NSUNZO 44
Okwela Woweddeyana wa Yehova Ontapulela Eni Mwa Weyo?
‘Okwela woweddeyana wa Yehova kwa mukala-kala.’—MASAL. 136:1.
JIBO 108 Mulugu Ddokwela-wene
DHINASUNZE IYO *
1. Txini ennikokomeza Yehova wi nikose?
YEHOVA onoziveliwa olagiha okwela woweddeyana. (Oz. 6:6) Iyene onowakokomeza alabeli aye okosaga yakakene. Amulabihedhaga namavuhulela waye Mikeya, Mulugu wehu onikokomeza wi nilagihege ‘okwela woweddeyana.’ (Mik. 6:8) Mbwenye, nihinatti okosa ejuwene, ninofwanyela oziwa txini entapulela okwela woweddeyana.
2. Mikalelo gani dhiniwanana na okwela woweddeyana?
2 Okwela woweddeyana txini? Nzu ntti ‘okwela woweddeyana’ ninofwanyeya mBibiliani Tradução do Novo Mundo dila dhowakwana 230. Kuloga dhavi? Mowiwanana na “Glossario ya Bibilia” otapuleliwa wa nzu ntti, nintonya “okwela onlagihiwa sabwa ya okosa nipagano, ororomeleya, weddeyana vina okala ofiyedheya na muttu mwina. Okwela woweddeyana mukalelo wa okwela onalagiha Mulugu nlogo na attu, vina attu anotonyihedhana okwela oku muttu na mukwaye.” Mbwenye Yehova ddili yotagiha yapama ya okwela woweddeyana. Mwari mwa nsunzo ntti ninele osekeserha mukalelo onatonyihedha Yehova attu okwela woweddeyana. Nsunzo ninfwarela, ninele osekeserha mukalelo onawodhihu omutagiha Yehova, nitonyihedhagana okwela woweddeyana muttu na mukwaye.
YEHOVA DDILI YOTAGIHA YAMAKAMAKA YA ‘OLAGIHA OKWELA WOWEDDEYANA’
3. Txini emwaddelile Yehova Mizé sabwa ya mikalelo dhaye?
3 Muvirile mudhidhi mung’onovi ana Izrayel bamalile Obudduwa w’Ejipitu, Yehova wahivilagiha wa Mizé alogaga sabwa ya nzina Naye vina mikalelo dhaye. Iyene ohiloga dhahi: ‘Yehova, Yehova, Mulugu wa nttebwa, wattagaraga, wovilela, onalagiha attu enjene okwela woweddeyana, onalevelela dhotega dhawa na dhovonya dhawa.’ (Obud. 34:6, 7) Na mazu aba olibiha sabwa ya mikalelo Dhaye dhapama Yehova wahimwaddela Mizé mukalelo mmodha wamakamaka oli okwela woweddeyana. Ejo entapulela eni?
4-5. (a) Yehova ovyonihile dhavi mwinyene? (b) Mavuzo gani anasekeserhihu?
4 Yehova ohitonyihedha wi iyene kana bahi okwela woweddeyana mbwenye ‘ohidhaleliwa okwela woweddeyana.’ Nzu ntti ninologiwa dila dhowakwana tanu na mmodha mBibiliani. (Oleb. 14:18; Nem. 9:17; Masal. 86:15; 103:8; Jow. 2:13; Jon. 4:2) Mwa dhipaddi esi dhotedhene, onaddiwanamo ddi Yehova, ottiya attu. Eji kiyali yojedheleya wi mwinyene Yehova attittimihe venjene mukalelo waye wa okwela woweddeyana? Mohaganyedha, okwela woweddeyana kwamakamaka mwa Yehova. * Nona Mwene Davidi wahittukuleleya ologa dhahi: ‘É Yehova, opama wenyu onofiya odhulu . . . Onikwela wenyu onowumiha milomo, É Mulugu! Attu onotamela ottawela mmakapwani mwenyu.’ (Masal. 36:5, 7) Ninga Davidi, ninawodhe dhavi otikina okwela woweddeyana wa Mulugu?
