Shili yinalumbunuka yitanga, manyonga hanji chuma cheswacho chize chakulimika ni shimbi ja Zambi. Yinalumbunuka nawa kwehuka shimbi ja Zambi ni kulinga yuma yipi yize kuyishi kupemena kuli Iye. (1 Yoano 3:4; 5:17) Mbimbiliya yakuhanjika nawa ha shili yize mutu akulinga chipwe ngwe kananyingika chuma chalita chize te atamba kulinga.—Tiangu 4:17.

 Mu limi lize asonekene Mbimbiliya, liji “shili” linalumbunuka “kulwezela ha chuma chize unazange kutondekeza.” Chakutalilaho, ku Izalele ya ku shakulu, kwapwile maswalale waze te akukonga mawe “keshi kulwezela,” hanji ngwetu chakuhona kulinga shili. (Akwa Kuyula 20:16) Kashika, kulinga shili chinalumbunuka kulwezela ha shimbi jingunu ja Zambi.

 Amu Zambi ali Sakatanga wetu, kali ni ulite wakutesa shimbi jize atu atamba kukaula. (Usolwelo 4:11) Kashika, mutu ni mutu, kumakalumbununa kuli Zambi hakutwala ku yitanga yenyi.—A-Roma 14:12.

Shina mutuhasa kwehuka kulinga shili yeswe?

 Ka. Mumu Mbimbiliya yakwamba ngwo, “eswe hanavulumuna, kahetele ku uhenya wa Zambi. (A-Roma 3:23; 1 Mianangana 8:46; Chilumbununyi 7:20; 1 Yoano 1:8) Mumu liaka chino chakulingiwa?

 Atu atangu, Alama ni Eva, te hi akwa-shili ko. O kaatangile angunu, mu chano cha Zambi. (Uputukilo 1:27) Alioze muze ehukile Zambi, yatokesa ungunu wo. (Uputukilo 3:5, 6, 17-19) Kashika, muze asemene ana, no yahinga shili ni uhenge ngwe chizechene chakulingiwa ni musongo uze wakusambuluka. (A-Roma 5:12) Mwanangana Ndawichi katayijile nyonga lino muze ambile ngwenyi: “Chize ku kusemuka chami nguli chihenge.”—Samu 51:5.

Shina shili yimwe yapwa yinene kuhiana yikwo?

 Ewa. Chakutalilaho, Mbimbiliya yakwamba ngwo, atu a mu Sondome kapwile “yingulungulu, akwa kuvulumiona Yehova kuhiana,” chikwo nawa ngwo, ‘shili yo yapihile naye.’ (Uputukilo 13:13; 18:20) Tala yikuma yitatu yize yakupwisa shili kupwa yinene.

1.   Mulali wa shili. Mbimbiliya yakututoweza hanga twehuke kulinga shili yinene ngwe, utanji, kukombelela mahamba, wiji, kuzengewa, kuhianyisa ndando, kushiha mutu ni yipanda-panda. (1 A-Korindu 6:9-11; Usolwelo 21:8) Mbimbiliya yakusolola ngwo, shili ayi yalisa ni yize mutu akulinga chakuhona kunyingika. Ngwe chakutalilaho, kulinga yuma hanji kuhanjika kalusu-lusu ni kulemeka akwetu ku mbunge. (Yishima 12:18; A-Efwesu 4:31, 32) Alioze Mbimbiliya yakusolola nawa ngwo, kutwatambile kulelesa shili niyimwe. Mumu kulinga chino muchihasa kutuvulumwisa shili yinene.—Mateu 5:27, 28.

2.   Manyonga. Atu amwe kakulinga shili mumu kanyingikine shimbi ja Zambi. (Yilinga 17:30; 1 Timoteu 1:13) Mbimbiliya kuyishi kulengulula shili yacho. Alioze yakusolola ngwo chino chalisa ni mutu yoze masakula kwehuka shimbi ja Zambi ku zango lienyi mwene. (Kwalula 15:30, 31) Kulinga shili ku zango lia mutu mwene, chakukatuka ku ‘upale wenyi upi.’—Jeremia 16:12.

3.   Yisuho. Mbimbiliya yakusolola ngwo, hatwama kalisa hakachi ka kulinga shili chisuho chimuwika ni kutenga shili ngwe chako. (1 Yoano 3:4-8) Yehova kakulikenuna ni mutu yoze unanyingika kulinga chuma chalita alioze ‘mavulumuna ku pami.’—A-Hepreu 10:26, 27.

 Mutu yoze walinga shili yinene mahasa kwivwa kulema ku mbunge. Chakutalilaho, Mwanangana Ndawichi kasonekene ngwenyi: “Uhenge wami hiwanguhiana helu lia mutwe wami. Hiwangulemena naye ngwe chiteli chilemu.” (Samu 38:4) Chipwe chocho, Mbimbiliya yakuhana kutalatala chino ngwo: “Chingulungulu akambile ndako jenyi, mukwa uhenge akambile manyonga jenyi. Eze kuli Yehova hanga amuvwile keke; eze kuli Zambi yetu mba mamwaha ukonekeno wa kulumbama.”—Izaia 55:7.