1. Dila dhina nivuzo gani ninvikosihu?

WEYO MASAKA mena onozuzumaga obe onokubanyaga ogobuwela dhinapadduwe musogorho ninga—ogujuliwa wa relijiau dhotambi, olupela wa Gog na Magog, vina koddo ya Armagedon? Weyo dila dhina onovivuzaga, ‘Nsakana ntto nigafiya ddinele okana nroromelo noliba ninaddikamihedhe opemberha?’ Akala onokanaga mubuwelo ninga obo, mazu a Yezu ali nlebo na nsunzo ntti anele wukamihedha. Yezu wahawaddela anamafwara aye dhahi: “Kamuribe murima: m’muroromele Mulugu.” (Jo. 14:1) Okana nroromelo noliba ovanene ninele onikamihedha owanana makattamiho agafiya.

2. Ninawodhe dhavi olibiha nroromelo nehu, nanda txini enasekeserhihu munsunzoni ntti?

² Wi nilibihe nroromelo nehu sabwa ya makattamiho anagumanihuna musogorho ninofwanyela otanalela makattamiho angumanihuna masaka abano aneha nroromelo nehu. Otanalela makattamiho abo, enele onikamihedha wona mpaddi gani onfwanyelihu olibiha nroromelo nehu. Midhidhi dhotedhene dhingumanihuna makattamiho aneha nroromelo nehu, nroromelo nehuna ninoliba. Dhawene ninele owodha owanana makattamiho anapadduwe musogorho. Munsunzoni ntti, ninele wona makattamiho manayi agumanilena anamafwara a Yezu Kristu abene onihile wi awene anfwanyela okana nroromelo noliba. Vasogorova iyo ninele osekeserha makattamiho oligana angumanihuna masaka abano annisasanyedhela dhinapadduwe musogorho.

3. Mazu a Yezu anfwanyeya va Mateu 6:30, 33, annikamihedha ononelamo eni?

³ Joziweya wi mwazambo a ntakulu onofuna okosa muli mwetemwene wi amutamelele mwadhiye na anaye dhilobo dhoja, dhowabala vina mburo wokala. Okosa mabasa ninga abuwene  masaka abano ankalihu kahiyo elobo yovevuwa. Sabwani abali ena anoyelelaga ganyo dhawa, masiki akose guru ya otamela ganyo yina awene kanfwanya. Oku abali ena anokoddaga ganyo dhina sabwani ganyodha dhinogudulana na magano a Mulugu. Dhilobo ninga esi dhigapadduwa ninofwanyela olibiha nroromelo nehu, nubuwelaga wi Yehova onele onikamihedha ofwanya ganyo-ganyovi enanikamihedhe osapela ntakulu nehu. Yezu wahawaddela anamafwara aye ebaribari eji va Diskursuni ya Vamwangoni. (Kengesa Mateu 6:30, 33.) Iyo nigakana ebaribari wi Yehova kananinyanyale, ejo enele onikamihedha ovilibihedha wika—dhilobo dhomuyani vamburoni voroma mwigumini mwehu. Iyo nigonaga mukalelo onnikamihedha Yehova mpaddi womaningoni, ejo enele onittukulela omukuluvela venjene Yehova vina nroromelo nehu ninele oliba.

4-5. Txini yakamihedhile anamudhi a Castro owanana makattamiho oyelega?

⁴ Ndowene nisekeserheni yotagiha ya anamudhi o Venezuela mukalelo onakamihedha Yehova mpaddi womaningoni. Anamudhi a Castro ahikana muwaku mung’onovi wakamihedha, obuwene wagumelani na mabasa olima. Venevo atimbwini wawaka dhokana dhawa vina numba yawa. Migueli oli mwazambo wa anamudhi abale ohiloga dhahi: “Iyo ovanene ninivisapela na dholima dhingumelihu va munddani mung’ono obolehiwe iyo. Valaboni ddinroma omukumbirha Yehova wi anikamihedhe ofwanya elobo yovisapelana labonene nttile.” Okalawo wa anamudhi aba onorutxa, mbwenye omukuluvela wawa Yehova wi iyene onowakamihedha, ejo enowalibiha awene odhowavi omatugumanoni vina mmalaleyoni. Awene anowika vamburoni voroma Omwene wa Mulugu, vina Yehova onowakamihedha venjene.

