Ewa. Mutuhasa kuwana ushindakenyo mu Mbimbiliya ngwo Zambi kwatwama. Mbimbiliya yakutukolweza hanga tukolese ufulielo wetu muli Zambi. Kashika, kutwatambile kutayiza chamutayijila yuma yize mayingeleja akulongesa. Twatamba kuzachisa “kunyonga cha mana.” (A-Roma 12:1; 1 Yoano 5:20) Tala yize Mbimbiliya yakulongesa hakutwala ku chikuma chino:

•   Kumona chize yuma yapwa yakululieka mu malilu ni hashi, chakusolola ngwo kwatwama umwe Sakatanga. Mbimbiliya yinambe ngwo: “Mumu zuwo lieswe lili ni yoze walitungile; alioze yoze watungile yuma yeswe iye Zambi.” (A-Hepreu 3:4) Chipwe ngwe nyonga liacho mulisoloka ngwe liashi, nihindu atu waze alongoloka chinji kakutayiza ngwo nyonga liacho liamwenemwene. a

•   Amu tuli atu, tukwete nyonga lia kuzanga kunyingika ulumbunwiso wa mwono. Chipwe muze mutupwa ni yuma yeswe ku mwono, nihindu nyonga liacho liatwamako. Yuma yacho ye Mbimbiliya yakwamba ngwo ‘uswale mu spiritu.’ Chino chinatale nawa ha nyonga lietu lia kuzanga kunyingika Zambi. (Mateu 5:3; Usolwelo 4:11) Kupwa ni uswale wacho mu spiritu, kuchishi kusolola wika ngwo Zambi kwatwama, alioze chakusolola nawa ngwo Sakatanga kapwa mukwa zango yoze wakuzanga hanga tukuchise zala yetu ya ku spiritu.—Mateu 4:4.

•   Uprofeto wa mu Mbimbiliya kaliangile kuusoneka mu yimako-yimako ha miaka yinji kunyima, chikwo nawa wamanunukine mu yimako-yimako. Chino chinasolola ngwo, uprofeto wacho wakatukile kuli mutu umwe yoze ukwete ndundo jinji.—2 Petulu 1:21.

•   Atu waze asonekene Mbimbiliya kapwile ni chinyingi hakutwala ku ciência, chinyingi chize atu ha mashimbu jacho te kanyingikine. Chakutalilaho, ku mashimbu a kunyima atu anji te kakutayiza ngwo, hashi hatwama helu lia umwe kashitu ngwe, njamba, chombo hanji ngombe. Alioze Mbimbiliya yakwamba ngwo, Zambi “Kakuzezeleka hashi mu tetela.” (Yombi 26:7) Chikwo nawa, Mbimbiliya yakulumbununa ngwo hashi hapwa ha “kujinguluka.” (Izaia 40:22) Atu anji kakutayiza ngwo, ndo kupwe umwe Zambi yoze wahanyine mana kuli akwa-kusoneka Mbimbiliya mba ahase kusoneka manyonga ni ulumbunwiso walita.

•   Mbimbiliya ye wika yakukumbulula yihula yize yapwa yikalu. Nyi mutu kawanyine makumbululo alita hakutwala ku yihula yacho, mahasa kunyonga ngwe Zambi katwamineko. Chakutalilaho, Nyi chamwenemwene lume Zambi kakwete zango, mumu liaka hano hashi hali lamba lipwahaha? Mumu liaka mayingeleja keshi kukwasa atu kulinga yuma yipema, alioze yuma yipi?—Titu 1:16.