Tunanyingika ngwetu, Mbimbiliya kuyishi kuzachisa liji “kuselumuna” hanga yihanjike ha nyonga kuzanga kuchiza ufumba. Alioze yisoneko yinji mu Mbimbiliya yakusolola nyonga lia Yehova hakutwala ku mwono wa mutu, chipwe wa mwana yoze uchili mu jimo.

 Mwono uli chawana cha Zambi. (Uputukilo 9:6; Masamu 36:9) Mutu mweswawo mwono wenyi wapwa ulemu chinji kuli Zambi, chipwe wa mwana yoze uchili mu jimo. Kashika, kuchiza kushiha mwana yoze kanda achisemuka ku zango lia mutu mwene, che chimuwika ni kushiha mutu yoze hanasemuka.

 Shimbi yize Zambi ahanyine kuli A-Izalele wapwile ni kwamba ngwo: “Nyi kachi atu amwe mazwela, mba malemeka kafumbakaji chocho maselumuna mwana, alioze kukuchi kupwa ulema, akamufwetese lume, nikulita ni chize mukwo-lunga mamusela. Iye akafwete ngwe ngaji matongola. Alioze nyi kachi ulema umwe muusoloka kachi akahane mwono ha mwono.”—Kutuhuka 21:22, 23. a

•  Ha shimbu lika mwono wa mutu wakuputuka?

•  Shina Zambi makakonekena mutu yoze wachijile ufumba ku zango lienyi mwene?

•  Shina chili chipi kuchiza ufumba nyi mwono wa mwana hanji wa naye uli mu ponde?

 Kulita ni Zambi, mwono wa mutu wakuputuka ha tangwa lize pwo akupwa kafumba. Yisoneko yinji ya mu Mbimbiliya yakusolola ngwo, kuli Zambi mwana yoze uchili mu jimo, neye kali mutu. Tutalenu yilweza yimwe yize yinasolola ngwo, Zambi kakumona mwono wa mwana yoze uchili mu jimo ngwe wa yoze hasemuka.

•   Ni usongwelo wa Zambi, Mwanangana Ndawichi yamba kuli Zambi ngwenyi: “Meso je amwene mujimba wami shimbu kanda uliwumba.” (Samu 139:16) Zambi te kakumona Ndawichi ngwe mutu shimbu te kanda achisemuka.

•   Shimbu profeta Jeremia te kanda asemuka, Zambi te hanatese kumwaha chiteli chalipwila. Zambi yamba kuli Jeremia ngwenyi: “Shimbu kanda nguchikuwumba mu jimo nakunyingikine; shimbu kanda uchisemuka nakutumbikilile; nakusele ukapwe profeta ku mavungu.”—Jeremia 1:5.

•   Luka umwe wa kuli waze asonekene Mbimbiliya, kapwile mbuki, chocho yazachisa liji lia Ngregu hanga ahanjike hali mwana yoze uli mu jimo lia naye ngwe mwana yoze hasemuka.—Luka 1:41; 2:12, 16.

 Mutu yoze wachijile ufumba Zambi mahasa kumukonekena. Nyi ngwe haliapwila mutu wacho kakutayiza nyonga lia Zambi hakutwala ku mwono, iye katambile kulilamikiza. “Yehova hazala too ni keke ni vumbi . . . Chize wapwa usuku wa Chivumbuko ndo ku Chitokelo, chocho akuhandununa kuli yetu utanguko wetu.” b (Samu 103:8-12) Yehova kakukonekena atu eswe waze akulikonyeka ni mbunge yo yeswe ha shili yize alingile kunyima, chipwe lume waze achijile ufumba.—Samu 86:5.

 Kulita ni yize Mbimbiliya yakwamba hakutwala ku mwono wa mwana yoze kanda achisemuka, chili chipi kushiha mwana wacho chipwe ngwe mwono wenyi hanji wa naye muupwa mu ponde.

 Muchihasa kulingiwa ha mashimbu a kushita, mukusoloka umwe kapinda munene yoze mahasa kulingisa atu hanga asakule kulamwina mwono wa mwana hanji wa naye. Ha chikuma ngwe chino, atu waze anatale ha chuma chacho katamba kusakula mutu yoze malamwina.