Kuchi Chitapo cha Yesu Muchisa Kupwa ‘Ukuule Kuli Eswe’?

KWAZULULA

Kumbululo lia mu Mbimbiliya

Kupalikila mu chitapo cha ukuule wa Yesu, Zambi kakutulamwina ku shili ni kufwa. Mbimbiliya yakwamba ngwo, manyinga a Yesu waze amwangine, kapwa ngwe ndando ya ukuule. (A-Efwesu 1:7; 1 Petulu 1:18, 19) Kashika Yesu ambile ngwenyi, kejile hashi “nikuhana mwono wenyi ndando ya ukuule hali anji.”—Mateu 20:28.

Mumu liaka ndando ya “ukuule hali anji” yafupiwile?

Lunga mutangu Alama, kamutangile mungunu, hanji ngwetu, keshi shili. Iye kapwile ni uhashi wa kutwama ku miaka yeswe, alioze muze asakwile kwehuka Zambi, yatokesa uhashi wacho. (Uputukilo 3:17-19) Shili yili ngwe umwe kapalia. Kashika, muze Alama apwile ni ana, ana jacho no yaahinga kapalia wacho. (A-Roma 5:12) Ha mukunda wa chino, Mbimbiliya yakwamba ngwo Alama ‘yalilanjisa’ mwene hamwe ni ana jenyi ngwe ndungo ku shili ni kufwa. (A-Roma 7:14) Niumwe wa kuli ana jenyi te mapwa ni uhashi wa kulanda cheka yize Alama atokesele wakuhi, mumu eswe kali yihenge.—Samu 49:7, 8.

Chocho, ana ja Alama te keshi nawa ni kutalatala nichimwe. Alioze Yehova yaavwila keke. (Yoano 3:16) Kashika, Zambi ha ululi wenyi, te katambile kulengulula shili yo hanji kwakonekena wika chamukunekenena chakuhona chitela chalita. (Samu 89:14; A-Roma 3:23-26) Zambi kakuzanga atu, kashika afupile jila ya kutukonekenenamo ni kufuka shili yetu. (A-Roma 5:6-8) Chitapo cha ukuule wa Yesu, ye jila yize Zambi azachishile.

Ukuule yika unalumbunuka?

Mu Mbimbiliya, liji “ukuule” linalumbunuka yuma yitatu:

Kufweta.—Kwalula 3:46, 47.
Kuheha utuswilo, hanji kulamwina.—Kutuhuka 21:30.
Ndando ya ukuule yalita, hanji ngwetu ndando yacho yikwete ulemu umuwika ni chuma chize chinafupiwa kutusula. a

Tala chize yikuma yino yitatu yinatale ha chitapo cha ukuule wa Yesu Kristu.

Kufweta. Mbimbiliya yinambe ngwo, akwa-Kristu ‘hanaalande ni ndando.’ (1 A-Korindu 6:20; 7:23) Ndando yacho yapwile manyinga a Yesu waze alanjile no ‘atu a ku mavungu eswe, ni ku malimi eswe, ni kuli atu eswe, ni ku minyachi yeswe.’—Usolwelo 5:8, 9.
Utuswilo. Chitapo cha ukuule wa Yesu, chakututusula ku shili.—1 A-Korindu 1:30; A-Kolosu 1:14; A-Hepreu 9:15.
Ndando yalita. Chitapo cha ukuule wa Yesu chalita ni yize Alama atokesele—mwono ungunu. (1 A-Korindu 15:21, 22, 45, 46) Mbimbiliya yinambe ngwo: “Mumu chizechene ngwe ku uhulia wa mutu umuwika anji aapwishile yivulumunyi, chocho nawa ku kwononoka cha mutu umuwika [Yesu Kristu] anji kumakaapwisa akwa ululi.” (A-Roma 5:19) Versu yino yinalumbununa chize kufwa cha mutu umuwika chafwetele ndando ya ukuule hali yivulumunyi anji. Chino chinasolola ngwo, ndando ya ukuule yalita. Hachino, atu eswe waze akusa tachi, mahasa kuyuka ha chitapo cha ukuule wa Yesu.—1 Timoteu 2:5, 6.

a Mu malimi waze asonekene Mbimbiliya, liji “ukuule” liakuhana nyonga lia ndando hanji chikumba cha ndando yinji chize akuhana hanga apikule chimwe chuma. Chakutalilaho, mu limi lia A-Hepreu liji ka·phar linalumbunaka “kufuka.” Kanji-kanji liji lino kakulizachisa mu mulali wa kufuka yuma yeswe yipi yize yakulingiwa mumu lia shili. (Samu 65:3) Alioze liji koʹpher kakulizachisa hanga ahanjike ha ndando yize akufweta mumu lia chuma chize chapihia. Mu Mbimbiliya liji lino kanji-kanji kakulivuka ngwo, “ndando ya ukuule.” (Kutuhuka 21:30) Chizechene nawa, liji lia Ngregu lyʹtron, lize kanji-kanji akulumbununa ngwo “chitapo cha ukuulo,” mulihasa nawa kulumbunuka “ndando ya ukuule.” (Mateu 20:28, Almeida, revista e corrigida) Akwa-kusoneka a Ngregu kazachile liji liacho hanga ahanjike ha ndando yize akufweta hanga atusule umwe ndungo.