“Nvaho wa Ologa dhilogelo dhinji” yali ewodhelo yotikiniha yana Akristu a nsaka na arumiwi. (Merelo 10:46) Ewodhelo eji yannawodhiha ologa dhilogelo dhina dhahasunzilani. (Merelo 2:​4-8) Mudhidhi walogani, abale aziwa elogeloya annonelamo momaguva. Nona ologa dhilogelo dhinji wali nvaho wa muya wokoddela wavahile Mulugu Akristu ena a nsaka na arumiwi.​—Ahebreu 2:4; 1 Korinto 12:​4, 30.

•  Nvaho wa ologa dhilogelo dhinji oromile dhavi vina mudhidhi gani?

•  Efunelo ya ologa dhilogelo dhinji yali evi?

•  Nvaho obu ogahikalawovi?

•  Nvaho wa ologa dhilogelo dhinji ogomile mudhidhi gani?

•  Koddi masaka abano attu anowakela Nvaho wa ologa dhilogelo dhinji?

•  Ninawodhe dhavi wazinddiyela Akristu ebaribari?

 Siku noroma nipadduwile matikiniho aba, yali omembesi wa yaka ya 33 E.C. vamattangani a Pentekoste. Anamafwara a Yezu owakwana 120 ahitugumana mwa venevo ‘ahimotteliwa muya wokoddela baroma ologa dhilogelo dhinji’ (Merelo 1:​15; 2:​1-4) Ahitugumana attu a malogo menji vina ‘muttu-muttu wannawiwa anamafwara alogaga na elogelogelo yaye-yaye.’—Merelo 2:​5, 6.

1.   Ononihedhamo wi Akristu nali nlogo nasakuliwe na Mulugu. Mulugu wahilabihedha matikiniho wila atonyihedhe wi wannarumela alabeli aye ororomeleya. Motagiha ohikosa ejuwene na Mizé. (Obudduwa 4:​1-9, 29-​31; Olebeliwa 17:10) Na mukalelo wakakene nvaho wa ologa dhilogelo dhinji yali ezinddiyelo yatonyihedha wi Mulugu wanrumela nikuru nttile na Akristu namalile witeya. Murumiwi Paulo ohileba: ‘dhilogelo kahiyo ezinddiyelo enapuriha akadda mutugumano, mbwenye wa abale ahina nroromelo.’​—1 Korinto 14:22.

2.   Washagiha Akristu wi avahe onamoona. Abale awiwale anamafwara a Kristu siku na Pentekoste ahiloga: ‘Muttu-muttu ohawiwa alaleyaga matikiniho a Mulugu n’elogelo ya owani waye.’ (Merelo 2:​11) Nona, efunelo yamakamaka ya matikiniho aba yali wa washagiha Akristu wi awodhe ‘avaha onamoona wowakwana’ vina ‘wakosa anamafwara a attu a malogo otene’ ninga murumeli Yezu. (Merelo 10:42; Mateu 28:19) Attu owakwana 3.000 onile matikiniho vina ewile onamoona ahidha okala anamafwara sikunene nttile.​—Merelo 2:​41.

 Nne. Mivaho dha muya wokoddela vina wa ologa dhilogelo wali wa mudhidhi mung’onovi. Bibilia wahibaza ologa: ‘Nvaho wa ologa mavuhulo onere ovira, wologa dhilogelo kunakalewo.’—1 Korinto 13:8.

 Anlabihedhiwa Arumiwi wi a’vahe nvaho wa muya wokoddela arumiwi ena, Arumiwi annika mada vamusorho va Akristu ena mwa dhawene annakela mivahodha. (Merelo 8:​18; 10:44-​46) Enoneya ninga wi abale avahiwe mivaho dha muya na arumiwi ka’wodha wavaha attu ena. (Merelo 8:​5-7, 14-​17) Ndoweni none nladdaniho ntti, muttu agavahiwa karta ya weddihana karo, ejo kininvaha ewodhelo ya wakosela makarta attu ena. Nvaho wa ologa dhilogelo ogomile mudhidhi okwile Arumiwi vina wa abale avahiwe na awene.

 Nvaho obu wa ologa dhilogelo ohigoma vyaka zana dhoroma. Movanene, kawo ona ewodhelo ya ologa dhilogelo na guru ya Mulugu. *

 Yezu wahiloga wi elobo egaazinddiyelihile anamafwara aye egali okwela, obuwene ogattukuleli wika dhifunelo dha attu ena vamburoni voroma. (Joau 13:34, 35) Murumiwi Paulo wahisunziha wi okwela egali elobo egawodhile wazinddiyeliha Akristu ebaribari. (1 Korinto 13:​1, 8) Paulo wahiloga wi muya wa Mulugu ogahibala mikalelo mwa Akristu, esene dhinkuweliwa “dhimbala muya.” Mwa mikalelo esi, woromaya Okwela.​—Galásia 5:​22, 23.