Ha site jw.org hasolokanga sango jize jinakasolola mbomba jize jalozokanga ha kukunguluka cha mambonge chize te chinalingiwa mu Kerala, Índia ha Liayenda 29 ya Outubro, 2023. Chaluyinda, mandumbu aali a mapwo yafwila hazehene, ni umwe kanuke wa pwo wa miaka 12 neye yafwa mumu kalemananga chinji. Kwalemananga mandumbu akwo a mapwo ni a malunga 55, amwe hakachi ko kali ni yilonda yinene-yinene.

Ha shimbu lino, mu shipitali muli mandumbu atatu a mapwo ni aali a malunga waze anatalila ha mbunge. Mapulisha yamba ngwo mbomba jitatu jalozokanga ha ola 9:40 muze te analembe. Chingalwe walinganga upi wacho kamukwata kali mu usopeso hanga asolole yize yamutwalanga kulinga upi wacho.

Tunasakwilila chizavu cha akwa-kuhana ukwaso chize chahetanga ha shimbu ku chihela chacho hanga ahane ukwaso ni chizavu cha akwa-shipitali chize chinakwase mandumbu jetu waze alemananga.

Atu waze anakapwako kanakasakwilila chinji ni kutakama mumu lia zango ni ukwaso uze mandumbu anakaasolwela. Ndumbu wa pwo yoze te unatwama kulutwe muze mbomba jalozokele yamba ngwenyi: “Ha shimbu lizeliene, yingulemba kuli Yehova. Mandumbu jetu waze te anakalakala ha chihela chacho hamwe ni mandumbu akwo yalinga yuma yeswe kawashi-washi hanga eswe tupwe mu ufunge. Chapwa chilweza cha zango lia Yehova ni kulihulumba chenyi hali hita umwe wa kuli yetu.”

Mandumbu waze amanyinako mutango wa Índia, tulayi a mbonge, ni makulwana a mu yikungulwila kananungu ni kukwasa ku ufulielo ni ku musunya mandumbu waze apalika mu ponde. Umwe mukulwana wa mu chipatulo cha ku mutango yoze unakaya ku Kerala ni kutakamisa mandumbu waze apalika mu ponde, yamba ngwenyi: “Chipwe ngwe mandumbu kapalika mu ponde, kanamono lamba mumu lia yuma yize apalika, nihindu natakama ha kumona manyonga alita waze mandumbu jacho anasolola. Nahanjika ni anji a kuli ayo. Kumona chize ayo anajikijila muli Yehova chatakamisa ufulielo wami.”

Mandumbu jetu hashi heswe, tunalembela asoko ja mandumbu jetu afwa ni waze eswe apalika mu ponde yino mu Índia. Twakuwana utakamiso ni sambukila ha chilakenyo cha mu Mbimbiliya cha matangwa apema waze mutukapwa no kulutwe mu chifuchi muze kumuchikapwa upupilo, lamba ni kufwa. Tunanungu ni kujikijila kuli Yehova.—Samu 56:3.