Ewa, Zambi kakulihulumba muze umwe kavumbi kenyi anayiji. Mbimbiliya yinalakenya ngwo: “Yehova mamutakamisa ha muu wenyi wa kukokoloka.” (Samu 41:3) Nyi ukwete musongo uze kuushi kuya, yikuma yino muyihasa kukukwasa:

1.   Lemba ni kwita tachi hanga unyongonone. Muhasa kupwa ni “sambukila ya Zambi, yize yakuhiana kunyonga cheswe.” Sambukila yacho muyihasa kukukwasa kunyongonona ni kuhona kusakalala chinji.—A-Fwilipu 4:6, 7.

2.   Pwako ni nyonga lialita. Mbimbiliya yinambe ngwo: “Mbunge ya chiseke yapwa yitumbo yipema; alioze spiritu yize yamakuka kuyakuumisa yifwaha.” (Yishima 17:22.) Lilongese kupwa mukwa kusehejela, mumu achi muchihasa kukukwasa ku mujimba.

3.   Kolesa ufulielo we ku yuma ya kulutwe lia matangwa. Kutalatala chipema muchihasa kukukwasa kupwa ni uwahililo, chipwe ngwe ukwete musongo uze kuushi kuya. (A-Roma 12:12) Mbimbiliya yakulakenya shimbu lize “niumwe watungako mamba ngwenyi, Ngunayiji.” (Izaia 33:24) Zambi makauka misongo yize kuyishi kuya, misongo yize akwa Ciência musono keshi kuhasa kuuka. Chakutalilaho, Mbimbiliya yinasolola chize ushinakaji muukahwa ha kwamba ngwo: “Musunya wenyi upwe nawa musunya wa ukweze; akahiluke nawa ku tachi ja ukweze wenyi.”—Yombi 33:25.

 Utowezo: Chipwe ngwe Yela ja Yehova kananyingika ngwo Zambi kakukwasa atu, nihindu muze o akuyiza kakuya ni kufupa ukwaso wa mandotolo. (Marku 2:17) Kutushi kusakwila mutu niumwe uukiso uze atamba kutayiza. Mutu ni mutu katamba kukwata chiyulo chenyi mwene ha chikuma chacho.