5 Wi ninonelemo pama okwela woweddeyana, ninele osekeserha mavuzo meli: Yehova onimutonyihedha ani okwela woweddeyana? Nanda abale antonyihedhiwa okwela oku ankana dhopurelamo gani?
YEHOVA ONATONYIHEDHA ANI OKWELA WOWEDDEYANA?
6. Yehova onalagiha ani okwela woweddeyana?
6 Yehova onatonyihedha ani okwela woweddeyana? Bibilia onologa wi iyo ninokwela dhilobo dhinjene, ninga motagiha: “Olima,” “vinyu na makura,” “olagiwa,” “ononelamo,” vina “eziwelo”—aba mazina a dhilobo dhing’onovi. (2 Map. 26:10; Gano 12:1; 21:17; 29:3) Okwela oku woweddeyana kunlagihiwa dhilobo, onlagihiwa attu bahi. Yehova kanalagiha attu otene okwela woweddeyana. Iyene onalagiha abale ana mandano ofiyedheya na iyene. Mulugu wehu ddoweddeyana na amarho aye. Iyene ohapikirela dhilobo dhamakamaka vina onele odhowavi alagihaga okwela woweddeyana.
Yehova onowavaha dhilobo dhinjidhene attu otene, masiki na abaleya ahinimulabela (Kang’ana ddima 7) *
7. Yehova olagihile dhavi wakwela attu otene?
7 Yehova onowakwela attu otene. Yezu wahimwaddela mulobwana dhahi wakuweliwa Nikodemu: “Mulugu oakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.”—Jo. 3:1, 16; Mt. 5:44, 45.
Mowiwanana na mazu a Mwene Davidi na navuhulela Daniyel, Yehova onowalagiha okwela waye woweddeyana abale animuziwa, onimova, animukwela vina aneddana malamulo aye (Kang’ana ddima 8-9)
8-9. (a) Sabwaya jani Yehova agatonyihedha alabeli aye okwela woweddeyana? (b) Txini enone iyo ovanene?
8 Ninga mulogeliwani ddima dha mundduni, Yehova onatonyihedha okwela woweddeyana abale ana mandano ofiyedheya na iyene—alabeli aye. Eji enowiwanana na eji elogile Mwene Davidi vina namavuhulela Daniyel. Motagiha, Davidi ohiloga dhahi: “Munodhowavi mwatonyihedhaga okwela woweddeyana abale anuziwani.” ‘Yehova onodhowavi atonyihedha okwela okala-nokalawene abale animuriha.’ Daniyel ohiloga dhahi: ‘É Yehova, Mulugu wa [ebaribari] munatonyihedha okwela woweddeyana abale anukwelani vina aneddana malamulo enyu.’ (Masal. 36:10; 103:17; Dan. 9:4) Ninga munlogela mazu aba a ovuhuleliwa, Yehova onowatonyihedha okwela woweddeyana emeleli aye sabwani anomuziwa, anomuriha, anomukwela vina anoweddana malamulo aye. Yehova onowatonyihedha okwela woweddeyana alabeli aye ebaribari.
9 Nihinatti oroma omulabela Yehova iyo nanakela okwela wa Mulugu onakweliyena attu otene. (Masal. 104:14) Vadhilihu okala alabeli aye, ninopurelamo okwela woweddeyana. Nona, Yehova onowalibiha emeleli aye alogaga: ‘Ddinelege odhowavi ddukwelaga wiwananeyana waga kunavuguwe.’ (Iza. 54:10) Mowenjedha, Davidi ohiloga dhahi, ‘Yehova onelege odhowavi aweddihaga emeleli aye noderetu.’ (Masal. 4:3) Niniwamo dhavi na mukalelo onneddiha Yehova noderetu? Munasalimu ohiloga dhahi: ‘Ona malago onele otanalela esidha vina onele otanalela nofwasa merelo a okwela woweddeyana wa Yehova.’ (Masal. 107:43) Na mazu aba muyubuweloni, ndoweni nisekeserheni mikalelo miraru dhimpurelamo emeleli a Yehova okwela waye woweddeyana.