⁵ Masiki na makattamiho aba agumananina, Migueli na mwadhiye Yurai, anzuzumela wona mukalelo wakamihedha Yehova. Mudhidhi mwina Yehova walabihedha abali wi akamihedhe okana elobo yovisapelana obe wannimukamihedha Migueli ofwanya mabasa-mabasavi. Mudhidhi mwina Yehova anakamihedha avahaga dhilobo dhajombela modhela walabihedha abali ofiliyali. Yehova txipo kanyanyalile. Nipadduwo ntti nihakamihedha anamudhi abale olibiha norormelo nawa. Vasogorova sabwa ya wona mukalelo wakamihedhile Yehova, mwaniwa munddimuwaya Yoselin, ohiloga dhahi: “Eji enoddipangarhaza venjene wona nlada na Yehova ninikamihedhaga. Ddinowubuwela wi Yehova ddi marho waga onfwanyelimi omukuluvela mwigumini mwaga motene.” Iyene vina ohenjedhedha: “Makattamiho agumanilihuna ninga anamudhi ahinisasanyedha wi niwodhe owanana makattamiho anagumanihuna musogorho.”

6. Ninawodhe dhavi owaraliha nroromelo nehu nigafwanyiwa makattamiho oyelega?

⁶ Weyo onwanana makattamiho oyelega? Akala pumwenemo oli nsaka norutxa. Masiki bili dhawene, enowodheya olabihedha mudhidhi obu wa makattamiho wi olibihe nroromelo nawo. Kamulobelele Yehova, kengesa mazu a Yezu anfwanyeya va Mateu 6:25-34 vina katanalela ejile enengesiwe. Katanalela vina dhotagiha dha masaka abano dhinoniha wila Yehova onowakamihedha abale anika  mabasa Omwene vamburoni voroma. (1 Kor. 15:58) Okosa eji enele olibiha nroromelo nawo nowi Yehova onele wukamihedha dhahene ninga munakamihedhiye attu ena anfwanyiwa makattamiho ninga awo. Iyene onoziwa esile dhinujombela, vina onoziwa mukaleloya wa wukamihedha. Ogona nikamihedho na Yehova mwigumini mwawo, nroromelo nawo ninele oliba vina onele owodha ovilela makattamiho-makattamihovi anagumanihuna musogorho.—Hab. 3:17, 18.

7. Mowiwanana na Mateu 8:23-26, “pevo enddimuwa” yatatamuwile mbara yehile dhavi nrorome na anamafwara a Yezu?

⁷ Mudhidhi wali Yezu na anamafwara aye mu nyaza yahiteya pevo enddimuwa yatatamulile manebe, venevo Yezu ohilabihedha nipadduwo ntti wi akamihedhe anafwara aye wona mpaddi wafunani olibiha nroromelo nawa. (Kengesa Mateu 8:23-26.) Mudhidhi waromile pevo enddimuwa etatamula manebe venevo manje baroma okupedheyela mmwanddiyani Yezu wela ogona. Na wova anamafwara aye ahinvenyiha ahimuloba wi avune, Yezu nvenyiliye wahasisigula alogaga dhahi: “Nyuwo attu oyeveliwa nroromelo, munovela nni dhawene?” Anamafwara a Yezu kafwanyela wova awene anfwanyela ononelamo wi Yehova ohikana ewodhelo yombarela Yezu vina abale ali na iyene. Nipadduwo ntti ninnisunziha eni? Nroromelo noliba ninele onikamihedha owanana makattamiho manddimuwa, anladdanihiwa na “pevo enddimuwa.”

8-9. Txini yehile nroromelo na Anel, nanda txini emukamihedhile?

