Shina Zambi Katwama ku Yihela Yeswe ha Shimbu Limuwika?
Kumbululo lia mu Mbimbiliya
Zambi kakumona yuma yeswe, mahasa kulinga chuma cheswacho mazanga nawa ku chihela cheswacho. (Yishima 15:3; A-Hepreu 4:13) Alioze, Mbimbiliya kuyishi kulongesa ngwo, Zambi kali mu yuma yeswe ni ku yihela yeswe ha shimbu limuwika. Mbimbiliya yakulongesa ngwo Zambi kali mutu, yoze watwama ku chihela chimuwika.
Chize Zambi apwa: Zambi kali spiritu. (Yoano 1:18) Atu keshi kuhasa kumumona. (Yoano 4:24) Usolwelo wa kuli Zambi uze uli mu Mbimbiliya wakusolola ngwo, iye katwama ku chihela chimuwika, kuushi kusolola ngwo katwama ku yihela yeswe ha shimbu limuwika.—Izaia 6:1, 2; Usolwelo 4:2, 3, 8.
Chihela chize Zambi atwama: Zambi katwama muma mwa spiritu muze atu keshi kumona, muma mwacho mwalisa ni hano hashi. Zambi katwama “mwilu.” (1 Mianangana 8:30) Mbimbiliya yakwamba ngwo, tangwa limwe angelo “yeza, yasoloka kumeso ja Yehova.” a Chino chinasolola ngwo, Zambi kali ni chihela chize atwama.—Yombi 1:6.
Nyi Zambi katwamine ku yihela yeswe ha shimbu limuwika, shina mahasa kungufunga?
Ewa. Zambi kakulihulumba hali yetu eswe. Chipwe ngwe Zambi katwama muma mwa spiritu, nihindu kakupanjika ni kukwasa atu eswe waze akusa tachi hanga amuvwise kuwaha. (1 Mianangana 8:39; 2 Sango ja Mianangana 16:9) Tala chize Yehova akusolola ngwenyi, kakulihulumba hali tuvumbi twenyi ashishika:
Muze wakulemba: Yehova mahasa kwivwa kulemba che ha shimbu lizeliene unalembe.—2 Sango ja Mianangana 18:31.
Muze unanenganyana: “Yehova katwama hehi ni waze amakuka mbunge, kakulamwina waze ali ni spiritu ya kupihilila.”—Samu 34:18.
Muze unafupiwa usongwelo: Yehova ‘makufumba, ni kukulongesa’ kupalikila mu Liji lienyi, Mbimbiliya.—Samu 32:8.
Mahuza hakutwala ku chihela chize Zambi atwama
Mahuza: Zambi katwama ku yuma yeswe yize atangile.
Umwenemwene: Zambi katwamine hano hashi chipwe ku chihela chikwo chize atu akumona. (1 Mianangana 8:27) Tunanyingika ngwetu, tutongonoshi ni yitangiwa yikwo ‘yakwambujola ulemu wa Zambi.’ (Samu 19:1) Alioze, Yehova katwamine mu yuma yize atangile chizechene ngwe mukwa-kufunjeka katwamine mu yuma yize akufunjeka. Chipwe chocho, chuma chize akulinga kuli mukwa-kufunjeka muchihasa kutulongesa yuma yinji hali iye. Chizechene nawa, yitangiwa ya Yehova yakusolola ‘tachi jenyi ja mutolo jize kujishi kumoneka’ ngwe, ndundo, mana ni zango.—A-Roma 1:20.
Mahuza: Zambi katamba kutwama ku yihela yeswe ha shimbu limuwika mba apwe ni ndundo jinji hanji kunyingika yuma yeswe.
Umwenemwene: Spiritu yisandu yili tachi ja Zambi jize akuzachisa hanga alinge cheswacho chuma. Spiritu yacho ye Zambi akuzachisa hanga amone yuma yeswe ni kulinga chuma cheswacho mazanga, ha shimbu ni ku chihela cheswacho chakuhona mwene kupwako.—Samu 139:7.
Mahuza: Mukanda wa Samu 139:8, wakulongesa ngwo, Zambi katwama ku yihela yeswe ha shimbu limuwika mumu unambe ngwo: “Nyi munguzezuka mwilu, yena mwoli. Nyi mungwalila muhela wami muma mwa afu, hindu mwoli.”
Umwenemwene: Versu yino kuyalongesele ngwo, Zambi katwama ku yihela yeswe ha shimbu limuwika. Versu yino yinasolola ngwo, Yehova mahasa kutukwasa chipwe ngwe tuli ku chihela cheswacho.
a Mbimbiliya yakusolola ngwo, jina lia Zambi Yehova.
Kota Muzanga Chinji Yuma Yize Mumona
MALONGESO ALEMU A MU MBIMBILIYA
Shina Zambi Katwamako?
Hengwola yuma yize yakusolola ngwo chinalite kufuliela muli Zambi.
KUMBULULO LIA YIHULA YA MU MBIMBILIYA
Spiritu Yisandu Yika Yinalumbunuka?
Kuli chikuma chilemu cha mumu liaka Mbimbiliya yakuvuluka spiritu yisandu ngwe “kwoko” lia Zambi.”
SANGO JA YETU
Eta Umwe Eze ni Kukumeneka
Kushimutwina chimwe chihula cha mu Mbimbiliya, kunyingika yuma yinji hakutwala kuli Yela ja Yehova.