela Yehova vina wahoniha na merelo. Yehova kamunyanyalile mulobwana oddu woweddeyana, iyene vina kanonyanyale. (Masal. 37:28; Aheb. 13:5) Atelani anawodhe dhavi okana wagalala?

9. Txini enziwihu sabwa ya namavuhulela Izaiya na mwadhiye?

⁹ Namavuhulela Izaiya na mwadhiye annika mabasa a Yehova vamburoni voroma mwigumini mwawa. Izaiya wali namavuhulela, txino mwadhiye wahikana mabasa ayene vowi mBibiliani iyene wakuweliwa ‘namavuhulela wa muyana.’ (Iza. 8:1-4) Ninga atelani, Izaiya na mwadhiye anzuzumela venjene omwebedha Yehova. Eji yotagiha yapama enfwanyela ofwara atelani otene a masaka abano!

10. Osunza mavuhulu a mBibiliani anakamihedhe dhavi atelani okanavi efunelo ya omulabela Yehova venjene?

¹⁰ Atelani a masaka abano anele owodha omutagiha Izaiya na mwadhiye agavilibihedha okosa muli mwetemwene wi amulabele Yehova. Awene anele olibiha omukuluvela wawa Yehova modhela osunza mavuhulo a Bibilia vamodha vina wona mukalelo onakwanihedheye mavuhuloya. * (Tito 1:2) Awene vina anofwanyelela otanalela mukalelo onawodhani okamihedha wakwanihedheya wa mavuhuloya. Motagiha, awene anofwanyela okosa mpaddi wa nivuhulo nilogile Yezu nawi miselu dhapama dhinele olaleyiwa mwilaboni mwetemwene ngamala panafiye ogoma wa elabo. (Mt. 24:14) Venevo vandowa atelani atanalelaga mukalelo onakwanihedheye mavuhulo a  mBibiliani, anele olibihavi efunelo yawa ya okosa muli mwetemwene mmabasani a Yehova.

11. Priska na Akila ali omala na wale wi akose eni nanda sabwaya jani?

¹¹ Atelani aswa anele osunza na yotagiha ya Priska na mwadhiye Akila, ali atelani a elabo y’o Juda akala kwatti y’o Roma. Awene vewalani miselu dhapama dhaloga sabwa ya Yezu ahisunza bafiyedha okala Akristu. Kavali waganyedha wi awene annagalala na egumi yananina. Mbwenye, vahipadduwa elobo yohijedheleya Mulamuleli Munddimuwa Kláudio wahilamulela wi Ayuda otene attiye elabo ejile y’o Roma. Katanalela mukalelo wewilemo Akila na Priska. Awene anfwanyela wattiya amudhawa vina amarho awa wi amwalele elabo yawa o Juda wi adhowe ete wili marhondda awa vina mukalelo wa okalawo. Koddi makattamiho aba apadduwile ahitximiha omulabela wawa Yehova? Weyo onoziwa yowakulaya. Mumwalile awene o Juda badhowa okala o Korinto, Akila na Priska ahivilibihedha venjene okamihedha mulogo wa wenewale vina ahilaba oku-noku na murumiwi Paulo alibihaga abali. Vasogorova, awene ahimwalela kwatti yina wali ojombeliwa wa anamalaleya. (Mer. 18:18-21; Rom. 16:3-5) Awene ahinjiveliwa mabasa okosa masiki dhawene anagalala venjene!

12. Sabwa jani atelani aswa anofwanyela okana dhogana dhomuyani?

¹² Enowodheya atelani a masaka abano omutagiha Priska na Akila modhela wika Omwene wa Mulugu vamburoni voroma mwigumini mwawa. Mudhidhi wamakamaka onfwanyelela atelani osekeserha dhogana dha mwigumini mwawa bu mudhidhi oneddelelana awene. Atelani agakosa dhogana dhowika mabasa a Yehova vamburoni voroma mwigumini mwawa anele wona muya wa Yehova okamihedhaga mabasa a mwigumini mwawa. (Koh. 4:9, 12) Katanalela yotagiha ya Russell na mwadhiye Elizabeth. Russell ohiloga, “Naromile ologela dhogana dhehu dhomulabela Yehova mudhidhi oromile iyo weddelelana.” Elizabeth ohiloga dhahi, “Iyo nahibaza ologela  dhogana dhehu mutanene, wi musogoro nigadha ogumanana makattamiho orutxa ahinitximihe odhowanavi vasogoro mabasa ehu a omulabela Yehova.” Yogana yakosile Russell na Elizabeth yahattukulela awene omwalela elabo ya Micronésia wenewo wajombeliwa anamalaleya.

13. Mowiwana na Masalmo 28:7, dhopurelamo gani dhinakane atelani agamukuluvela Yehova?

¹³ Dhahene ninga Russell na Elizabeth, atelani enjene anovevutxa egumi yawa, wi akane mudhidhi mwinji wa olaba mabasa a olaleya vina osunziha. Awene agakana dhogana dha olaba mabasa a Yehova vina agalaba mumodhani anokana dhopurelamo dhinjene dhapama. Awene vina anele wona nikamihedho na Yehova mwigumini mwawa, omukuluvela wawa Yehova onelege odhowavi bugonuwa ottiya ejo anele okana wagalala watxibarene.—Kengesa Masalmo 28:7.