⁸ Koona empadduweli murogora wa muziye onkuweliwa Anel, onkala elabo yo Porto Rico. Yehile nroromelo naye yali ‘sikoloni.’ Yoweha eji yapadduwile yaka ya 2017, yali sikoloni wakuweliwa Hurricane Maria wanyongile numba ya Anel. Nipadduwo ntti nahimuyeleliha ganyo yaye. Anel ohiloga dhahi: “Mudhidhi obule wa makattamiho ddankubanya venjene mbwenye ddahinonelamo wi ddanfwanyela omukuluvela Yehova, olobela vina ohittiya makattamihoya wi addikumule ofiyedha ohiziwa yokosa.”

⁹ Emukamihedhile Anel—wiwelela. Iyene ohiloga: “Ofwara malago a nikuru na Mulugu ahiddikamihedha okala ofwaseyene. Miyo ddihona nlada na Yehova modhela nipangarhazo niddivahiliye vina nikamihedho niddivahiliye mpaddi womaningoni modhela walabihedha abali na arogora orugunuwa elabo yotene.” Iyene ohenjedhedha: “Yehova ohiddivaha dhinjidhene opitta esile dhakumbirilimi, vina nroromelo naga nihiliba.”

10. Txini enfwanyeliwe okosa akala onotabuwa na makattamiho orutxa ankala ninga “pevo enddimuwa”?

¹⁰ Weyo onotabuwa na makattamiho ankala ninga ‘pevo enddimuwa’? Txino makattamihoya atatamuliwe na dhifoyo dha mwilaboni obe makattamiho a eredda anuttiya okumuwene mudhidhi mwina ohiziwaga txini enfwanyeliwe okosa. Mudhidhi mwina txino weyo onokalaga okubanyene, mbwenye kuttiye makattamiho aba anukubanyiha ottiya omukuluvela Yehova. Kakala wofiyedheyana na iyene vina kalobela. Kalibiha nroromelo nawo modhela otanalela  masaka a wale abuwene okamihedhile Yehova. (Masal. 77:11, 12) Kakana ebaribari wi iyene—txipo kanonyanyale nne ovanene nne musogorho.

11. Ninfwanyelelani okala omala na wale wi nawiwelege abale annisogorhela?

¹¹ Txini enokamihedhe owanana makattamiho orutxa? Anel ohiloga wi wiwelela. Osunze wakuluvela abale anakuluvela Yehova vina Yezu. Mudhidhi mwina awene aganivaha malago anfwanyelihu weddana, ninodhaga wona wi malagoya aba kananipurele. Masiki bilivi dhawene Yehova onaruriha abale animwiwelela. Iyo ninziwa ejuwene modhela Mazu aye vina modhela dhotagiha dha emeleli aye ororomeleya abuwene avunile dhigumi dhawa sabwa ya wiwelela. (Obud. 14:1-4; 2 Map. 20:17) Otanalelege dhotagiha ninga esene. Okosa eji enele olibiha efunelo yawo ya wiwelelaga magano anvaha nikuru na Mulugu ovanene vina anavahiwegihu musogorho. (Aheb. 13:17) Ogakosa dhawene kunakane mwaha wa wova dhilobo dhinapadduwe musogorho.—Gano 3:25.

12. Ninga munlogela Luka 18:1-8, wiwanana gani olivo wa okana nroromelo na ovilela opujiwa?

¹² Yezu wanziwa wi opujiwa ogaheya nroromelo na anamafwara aye. Wila akamihedhe owanana opujiwa, iyene wahiloga nladdaniho ninfwanyeya va nivuru na Luka. Yezu wahiloga nipadduwo na mamukwela wamunlela namattonga wahamuriha Mulugu vina wahariha attu wi attonge miladdu dhaye. Iyene wahikana ebaribari wi mulamuleli oddu agahittonga makani aye. Vina jijuwene edhile opadduwa namattongaya wahittonga miladdu dhaye. Eji ennisunziha eni? Yehova kahiyo muttu wabure ninga namattonga oddu. Yezu ohiloga dhahi: “Akala iyene ofiyedha wubuwela dhahene, Mulugu kanavuruwane athu a nlogo naye, animukuwela mathiyu na mutana?” (Kengesa Luka 18:1-8.) Yezu vina ohenjedhedha alogaga: ‘Apa vaneyelele Mwana Muttu mwilaboni, anele ofwanya nroromelo ninga ntti?’ Eji ennisunziha eni? Iyo nigatabuwaga na opujiwa ninofwanyela woniha wi nihikana nroromelo noliba, modhela okalela ntidi olobela vina ovilela dhahene ninga mwakoseli mamukwela oddule. Na nroromelo ninga ntti, iyo ninele okana ebaribari wi mudhidhi-mudhidhivi Yehova onele onikamihedha. Mudhidhi mwina masiki malobelo ehu ahakuliwaga ninga mwafunihu ninofwanyela okuluvela guru ya nlobelo.

