Kuchi te Chifwa cha Yesu Chapwa?
Kumbululo lia mu Mbimbiliya
Niumwe unanyingika kanawa chize chifwa cha Yesu te chapwa wakuhi, mumu Mbimbiliya kuyishi kuhanjika ha chikuma chacho. Chino chinalumbunuka ngwo, chifwa chenyi hi chuma chilemu ko. Chipwe chocho Mbimbiliya yakutwaha nyonga lia chize Yesu te apwa.
Kupwa chenyi: Yesu kapwile Ka-Yunda. Kashika kupwa chenyi kota te chalifwa ni atu a ku munyachi wa naye. (A-Hepreu 7:14) Chino chakusolola ngwo Yesu te kalisele chinji ni atu akwo. Kashika, ha chisuho chimwe muze akatukile ku Ngalileya ni kuya ku Yerusaleme atu kahashile kumusela chinyingi. (Yoano 7:10, 11) Chipwe hakachi ka tumbaji twenyi, kupwa chenyi te kuchalisele chinji. Tuli ni shindakenyo mumu chafupiwile kumusolola kuli Yundase hakachi ka mbunga. Chino chinasolola ngwo iye te kalifwa ni atu akwo.—Mateu 26:47-49.
Kambu jenyi: Kota Yesu kakapwile ni kambu jisuku-jisuku, mumu Mbimbiliya yakusolola ngwo, “lunga nyi mapwa ni kambu jisuku jinapu kaleleso kuli iye.”—1 A-Korindu 11:14.
Wevu wenyi: Yesu kapwile ni wevu. Kapwile ni kukaula shimbi ja A-Yunda jize jakukanjisa malunga ngwo, “kanda nukapihisa masongo a wevu.” (Ulevi 19:27; A-Ngalashia 4:4) Chikwo nawa, Mbimbiliya yakuhanjika ha wevu wa Yesu ha umwe uprofeto hakutwala ku lamba lize te mamona.—Izaia 50:6.
Mujimba: Sango jakusolola ngwo Yesu kapwile ni tachi ku mujimba. Mu mulimo wenyi wa kwambujola hano hashi, kalingile wenyi usuku-usuku hashi. (Mateu 9:35) Ha yisuho yaali, kayile mu tembele ni kumwanga yuma ya waze apwile ni kulanjisamo. Ha chisuho chikwo nawa, Yesu yahosa shikote ya mihipu, yatuhwisa eswe mu Tembele, ni mapanga ni ngombe. (Luka 19:45, 46; Yoano 2:14, 15) Yimwe enciclopédia yinambe ngwo: “Mikanda yeswe ya Evangelu yakusolola ngwo [Yesu] kapwile ni tachi ni chihindu chipema.” Volume IV, lifwo 884.
Chifwa chenyi: Yesu kapwile mutu wa zango yoze te wakulihulumba hali atu. Kwamba umwenemwene chifwa chenyi chapwile ni kusolola kanawa yitanga yino. (Mateu 11:28, 29) Atu eka ni eka kapwile ni kuya kuli iye hanga aalembejeke ni kwakwasa. (Luka 5:12, 13; 7:37, 38) Chipwe twanuke no kapwile ni kulivwa kanawa kupwa hamwe ni Yesu.—Mateu 19:13-15; Marku 9:35-37.
Mahuza hakutwala ku chize Yesu apwa
Mahuza: Atu amwe kakwamba ngwo, munyachi wa Yesu wakatukile mu África mumu ngwo mukanda wa Usolwelo wakutesa kambu jenyi jitoma ngwe wanda, “yiliato yenyi ya kulifwa ni kengelia ya kulejima.”—Usolwelo 1:14, 15.
Umwenemwene: Mukanda wa Usolwelo kausonekene mu “yilayi.” (Usolwelo 1:1) Muze Mbimbiliya yinatongola kambu ni molu a Yesu hano, kuyishi ni kuhanjika ha chize Yesu te apwa muze apwile hano hashi. Alioze yinahanjika ha yitanga yize Yesu te mapwa nayo muze mamuhindwisa. Mukanda wa Usolwelo 1:14, unambe ngwo, ‘mutwe [wa Yesu] ni kambu jenyi jitoma ngwe wanda, jitoma ngwe neve.’ Chino chinashindakenya ha ulombo wa kambu ja Yesu, hi ha mutapu wa kambu jenyi ko. Kutesa chino chinasolola ngwo Zambi kapwile mukwa-mana, chizechene ngwe apwa mutu yoze hapwa ni kambu jitoma.—Usolwelo 3:14.
‘Yiliato ya [Yesu] ya kulifwa ni kengelia ya kulejima, ngwe ya kusaya mu lutengo munene.’ (Usolwelo 1:15) Chikwo nawa, “ku meso jenyi kwapwile ngwe lie tangwa muze mulipanguka ni tachi jalio.” (Usolwelo 1:16) Kukwatwamine atu waze akwete yifwa ngwe yino. Chino chinalumbunuka ngwo, maliji wano kali ngwe yilayi, yize yinalumbunuka ngwo, muze amuhindwishile ‘yatwama mu pangu lize keshi kuhasa kukundamako,’ hanji ngwetu niumwe mutu kechi kuhasa kumonamo.—1 Timoteu 6:16.
Mahuza: Yesu kapwile mulelu, chihonge.
Umwenemwene: Chino hi chamwenemwene ko, Yesu kapwile ni tachi ni hamu. Chakutalilaho, muze atu ayile hanga amukwate, iye yasolola hamu ni kulisolola kuli ayo. (Yoano 18:4-8) Yesu nawa kota kapwile ni tachi, mumu kapwile karpinderu, mulimo uze wakufupiwa tachi jinji.—Marku 6:3.
Mba mumu liaka Yesu afupiwile ukwaso wa kumbata mutondo uze te mamuhachilaho? Chikwo nawa, mumu liaka iye aliangile kufwa hakachi ka atu waze apwile hamwe nenyi? (Luka 23:26; Yoano 19:31-33) Shimbu te kanda achifwa, Yesu kamulambile chinji kashika te kanahongo chinji. Kanongamine ufuku wa muundu mumu te kanasakalala chinji. (Luka 22:42-44) Ha ufuku, A-Yunda kamuhungumionene mba mukwachako, A-Roma no yamulamba chinji. (Mateu 26:67, 68; Yoano 19:1-3) Yino yeswe yalingishile hanga iye aliange kufwa.
Mahuza: Yesu kapwile mukwa-kulivutula, te keshi kuwahilila.
Umwenemwene: Yesu kapwile ni kwimbulula kanawa yitanga ya Tato, Yehova, yoze Mbimbiliya yakuvuluka ngwo Zambi ya uwahililo. (1 Timoteu 1:11; Yoano 14:9) Chikwo nawa, Yesu kalongesele atu yuma yize atamba kulinga mba awahilile. (Mateu 5:3-9; Luka 11:28) Chino chinasolola ngwo Yesu kapwile mukwa-kuwahilila, chipwe chifwa chenyi te che chakusoloka.
Kota Muzanga Chinji Yuma Yize Mumona
ESSENTIAL BIBLE TEACHINGS
Kuchi Mutuhasa Kupwa ni Shindakenyo Ngwetu Mbimbiliya Yili Yamwenemwene?
Nyi Mbimbiliya yakatuka kuli Zambi, yatamba kulisa chinji ni mikanda yikwo.
SANGO JA YETU
Eta Umwe Eze ni Kukumeneka
Kushimutwina chimwe chihula cha mu Mbimbiliya, kunyingika yuma yinji hakutwala kuli Yela ja Yehova.