Iya Makaya mu Malilu?
Kumbululo lia mu Mbimbiliya
Zambi kasakwile chizavu chikehe cha Akwa-Kristu ashishika waze hanyima lia kufwa akwahindwisa hanga akatwame mu malilu. (1 Petulu 1:3, 4) Muze Akwa-Kristu jacho akupwa kusakula, o katamba kununga ni kushishika kuli Zambi ni kulinga yize iye akuzanga. O katamba kununga ni kukolesa ufulielo wo ni kusolola yitanga yipema hanga achine kutokesa uhashi wo wa kutwama mu malilu.—A-Efwesu 5:5; A-Fwilipu 3:12-14.
Atu waze makaya mu malilu yika makalingamo?
Akwa-Kristu jacho makayula hamwe ni Yesu ngwe mianangana ni asasendote ha kanunu ka miaka. (Usolwelo 5:9, 10; 20:6) O makalinga chihanda cha “malilu aha” hanji ngwetu unguvulu wa mu malilu hanga akayule “hashi haha” hanji ngwetu atu waze makatwama hano hashi. Waze makayula mu malilu makakwasa atu hano hashi hanga apwe angunu, ngwe chize Zambi azangile chize ku uputukilo.—Izaia 65:17; 2 Petulu 3:13.
Atu angahi makahindwisa hanga akatwame mu malilu?
Mbimbiliya yakusolola ngwo unji wa atu 144,000 makaahindwisa hanga akatwame mu malilu. (Usolwelo 7:4) Mu umwe usolwelo uze unasonewa mu mukanda wa Usolwelo 14:1-3, postolo Paulu kamwene “Mwana-panga, kanamana ha Mulundu wa Zaione, ni hamwe nenyi kulakaji, ni makumi awana, ni tununu awana (144,000).” Mu usolwelo wacho “Mwana-panga” kanalumbunuka Yesu hanyima lia kumuhindwisa. (Yoano 1:29; 1 Petulu 1:19) “Mulundu wa Zaione” unalumbunuka wata wa Yesu ni wa atu 144,000 waze anayulu mu malilu.—Samu 2:6; A-Hepreu 12:22.
Akwa-Kristu jacho waze ‘hanaatambika ni kwatongola,’ hanga akayule hamwe ni Yesu mu malilu, kakwavuluka ngwo “mbunga yikepe ya mapanga.” (Usolwelo 17:14; Luka 12:32) Chino chinasolola ngwo o kali akehe nyi twatesa ni mapanga akwo a Yesu.—Yoano 10:16.
Mahuza hakutwala kuli atu waze makaya mu malilu
Mahuza: Atu eswe apema makaya mu malilu.
Umwenemwene: Zambi kanalakenya ngwenyi, atu anji apema makatwama hano hashi ku miaka ya mu mutolo.—Samu 37:11, 29, 34.
Yesu kambile ngwenyi: “Niumwe hanayi mwilu” wakuhi. (Yoano 3:13) Iye kasolwele nawa ngwenyi atu apema waze aliangile kufwa shimbu iye te kanda afwa ngwe Apalahama, Mose, Yombi ni Ndawichi kakayile mu malilu. (Yilinga 2:29, 34) Alioze o kapwile ni kutalatala cha uhindukilo ni kutwama hano hashi.—Yombi 14:13-15.
Uhindukilo wa waze makatwama mu malilu kakuuvuluka ngwo, “uhindukilo utangu.” (Usolwelo 20:6) Chino chinalumbuka ngwo, mukukapwa nawa uhindukilo ukwo, uze muukalingiwa hashi.
Mbimbiliya yakulongesa ngwo, mushi lia Wanangana wa Zambi, ‘kufwa kuchichi kapwako nawa.’ (Usolwelo 21:3, 4) Chilakenyo chino muchikamanunuka hano hashi, mumu mu malilu kufwa kwatwaminemo.
Mahuza: Mutu ni mutu mahasa kusakula nyi matwama mu malilu nyi hano hashi.
