Yuma yakusolola ngwo Mikele lili jina lia Yesu mu malilu shimbu te kanda achiza hano hashi ni muze afunyine mu malilu. a Mayingeleja amwe kakumuvuluka ngwo “São Miguel.” Mbimbiliya yakwamba ngwo Mikele kalitachikile ni Satana hamukunda wa mujimba wa Mose. Chikwo nawa, kakwashile umwe mungelo kutwala sango kuli profeta Daniele. (Daniele 10:13, 21; Yundase 9) Jina Mikele linalumbunuka ‘Iya yoze walifwa ni Zambi?’ Iye katela kupwa ni jina lino mumu kakukalila unguvulu wa Zambi ni kulimika ni akwa-kole ja Zambi.—Daniele 12:1; Usolwelo 12:7.

 Tala mumu liaka twakwamba ngwetu, Yesu mwe Mikele mungelo wa lutwe.

•   Mikele mwe “Mungelo wa Lutwe.” (Yundase 9) Chisanyiko “mungelo wa lutwe,” linalumbunuka “Mwata wa angelo.” Liakusoloka wika ha versu jaali mu Mbimbiliya. Ha yisuho yeswe yaali muze jina lino liakusoloka, liakukwata hali mungelo umuwika. Chisoneko chimwe chinasolola ngwo, Mwene wetu Yesu “kumakahulumuka mwilu, ni liji lia mutambi, ni liji lia mungelo wa lutwe.” (1 A-Tesalonika 4:16) Yesu kali ni “liji lia mungelo wa lutwe” mumu iye mwe Mikele mungelo wa lutwe.

•   Mikele kakusongwela chilombo cha angelo. “Mikele ni angelo jenyi ashile jita ni ndragau,” hanji ngwetu Satana. (Usolwelo 12:7) Mikele kakwete wata unji mu malimu, mumu kakumuvuluka ngwo “umwe wa akwa lutwe hakachi ka akwa kuyula” ni “mukwa kuyula munene.” (Daniele 10:13, 21; 12:1) Umwe mukwa-kulilongesa Usendo Waha avuluka ngwo, David E. Aune yamba ngwenyi: “Yisanyiko yino yinasolola ngwo Mikele kali kasongo ka angelo mu malilu.”

   Mbimbiliya yakutongola nawa jina lia mutu umuwika yoze ukwete wata helu lia angelo akwo. Yakusolola “usolwelo wa Mwene Yesu mwilu hamwe ni angelo jenyi a tachi, mu kahia ka kulekwoka, akakale milonga.” (2 A-Tesalonika 1:7, 8; Mateu 16:27) Yesu ‘hanayi mwilu.’ Kashika angelo, ni akwa kuyula, ni tachi, kakuzeyela kuli iye. (1 Petulu 3:21, 22) Kuchichi kulita Zambi kutanga Yesu ni Mikele hanga apwe ni chiteli chimuwika cha kusongwela angelo ashishika. Kashika chinalite kwamba ngwetu, Yesu ni Mikele kali mutu umuwika.

•   Mikele “makamana” ha “mwaka wa lamba” lize kanda lisoloka chize ku uputukilo. (Daniele 12:1) Yesu Kristu yoze avuluka ngwo “Lie Liji lia Zambi,” makalinga yuma yinji ngwe “MWANANGANA WA MIANANGANA ESWE,” hanga akanongese akwa-kole eswe a Zambi ni kufunga atu ja Zambi. (Usolwelo 19:11-16) Iye makachilinga ha “luyinda munene, yoze kanda amoneka hano hashi chize ku uputukilo wa hashi.”—Mateu 24:21, 42.