Ewa, Ndiapu kali umwenemwene. Iye mwe “mwata wa hano hashi,” chitangiwa cha ku spiritu chize chehukile Zambi ni kulimika Nenyi. (Yoano 14:30; A-Efwesu 6:11, 12) Mbimbiliya yakusolola utu wa Ndiapu ha kuzachisa yisanyiko yino:

•   Satana, chisanyiko chino chinalumbunuka “Mukwa-kulimika.”—Yombi 1:6.

•   Ndiapu, chisanyiko chino chinalumbunuka “Mukwa-saki.”—Usolwelo 12:9

•   Kapela, Mbimbiliya yakuzachisa chisanyiko chino hanga yisolole ngwo kali “Mukwa-kwonga.”—2 A-Korindu 11:3.

•   Mukwa-kweseka.—Mateu 4:3.

•   Mukwa-mahuza.—Yoano 8:44.

Iye hi nyonga lia upi ko hanji yitanga yipi

 Atu amwe kakunyonga ngwo, Satana Ndiapu kali wika manyonga api mu mbunge ya mutu. Alioze, Mbimbiliya yakusolola umwe lusango haze Zambi anahanjika ni Satana. Zambi kali mungunu, kashika kechi kuhasa kupwa nawa ni manyonga api. (Shimbi Yamuchiali 32:4; Yombi 2:1-6) Chikwo nawa, Satana kesekele Yesu yoze keshi shili. (Mateu 4:8-10; 1 Yoano 3:5) Kashika, Mbimbiliya yakusolola ngwo, Satana kali mutu wamwenemwene, hi manyonga api mu mbunge ya mutu ko.

 Shina twatamba kukomoka muze atu akunyonga ngwo, Ndiapu katwamineko? Ka, mumu Mbimbiliya yakwamba ngwo, Ndiapu kakuzachisa majila anji hanga apiangule atu. (2 A-Tesalonika 2:9, 10) Amwe a ku mahuza jenyi kali kwonga atu hanga anyonge ngwo, iye katwamineko.—2 A-Korindu 4:4.

  Mahuza: Lúcifer lili jina likwo lia Ndiapu.

 Umwenemwene: Liji lia Hepreu lize Mbimbiliya jimwe akulumbununa ngwo, (Lúcifer) linalumbunuka “mutumbu wa chichamene.” (Izaia 14:12) Maliji a helu ni a mushi kanasolola ngwo liji liacho linatale ha minyachi ya mianangana a Babilonia, waze te monwona kuli Zambi mumu kapwile akwa-kulizata. (Izaia 14:4, 13-20) Chisanyiko chakwamba ngwo, “mutumbu wa chichamene” kachizachishile hanga ahepwise nacho mianangana a Babilonia muze te maanongesa.

  Mahuza: Satana kakukalakalila Zambi

 Umwenemwene: Ndiapu kali mukwa-kole wa Zambi, hi kavumbi kenyi ko. Satana kakulimika nawa ni atu eswe waze akuwayila Zambi.—1 Petulu 5:8; Usolwelo 12:10.