Yesu kalamwinyine atu ashishika, muze ahanyine mwono wenyi ngwe chitapo cha ukuule. (Mateu 20:28) Kashika Mbimbiliya yakuvuluka Yesu ngwo, “Chilamwina cha akwa hashi.” (1 Yoano 4:14) Yakwamba nawa ngwo: “Ulamwino wakuhi muli mukwo niumwe: mumu chipwe jina lieka liakuhi kushi lia lilu, nilimwe, lize hanalihana hakachi ka atu; atulamwine nalio.”—Yilinga 4:12.

 Yesu ‘kamwene kufwa hali atu eswe,’ waze akumufuliela (A-Hepreu 2:9; Yoano 3:16) Hanyima “Zambi wamuhindwishile hakachi ka afu” mba Yesu yahiluka mwilu ngwe mutu wa spiritu. (Yilinga 3:15) Kashika Yesu “kanahase nawa kulamwina ndo ku songo, waze akukundama kuli Zambi mu jina lienyi, se matangwa eswe katwama ni mwono mukuahakwila,” hanji ngwetu kwahanjikila kuli Zambi.—A-Hepreu 7:25.

Mumu liaka twakufupiwa hanga Yesu atuhakwile?

 Mumu tulieswe tuli akwa-shili. (A-Roma 3:23) Shili yapwa chipanga hakachi ka yetu ni Zambi, kashika shili yacho yakutwala ku kufwa. (A-Roma 6:23) Alioze Yesu kakukalakala ngwe “hako” hanga akwase atu waze akufuliela ha chitapo chenyi. (1 Yoano 2:1) Yesu kakuhakwila atu jacho ha kwita kuli Zambi hanga apanjike yilemba yo ni kukonekena shili yo. Iye kakuchilinga kupalikila mu chitapo cha ukuule. (Mateu 1:21; A-Roma 8:34) Zambi kakutayiza kwita chetu kupalikila muli Yesu mumu chakulita ni upale wenyi. “Zambi katumine Mwanenyi hano hashi hanga akapatwile akwa hashi, alioze hanga akwa hashi akawane ulamwino muli iye.”—Yoano 3:17.

Shina kufuliela wika muli Yesu che muchikatulamwina?

 Ka. Tunanyingika ngwetu twatamba kufuliela muli Yesu mba akatulamwine. Alioze kuli yuma yikwo yize twatamba kulinga. (Yilinga 16:30, 31) Mbimbiliya yakwamba ngwo: “Mumu chizechene ngwe mujimba kuushi spiritu kuunafu, chocho nawa ufulielo kuushi yitanga kuunafu.” (Tiangu 2:26) Nyi tunazange akatulamwine, twatamba:

•   Kulilongesa hakutwala kuli Yesu ni Tato, Yehova.—Yoano 17:3.

•   Kufuliela muli ayo.—Yoano 12:44; 14:1.

•   Kusolola ufulielo wetu ha kwononokena shimbi jo. (Luka 6:46; 1 Yoano 2:17) Yesu kalongesele ngwenyi hi eswe ko mamba kuli yami ngwo, “Mwene,” makaalamwina, alioze waze wika ‘akulinga upale wa Tato yoze uli mu malilu.’—Mateu 7:21.

•   Kununga ni kusolola ufulielo wetu chipwe muze mutupwa mu yipikalo. Yesu kasolwele chikuma chino zwalala muze ambile ngwenyi: “Mweswe manyongonona ndo ku songo, kumakamulamwina.”—Mateu 24:13.