Omwa dholelezeliha na ovipimelela kahiyo ottega. Bibilia onloga wi vinyu nvaho wa Mulugu, ona ewodhelo ya onagalaliha. (Masal 104:14, 15; Kohelét 3:​13; 9:7) Bibilia vina onologa wi vinyu onokamihedha egumi yehu.​—1 Timóteo 5:​23.

 Vali Yezu velaboni ya vati, wahimwa vinyu. (Mateu 26:29; Luka 7:​34) Iyene wahikosa matikiniho, basaddula manje bakala vinyu vafestani a matelo.​—Joau 2:​1-​10.

Ngovi ya omwa dholezeliha sovipimelela

 Ebaribari wi Bibilia onologa vinyu na mukalelo wapama, mbwenye onokona omwa vaddiddi obe olezela. Nona mukristu ongana omwa, onofwanyelela ovipimelela. (1 Timóteo 3:8; Tito 2:​2, 3) Bibilia onovaha mwaha dhinji dha omwa novipimelela, koona mwaha dhing’onovi:

•   Omwa sovipimelela onononga etanalelo vina onopigidha omuttu wehu. (Gano 23:29-​35) Muttu wamulezeli kanwodha wiwelela malamulo a ‘opereka maningo ehu ninga mukutto wamento, wokoddela, onimuzivela Mulugu. Ekalelo yomwebedhana Mulugu wofwanyelela, jijiwene bahi.’—Roma 12:1.

•   Muttu wamulezeli kankana ewodhelo ya oviyang’anela vina onorimeliwa ‘ttima ya okosa dhili dhapama.’​—Ozeya 4:​11; Éfeso 5:​18.

•   Olezela onodhaga onittukulela oyelega vina okala aredda.​—Gano 23:21, 31, 32.

•   Omwa vaddiddi vina olezela dhilobo dhinimusilidha Mulugu.​—Gano 23:20; Galásia 5:​19-​21.

Okwaranya maddile txini?

 Muttu onkwaranya maddile a omwa dholezeliha akala onomwa mpaka ovitotela makattamiho obe watotela attu ena. Olezela kintapulela omwa mpaka omotta bahi. Bibilia onologa vizinddiyelo dhinoniha wi muttu okwaranya maddile. Ninga motagiha iyene onoduwala dhipaddi dhina dhinziwiye, onoziveliwa kani, kanwodha ologa deretu vina onedda bagadederuwa. (Job 12:25; Masal 107:27; Gano 23:29, 30, 33) Masiki muttu onmwa vaddiddi mbwenye sohilezela, txino ‘onosegedheya . . . na ottabwiha omwawa . . .’, ejuwene enamuttukulela okana makattamiho menjene.​—Luka 21:34, 35.

Mudhidhi gani onfuniwanihu orabela kakamwe omwa

 Bibilia onologa wi dila dhina enokala Mukristu orabela omwa dholezeliha, ninga motagiha:

•   Akala omwa wawo onomukakattutxa muttu mwina.​—Roma 14:21.

•   Akala omwa dholezeliha onolupa malamulo a elabo yehu.​—Roma 13:1.

•   Akala ninokana ekaro(vício) ya dhomwa dholezeliha. Mulezeli obe ole ommwa vaddiddi onofwanyela wimetxa malamulo apama.​—Mateu 5:​29, 30.