13. Nlobelo nakamihedhile dhavi anamudhi eddihiwe na opujiwa?

¹³ Katanalela empadduweli murogora onkuweliwa Vero onkala elabo ya República Democrática do Congo. Vero na mamune ohili muKristu vina na mwaniwa wa vyaka 15 elottawa mmuruddani mwawa sabwani muruddaya welolupeliwa na anyakoddo. Mudhidhi wattawani bali mudila ahigumanana anyakoddoya venevo ahatxutxa alogaga wi anele wapa. Vero oroma olila, venevo mwanaye wantamela ommaliha nona wahiroma okosa nlobelo na nzu noliba munlobelonimwa wanloga dila dhinjene nzina na Yehova. Mumaleliye olobela musongorheli wa anyakoddoya wahinvuza:  “Mwanamuyana-we wusunzihile olobela bani?” Iyene wahimwakula: “Mmani, alabihedhaga nlobelo ninfwanyeya va nlebo na Mateu 6:9-13.” Mwimeleli oddule wahiloga dhahi: “Mwanamuyana-we kadhowa na amambali awo na mureddele vina Yehova Mulugu wenyu obareleni!”

14. Txini egadhile weha nroromelo nehu, nanda elobo gani enanikamihedhe wi niwodhe owanana?

¹⁴ Dhotagiha esi dhinonisunziha wi txipo kanipwaze ttima ya nlobelo. Ki akala malobelo awo kanakuliwa momaguva txini enfwanyela weyo okosa? Dahene ninga mamukwela ologiwe vamusiboni wa Yezu, okalele ntidi olobela. Okane ebaribari wi Yehova txipo kanawunyanyale vina na mudhidhiya iyene onele wakula malobelo awo na mukalelo wakakene. Omunlele Yehova omukumbirhaga muya waye wokoddela. (Fil. 4:13) Kudduwale wi omagomelowa Yehova onele wureliha venjene ofiyedha weyo odduwala matabuwo agumanilewina. Ogavilela makattamiho na nikamihedho na Yehova Nroromelo nawo ninele oliba vina onele owodha owanana makattamiho-makattamihovi anagumaniwena musogorho. —1 Ped. 1:6, 7.

15. Mowiwanana na Mateu 17:19, 20, makattamiho gani agumanilena anamafwara a Yezu?

¹⁵ Yezu wahasunziha anamafwara aye wi nroromelo nigahakamihedha okwaranya makattamiho. (Kengesa Mateu 17:19, 20.) Midhidhi dhina anamafwara a Yezu anwodha ottamagiha muya dhabure mbwenye dila modha awene kawodhile. Sabwaya? Yezu wahatapulela wila awene anfwanyela okana nroromelo noliba. Vina wahawaddela wila awene kokana nroromelo nowakwana agahiwodha okwaranya makattamiho anoniwa ninga mwango! Masaka abano iyo vina ninofwanyiwa makattamiho abuwene anonihu ninga orutxa okwaranyawa.

16. Nroromelo nimukamihedhile dhavi Geydi mudhidhi okwile mamune?

¹⁶ Koona yotagiha ya murogora Geydi onkala elabo yo Guatemala. Mamunaye Edi, welopiwa mudhidhi weyelani omatugumanoni. Nroromelo nimukamihedhile dhavi Geydi owanana makattamiho aba? Iyene onologa: “Olobela ohiddikamihedha omponyedha muttorho waga Yehova vina okana murenddele. Miyo ddihona mukalelo waddizuzumela Yehova modhela nikamihedho niddivahile amudhaga vina amarho na abali a mmulogoni. Wika mabasa a Yehova vamburoni voroma ohiddikamihedha ohikaletxa okubanyene mudhidhi wotene vina ohiddikamihedha ozuzumela makattamiho agumanimina siku na siku ottiya ozuzumelaga makattamiho a musogorho. Muvireli yoweha eji miyo ddihisunza wi kintanala makattamiho-makattamihovi anagumanimina musogorho, ddinele owodha opemberha na nikamihedho na Yehova, na Yezu vina nikuru na Mulugu.”

