Ka, hashi kechi keza kanongesaho, kwochaho ni kahia hanji kusalakanyisaho hashi heka. Mbimbiliya yakulongesa ngwo, Zambi katangile hashi hanga atu atwameho ndo ku miaka ya mutolo.

•   “Akwa ululi kumakazuka chifuchi; kumakatwamamo ku miaka ya mutolo.”—Samu 37:29.

•   “[Zambi] wasele fundamentu ya hashi hanga kuyichi kanyika ndo ku miaka ya mutolo.”—Samu 104:5.

•   “Hashi hakusala chizechene ha miaka.”—Chilumbununyi 1:4.

•   “Yoze wawumbile hashi nikulingaho. Wakoleseleho, katangileho hahululu, watangileho hanga atu akatwameho.”—Izaia 45:18.

 Zambi kechi kwecha hanga atu onwone hashi heswe mumu lia poluição, jita, hanji ni chuma chikwo. Mumu kwamba umwenemwene Zambi mwe makonwona “waze akwonwona hashi.” (Usolwelo 11:18) Kuchi iye makachilinga?

 Zambi makachiza mawanangana a hashi waze keshi kufunga hashi ni kusalakanyisaho Wanangana wenyi ungunu wa mu malilu. (Daniele 2:44; Mateu 6:9, 10) Yesu, Mwana wa Zambi mwe makapwa mwanangana wa Wanangana wacho. (Izaia 9:6, 7) Muze Yesu apwile hano hashi, kalingile yikomokeso yize yasolwele ngwo kali ni ndundo ja kusongwela tachi ja hashi ngwe luyinda wa chisemewa. (Marku 4:35-41) Yesu ngwe Mwanangana wa Wanangana wa Zambi, makahasa kusongwela yuma yeswe hashi hamwe ni clima. Iye makalulieka yuma yeswe ya hashi hanga hashi hakapwe paraisu ngwe chize wapwile munda wa Endene.—Mateu 19:28; Luka 23:43.

 Ka, hi chocho ko. Nyonga lino liasolokele mumu lia chize atu akulumbununa chipi chisoneko cha 2 Petulu 3:7, chinambe ngwo: “Malilu aze a haliapwila, ni hashi, . . . hanayitulikila kahia.” Alioze tutalenu yikuma yaali yize yakutukwasa kupwa ni ulumbunwiso walita wa maliji wano:

1.   Mu Mbimbiliya liji “malilu,” “hashi,” ni “kahia” mahasa kupwa ni ulumbunwiso unji. Chakutalilaho, mukanda wa Uputukilo 11:1, unambe ngwo: “Hashi heswe hapwile limi limuwika ni kuhanjika chimuwika.” Ha chisoneko chino, liji “hashi” linalumbunuka atu.

2.   Maliji a helu a mukanda 2 Petulu 3:7, kanasolola yize yinalumbunuka malilu, hashi ni kahia. Versu 5 ni 6 yinatese yuma ni matangwa a Noa. Ha mashimbu a Noa yuma yeswe hashi kayinongesele, chipwe chocho hashi yihanunga. Kwamba pundu, “hashi” anongesele ku sanga lia meya, kapwile atu waze apwile ni kulinga upupilo. (Uputukilo 6:11) Sanga lia meya lianongesene nawa “malilu” hanji ngwetu, atu waze apwile ni kuyula ha mashimbu jacho. Chocho atu api yapwa kunongesa, alioze hashi hetu ka. Noa ni usoko wenyi yaalamwina ku sanga lia meya, chocho yazalisa hashi ni ano hanyima lia sanga lia meya.—Uputukilo 8:15-18.

 Chizechene ngwe sanga lia meya, “kahia” kaze anatongola ha 2 Petulu 3:7, kanalumbunuka unongeso wa atu api, hi wa hashi ko. Zambi kanalakenya “malilu aha ni hashi haha” haze “hakutwama ululi.” (2 Petulu 3:13) “Hashi haha” hanalumbunuka atu aha waze makatwama hashi ni kwayula ku “malilu aha” hanji ngwetu Unguvulu waha—Wanangana wa Zambi. Wanangana wacho we muukapwisa hashi heswe paraisu.—Usolwelo 21:1-4.