OKWELA WA YEHOVA ONNIPURELIHAMO DHAVI?
Yehova onowenjedhedha avahaga dhilobo dhapama abale animulabela (Kang’ana ddima 10-16) *
10. Iyo nimpurelamo dhavi oziwa wi okwela woweddeyana wa Mulugu kwa mukala-kala? (Masalmo 31:7)
10 Okwela woweddeyana wa Mulugu kwa mukala-kala. Okwela oku woweddeyana onologiwa va Masalmo 136 dila dhowakwana 26. Versu yoroma enologa: ‘Mutamaleni Nabuya vowi ddwapama okwela waye woweddeyana kwa mukala-kala.’ (Masal. 136:1) Mazu aba ‘okwela waye woweddeya kwa mukala-kala’ anowiyeleliwa dila dhinjidhene oromana verso 2 mpaka 26. Venevo vanadhowihu nengesaga maversu mena a nlebo na masalmo, ninele otikina mwaha wa wona mikalelo dhottiyana-ttiyana dhinlagiha Yehova okwela waye woweddeyana nanda iyene txipo kanattiye onilagiha okwela oku. Wiyeleliwa wa mazu aba “okwela woweddeyana kwa mukala-kala” enotonyihedha kakamwe wila okwela woweddeyana wa Mulugu na nlogo naye txipo kunatxinje. Japama oziwa wila Yehova kananyanyala alabeli aye, mottiyanamwene iyene onkala vakuvi na awene vina kanattiya abale animulabela, makamaka agafwanyiwa makattamiho. Iyo ninpurelamo dhavi: Oziwa wi Yehova oli vakuvi vehu enonagalaliha vina enonivaha guru dhinfunihu wi niwanena makattamiho annifwanya, ottiya ejo wi neddegevi mu dila ya egumi.—Kengesa Masalmo 31:7.
11. Mowiwanana na Masalmo 86:5, txini enimuttukulela Yehova olevelela?
11 Okwela woweddeyana wa Mulugu onomuttukulela okala namalevelela. Yehova onowona akala muttu ottegile ohitxinuwa vina akala ohittiya okosa dhottegadha, nona okwela woweddeyana onomuttukulela Iyene olevelela. Munasalmo Davidi ohiloga dhahi: “Keddile na iyo apimelelaga dhothega dhehu, kanivahile goyi alazaga miladdu dhehu.” (Masal. 103:8-11) Davidi wanziwa wiwopa wa okosa yoddawa enddimuwa. Iyene vina wanziwa wi Yehova ‘oli womala nawale wi alevelele.’ Txini enimuttukulela Yehova olevelela? Yowakulaya enfwanyeya va Masalmo 86:5. (Kengesa.) Pumwenemo, ninga mulogeli Davidi munlobeloni, Yehova onolevelela vowi okwela waye woweddeyana bowinjiva mwa otene antamela oleveleliwa na iyene.
12-13. Txini enanikamihedhe akala iyo ninovipwatteliha dhottega dha mundduni?
12 Nigattega kahiyo yabure okubanya, ejo enele onikamihedha otxinuwa—vina ovilibihedha wi nisisigule—dhovonya dhehu. Alabeli ena a Yehova anovipwatteliha miladdu mwaha wa dhabure dhikosilani mundduni. Awene anubuwela wi Yehova txipo—kanalevelele dhottega dhikosilani, masiki awene atxinuwe. Wahiromaga wiwamo dhawene? Akala pumwenemo kudduwale wi Yehova oli womala-nawale wi atonyihedhe okwela waye woweddeya mwa adhari aye otene.
