Bibilia onloga: “Attu aliwo anoziwa wi anere’okwa; vano aliba okwa kanziwa elo-wene.” (Kohelét 9:5; Masal 146:4) Nona, nigakwa, ninottiya okalawo. Abale akwile kanubuwela, kankosa elobo nne kantanalela.

“Onowiyelela okala mbwebwe wokokene”

 Ninoziwa ennipadduwela nigakwa modhela mazu amwaddele Mulugu mulobwana woroma, Adamu, mudhidhi omusadduweliye. Mulugu wahimwaddela dhahi: “Vowi weyo oli mbwebwe, onowiyelela okala mbwebwe wokokene.” (Wita 3:19) Mulugu ahinatti ‘ompaddutxa vamattakani,” Adamu kaliwo. (Wita 2:7) Jijuwene empadduwele mumaleliye okwa, iyene ohiyelela okala mattaka vina ottiya okalawo.

 Yakene jinapadduwela abale ankwa masaka abano. Bibilia awaddagana attu na vinama dhina, ohiloga: “Otene abudduwile mmattakani, mmattakanimwa anowiyelelamo.”​—Kohelét 3:19, 20.

Okwa kahiyo omagomo wa dhetene

 Bibilia dila dhinji onoladdaniha okwa na tturo. (Masal 13:3; Joau 11:11-14; Merelo 7:60) Muttu agakala mutturoni kanziwa dhimpadduwa mwilaboni. Na mukalelo wakakene, abale akwile kanziwa elo. Mbwenye Bibilia onosunziha wi Mulugu okana ewodhelo ya wavenyiha amarafula mutturoni wi eyelele okalawo wili. (Job 14:13-15) Mwa abale anavenyihiwe na Mulugu, okwa kunakale omagomo wa dhotendhene okwa kahiyo omagomo wa dhotedhene.