14. Pedro na mwadhiye onihile dhavi wi ankuluvela nipikirelo ninfwanyeya va Mateu 6:25, 31-34?

¹⁴ Atelani anele osunza vina na yotagiha ettiyile murumiwi Pedro na mwadhiye. Yezu munfwanyiliye Pedro dila yoroma, Pedro wanfwanyela okosa yosakula yamakamaka. Pedro ahinatti ogumana na Yezu iyene wali namattadda wakosa mabasa aba wi asapelena murala waye. Mbwenye mmobile Yezu wi akale namafwara waye wa mudhidhi wotene, Pedro wanfwanyelela watanalela amudhaye. (Lk. 5:1-11) Pedro wahigana onfwara Yezu mmabasani olaleya. Wahikosa yosakula yaderetu! Iyo kanina wagayedha wi mwadhiye wahikamihedha yogana eji ekosile Pedro. Bibilia onologa wi mmalile Yezu ovenyihiwa mukwani mwadhi Pedro wahinvelela mamune mudhidhi mung’onovi mmabasani olaleya. (1 Kor. 9:5) Nona kanina waganyedha wi yotagiha ya mwadhi Pedro ninga Mukristu ehimukamihedha Pedro oleba malago apama anakamihedha amamuni na ateliwi. (1 Ped. 3:1-7) Txibarene, Pedro na mwadhiye ahikuluvela mapikirelo a Yehova anloga wi Iyene onele wenjedhedha dhojombeliwa dhehu nigeka mabasa Omwene vamburoni voroma mwigumini mwehu.—Kengesa Mateu 6:25, 31-34.

15. Txini esunziliwe na yotagiha ya Tiago na mwadhiye Ester?

¹⁵ Nyuwo akala mutelilena ovanenevi, munawodhe dhavi odhowavi munuwihaga efunelo yenyu ya olaleya miselu dhapama? Munawodhe okosa ejuwene mugasunza dhotagiha dha atelani ena. Motagiha, kengesani seriye enloga “Eles se Ofereceram.” Seriye eji ehimukamihedha Tiago na mwadhiye Ester, atelani o Brazil, okana efunelo ya odhowavi enjedhedhaga mabasa awa a olaleya. Tiago ohitapulelamo dhahi: “Mudhilihu ononelamo mukalelo onakamihedha Yehova emeleli aye a masaka abano, iyo vina nahona wi Yehova elege odhowavi anikamihedhaga.” Awene ahimwalela o Paraguai, wenewo onkamihedhani napanovi oromana yaka ya 2014. Ester ohiloga: “Nlebo na Bibilia ninziveliwitxihu tta Éfeso 3:20. Mudhidhi-na-mudhidhi niwona nlebo ntti nakwanihedheyaga mwigumini mwehu.” Paulo alebelaga karta ntti akadda Éfeso wahileba wi Yehova onele onivaha dhilobo dhinjene opitta esile dhinkumbirihu. Txibarene mazu aba ba ebaribari!

16. Txini enfwanyela okosa atelani azombwe anfuna wakwanihedha dhogana dhawa mpaddi womuyani?

¹⁶ Atelani azombwe a masaka abano anele opurelamo na dhotagiha dha atelani ena animukuluvela Yehova. Atelani ena ahikana vyaka dhinjene mmabasani a mudhidhi wotene. Akala muhikana yogana ya wunuwiha mabasa enyu omulabelana Yehova munkoddelani wakumbirha  malago awene? Okosa eji mukalelo mwina ononiha wi munomukuluvela Yehova. (Gano 22:17, 19) Anddimuwa a mmulogoni, enowodheya nyuwo vina wakamihedha atelani azombwe wakwanihedha dhogana dhawa mpaddi womuyani.

17. Txini empadduweli Klaus na mwadhiye Marisa, nanda yotagiha yawa ennisunziha eni?

¹⁷ Mudhidhi mwina, ninoganaga omulabela Yehova na mukalelo osakulihu mbwenye kimpadduwaga ninga munfunelihu. Kona yotagiha ya Klaus na Marisa, alogiwe ddima dhoroma. Mumaleli awene otelana badhivirha vyaka ttaru ahittiya ntakulu nawa badhowa okamihedha mabasa omaga akosiwa filial ya Filandia. Mbwenye vasogorova ahidha ononelamo wi kagakalile wenewale okwaraya myeri mitanu na nimodha. Vamaromo, awene ahikubanya. Mbwenye dhilobodha dhahipadduwa. Mbwenye dhilobodha dhahitxinja, awene ahiwobiwa wi adhowe akose kursu ya elogelo ya Árabe, mumalelani okosa kurusuya ahittomeliwa olaba elabo yina onlogiwa elogelo eji ya Árabe. Marisa obuwelaga dhipadduwile ohiloga: “Miyo ddanova okosa elobo ehinattigi miyo okosa mbwenye omukuluvela Yehova ohiddikamihdha wona nikamihedho naye na mukalelo wahajelha iyo. Nipadduwo ntti nihiddikamihedha omukuluvela Yehova venjene.” Yotagiha eji enowoniha wi nigamukuluvela Yehova na murima wehu wotene iyene onele oniruriha.

18. Atelani anonihe dhavi wi anomukuluvela Yehova?

¹⁸ Matelo nvaho wa Yehova. (Mt. 19:5, 6) Iyene onjedhela wi atelani apurelemo mvaho obu. (Gano 5:18) Atelani azombwe, munkoddelani opepesa muziwa mukalelo oneddihenyu egumi yenyu? Munkoddela nni okosa muli mwetemwene wi mumonihe Yehova wi munotamalela nvaho obu wuvahile iyene? Kamulobeleleni Yehova. Katamelani mu Nzuni naye malago aniwanana na makattamiho enyu. Ottiya ejo kavirihanimo malago anuvahani Yehova. Mukane ebaribari wi munele okana wagalala vamuralani vina munele wakela mareliho a Yehova mugewananiha matelo enyu na mabasa omulabela Yehova!