Ka, mayingeleja eswe kalifwile ka. Mu Mbimbiliya muli yilweza yinji ya mayingeleja waze keshi kuvwisa Zambi kuwaha. Kwatwama Milali yaali ya uwayilo uze Zambi keshi kuzanga.

Mulali 1: Kuwayila tuzambi a mahuza

 Mbimbiliya yakusolola uwayilo wa tuzambi mahuza, ha kuzachisa maliji ngwe, “kwonga,” “mahuza” ni “yuma yamokomoko.” (Jeremia 10:3-5; 16:19, 20) Yehova a kalwezele vungu lia A-Izalele ngwenyi: ‘Kanda nukapwa ni tuzambi tweka kumeso jami.’ (Kutuhuka 20:3, 23; 23:24) Alioze, muze o te akuchilinga, “Utenu wa Yehova” wapwile ni kwakasumukina.—Kwalula 25:3; Ulevi 20:2; Akwa Kuyula 2:13, 14.

 Chipwe musono, Zambi nihindu uchili ni nyonga liacho hakutwala kuli “waze anavuluka ngwo, tuzambi.” (1 A-Korindu 8:5, 6; A-Ngalashia 4:8) Iye kanatoweza atu waze anazange kumuwayila ngwenyi, katamba kulihandununa ni uwayilo wa mahuza ha kwamba ngwenyi: “Tuhukenu mukachi ko, lihandununenu no.” (2 A-Korindu 6:14-17) Nyi ngwe mayingeleja eswe kali amuwika, chikwo nawa, eswe kakutwala atu kuli Zambi, mba mumu liaka Zambi ahanyine shimbi yacho?

Mulali 2: Kuwayila Zambi wamwenemwene mu jila yize iye keshi kuzanga

 Ha mashimbu amwe, A-Izalele kapwile ni kuzachisa uwayilo wa mahuza muze te akuwayila Zambi, alioze Yehova kapwile ni kulituna uwayilo wacho wa mahuza. (Kutuhuka 32:8; Shimbi Yamuchiali 12:2-4) Yesu katowezele mangana a mayingeleja a mashimbu jenyi, mumu lia chize o apwile ni kuwayila Zambi; kapwile ni kusoloka ngwe kakuwayila Zambi, alioze o te kakulelesa “yuma yilemu yahiana ya shimbi, upatwilo wa ululi, ni keke, ni ufulielo.”—Mateu 23:23.

 Chipwe musono, uwayilo wamwenemwene uze unakatuka mu Mbimbiliya, we wika wakutwala atu kuli Zambi. Au we umwenemwene uze twakuwana mu Mbimbiliya. (Yoano 4:24; 17:17; 2 Timoteu 3:16, 17) Kwamba pundu, mayingeleja waze akulongesa yuma ya mahuza, kakuhandununa atu kuli Zambi. Malongeso anji waze atu akunyonga ngwe kanakatuka mu Mbimbiliya, ngwe, longeso lia tuzambi atatu, muthu kafu alma kuyishi kufwa ni longeso lia infernu ya kahia, kaalumbile kuli atu waze te akuwayila tuzambi twa mahuza. Uwayilo wa mutapu au uli wamokomoko, mumu wakulingisa atu hanga akaule malongeso ja atu, chakuhona kukaula malongeso a Zambi.—Marku 7:7, 8.

 Zambi keshi kuzanga uwayilo wa yilembekese. (Titu 1:16) Uwayilo wamwenemwene wakukwasa atu kukundama kuli Zambi. Uwayilo wacho hi chuma ko chize mutu malinga mumu ngwo katamba kuchilinga. Alioze wakukwata ha yiyulo ya mutu ni yuma yeswe yize akulinga. Chakutalilaho, Mbimbiliya yakwamba ngwo: “Nyi kachi umwe malishinginyeka kupwa mukwa shindakenyo, shimbu keshi kuhombola limi lienyi, awo kakwonga mbunge yenyi mwene, shindakenyo ya yono mutu yamokomoko. Shindakenyo yipema kuyishi luchisa kumeso ja Zambi mwe Tata, uno: Kunangisa ana-ashiwa ni twamishi a mapwo mu luyinda wo, ni kulifunga mwene keshi chipeka ku yuma ya hano hashi.” (Tiangu 1:26, 27) Mbimbiliya yakuzachisa liji “shindakenyo” hanga yisolole ngwo, uwayilo wamwenemwene kuushi ulembekese.