17. Txini enfwanyeliwe okosa akala onowanana makattamiho manddimuwa ahinwodheya ottekenyeya ninga mwango?

¹⁷ Weyo onotabuwa sabwa ya okweliwa mwana-mmudhi? Akala pumwenemo katamela mudhidhi  wi olibihe nroromelo nawo sabwa ya njedhelo na ovenya mukwani modhela wengesa mapadduwo anfwanyeya mBibiliani a adhari ororomeleya a Mulugu abuwene anavenyihiwe mukwani. Obe onotabuwa sabwa ya mwana-mmudhi oburutxiwe mmulogoni? Akala pumwenemo kakana ebaribari yawi mulagelo wa Yehova bwamakamaka. Kintanala makattamiho makattamihovi angumaniwena kapurha mudhidhi obu wi olibihe nrorormelo nawo. Kamwaddele Yehova dhotene dhili mmirimani mwawo. Kutamele okala vawo vene, ottiya ejo kakala wofiyedheya na abali vina arogora. (Gano 18:1) Kakosa mabasa anawodhe wukamihedha masiki akala onkosa ejuwene oku bugalila. (Masal. 126:5, 6) Kuttiye elemelelo yawo yowonaga matugumano, odhowa mmabasani a olaleya vina omwengesa Bibilia. Otanalelegevi mareliho awupikirheli Yehova wuvaha musogorho. Mudhidhi ononege weyo nikamihedho na Yehova nroromelo nawo ninelege odhowavi bigonuwa.

18. Ogona wi oyeveliwa nroromelo txini enfwanyeliwe okosa?

¹⁸ Akala mapadduwo agumanilewena wale anowoniha wila onojombeliwa nroromelo kunyimuwe. Koona ejuwene ninga gari wi olibihe nroromelo nawo. Kaloba dhahene ninga mukosile arumiwi a Yezu amulobile Yezu dhahi: “Enjedhedhaní ororomela wehu.” (Lk. 17:5) Ottiya ejo katanalela dhotagiha dhisekeserihu munsunzoni ntti. Ninga yotagiha ya Migeli na Yurai. Kobuwela dila dhotene dhukamihedhile Yehova ninga mwana Vero vina Anel, omulobelele venjene Yehova makamaka akala oli mudhidhi worutxa. Ninga Geydi, wubuwele wi Yehova onele wuvaha nikamihedho modhela walabihedha anamudhi obe amarho. Weyo ogamuttiya Yehova wukamihedha owanana makattamiho angumaniwena masaka abano onele okanavi nroromelo nowi iyene onele wukamihedha owanana makattamiho-makattamihovi anagumaniwena musogorho.

19. Njedhelo gani nana Yezu, nanda weyo onfwanyela okana ebaribari gani?

¹⁹ Ebaribari wi Yezu wahona dhipaddi dhing’onvi dhafwanyela anamafwara aye, olibiha nroromelo. Mbwenye txipo kana waganyedha wi na nikamihedho na Yehova awene agahiwodha owanana na makattamiho agagumanilena awene musogorho. (Jo. 14:1; 16:33) Yezu wankuluvela wi onele okalawo muttitti munddimuwa obuwene onavuneye va goyi enddimuwa sabwa ya okana nroromelo noliba. (Ovuh. 7:9, 14) Koddi weyo onele owodha ovuneya vamodha na muttitti obu munddimuwa? Modhela mahala a Yehova weyo onele owodha okala na awene, mbwenye wi ejuwene epadduwe kapura gari yotene ena weyo wi olibihe nroromelo nawo!—Aheb. 10:39.