Mu Mbimbiliya liji lize akulumbununa ngwo “uhindukilo” linakatuka mu limi lia Ngregu anástasis, lize linalumbunuka “kukatuka” hanji “kumana cheka.” Mutu yoze akuhindwisa, kakumukatwisa mukachi ka afu ni kupwa nawa ngwe chize te apwa.—1 A-Korindu 15:12, 13.

 Chipwe ngwe liji “uhindukilo” kulishi kusoloka mu Yisoneko ya A-Hepreu hanji ngwetu Usendo Ukulu, alioze malongeso hakutwala ku chikuma chacho katwamamo. Chakutalilaho, kupalikila muli profeta Hozeia, Zambi yalakenya ngwenyi: ‘Munguakuula ku tachi ja kuma kwa afu. Munguakuula ku kufwa.’—Hozeia 13:14; Yombi 14:13-15; Izaia 26:19; Daniele 12:2, 13.

 Kuliko atu makahindwishila? Atu amwe makaahindwisa hanga akatwame mu malilu ni kuyula hamwe ni Kristu. (2 A-Korindu 5:1; Usolwelo 5:9, 10) Mbimbiliya yakwamba ngwo, uno uli “uhindukilo utangu,” chekwamba ngwo, mukukapwa uhindukilo ukwo. (Usolwelo 20:6) Ha uhindukilo wamuchiali, atu anji makahinduka, atu jacho makatwama hano hashi.—Samu 37:29.

 Kuchi atu akwahindwisa? Zambi kahanyine kuli Yesu ndundo ja kuhindwisa najo afu. (Yoano 11:25) Yesu makahindwisa “waze eswe ali mu mafuka.” Hita umwe wa kuli ayo makamuhindwisa chizechene ngwe te apwa shimbu kanda achifwa. (Yoano 5:28, 29) Atu waze makahindwisa hanga akatwame mu malilu, kakwaha mujimba wa spiritu, alioze waze makatwama hashi, makahindwisa ni mujimba waha wa musunya uze kuushi kuyiza.—Izaia 33:24; 35:5, 6; 1 A-Korindu 15:42-44, 50.

 Iya yoze makapwa kuhindwisa? Mbimbiliya yakwamba ngwo: “Kumukukapwa uhindukilo wa akwa ululi ni wa yihenge.” (Yilinga 24:15) “Akwa-ululi” kali atu ashishika ngwe Noa, Sara ni Apalahama. (Uputukilo 6:9; A-Hepreu 11:11; Tiangu 2:21) “Yihenge” kali atu waze kakononokena ku shimbi ja Zambi, mumu kakapwile ni uhashi wa kumunyingika ni kumulingila.

 Alioze, atu waze akwete yitanga yipi mba keshi kuzanga kuyecha, kechi kapwa kuhindwisa. Muze mutu wa mutapu au akufwa, kwahwa keshi kupwa nawa ni kutalatala cha uhindukilo.—Mateu 23:33; A-Hepreu 10:26, 27.

 Shimbu lika uhindukilo muukalingiwa? Mbimbiliya yaliangile kwamba ngwo, uhindukilo wa waze makaya mu malilu te muuputuka ha kwiza cha Yesu. Kwiza chacho chaputukile ha mwaka 1914. (1 A-Korindu 15:21-23) Uhindukilo wa waze makatwama hano hashi muukalingiwa ha kanunu ka miaka wa kuyula cha Yesu Kristu, muze hashi muhakapwa paraisu.—Luka 23:43; Usolwelo 20:6, 12, 13.

 Mumu liaka twatamba kufuliela ha uhindukilo? Mu Mbimbiliya muli sango livwa hakutwala ku uhindukilo. Hita umwe wa ku uhindukilo wacho, kwapwile yela waze amwene yuma yacho. (1 Mianangana 17:17-24; 2 Mianangana 4:32-37; 13:20, 21; Luka 7:11-17; 8:40-56; Yoano 11:38-44; Yilinga 9:36-42; 20:7-12; 1 A-Korindu 15:3-6) Uhindukilo wa Lazaru wapwile walipwila mumu muze afwile kwapalikile matangwa awana, chocho Yesu yalinga chikomokeso ha kumuhindwisa hakachi ka mbunga. (Yoano 11:39, 42) Chipwe e akwa-kole ja Yesu te kechi kuhasa kuhamika ha uhindukilo wa Lazaru, mumu katwamine punga hanga ashihe Yesu ni Lazaru.—Yoano 11:47, 53; 12:9-11.

 Mbimbiliya yinasolola ngwo, Zambi kali ni ndundo ni zango lia kuhindwisa waze hanafu. Mumu lia manyonga jenyi keshi musulo, iye kananyingika kanawa utu wa hita mutu yoze makahindwisa kupalikila mu ndundo jenyi. (Yombi 37:23; Mateu 10:30; Luka 20:37, 38) Zambi mahasa kuhana nawa mwono kuli waze hanafu, chikwo nawa iye kanazange kuchilinga! Mbimbiliya yakwamba hakutwala ku uhindukilo uze muukalingiwa kulutwe lia matangawa ngwo, Zambi makevwa ‘usona ha chitanga cha moko jenyi.’—Yombi 14:15.

Mahuza hakutwala ku uhindukilo

 Mahuza: Uhindukilo uli kuchinga cheka nawa alma ku mujimba.

 Umwenemwene: Mbimbiliya yakulongesa ngwo, alma we mujimba wa mutu mwene, hi chuma ko chize chakununga ni mwono muze mutu akufwa. (Uputukilo 2:7; Ezekiele 18:4) Kashika, uhindukilo hi kuchingako cha mujimba ni alma, ka, alioze chili kutanga cheka mutu yoze wafwile.

 Mahuza: Atu amwe makaahindwisa ni kwanongesa nawa ha shimbu lizeliene.

 Umwenemwene: Mbimbiliya yakwamba ngwo, “waze hanalingi yipi” makapwa ni “uhindukilo wa upatwilo.” (Yoano 5:29) Kashika, upatwilo wacho muukapwa kulita ni yuma yize ayo makalinga hanyima lia kwahindwisa, hi mumu lia yuma yize ko alingile kunyima. Yesu kambile ngwenyi: “Afu makevwa liji lia mwe Mwana Zambi; mba waze mevwa kumakapwa ni mwono.” (Yoano 5:25) Atu waze “makevwa” hanji ngwetu waze makononokena yuma yize makalilongesa hanyima lia uhindukilo, majina jo makapwa akusoneka ku ‘mukanda wa mwono.’—Usolwelo 20:12, 13.

 Mahuza: Mutu yoze makahindwisa, makapwa ni mujimba uzewene apwile nawo shimbu te kanda afwa.

 Umwenemwene: Muze mutu akufwa, mujimba wenyi wakupola ni kwalumuka fufuta.—Chilumbununyi 3:19, 20.