13 Nimpurelamo dhavi: Masiki nikalaga attu ohiligana, enowodheya okana wagalala sabwa ya omulabela Yehova na mubuwelo wotxena. Eji enowodheya sabwa ya ‘nikami na Yezu Mwana Mulugu ninnikoddeliha nittimihaga dhottega dhehu dhotedhene.’ (1 Jo. 1:7) Akala weyo onokubanya sabwa ya yottega ekosiliwe, kudduwale wi Yehova ottiya okala womala-nawale wi amulevelele muttegi ontxinuwa iyene vina onofuna. Koona mukalelo wiwananihile Davidi mazu aba okwela woweddeyana na olevelela. Iyene ohileba: “Ninga mulapelane vati na odhulu, jilí wunuwa wa okwela waye na abale animuriha. Mulapelano oli omadhelo wa nzuwa na omaddowelo, ji ekalelo ennibareliha iyene dhothega dhehu.” (Masal. 103:11, 12) Kinaganyedheya wila Yehova oli womala-nawale wila “anilevelele na murima wotene.”—Iza. 55:7.
14. Davidi otapulelimo dhavi nibarelo ninnivaha Mulugu sabwa ya okwela waye woweddeyana?
14 Okwela woweddeyana wa Mulugu ononivaha nibarelo mpaddi womuyani. Davidi ohimulobelela Yehova alogaga: ‘Nyuwo muli vottawela vaga; munoddamelela dhawopiha; ddittabiheni na jibo dha mperhe. . . . Abale animuroromela Nabuya anokuneliwa na okwela waye woweddeyana.’ (Masal. 32:7, 10) Nsaka na Bibilia kwatti yankana ringa wila nibarele nlogo mwa amwiddani. Na mukalelo wakakene okwela woweddeyana wa Yehova onkala ninga ringa ennibarela mwa dhilobo dhigadhile ononga mandano ehu na iyene. Ottiya ejo, okwela woweddeyana wa Yehova onomuttukulela onikukusela wa iyene.—Jer. 31:3.
15. Sabwaya jani okwela woweddeyana wa Yehova onoladdanihiwa na ttawela vina erugu?
15 Davidi wahikosa nladdaniho wi atapulelemo nibarelo ninakela nlogo na Mulugu. Iyene ohileba: ‘Mulugu nibarelo naga, Mulugu ondditonyihedha okwela woweddeyana.’ Davidi ohiloga vina mwaha wa Yehova: ‘Iyene ddinddeddiha na okwela woweddeyana, thawela yaga ddi erugu yaga enddivuna, ddi ebarelo yaga enddikoya.’ (Masal. 59:17; 144:2) Txini emuttukuleli Davidi oladdaniha okwela woweddeyana wa Yehova na ttawela vina erugu ya nibarelo? Iyo nigadhowavi nimulabelaga Yehova, iyene ohipikirela wi onele obarela mandano ehu na iyene masiki nikalaga elabo elabovi. Nipikirelo ntti ninologiwa vina va Masalmo 91. Namaleba wa masalmo ohiloga: ‘Ddinele ologa dhahi na Yehova: ‘Nyuwo muli ttawela yaga oliba waga.’’(Masal. 91:1-3, 9, 14) Mizé vina wahimuladdaniha Yehova na ttawela. (Masal. 90:1) Vasogorova ahalagawo malabo mang’onovi wi Mizé akwe ohiloga mazu okoddela vaddiddi: “Oromana wale vothawela venyu ddi Mulugu; mono waye wamukala-kala bunulibihani.” (Olib. 33:27) Mazu aba “mono waye wamukala-kala bunulibihani” annisunziha eni mwaha wa Yehova?
16. Mareliho gani meli ana iyo? (Masalmo 136:23)
16 Nigamukosa Yehova Ttawela yehu, ninele ovyona obareleyene. Masiki dhawene ninodhaga ofwanyiwa makattamiho abuwene agobuwelile iyo wi kaninawodhe ogomiha. Egapadduwa dhawene txini endaga okosa Yehova? (Kengesa Masalmo 136:23.) Iyene ononittiddela nlada nehu, ononivenyiha vina ononikamihedha wimela pwi. (Masal. 28:9; 94:18) Iyo nimpurelamo dhavi: Oziwa wila enowodheya okuluvela nikamihedho na Yehova enonubutxedha mareliho meli. Noroma, nikana nibarelo nokuluveleya wego-wegovi onkalihu. Nanawili, Babihu wokweleya wa wirimu onomuzuzumela muttu ddi muttu.
