Jita ya Armagedone yinalumbunuka jita yakasula ya Zambi ni manguvulu ja atu. Alioze musono, manguvulu jacho ni waze akwakwasa kakulimika ni Zambi ha kulituna kumwononokena. (Samu 2:2) Jita ya Armagedone muyikonwona manguvulu eswe a hashi.—Daniele 2:44.

 Liji “Armagedone” liakusoloka kamuwika mu Mbimbiliya mu mukanda wa Usolwelo 16:16. Kupalikila mu umwe uprofeto, mukanda wa usolwelo unasolola ngwo “kuma kuze anavulukako mu Hepreu ngwo Armagedone,” “mianangana a yifuchi yeswe ya hashi,” makaakungulwila hamuwika “ku jita ya tangwa linene lia Zambi Mukwa-Ndundo-Jeswe.”—Usolwelo 16:14.

 Iya makasa jita ya Armagedone? Yesu makasongwela mbunga ja maswalale aze ali mwilu hanga ase jita ni akwa-kole ja Zambi ni kwakumba. (Usolwelo 19:11-16, 19-21) Akwa-kole jacho, kanachingi waze akulimika ni wata wa Zambi ni kuulelesa.—Ezekiele 39:7.

 Shina jita ya Armagedone muyikalingiwa ku Medio Oriente? Ka. Shimbu akayilinge wika mu chihela chimuwika, jita ya Armagedone makayilinga hashi heswe.—Jeremia 25:32-34; Ezekiele 39:17-20.

 Liji Armagedone yize mashimbu amwe akuvuluka ngwo “Har–magedohn” (Mu limi lia Hepreu Har Meghiddohn), linalumbunuka ‘mulundu wa Megidu.’ Megidu yapwile mbonge ya mu Izalele ya shakulu. Sango jakutulweza ngwo, ku chihela chacho, kapwile ni kwasako jita, jita yimwe yakuchihela chacho, kayisoneka mu Mbimbiliya. (Akwa Kuyula 5:19, 20; 2 Mianangana 9:27; 23:29) Alioze, liji Armagedone kuyishi kulumbunuka wika chihela cha Megidu. Mumu ku chihela chacho kukushi mulundu unene. Chikwo nawa, chipwe kuchingako Yezerele chihela chize chapwila hakamwihi ni Megidu, muchipwa chikalu hanga eswe waze masa jita ni Zambi, kutamo. Kashika, liji Armagedone linalumbunuka kulichinga cha mianangana a hashi heswe hanga alimike ni wanangana wa Zambi.

 Kuchi Zambi makasa jita ya Armagedone? Twanyingikine chize makazachisa ndundo jenyi, alioze iye mahasa kuzachisa chiwe, minyiko yinene, sanga lia meya, fundanga, ni musongo, ngwe chize alingile ku mashimbu akunyima. (Yombi 38:22, 23; Ezekiele 38:19, 22; Habakuke 3:10, 11; Zekaria 14:12; Ezekiele 38:21, 23; Zekaria 14:13) Mumu lia kalumbanganyiso, akwa-kole ja Zambi makalishiha umwe ni mukwo, kusongo makanyingika ngwo Zambi mwe unase jita no.— Ezekiele 38:21, 23; Zekaria 14:13.

 Shina jita ya Armagedone muyikanongesa hashi heswe? Jita ya Armagedone kuyishi keza kanongesa hashi heswe, mumu Mbimbiliya yakusolola ngwo atu makatwama hashi ku miaka ya mutolo. (Samu 37:29; 96:10; Chilumbununyi 1:4) Shimbu yinongese atu eswe, armagedone muyikalamwina “mbunga yinene” ya tuvumbi twa Zambi.—Usolwelo 7:9, 14; Masamu 37:34.

 Liji “hashi” mu Mbimbiliya kanji-kanji liakumbunuka atu api waze akulimika ni Zambi. (1 Yoano 2:15-17) Kashika, mutuhasa kwamba ngwetu, armagedone kumakaneha songo lia hano hashi.—Mateu 24:3.

 Tangwa lika jita ya Armagedone muyikalingiwa? Ha kuhanjika hakutwala ku luyinda munene yoze makatwala ku jita ya Armagedone, Yesu kambile ngwenyi: “Alioze ha kutwala ku tangwa lize ni ola yize niumwe kayinyingike, chipwe angelo a mwilu ka, alioze Tata wika.” (Mateu 24:21, 36) Chipwe chocho, Mbimbiliya yakulongesa ngwo Armagedone muyikalingiwa ha mashimbu akuyula cha Yesu mu malilu, chize chaputukile ha mwaka 1914.—Mateu 24:37-39.