Muze mutu akumupapachisa, kakumuchupika mweswe mu meya mba mamututwisamo. a Kashika Yesu amupapachishilile mu lwiji muze mwapwile meya anji. (Mateu 3:13, 16) Mbimbiliya yakuhanjika nawa hali umwe Ka-Etiopia yoze hanyima lia upapachiso ‘yatuhuka mu meya.’—Yilinga 8:36-40.

Upapachiso yika unalumbunuka?

 Mbimbiliya yakutesa upapachiso ni kufunda mutu. (A-Roma 6:4; A-Kolosu 2:12) Kushimbama mu meya chinalumbunuka kufwa kulita ni mwono ukulu uze apwile nawo. Kututuka mu meya chili ngwe kaputuka mwono waha uze unalumbunuka kulinga upale wa Zambi. Upapachiso wakusolola ngwo, mutu kakufuliela ha chitapo cha ukuule wa Yesu. Chikwo nawa, mutu wacho kakusolola ngwo kalinga yimwe hanga apwe ni mbunge yitoma ku meso ja Zambi. (1 Petulu 3:21) Kashika Yesu ambile ngweyi, tumbaji twenyi ta kaatamba kwapapachisa.—Mateu 28:19, 20.

Shina upapachiso wakuchiza shili ya mutu?

 Ka. Mbimbiliya yakulongesa ngwo, shili yetu mahasa kuyijimuna wika ni manyinga a Yesu. (A-Roma 5:8, 9; 1 Yoano 1:7) Alioze mutu katamba kufuliela muli Yesu, kukaula shimbi jenyi ni kumupapachisa mba ayuke ha chitapo cha ukuule.—Yilinga 2:38; 3:19.

What is christening?

 The terms “christen” and “christening” do not appear in the Bible. They refer to a ceremony performed by some churches in which an infant is “baptized” (by having water sprinkled or poured on his head) and named.

Shina Mbimbiliya yakutayiza upapachiso wa ana-kemba?

 Ka. Mumu chikuma chino chipwe mwe mu Mbimbiliya kuchishi kusolokamo. Mayingeleja amwe kakusolola yimwe mianda ha kumwangina ndambu ya meya ha mbanda-mutwe wa mwana-kemba ngwe chilayi chize muchisolola ngwo kamupapachisa mba mamuluka jina. Alioze, katamba kupapachisa wika mutu yoze hakola ni kupanjika “sango lipema lia kutwala ku Wanangana wa Zambi.” (Yilinga 8:12) Chino chinalumbunuka kulilongesa Mbimbiliya, kukaula yize mutu analilongesa ni kulikonyeka ku shili yenyi. Mwana-kemba kechi kuhasa kulinga yuma yino.—Yilinga 2:22, 38, 41.

 Chikwo nawa, Mbimbiliya yakwamba ngwo, ana ja akwa-Kristu kapwa asandu, mumu lia ufulielo wa yisemi jo, hi mumu lia upapachiso ko. (1 A-Korindu 7:14) Nyi te Mbimbiliya yakutayisa upapachiso wa twanuke, kachi kuyishi kwamba nawa ngwo, o kali asandu mumu lia ufulielo wa yisemi jo. b

Mahuza hakutwala ku upapachiso

 Mahuza: Kumwangina ndambu ya meya ha mutwe wa mutu chinalumbunuka upapachiso.

 Umwenemwene: Upapachiso weswe uze atongola mu Mbimbiliya, wakusolola ngwo atu waze apapachishile kaachupikile eswe mu meya. Chakutalilaho, muze kambaji Fwilipu apapachishile umwe lunga Ka-Etiope, “yapalumuka nikunjila mu meya” mba hanyima ‘yatuhuka mu meya.’—Yilinga 8:36-39. c

 Mahuza: Mbimbiliya yakusolola ngwo, muze asoko amwe apwile ni kwapapachisa, ana-kemba no kapwile ni kwapapachisa. Chakutalilaho, Mbimbiliya yakuhanjika hali umwe kalayi wa zuwo lia ususu ngwo: “Yamupapachisa, iye ni akwa jiko lienyi eswe.”—Yilinga 16:31-34.

 Umwenemwene: Lusango yono kanasolola ngwo, atu waze apapachishile kapanjikile “liji lia Mwene” ni kulikonyeka, chocho “yalikwiza.” (Yilinga 16:32, 34) Kashika twamona ngwetu, mu usoko wa kalayi wa zuwo lia ususu kapapachishilemo mwana-kemba niumwe, mumu keshi ni uhashi wakunyingika liji lia Yehova.

 Mahuza: Yesu katayijile upapachiso wa ana-kemba muze ambile ngwenyi, Wanangana wa malilu niwo.—Mateu 19:13-15; Marku 10:13-16.

 Umwenemwene: Muze Yesu ambile maliji wano, iye te keshi ni kuhanjika ha upapachiso. Alioze, te kanalumbununa ngwo, mutu katamba kulikehesa ngwe kanuke mba apwe ni yiwape ya Wanangana wa Zambi.—Mateu 18:4; Luka 18:16, 17.