OKWELA WOWEDDEYANA WA MULUGU ONONIVAHA NIKULUVELO
17. Nikuluvelo gani ninfwanyela iyo okana sabwa ya okwela woweddeyana wa Mulugu? (Masalmo 33:18-22)
17 Ninga monelihu, ninofwanyela okana ebaribari wila nigafwanyiwa makattamiho-makattamihovi Yehova onele onivaha nikamihedho ninfunehu wila nidhowegevi nimuroromelaga iyene. (2 Kor. 4:7-9) Namavuhulela Jeremiya ohiloga: ‘Okwela woweddeyana wa Mulugu kumalile, ttagaraga dhaye dhinodhowavi.’ (Ent. 3:22) Ninofwanyela okuluvela wi okwela woweddeyana wa Yehova olivi na iyo, sabwani munasalmo ohiniroromeliha, ‘mento a Yehova anowawang’anela attu animuroromela, ankuluvela okwela waye woweddeyana.’—Kengesa Masalmo 33:18-22.
18-19. (a) Txini ehinfwanyelela iyo odduwala? (b) Txini enasekeserhe iyo nsunzo ninfwarela?
18 Txini ehinfwanyelihu odduwala? Nihinatti oroma omulabela Yehova, iyene wanitonyihedha okwela wakene onatonyihedhiye attu otene, mbwenye varomile iyo omulabela Yehova ohiroma onikwela na okwela woweddeyana. Sabwa ya okwela oku Yehova ononittambirha na mada aye obarela. Iyene txipo kananinyanyale, onele wakwaniha mapikirelo otene anikoseliye. Iyene onfuna wi iyo nagalale! (Masal. 46:1, 2, 7) Nona, kintanala makattamiho-makattamihovi angumanana iyo, Yehova ononivaha guru dhinfunihu wi nidhowegevi nikalaga attu ororomeleya.
19 Mpaka veneva iyo nihona mukalelo anatonyihedha Yehova okwela woweddeyana alabeli aye. Iyene vina, onjedhela wi iyo vina natonyihedhe attu ena okwela woweddeyana. Ninakose dhavi? Nsunzo ninfwarela ninele ologa makani aba.
JIBO 136 Yehova ‘Onele Wuttuva’
^ par. 5 Okwela woweddeyana txini? Attu gani antonyihedhiwa okwela woweddeyana wa Yehova, nanda abale antonyihedhiwa okwela oku ankana dhopurelamo gani? Dhowakula dha mavuzo aba dhinele osekeseriwa mwari mwa nsunzo ntti vina nsunzo ninfwarela. Masunzo aba anele ononihedhamo pama mukalelo obu.
^ par. 4 Mazu aba a okwela woweddeyana wa Mulugu anologiwa mmaversuni mena a Bibilia.—Koona Nehemiya 13:22; Masalmo 69:13; 106:7; vina Enthothobelana 3:32.
^ par. 54 MAFOTO NIKUKU: Dhikalawo mikalelo dhinjene dhintonyihedha Yehova okwela waye mwa attu otene, motaganyiha na alabeli aye. Sirkulu dhinfwanyeya vadhulu va nikuru na attu dhinolagiha mikalelodha. Yamakamakaya gari ena awene yopurelamo yobolo.
^ par. 62 MAFOTO NIKUKU: Abale animulabela Yehova vina anroromela yobolo anoweddihiwa na Yehova na mukalelo wavawoka, ottiya wakela okwela wakene onkweliwa attu otene, alabeli a Yehova anowona okwela woweddeyana wa Mulugu na mikalelo dhottiyana. Mmasirkuluni ninowodha wona dhotagiha dhing’onovi.