Umwenemwene: Zambi mwe wakusakula hakachi ka Akwa-Kristu mutu yoze mazuka “kwononona cha kutambika cha kwilu” hanji kutalatala cha kutwama mu malilu. (A-Fwilipu 3:14) Chipwe ngwe mutu mazanga chinji kutwama mu malilu, nihindu Zambi mwe masakula kuze mutu wacho makatwama.—Mateu 20:20-23.
Mahuza: Kutalatala cha kutwama hashi kakuchihana wika kuli atu waze katelele kuya mu malilu.
Umwenemwene: Zambi kakuvuluka atu waze makatwama ku miaka yeswe hano hashi ngwenyi, “atu jami” waze “natongwele” ‘akuwahisa kuli Yehova.’ (Izaia 65:21-23) Atu jacho makapwa ni chiwape cha kumanununa upale wa Zambi hali atu, hanji ngwetu kwapwisa angunu ni kutwama ku miaka ya mutolo mu paraisu hano hashi.—Uputukilo 1:28; Masamu 115:16; Izaia 45:18.
Mahuza: Unji wa atu 144,000 waze atangola mu mukanda wa Usolwelo kali chilayi, hi ya pundu ko.
Umwenemwene: Chili umwenemwene ngwo, mukanda wa Usolwelo muli kwalula chimwe chize chapwa yilayi, alioze kwalula chimwe ka. Chakutalilaho, mukanda wa Usolwelo wakuhanjika ha majina “ja e kumi ni apostolo aali a mwe Mwana-panga.” (Usolwelo 21:14) Tala yuma yize yakutwaha shindakenyo ngwo, kwalula cha atu 144,000 hi chilayi ko.
Usolwelo 7:4 wakwamba ngwo, “waze aajikile ni chijikilo ngwo, Kulakaji, ni makumi awana, ni tununu awana, (144,000).” Kulutwe mukanda unowene wa Usolwelo unatese chizavu chino cha atu 144,000 ni chizavu chikwo. Chisoneko chinahanjika ha “mbunga yinene, yize niumwe mahasa kwalula.” Atu waze ali mu kachi ka mbunga yacho ni makaalamwina kuli Zambi. (Usolwelo 7:9, 10) Nyi ngwe kwalula cha 144,000 chili chilayi ni kuhanjika ha unji wa atu waze kutwatambile kwalula, kachi kutesa cha yizavu yaali kuchalitele. a
Mukanda wa Usolwelo wakwamba nawa ngwo, atu 144,000 “aalanjile hakachi ka atu ngwe mihuko yitangu.” (Usolwelo 14:4) Maliji “mihuko yitangu” kakwazachisa hanga asolole yuma yikehe yize yakumanyinako yikwo. Maliji jacho kakusolola kanawa atu waze makaya hanga akayule hamwe ni Yesu mu malilu. Unji wa atu waze makaya mu malilu kali akehe ni twatesa ni mbunga yinene ya waze makatwama hano hashi.—Usolwelo 5:10.
a Umwe Longeshi avuluka ngwo, Robert L. Thomas kasonekene hakutwala ku kwalula cha atu 144,000 waze twakuwana mu mukanda wa Usolwelo 7:4 ngwenyi: “Kwalula chino chalisa chinji chize chili ha Usolwelo 7:4. Mumu nyi kwalula chino chapwa chilayi, chekwamba ngwo, kwalula chiswe anatongola mu mukanda uno yili yilayi. Nichimwe cha pundu chakuhi.”—Usolwelo 1–7: An Exegetical Commentary, lifwo 474.
Kota Muzanga Chinji Yuma Yize Mumona
ESSENTIAL BIBLE TEACHINGS
Wanangana wa Zambi Yika?
Muze Yesu akalakalile mulimo wenyi, te kakulongesa atu hakutwala ku Wanangana wa Zambi kuhiana chuma cheswacho. Ha miaka yinji, atu te kulemba hanga Wanangana wize.
